Leilung Chhiatna Hmachhawn Dân

Leilung chhiatna thlen ngun dân leh a râpthlâk tawlh tawlh dân han en hian, chu mi hmachhawn tûrin eng nge tih theih awm? Hma lâk theih dân ṭangkai tak ṭhenkhat i lo en ang u.

Chhiatna thlen theihna hmunah awm suh. “Mi hmanghria chuan thil ṭha lo chu a hmuhin a biru ṭhîn a; mi mâwl erawh chuan a tâwn mai ṭhîn a, a tuar phah ṭhîn,” tiin Bible chuan a sawi. (Thufingte 22:3) Hei hi leilung chhiatna chungchânga hman ṭangkai theih fuihna thu fing tak a ni. Tlângkâng emaw, tuilian emaw, a nih loh leh hurricurane leh typhoon thlipui lo thleng tûr vaukhânna tihchhuah a nih chuan chu mi hmun ata chhuah a, hmun him zâwka insawn chu a finthlâk a. Inte leh bungruate aiin nunna chu a hlu zâwk a ni.

Ṭhenkhat tân chuan chhiatna thlen theihna hmuna khawsak loh chu thil theih a ni mai thei a. Lehkhabu pakhat chuan: “Chhiatna chu leilung hmun khatah a thleng khâwm deuh vek ṭhîn. Lei hmun chhe tê chauh hi hmun hlauhawm a ni a, chhiatna lian tham a tam zâwkte chu, chu mi hmunah chuan a thleng ang,” tiin a sawi. Entîr nân, tuipui kam hnaih hmun hniam-ah emaw, lei khi chat awmna kiang hnaiah emaw chuan chutiang chhiatna chu a thleng duh zual a ni. Chutiang hmun hlauhawma i chên loh theih emaw, hmun him zâwka i insawn chhuah theih emaw chuan nasa takin leilung chhiatna i tawrh loh phah mai thei a ni.

Hma lâk dân tûr ruahmanna nei rawh. Theih tâwpa i invêng lâwk chung pawhin beisei loh tak chhiatna chu i tawng tho mai thei a. Ruahmanna i lo siam lâwk chuan chu mi hmachhawn chu a awlsam sawt ang. Chu chu kan hmuh tâk Thufingte 22:3 thurâwn nên pawh a inmil a ni. Rîkrum thila mamawh tûrte dah khâwmna bâwm ken chhuah mai theih tûr i nei em? Thu leh hla chhuah pakhat 1-2-3 of Disaster Education tih chuan hêngte hi a telh a ni: First-aid thilte, tui in tûrte, ei tûr chhe thei lo chi te, leh lehkha pawimawh te chu. Leilung chhiatna thleng thei tûr chite leh chûngte a lo thlen palha hmachhawn dân tûr chungchâng chhûngkuaa sawi khâwm chu a finthlâk hle bawk ang.

Pathian nêna inlaichînna ṭha vawng rawh. Hei hian eng dinhmun hnuaiah pawh min ṭanpui thei a ni. Bible chuan Pathian chu “khawngaihnate Pa leh thlamuanna zawng zawng Pathian” niin a sawi a. “Inngaitlâwmte thlamuantu” niin a sawi bawk.—2 Korinth 1:3, 4; 7:6.

Ni e, Pathian chuan amah ringtute dinhmun hmachhawn chu a hre chiang hle a. Ani chu hmangaihna Pathian a ni a, kawng hrang hrangin mi tichak thei tak fuihnate min pe ṭhîn. (1 Joh.  4:8) Thilmak tihna ni lo va, Pathian thlarau thianghlim thiltithei tak dîla ṭawngṭaina chuan eng dinhmunah pawh min ṭanpui thei a. Thlarau thianghlim chuan hrehawm tuarte chu mi thlamuan thei leh tidam sawng sawng thei Bible chângte a hriat chhuahtîr thei a ni. Dik takin, Pathian chhiahhlawh rinawmte chuan hmân lai Israel lal Davida ang bawkin: “Thihna hlim kawr ruam zawh mah ila, thil ṭha lo rêng rêng ka hlau lo vang; nang ka hnênah i awm si a; i talhtum leh i tiangin mi thlamuan ṭhîn a ni,” an ti ve thei a ni.—Sâm 23:4.

Kristian unaute chu an inṭanpui tawn ṭhîn. Kum zabi khatnaah khân, Kristian zâwlnei pakhat Agaba chuan, “Khawvêl zawng zawngah ṭâm nasa tak a tla dâwn tih Thlarau hrilhin a hriattîr a; chu ṭâm chu Klaudia lal laiin a lo thleng ta a.” Chu ṭâm chuan Judai rama Isua zirtîr tam tak chu nasa takin a nghawng a ni. An Kristian unaute mangan thu an hriat chuan hmun danga zirtîrte chuan eng nge an tih? Bible thuziak chuan: “Zirtîrteho chuan an theih tâwk ṭheuhvin, Judai rama unau awmte hnênah chuan chhawmdâwlna tûr thawn a tum a,” tiin a sawi. (Tirhkohte 11:28, 29) Chhawmdâwlna pein, hmangaih takin an chhâng lêt a ni.

Tûn laiah pawh, leilung chhiatna nasa tak a thlen hunah Pathian chhiahhlawhte chuan chutiang bawkin an chhâng lêt a. Jehova Thuhretute chuan an Kristian unaute ṭanpuina kawngah hriat an hlawh a ni. Entîr nân, kum 2010, February 27-a Chile rama lîr nasa tak a nghîn khân Jehova Thuhretute chuan a tuarte ṭanpui tûrin hma an la vat a ni. Tsunami-in a in a lâk bosak Karla-i chuan heti hian a sawi a: “Chhiatna thlen tûk maia min ṭanpui tûra [Thuhretu unaute] hmun dang aṭanga an lo thleng ka hmuhna chuan min thlamuanin, min tichak hle mai. Chûng mahnia inpete ṭhatna hmang chuan Jehova’n min thlamuan a ni tih a chiang hle. Hmangaih leh vênhim nia inhriatna ka nei a ni,” tiin. Thuhretu ni lo a pu chuan ṭanpuina an pêkte chu a lo hmu vek a. Heti hian a sawi a ni: “Hei hi kum tam tak chhûng kan kohhranho zînga ka lo hmuh tawhte lakah chuan a danglam hle mai,” tiin. A thil hmuh chuan Jehova Thuhretute chu amah Bible zirpui tûra sâwm tûrin a chêttîr a ni.

Pathian hmangaihtute kawm chu chhiatna tawh laia min ṭanpuitu ṭha tak a ni thei a ni. (w11-E 12/01)

[Phêk 6-naa milem]

Rîkrum thila mamawh tûrte dah khâwmna bâwm ken chhuah mai theih tûr i nei em?

[Phêk 7-naa milem]

Thilmak tihna ni lo va, Pathian thlarau thianghlim thiltithei tak dîla ṭawngṭaina chuan eng dinhmunah pawh min ṭanpui thei

[Phêk 7-naa milem]

Kristian unaute chu leilung chhiatna hmachhawn thei tûrin an inṭanpui tawn

[Phêk 7-naa milem]

“Hmangaih leh vênhim nia inhriatna ka nei”