‘Thutak Awm Dân Aṭangin’ Inzir Rawh
‘Thutak Awm Dân Aṭangin’ Inzir Rawh
“Dânah chuan finna leh thutak awm dân i [nei].” —ROM 2:19, 20.
HENG ZAWHNATE CHHANNA HI ZAWNG RAWH:
Mosia Dân hnuaia inthawinate chuan eng nge a lo entîr lâwk?
Israelte inthawina hlan ṭhin ṭhenkhat leh tûn laia Kristiante hlan ṭhinte’n inanna eng nge an neih?
Kan inthawina Jehova’n a pawm leh pawm loh chu engah nge a innghah?
1. Engvângin nge Mosia Dân pawimawhna hriat thiam chu kan duh ang?
THLARAUVA thâwk khum tirhkoh Paula thuziakte hi awm lo ta sela chuan, Mosia Dân hmêlhmang tam takte pawimawhna chu kan tân hriat thiam a harsa hle ngei ang. Entîr nân, Hebrai mite hnêna a lehkha thawnah ‘puithiam Lalber, rinawm tak’ Isua chuan amah ringtute’n “chatuana tlanna” an neih theih nân an tân “thupha chawina” vawi khata a tlin tlâk nghâl theih dân Paula chuan a hrilhfiah a ni. (Heb. 2:17; 9:11, 12) Biak bûk chu ‘vân thilte hlim’ mai a nih thu leh Isua chu Mosia palaina aia “thuthlung ṭha zâwk” atâna Palai a nih thu pawh a hrilhfiah bawk. (Heb. 7:22; 8:1-5) Paula hun lai chuan, chûng Dân thu hrilhfiahnate chu Kristiante tân a hlu hle a, kan tân pawh a la hlu reng a ni. Chu chuan kan tâna Pathian ruahmanna siamte hlutna hre thiam lehzual tûrin min ṭanpui si a.
2. Juda Kristiante chu eng angin nge Jentailte aia an chan a ṭhat zâwk?
2 Rom khuaa Kristiante hnêna a lehkha thawnah Paula chuan a thuziak ṭhenkhat chu kohhrana Juda mite leh Mosia Dân lo zir tawhte tân bîkin a ziak a. Anni chuan chu Pathian Dân an hriat tawh avângin Jehova leh a dân bul felte chungchânga “finna leh thutak awm dân” an hriat tawh thu a sawi a ni. Chu “thutak awm dân” hriat thiamna leh chu mi zahna thûk tak an neihna avângin Juda Kristiante chuan an hmaa Juda mi rinawmte tih ang bawkin Jehova’n a mite hnêna a pêk Dân thu hre ve lote chu an kaihruai theiin, an zirtîr thei a, an tibengvâr thei a ni.—Rom 2:17-20 chhiar rawh.
ISUA INTHAWINA HLIMTHLA
3. Engtin nge hmân lai Juda mite thil hlan chungchâng zir chu kan hlâwkpui theih?
3 Paula sawi thutak awm dân hi kan tân pawh Jehova thiltumte hriat thiam nân a la pawimawh reng a. Mosia Dân phêna thu bulte hlutna leh pawimawhna chu a la danglam chuang lo. Chu chu rilrua vawng rengin, chu Dânte zînga pakhat chauh i lo ngaihtuah ang u—inthawina leh thil hlan chi hrang hrangte’n Juda inngaitlâwm takte Krista lama a hruai dân leh Pathianin an laka a beiseite hre thiam tûra a ṭanpui dân chu. Jehova’n a chhiahhlawhte laka a thil beisei bulpuite chu a inthlâk ngai loh avângin, inthawina leh thil hlan chungchânga Pathianin Israelte hnêna dân a pêkte chuan kan rawngbâwlna thianghlim ṭhat lam enfiah tûrin min ṭanpui thei a ni.—Mal. 3:6.
4, 5. (a) Mosia Dân chuan Pathian mite chu eng nge a hriatnawntîr? (b) Inthawina chungchânga Pathian dân chuan eng nge a lo entîr lâwk?
4 Mosia Dân zînga hmêlhmang tam tak chuan hmân lai Judate chu mi sual an nihzia a hriattîr a. Entîr nân, tupawh mitthi ruang khawih apiang chu an inthen thianghlim a ngai a ni. Chu mi atân chuan bâwngla sen hmêlhem lo an talh a, an hâl ṭhîn. A vâp chu “inthenna tui” siam nâna dah ṭhat a ni a, chu tui chu mi then thianghlim nân a bawlhhlawh hnu a ni thum nî leh a ni sarih nîah an theh ṭhin a ni. (Num. 19:1-13) Tin, mihring inthlahchhâwnna hian ṭhat famkim lohna a keng tel zêl tih hriatnawntîr nân, hmeichhe nau hring chu hun engemaw chhûng a bawlhhlawh a, chu mi hnuah inthawina hmangin inremna siam tûra phût a ni.—Lev. 12:1-8.
5 Nî tin nuna dinhmun hrang tam takah pawh sual thawi nân rana inthawi a ngai a. Pathian betu chuan a hria emaw hre lo emaw pawh ni se, chûng inthawinate—leh a hnua Jehova biak bûka hlan inthawinate—chu Isua nun ṭha famkim hlanna ‘hlimthla’ a ni.—Heb. 10:1-10.
INTHAWINA HLANNA KAWNGA RILRU PUT HMANG DIK
6, 7. (a) Israelte inthawina hlan tûr thlanna chu engin nge kaihruai a, an inthawina chuan eng nge a lo entîr lâwk? (b) Eng zawhna nge kan inzawh ang?
6 Jehova hnêna inthawina tûr ran engpawh chu kawng engkima “sawisêlbo” a ni tûr a ni a—a mitdel te, a silawng te, a piangsual te, a nih loh leh a dam lo te a ni tûr a ni lo. (Lev. 22:20-22) Israelte’n Jehova hnêna thei emaw, thlai emaw an hlan rêng rêng chu, a “rah hmasa ber,” an thar chhuah zînga a “ṭha ber” a ni tûr a ni a. (Num. 18:12, 29) A ṭha ber ni lo chu Jehova’n a pawm lo a ni. Rana inthawina chungchânga chu thil phût pawimawh tak chuan Isua inthawina chu hmêlhem lo leh bawlhhlawh kai lo a nih tûr thu leh Jehova chuan mihringte chhan chhuah nân a neih ṭhat ber leh duh ber a hlan tûr thu a entîr a ni.—1 Pet. 1:18, 19.
7 Inthawina hlântu chuan Jehova ṭhatna zawng zawng a ngaihhlut tak zet avânga hlân a nih chuan, a thil neih zînga ṭha ber hlan chu a châk dâwn lâwm ni? Thil hlan ṭhat zâwng chu mi mal thu zawng a ni ngei mai. Mahse, a hlântu chuan thil ṭha lo a hlan chuan, inthawina chu a rûn dâl mai leh phurrit hial anga a ngaihzia târ lanna a nih dâwn avângin Pathianin a lâwm lo vang tih a hria a ni. (Malakia 1:6-8, 13 chhiar rawh.) Chu chuan: ‘Eng rilru puin nge Jehova rawng ka bâwl? A rawng ka bâwl ṭhat zâwng leh ka bâwl chhan inenfiah ka ngai em?’ tia inzâwtin Pathian rawng kan bâwl dân min chhût chiantîr tûr a ni.
8, 9. Engvângin nge inthawina hlanna kawnga Israelte rilru put hmang chu kan ngaihtuah ang?
8 Israel miin inthawina a hlan chhan chu Jehova chunga a lâwmna lantîr nân emaw, hâl ral thil hlan anga Pathian duhsakna dîl nân emawa mahni duh thua hlan a nih chuan ran ṭha ber thlan chu a har lo ngei ang a. Ani chuan a thil neih ṭhat ber Jehova hnêna pêk chu a duh hle ngei bawk ang. Tûn laia Kristiante chuan Mosia Dânin a phût ang inthawina tak tak chu an hlân tawh lo va; mahse, Jehova rawng bâwl nâna an hun te, tha leh zung te, leh sum leh paite hmangin inthawina an hlân ve reng tho a ni. Tirhkoh Paula chuan Kristian beiseina ‘ṭan,’ a nih loh leh vântlâng hmaa puan chhuah leh “thil tihṭhat leh thilphal” chu Pathian lâwmzâwng inthâwina angin a sawi a. (Heb. 13:15, 16) Rilru put hmang dik neia Pathian Jehova mite chutiang thila an inhmanna chuan an tâna Pathian thilpêk zawng zawngte an ngaihhlutzia a târ lang a ni. Chuvângin, tûn laia Kristian rawngbâwlnaa telte leh hmân laia mahni duh thua inthawina hlântute rilru put hmang leh chêttîrtu inkârah inanna a awm a ni.
9 Mahse, miin thil engemaw a tihsual avânga Mosia Dânin sual thawina emaw, bawhchhiat thawina emaw a phût chungchângah eng nge kan sawi ve theih? Phût a nih avângin, chu chuan a hlântu inhuamna leh rilru put hmang a tidanglam ang em? Chutiang inthawina chu hreh chung chunga hlan a ni thei ang em? (Lev. 4:27, 28) Thil sual titu chuan Jehova nêna inlaichînna ṭha neih zawm zêl a duh tak zet chuan, chutiang chu a ni lo vang.
10. Kristiante’n inlaichînna chhe tawh siam ṭha leh tûrin eng “inthawina” nge an hlan ngai?
10 Chutiang bawkin tûn laiah pawh, tum rêng vâng ni lovin, hriat loh hlânin, a nih loh leh fimkhur loh vângin i unau tuemaw rilru i tina tih i hre mai thei a. I chhia leh ṭha hriatna chuan thiam loh a chantîr che pawh a ni thei. Tih tak zeta Jehova rawngbâwltu chuan tlin lohna a neihte siam ṭha tûrin theihtâwp a chhuah ngei dâwn lâwm ni? Chutah chuan a rilru kan tihnata hnêna tih tak zeta ngaihdam dîl te, a nih loh leh thil sual pawi tak angah chuan hmangaihna nei Kristian upate thlarau lam ṭanpuina zawnte a tel thei a ni. (Mt. 5:23, 24; Jak. 5:14, 15) Chuvângin, mi emaw, Pathian emaw chunga thil sual tih siam ṭhat nân “inthawina” anga sawi theih hma lâkna engemaw kan neih a ngai tihna a ni. Chu chuan, Jehova leh unaute nêna kan inlaichînna a siam ṭhain, chhia leh ṭha hriatna thiang min neihtîr a. Jehova kawng chu kawng ṭha ber a ni tih a nemnghet bawk a ni.
11, 12. (a) Remna inthawina chu eng nge ni? (b) Remna inthawina aṭangin eng nge kan zir theih?
11 Mosia Dânin a phût inthâwina ṭhenkhat chu remna thil hlan anga ngaih a ni a. Chu chuan Jehova nêna inremna a kâwk a ni. Chutiang inthawina sa chu a hlântu leh a chhûngte chuan biak bûka chaw eina pindan pakhatah emaw chuan an ei ang. A hlântu puithiam leh biak bûka rawngbâwl puithiam dangte pawhin chan an nei ve ve a ni. (Lev. 3:1; 7:31-33) He inthawina hlântu chuan Pathian nêna inlaichînna ṭha neih a duh vâng liau liauva hlân a ni a. A hlântu te, a chhûngte, puithiamte, leh Pathian Jehova chuan inrem tak leh hlim taka chawhlui kîlho ang mai an ni.
12 Chutianga entîr nei chawhlui kîl tûra Jehova sâwm leh sâwm hlawhtlin tluka chanvo ropui zâwk a awm thei dâwn em ni? A sâwmtu chuan chutiang khawpa mikhual zahawm tân theih tâwp chhuaha lo inbuatsaih chu a duh ngei ang. Remna inthawina chu Mosia Dân anga thutak awm dân pêng pakhat a ni a, chu chuan an Siamtu nêna inlaichînna ṭha leh muanawm neih duh apiangin Isua inthawina ropui zâwk hmanga an neih theihzia a entîr a ni. Tûn laiah pawh, kan sum leh pai, leh tha leh zungte Jehova rawngbâwl nâna kan hman hian Jehova nên kan inkâwmin, a ṭhian kan ni ve thei a ni.
INTHAWINA CHUNGCHANGA FIMKHUR A NGAIHNATE
13, 14. Engvângin nge Lal Saula inthawina hlan tum chu Jehova’n a pawm loh?
13 Jehova pawm ni tûr chuan, Mosia Dân hnuaia inthawinate chu rilru leh thinlung dik tak pu chunga hlan tûr a ni a. Mahse, Bible-ah chuan Pathian pawm tlâk loh inthawina hlan chungchâng entîrna pawh a chuang a ni. Engvângin nge inthawina ṭhenkhat a pawm loh? Thilthleng pahnih i lo en ang u.
14 Zâwlnei Samuela chuan Lal Saula hnênah Amalek-hote chunga Jehova rorêl hun a lo thleng tawh tih a hrilh a. Chuvângin, Saula chuan chu hmêlma hnam leh an ran rualte chu a tiboral vek tûr a ni. Mahse, a hneh hnu chuan Saula chuan a sipaite chu Amalek-ho lal Agaga a zuahtîr a. An ran rual ṭha berte pawh Jehova hnêna hlan tûr anga sawiin a zuahtîr bawk. (1 Sam. 15:2, 3, 21) Chu chu engtin nge Jehova’n a ngaih? Thu a awih loh avângin Saula chu a hnâwl a ni. (1 Samuela 15:22, 23 chhiar rawh.) Heta ṭang hian eng nge kan zir theih? Kan inthawina Pathian pawm tlâk ni tûr chuan a thupêkte zawm chungin kan hlân tûr a ni, tih hi.
15. Isaia hun laia inthawina hlântu Israel mi tuemawte nungchang ṭhat lohna chuan eng nge a târ lan?
15 Chutiang bawk entîrna chu Isaia bu-ah pawh kan hmu a. Isaia hun lai chuan, Israelte chuan dân pângngai angin Jehova hnênah inthawina an hlân a. Mahse, an nungchang ṭha lo tak chuan an inthawina chu engmah lovah a chantîr a ni. Jehova chuan, “In inthawina zozai hi ka tân eng nge a ṭangkaina awm? Berâmpa hâlrala hlante leh ran châwm thaute thau chu ka hnê ta; bâwngpate leh berâm note leh kêlpate thisenah pawh ka lâwm lo ve. . . . Thilpêk mai maite chu rawn keng tawh suh u; englo rimtui chu ka tân thil tenawm tak a ni,” tiin a sawi a ni. Eng nge a chhan? Pathian chuan an hnênah: “Vawi tam tak in ṭawngṭai hunah pawh ka ngaithla tawh lo vang: in kutte chu thisenin a khat si a. Insil ula, intifai rawh u; ka mithmuh phâk lovah in thiltihte hi a sualna chu dah bo rawh u; sual tih hi bâng tawh ula,” tiin a hrilh a ni.—Is. 1:11-16.
16. Kan inthawina Pathianin a pawm leh pawm loh chu engah nge a innghah?
16 Jehova chuan thil sual ti inchhîr duh lote inthawina chu a lâwm lo va. Mahse, a thupêkte mila nun tum tlat tute ṭawngṭaina leh thil hlante chu a pawm a ni. Mosia Dân chuan mite chu sual an ni tih leh ngaihdamna an mamawh tih a zirtîr a. (Gal. 3:19) Chu mi hriat thiamna chuan nasa taka pawi tihna thinlung a neihtîr a ni. Chutiang bawkin tûn laiah pawh, sual thawi dam thei Krista inthawina kan mamawh tih kan hriat a ngai a. Chu chu kan hriat thiam a, kan ngaihhlut chuan rawngbâwlnaa kan thil hlante chungah Jehova chu a ‘lâwm’ ang.—Sâm 51:17, 19 chhiar rawh.
ISUA INTHAWINA CHU RING RAWH
17-19. (a) Isua tlanna inthawina avânga Jehova chunga kan lâwmzia engtin nge kan lantîr theih? (b) A dawta thuziakah eng nge kan ngaihtuah ang?
17 Kristianna hun hmaa mite aia kan vânneihna pakhat chu Pathian thiltumte ‘hlimthla’ chauh hmua kan awm tawh lo hi a ni. (Heb. 10:1) Inthawina chungchânga dânte chuan Juda mite chu Pathian nêna inlaichînna ṭha neih nâna mamawh rilru put hmang ṭha—a chunga lâwmna dik tak, mahni thil neih ṭha ber pêk châkna, leh chhandam mamawh nih inhriatna te—a neihtîr a ni. Tlanna avângin Jehova chuan sualnain a nghawngte a tibo kumkhua dâwn tih leh tûnah ngei pawh chhia leh ṭha hriatna thiang tak min neihtîr thei tih Kristian Grik Pathian Lehkha Thu-in min hrilhfiah avângin kan lâwm hle. Isua tlanna inthawina chu thilpêk ropui a va ni tehlul êm!—Gal. 3:13; Heb. 9:9, 14.
18 Tlanna inthawina hlâwkpui tûr chuan a awmze hriatthiamna ho tê neih mai chu a tâwk lo ngei mai. Tirhkoh Paula chuan: “Chutichuan rinna avânga thiam kan chan theihna tûra Dân chu Krista lama min kaihruaitu a lo ni,” tiin a ziak a. (Gal. 3:24) Chu rinna chu thiltih tel lovin a awm thei lo. (Jak. 2:26) Chuvângin, Paula chuan Mosia Dânin a pêk hriatna dân neitu kum zabi khatnaa Kristiante chu an hriatna neihte nunpui tûrin a fuih a ni. Chutianga an tih chuan Pathian dân bul an zirtîrte nêna inmilin an nung a ni ang.—Rom 2:21-23 chhiar rawh.
19 Tûn laia Kristiante tân Mosia Dân hnuaiah awm tawh lo mah se, Jehova hnênah inthawina pawm tlâk hlan a la ngai tho va. Chu mi kan tih theih dân chu a dawta thuziakah sawiho a ni ang. (w12-E 01/15)
[Zirlai Atâna Zawhnate]
[Phêk 19-naa thu lâk chhuah]
A chhiahhlawhte hnêna Jehova thil phût bulpuite chu a danglam ngai lo
[Phêk 20-naa milem]
Jehova hnênah a khawi zâwk hi nge i hlan ang?
[Phêk 21-naa milem]
Jehova hnêna inthawina pawm tlâk hlântute chuan a duhsak an hlawh
