Jehova Hnênah Thinlung Zawng Zawnga Inthawina Hlân Rawh
Jehova Hnênah Thinlung Zawng Zawnga Inthawina Hlân Rawh
“In tih apiang chu . . . Lalpa [“Jehova,” New World Translation] tân anga ti zâwkin, châk takin ti rawh u.” —KOL. 3:23, 24.
KAN CHHANG THEI EMAW CHU:
Engtin nge kan nî tin thiltihnaah Jehova kan chawimawi theih?
Pathian kan biaknaah eng ang inthawina nge kan hlan?
Engtin nge Jehova hnênah kan thil neihte kan pêk theih?
1-3. (a) Nghaisakna bana Isua a thih avângin, Jehova’n inthawina min phût tawh lo tihna a ni em? Hrilhfiah rawh. (b) Tûn laia inthawina chungchângah eng zawhnate nge lo chhuak?
JEHOVA chuan C.E. kum zabi khatnaah Isua tlanna inthawinain Mosia Dân a tihbân thu a mite a hriattîr a. (Kol. 2:13, 14) Juda hovin kum za tam tak chhûng inthawina an lo hlan ṭhin chu a ṭûl tawh lo mai ni lovin, hlutna pawh a nei tawh lo. Chu Dân chuan “Krista lama min kaihruaitu” a nih angin a thawh tûr chu a hlen famkim tawh a ni.—Gal. 3:24.
2 Chu chu Kristiante’n inthawina chungchâng an ngaihven tawh lo tihna a ni lo. Chutih ahnêkin, tirhkoh Petera chuan, ‘Isua Krista zâra Pathian lâwmzâwng thlarau lam inthawina hlan’ a pawimawhzia a sawi zâwk a. (1 Pet. 2:5) Chu bâkah, tirhkoh Paula chuan Kristian inpumpêk tawh nun kawng tinrêng mai hi “inthawina” anga ngaih vek a âwm tih a sawi chiang a ni.—Rom 12:1.
3 Chuvângin, Kristiante chu Jehova hnêna thilpêkna emaw, thil chânna emaw hmangin A hnênah an inhlân a ni. Israelte tâna thil phûtte kan hriatna aṭangin, tûn laia kan inthawina zawng zawng hi Jehova’n a pawm vek tih engtin nge kan chian theih?
KAN NI TIN NUNAH
4. Nî tina kan thiltihte chungchângah eng nge kan hriat reng ang?
4 Kan nî tin nunah hian, kan thiltihte leh Jehova hnêna inhlanna inkûngkaih dân hriat chu a harsa mai thei a. In chhûng hna te, school hna te, pawn lam hna te, bazâr te, leh thil dang dangte chuan thlarau lam thil ngaihtuahna nên inzawmna nei lo angin a lang mai thei. Mahse, Jehova hnêna inpumpêk tawh emaw, nakin lawka la inpumpêk tûr emaw i nih chuan chûng thiltih pângngai takte chuan Pathian nêna in inlaichînna a nghawng thei tih hriat reng a pawimawh a ni. Engtik lai pawhin Kristian kan ni si a. Kan nun kawng tinrêngah Bible thu bulte kan nunpui a ngai a ni. Chuvângin Paula chuan heti hian min fuih a ni: “In tih apiang chu mihring tân anga ti lovin, Lalpa [Jehova] tân anga ti zâwkin, châk takin ti rawh u,” tiin.—Kolossa 3:18-24 chhiar rawh.
5, 6. Eng ngaihtuahnain nge nî tina kan silhfên leh nungchang chu thunun ang?
5 Kristiante nî tina thiltihte chu rawngbâwlna thianghlim zîngah zawng a tel lo ngei mai. Mahse, ‘Jehova tân anga châk tak,’ a nih loh leh thinlung zawng zawnga ti tûra min fuihna hian kan nun kawng tinrêng min ngaihtuahtîr a ni. Heta ṭang hian eng nge kan zir theih? Engtik lai pawha inchei ṭhain, nungchang mawi kan lantîr em? A nih loh leh, nî tina thiltih pângngaite kan tih laiin, kan nungchang emaw, kan silhfên emaw avângin Jehova Thuretute zînga mi kan ni tih lantîr kan zak deuh vem? Chutiang chu thleng lul suh se! Jehova mite chuan a hming tichhe thei thil engpawh chu an ti duh hauh lo vang.—Is. 43:10; 2 Kor. 6:3, 4, 9.
6 Jehova tân anga thinlung zawng zawnga thawh duhnain nun kawng tam tak a nghawng dân i lo en ang u. Chutianga kan en lai chuan, Israelte’n Jehova hnêna inthawina an hlan tûr chu an neih ṭhat ber a ni tûr a ni tih hre reng ang che.—Ex. 23:19.
I NUN A NGHAWNG DAN
7. Kristian inpumpêknaah eng nge tel?
7 Jehova hnêna i inpumpêk lai khân, tiam chin awm lovin i inpumpêk pumhlûm a ni lâwm ni? A nihna takah chuan, i nun kawng tinrêngah Jehova i dah hmasa ang i tihna a ni. (Hebrai 10:7 chhiar rawh.) Chu chu thu tlûkna ṭha tak a ni a. Thil engemaw chungchânga Jehova duhzâwng i zawn a, chu mi mila thil i tih tlatna chuan rah ṭha tak a chhuah tih i hmu tawh ngei ang. (Is. 48:17, 18) Pathian mite chuan anmahni zirtîrtu miziate an lantîr avângin anni chu an thianghlim a, an hlim thei a ni.—Lev. 11:44; Sâm 104:31.
8. Jehova’n hmân laia inthawinate thil thianghlim angin a thlîr tih hriat chu engvângin nge kan tân a pawimawh?
8 Jehova hnêna Israel mite inthawina hlan chu thil thianghlim anga ngaih a ni a. (Lev. 6:25; 7:1) “Thianghlimna” tiha lehlin he Hebrai thu mal hian Pathian tâna indah hranna, inpêk bîkna, a nih loh leh intihfaina a kâwk a ni. Kan inthawina Jehova pawm tlâk ni tûr chuan khawvêl thilte thunun loh leh chûngte tihbawlhhlawh loh a ni tûr a ni a. Jehova huat zâwng thil engmah hi kan hmangaih thei lo a ni. (1 Johana 2:15-17 chhiar rawh.) Chu chu, Pathian ngaiha min tibawlhhlawh thei thil engpawh kan pumpelh tûr tihna a ni tih a chiang hle. (Is. 2:4; Thup. 18:4) Thil thianghlim lo emaw, nungchang bawlhhlawhna lam thil emaw kan enin, kan ngaihtuah tûr a ni lo tihna a ni bawk.—Kol. 3:5, 6.
9. Mi dangte chunga Kristian rilru put hmang chu eng anga pawimawh nge a nih a, engvângin nge?
9 Paula chuan a Kristian unaute chu heti hian a fuih a ni: “Thil tihṭhat leh thilphal hi theihnghilh suh u; chutiang inthawina chungah chuan Pathian a lungni êm êm si a,” tiin. (Heb. 13:16) Chuvângin, mi ṭha nih leh mi dangte tâna thil ṭha tih chu Jehova’n a hnêna hlan inthawina pawm tlâk angin a thlîr a ni. Mi dangte ngaihsakna duhawm tak chu Kristian dikte chhinchhiahna langsâr tak a ni.—Joh. 13:34, 35; Kol. 1:10-12.
PATHIAN BIAKNA KAWNGA INTHAWINATE
10, 11. Engtin nge Jehova chuan kan Kristian rawngbâwlna leh biakna chu a thlîr a, chu chuan eng angin nge kan chungah nghawng a neih ang?
10 Kristian kan nih anga mi dangte tâna kan thil ṭha tih langsâr ber pakhat chu “beiseina kan puan chhuah hi” a ni. Hun remchâng apiang chu thu hrilh nân i hmang em? Paula chuan he Kristian rawngbâwlna pawimawh tak hi “faka inthawina . . . chu chu a hming ṭanna hmuite rah chu a ni,” tiin a sawi a ni. (Heb. 10:23, Baptist Mid-Missions’ Translation; Heb. 13:15; Hos. 14:2) Thu hrilh nâna kan hun hman zât leh thu hrilh dân kawnga hma kan sâwn theih dân tûr ngaihtuah chu kan ṭangkaipui thei a. Rawngbâwlna Inkhâwm tam tak chu he mi kawnga min ṭanpui tûra ruahman a ni. Mahse, kan hriat tûr chu kan thlawhhma rawngbâwlna leh tawn chawpa thu hrilhte hi “faka inthawina,” kan biakna pêng pakhat a ni a; chuvângin, chutiang inthawinaah chuan kan theih tâwpa ṭha kan hlân tûr a ni, tih hi a ni. Kan dinhmun chu inang lo hlawm hle mah se, chanchin ṭha puan chhuah nâna kan hun hman zât chuan thlarau lam thil kan hlutzia a târ lang ṭhîn.
11 Kristiante chuan mi mal emaw, a huho emawa Pathian biak nân hun an hmang ziah a. Chutianga ti tûr chuan Jehova’n min phût rêng a ni. Sabbath chawlh kan hman zêl emaw, kût hmang tûra Jerusalem-a kal zêl emaw chu a ngai tawh lo ngei mai. Mahse, chûng hmân laia an lo tih ṭhinte chuan tûn lai Kristian nunah tlukpui a nei a. Pathian chuan thiltih thite kalsan tûr te, a Thu zir tûr te, ṭawngṭai tûr te, leh Kristian inkhâwmnaa tel tûrtein min la beisei reng a ni. Tin, Kristian chhûngkaw lûte chuan hmahruaiin, chhûngkuaa Pathian biakna hun chu an kaihruai bawk. (1 Thes. 5:17; Heb. 10:24, 25) Kan thlarau lam thiltihte chungchângah heti hian kan inzâwt tûr a ni, ‘Pathian ka biak dân hi ka tiṭha lehzual thei ang em?’ tiin.
12. (a) Hmân lai Pathian biaknaa rimtui hâl ṭhin chu tûn laia eng nên nge khaikhin theih a nih? (b) Engtin nge he khaikhinna hian ṭawngṭainaa kan thu chhamte chungah nghawng a neih?
12 Lal Davida chu Jehova hnênah: “Ka ṭawngṭaina hi eng lo rimtui tak angin i hmâah tihchhuahin awm sela,” tiin fakna hla a sa a. (Sâm 141:2) I ṭawngṭaina chungchâng—i ṭawngṭai ngun dân leh ṭhat dân—han ngaihtuah lawk teh. Thu Puan bu chuan “mi thianghlimte ṭawngṭaina” chu rimtui tak nên a tehkhin a, ṭawngṭaina pawm tlâk chu Jehova hnênah thil rimtui leh duhawm tak angin a chho tihna a ni. (Thup. 5:8) Hmân lai Israel ramah khân, Jehova maichâma rimtui hâl ṭhin chu fîmkhur tak leh a inpawlh zât tûr chiah chiaha buatsaih a ni tûr a ni a. Kaihhruaina a pêk ang thlapa tih a nih chauhvin Jehova tân pawm tlâk a ni. (Ex. 30:34-37; Lev. 10:1, 2) Tih tak zeta kan ṭawngṭaina pawh chutiang bawka siam a nih chuan, Jehova tân pawm tlak a ni ang tih kan chiang thei a ni.
LAK LEH PEK
13, 14. (a) Epaphodita leh Philippi kohhran chuan Paula tân eng nge an tih a, chu chu engtin nge Paula’n a ngaih? (b) Engtin nge Epaphodita leh Philippi mite entawn tûr siam chu kan zui theih?
13 Khawvêl pum huap rawngbâwlna ṭanpui nâna kan thawhlâwm thawh hi a tam emaw, a tlêm emaw pawh ni se, inthawina hlan nêna tehkhin theih a ni a. (Mk. 12:41-44) C.E. kum zabi khatnaah khân Philippi kohhrana mite chuan Paula tisa lam mamawh ngaihsak tûrin Epaphrodita chu Rom khuaah an tîr a ni. Ani chuan Paula tân kohhran mite thilpêk pawh a ken tel ngei a rinawm. Hei hi Philippi kohhrana mite’n Paula hnêna thilphalna an lantîrna hmasa ber a ni lo. An ngilneihna avângin Paula chu rawngbâwlnaa a inhman tam lehzual theih nân sum leh pai lama rilru hahdam taka awmtîr chu an tum a ni. Engtin nge Paula’n an thilpêk chu a thlîr? Chu chu “englo rimtui rim, inthawina chhân tlâk, Pathian lâwmzâwng” angin a sawi a ni. (Philippi 4:15-19 chhiar rawh.) Paula chuan Philippi mite ngilneihna thiltih chu a hlut hle a, Jehova pawhin a ngaihlu hle bawk.
14 Chutiang bawkin, tûn laiah pawh Jehova chuan khawvêl pum huap rawngbâwlna atâna kan thawhlâwm thawhte chu a ngaihlu hle. Chu bâkah, kan nuna Lalram kan dah pawimawh ber zêl chuan tisa lam leh thlarau lama kan mamawhte pêk zêl min tiam a ni.—Mt. 6:33; Lk. 6:38.
I LAWMNA LANTIR RAWH
15. Jehova chunga i lâwm chhan thil ṭhenkhat chu engte nge ni?
15 Jehova chunga lâwm chhan tûr kan neihte sawi dâwn ila, hun a duh rei ngei ang. Nî tin mai hian nunna min pêk avângin lawmthu kan hrilh tûr a ni lâwm ni? Ani chuan inenkawl nâna kan mamawh zawng zawng—ei tûr te, silhfên tûr te, chênna tûr te, leh boruak hîp tûrte—min pe a. Chu bâkah, hriatna dika innghat kan rinna chuan beiseina min pe bawk. Chuvângin, a nihna leh kan tâna a thil tih tawhte avâng ringawt pawh hian, Jehova kan biak leh a hnêna faka inthawina kan hlan chu a inawm hle a ni.—Thu Puan 4:10, 11 chhiar rawh.
16. Engtin nge Krista tlanna inthawina chu kan chhân lêt ang?
16 Thuziak hmasa kan hmuh tawh angin, Pathianin mihringte hnêna a thilpêk hlu bîk tak pakhat chu Krista tlanna inthawina hi a ni a. Chu chu Pathian min hmangaihzia târ lanna ropui tak a ni. (1 Joh. 4:10) Chu mi chhân lêt dân tûr inâwm tak chu eng nge ni? Paula chuan heti hian a târ lang a ni: “Krista hmangaihna chuan min tîr lui a ni; heti hian kan ngaihtuah: Mi zawng zawng thih aiin mi pakhat a thi a, . . . tin, a nungte chu anmahni tân an nun tawh loh va, an thih aia thia tholeha tân chuan an nun tawh zâwkna tûrin a ni, mi zawng zawng thih aiin a thih ni,” tiin. (2 Kor. 5:14, 15) Paula sawi chu a nihna takah chuan, Pathian ngilneihna nasa tak avânga kan lâwm chuan Amah leh A Fapa chawimawi zawngin kan nung ang, a tihna a ni. Pathian leh Krista kan hmangaihna leh an chunga kan lâwmna chu thuawihna te, thu hrilh leh zirtîr siam kan châknate hmangin kan lan chhuahtîr a ni.—1 Tim. 2:3, 4; 1 Joh. 5:3.
17, 18. Eng kawngtein nge mi ṭhenkhatin Jehova faka inthawina an hlan nasat lehzual? Entîrna pakhat pe rawh.
17 Pathian hnênah faka inthawina i hlan ṭha lehzual thei ang em? Jehova’n an tâna thil ṭha a tihsak zawng zawngte an ngaihtuah lêt hnuah, mi tam tak chuan Lalram thu hrilh rawngbâwlna leh theocratic thiltih danga an inhman tam lehzual theih nân an hun leh hnate chu an siam rem a. Ṭhenkhat chuan kum tinin thla khat emaw, a aia tam emaw auxiliary pioneer an thawh theih phah a, mi dangte chuan regular pioneer an thawh theih phah bawk. Ṭhenkhat dang leh chu Lalram nêna inkûngkaih in sakna lamah an inhmang thung a ni. Hêngte hi lâwmna lantîr dân kawng ṭha tak a ni lâwm ni? Rilru put hmang dik tak nei chunga ngaihhlutna leh lâwmna lantîr nâna tih a nih chuan, hêng hi Pathian tâna pawm tlâk rawngbâwlna thianghlim a ni.
18 Kristian tam tak chuan Jehova hnênah lâwmthu sawi an ba nasa hle niin an inhria a, chu chuan thil ti tûrin a chêttîr a ni. Chutiang mite zînga pakhat chu Morena-i hi a ni. Ani chuan thlarau lama zawhna a neihte chhânna chu a seilenna kohran Catholic-ah leh khaw chhak lam sakhuaahte chuan a zawng a. Mahse, a chhânna lungawithlâk a hmu lo. Jehova Thuhretute nêna Bible an zir ṭan aṭang chauhvin a thlarau lam tuihâlna chu a reh ta. Morena-i chuan a zawhna zawng zawngte Bible aṭanga chhânna a hmuh avâng leh chûng chhânnate’n nun nghet a neihtîr avângin Jehova hnêna lâwmthu sawi nân a chakna zawng zawng rawngbâwl nâna hman chu a duh a. Tichuan, Baptisma a chan zawh vêleh a inzawm zatin auxiliary pioneer a thawk a, a dinhmunin a zir vêleh regular pioneer a thawk chhunzawm a ni. Chu chu kum 30 kaltaa thleng a ni a, tûn thlengin a la thawk chhunzawm zêl a ni.
19. Engtin nge Jehova hnêna i inthawina hlan chu i tihpun theih ang?
19 Jehova chhiahhlawh rinawmte zîngah an dinhmunin a zir loh avânga pioneer thawk thei lo tam tak zawng an awm ngei mai. Mahse, Jehova rawngbâwlnaa kan tih theih chu eng pawh ni se, a pawm tlâk thlarau lam inthawina kan hlân thei ṭheuh va ni. Engtik lai pawhin Jehova ai kan awh tih hre reng chungin, kan nungchangah a thu bul felte ngun taka kan zawm a ngai a. Rinnain Pathian thiltumte a thleng famkim dâwn tih kan ring tlat bawk a. Hnathawh ṭha hmangin, chanchin ṭha kan theh darh bawk a ni. Jehova’n kan tâna thil a lo tih tawh zawng zawngte chunga kan lâwmna a nasat êm avângin, a hnênah thinlung zawng zawnga inthawina i hlân chhunzawm zêl ang u. (w12-E 01/15)
[Zirlai Atâna Zawhnate]
[Phêk 27-naa thu lâk chhuah]
Jehova ṭhatna chuan faka inthawina hlân ṭha lehzual tûrin a chêttîr che em?
[Phêk 25-naa milem]
Hun remchâng apiang chu thu hrilh nân i hmang em?
