Leilung Chhiatna A Awm Tawh Lo Vang!

TU EMAW chuan, “Nakin lawkah leilung chhiatna a awm tawh dawn lo,” ti ta se, engtin nge i chhân ang? “I duhthusâm a nih chu. Leilung chhiatnate chu nuna thil telve rêng alâwm,” tiin i chhâng mai thei. A nih loh leh, “Fiamthua bum theih mai maiah min ngai emaw ni le?” tiin i ngaihtuah mai thei bawk.

Leilung chhiatnate hi awm reng tûr angin lang mah se, chutiang a ni lo vang tih beiseina tûr chhan ṭha tak a awm a ni. Mahse, chu inthlâkthlengna chu mihringte thawhrimna aṭangin a ni lo vang. Mihringte chuan leilung chhiatna lo thlen dân leh lo thlen chhan hi an hre thiam famkim thei lo va, an thununin, an thlâk thleng thei hek lo. A finna leh a thil chîkna avânga hriat hlawh, hmân lai Israel Lal Solomona chuan heti hian a ziak a: “Ni hnuaia tih tâkte chu miin a hmu chhuak thei lo . . . miin zawng eng ang mah sela, a hmu chhuak lo vang; mi fingin hriat inring teh mah se, a hmu chhuak thei bawk hek lo vang,” tiin.—Thuhriltu 8:17.

Mihringte’n leilung chhiatna hi an thunun theih si loh chuan, tuin nge thunun thei ta ang? Chu inthlâkthlengna awmtîrtu tûr chu min Siamtu a nih thu Bible chuan a târ lang a. Ani chu tui kal kual dân ang chi, leilung leh a chhûnga awmte inlaichîn tawn dân duangtu a ni. (Thuhriltu 1:7) Tin, mihringte nêna inang lo takin, Pathian chuan thiltihtheihna tiam chin nei lo a nei bawk. Chu mi dikzia chu nemnghetin zâwlnei Jeremia chuan heti hian a sawi a. “Aw Lalpa PATHIAN, ngai rawh, i thiltihtheihna nasa leh i kut pharin lei leh vân i siam ta a, i tân thiltih harsa lutuk a awm rêng rêng lo,” tiin. (Jeremia 32:17) Lei leh a chhûnga thil awm zawng zawngte hi a siam vek a nih avângin Pathian chuan mihringte inrem leh thlamuang taka an chên theih nân thilte thunun dân a hria tih a chiang hle.—Sâm 37:11; 115:16.

A nih chuan, engtin nge Pathianin inthlâk thleng ngaite chu a thlentîr ang? Tûn laia he leia thil thleng râpthlâk tak takte hi “khawvêl tâwpna” târ langtu “chhinchhiahna” a ni a. Isua chuan heti hian a sawi a ni: “Chûng chu a lo thleng in hmuh hun chuan Pathian ram a lo hnai tawh tih hria ang che u,” tiin. (Matthaia 24:3; Luka 21:31) Pathian Ram—Pathian siam vân lam sâwrkârna—chuan he leia inthlâkthlengna nasa tak chu a rawn thlen ang a, leilung chaknate pawh a thunun vek ang. Chûng chu amah ngeiin ti thei mah se, Pathian Jehova chuan a Fapa tihtîr chu a thlang zâwk a ni. Chu Fapa chungchâng chu sawiin, zâwlnei Daniela chuan: “Rorêlna te, ropuina te, ram te a hnêna pêk a ni a, mi tin te, hnam tin te leh ṭawng tinte zawng zawng chuan a rawng an bâwl nân,” tiin a sawi a ni.—Daniela 7:14.

Pathian Fapa, Isua Krista hnênah chuan he lei hi hmun nuam taka siam tûra mamawh thiltihtheihna pêk a ni a. Ani chuan kum sânghnih kaltaa he leia a awm lai khân leilung a thunun theihzia tlêm azâwng a lo lantîr tawh a ni. Ṭum khat chu, a zirtîrte nên Galili Tuipuia lawnga an chuan laiin, “thlipui nasa tak a lo tleh a, tuifâwnte chu lawngah chuan a lo fâwn  lût hlawp hlawp a, chutichuan lawng chu a lo khat dâwn ta mai a.” A zirtîrte chu an mangang hle a. Boral mai an hlauh avângin Isua an pun a ni. Isua’n engtin nge a tih? Ani chuan “thli chu a hau va, dîl hnênah pawh chuan, ‘Ngawi la, awm hle hle rawh!’ a ti a. Tin, thli chu a bang a, a lo reh ta ṭhup mai a.” A zirtîrte chuan mak ti takin: “He mi hi tunge ni le, thli leh dîl lam pawhin a thu an awi hi?” an inti hlawm a.—Marka 4:37-41.

Tûnah chuan Isua chu thlarauvin vânah a awm tawh a, thiltihtheihna leh thuneihna nasa zâwk pêk a ni tawh a ni. Pathian Rama Lalber a nih angin, he leia mite inrem leh thlamuanna pêk nâna thlâkthleng ngai thil zawng zawngte ti tûra mawhphurhna leh thiltihtheihna a nei a ni.

Mahse, kan hmuh tawh angin, buaina leh leilung chhiatna tam tak chu mihringte siam chawp, mahni hmasial takte leh mi duhâmte awmtîr emaw, tihzualkaih emaw a ni. Chutiang kawng zawh a, insiam ṭha duh lote chungah Lalram chuan eng nge a thlen ang? Bible chuan Lalpa Isua chu, “Pathian hre lo mi leh kan Lalpa Isua chanchin ṭha âwih lo mite chunga phuba lain a vântirhkoh chak takte nên, meialh zînga vân aṭanga inlâr” angin a sawi. Ni e, ani chuan ‘lei tichhetute tihchhiatna’ a thlen ve thung dâwn a ni.—2 Thessalonika 1:6-8; Thu Puan 11:18.

Chu mi hnuah chuan, he “Lalte Lal,” Isua Krista hian leilung chaknate chu a thunun pumhlûm ṭhak tawh ang a. (Thu Puan 19:16) Lalram khua leh tuite chuan eng chhiatna mah an tuar tawh dâwn lo tih a tichiang ang. Tin, mihringte tâna hlâwkna a nih ngei theih nâna sik leh sa inher dânte thunun tûrin a thiltihtheihna a hmang bawk ang. Chu mi rah chhuah chu Pathian Jehova’n hmâna a mite hnêna a tiam tawh: “Ruahtuite chu a hun têah ka tlâktîr ang a, lei chuan thil a hâwntîr ang a, rama thingte chuan rah an chhuah ang,” tih thlen famkimna a ni ang. (Leviticus 26:4) Mite chuan chhiatna engemaw avânga chân hlauhna nei tawh lovin, “Inte an sa ang a, chûngah chuan an awm reng bawk ang; grêp huante an siam ang a, a rah an ei bawk ang.”—Isaia 65:21.

Eng Nge I Tih Ngai?

Mi dang tam tak ang bawkin, leilung chhiatna râpthlâk tak awm tawh lohna khawvêla chên chu i châk ve ngei ang tih rinhlelh rual a ni lo. Mahse, chuta chêng tûr chuan eng nge i tih ngai? Leilung chhiatna awm tawh lohna khawvêl lo awm tûrah chuan “Pathian hre lo mi” leh “chanchin ṭha âwih lo mite” chu an chên theih dâwn loh avângin, miin Pathian chungchâng tûna a zir leh he lei awpna chungchânga a ruahmanna a thlâwp chu a pawimawh tih a chiang hle a. Pathian chuan amah kan hriat leh a Fapa hmanga a din Lalram chanchin ṭha kan zawm chu a phût a ni.

Chu mi kan tih theih dân kawng ṭha ber chu ngun taka Bible zir hi a ni a. Chutah chuan Lalram inawpna hnuaia hmun râlmuang tak lo awm tûra kan chên theih dân tûr kaihhruainate a chuang a ni. Engvângin nge Bible zirtîrnate hre tûrin Jehova Thuhretute hnênah ṭanpuina i dîl loh vang? Chutianga mite ṭanpui tûrin an inpeih reng si a. Pathian hre tûr leh chanchin ṭha âwih tûra theih tâwp i chhuah phawt chuan, Thufingte 1:33 thu: “Ka thu pawm apiangte erawh chu him takin an awm ang a, thil ṭha lo hlau lovin an awm hle hle ang,” tih hi i chungah a lo thleng dik ang. (w11-E 12/01)