Abrahama Chu Tu Nge Ni?

KHAWVEL sakhuate chungah ani aia nghawng nei nasa zâwk an awm mang meuh lo vang. Ani chu Juda te, Mosolman te, leh Kristiante’n inang khat renga an chawimawi Abrahama * a ni a, “Pathian Lehkha Thua mi lian” tih leh “rinna kawnga entawn tûr mi ropui” tia sawi ṭhin a ni. Bible chuan ani chu “ringtu zawng zawng pa” tiin a ko a ni.—Rom 4:11.

Engvângin nge Abrahama chu mite ngaihsân tak a nih? Kawng khatah chuan, Abrahama chu Bible-in Pathian ṭhian tia a koh fak awmchhun a ni a—vawi thum lai chutianga koh a ni lehnghâl!—2 Chronicles 20:7; Isaia 41:8; Jakoba 2:23.

Mahse, kawng lehlamah chuan Abrahama chu keimahni ang, mi pângngai ve mai a ni. Kan tawh ang harsatna tam tak a tâwk a—hlawhtling takin a hmachhawn a ni. Chutianga a hmachhawn theih dân hriat i duh em? Bible-in he mi pawimawh tak chungchâng a târ lan hi i lo ngaihtuah ang u.

A Pian leh Mûrna

Abrahama chu B.C.E. 2018-ah piangin, Ur khawpuiah a seilian a. (Genesis 11:27-31) Ur chu khawpui lian leh hausa tak a ni a. Milem biaknain a chiahpiah hneh hle a ni. Abrahama pa, Tera chu milem dang dang betute zînga mi a nih ngei a rinawm. (Josua 24:2) Mahse, Abrahama chuan a biakna chu nunna nei lo pathian dangte hnênah ni lovin, Jehova * hnênah chauh hlan a thlang a ni.

Chu thu tlûkna siam tûrin Abrahama chu engin nge chêttîr? Abrahama chu Nova fapa Sema thih hma kum 150-a piang a ni a. Chutiang khawpa amah aia upa chu a kawm ṭhin chuan, chu chuan amahah nghawng eng nge a neih theih? Abrahama chuan Sema hnên aṭang ngeiin khawvêl pum huap Tuilêta an dam khawchhuah dânte a hria a ni thei a. Chu Tuilêt ata Sema leh a chhûngte vênghimtu Pathian Jehova biak a pawimawhzia pawh a zir a ni thei bawk.

Sema kal tlang emaw, thil dang kal tlang emaw pawh ni se, Abrahama chuan Pathian dik chungchâng a zir chu ṭha takin a chhâng lêt a. ‘Thinlung fiahtu’ Jehova’n Abrahama a en chuan, amahah ṭhatna engemaw a hmu a—ṭha lehzual tûrin a ṭanpui a ni.—Thufingte 17:3; 2 Chronicles 16:9.

A Nun Kawng

Abrahama chuan nun lungawithlâk leh phûrawm tak a nei a, harsatna zawng a tawng fova, nun awmze nei lo erawh a ni ngai lo. A thil tawn zînga ṭhenkhat chauh lo ngaihtuah ta i la.

▪ Abrahama chu Ur khawpuia a chên laiin, Pathianin a pianna ram chu chhuahsan a, a kawhhmuh tûr hmuna kal tûrin a hrilh a. Abrahama leh Sari chuan thil engkim—an kalna tûr emaw, Pathianin kal chhuak tûra a tih chhan emaw—hre vek lo mah se, thu chu an zâwm a ni. A tâwpah chuan Kanaan ramah puan in kaihin an awm ta a, chutah chuan an dam chhûng zawng mikhual angin an khawsa ta a ni.—Tirhkohte 7:2, 3; Hebrai 11:8, 9, 13.

▪ Abrahama leh Sari chuan chutih lai chuan fa an la nei lo va; mahse, Jehova chuan Abrahama chu chi ropui takah a siam tûr thu a tiam a ni. Jehova chuan Abrahama zârah leia hnam tin malsâwm an la ni ang tih a sawi belh bawk. (Genesis 11:30; 12:1-3) A hnuah Jehova chuan  chu thutiam chu a nemnghet leh a. Abrahama hnênah vâna arsi angin a thlahte an la pung dâwn tih a hrilh a ni.—Genesis 15:5, 6.

▪ Abrahama chu kum 99 mi a nih a, Sari pawh kum 90 a tlin ṭêpin Jehova chuan fapa an neih tûr thu a hrilh a. Chu chu mihring thlîrna aṭang chuan thil theih niin a lang lo; mahse, Abrahama leh Sari chuan “LALPA tân thil rêng rêng a harsa lutuk” lo tih an hre thuai a ni. (Genesis 18:14) Kum khat hnu, Abrahama kum 100 a tlin chuan fapa a nei a, a hmingah Isaaka a sa a. (Genesis 17:21; 21:1-5) Pathian chuan Isaaka aṭangin mihringte tân malsâwmna ropui tak a thleng dâwn tih a tiam a ni.

▪ Kum engemaw zât hnu chuan, Jehova’n Abrahama hnênah thil danglam tak a ngên a: Abrahama chu a fapa duh tak, nupui fanau la nei lo Isaaka chu a hnêna hlân tûrin a ngên a ni. Fapa chân tûra a inngaihtuah chuan a rilru a na hle ngei ang; mahse, Jehova ngen anga ti tûr leh Isaaka inthawina atâna hlân tûrin a inbuatsaih a. Abrahama chuan Pathianin a thutiam thlen famkim nân, a ṭûl a nih chuan Isaaka chu a kai tho leh thei tih a ring tlat a ni. (Hebrai 11:19) Hun pawimawh tak, Abrahama’n a fapa a hlan dâwn lai tak chuan Pathian rawn inrawlhin, Isaaka nun chu a zuah ta a. Abrahama chu a thuawihna nasa tak avângin a fak a ni. Tichuan, Jehova chuan Abrahama hnênah a hmaa a thu lo tiam tawh chu a tiam nawn leh a ni.—Genesis 22:1-18.

▪ Kum 175 a dam hnuah, Abrahama chu a thi ta a. Bible chuan ani chu “lûa kêlsam to vek, putar tak, tar kûna damin” lungâwi takin a thi tih a sawi a ni. (Genesis 25:7, 8) Chutiang chuan Abrahama chuan Pathian thutiam dang thlen famkimna chu a tawng a ni—thlamuang taka a thih thlenga dam reina chu.—Genesis 15:15.

A Ro Hnutchhiah Chu

Abrahama chu hmân laia sakhaw mi leh mi awm tak tak mai a ni hauh lo. Tûn thlengin a chanchin chu a nung a, kan entawn ṭheuh theih tûr entawn tûr ṭha tak min hnutchhiah a ni. (Hebrai 11:8-10, 17-19) Abrahama târ lan mize ṭha palite chu i lo ngaihtuah ang u. Chûng miziate zînga hriat hlawh ber—rinna—aṭangin kan ngaihtuah ṭan ang. (w12-E 01/01)

[Footnote-te]

[Phêk 4-naa bâwm]

Bible Chanchina Mi Pawimawh Tak

Genesis bung 1 aṭanga 10-ah chuan Abela te, Enoka te, leh Nova te pawh tiamin rinna nei mi engemaw zâtte chanchin târ lan a ni a. Mahse, a dawta bung 15-te chu mi pakhat—Abrahama—chanchin a ni deuh thaw a ni.

Chu bâkah, Bible chuan Abrahama nêna inkûngkaihin ngaih dân pawimawh tak ṭhenkhat a vawikhatna atân a târ lang ṭan a. Entîr nân, Abrahama chanchinah hêngte hi kan hmu a ni . . .

▪ Pathian chu a chhiahhlawhte tân Phaw, a nih loh leh Vênghimtu anga târ lanna hmasa ber chu.—Genesis 15:1; leh Deuteronomy 33:29; Sâm 115:9; Thufingte 30:5 en rawh.

▪ Pathian rinna chungchâng târ lanna hmasa ber chu.—Genesis 15:6.

▪ zâwlnei tih thu mal a lanna hmasa ber chu.—Genesis 20:7.

▪ nu leh pa hmangaihna chungchâng târ lanna hmasa ber chu.—Genesis 22:2.