Abrahama Mi Inngaitlâwm Tak Chu

Abrahama chu chhûn khaw lum lai takin a puan in hlimah chuan a ṭhu a. Kâwlkil lam a han thlîr chuan, chu mi hmun tlawh tûra lo kal mi pathum chu hla tak aṭangin a lo hmu a ni. * Abrahama chu hreh miah lovin mikhualte lam panin a tlân a, châwl hahdam a, ei leh in tûrin a ngên a. Anni chu “chhang tlêm tal” ei tûrin a sâwm a; mahse, chhang ur thar te, hnutetui khal te, hnutetui te, leh sa duhawm bâwng tuai sa te telna ruai ropui tak chu a buatsaih a ni. Mi khualte hmaa chaw hluina hmangin, Abrahama chuan khualchhâwn thiamna langsâr tak chauh ni lovin, kan la hmuh tûr, inngaihtlâwmna dik tak pawh a târ lang bawk a ni.—Genesis 18:1-8.

INNGAIHTLAWMNA CHU ENG NGE NI? Inngaihtlâwmna chu chapona leh intihveina laka fihlîmna a ni a. Mi inngaitlâwm chuan mi dang tupawhin amah aia ṭhat zâwkna engemaw tal an nei tih a hria a ni. (Philippi 2:3) Mi dangte rawtna pêk chu a ngaithla a, an tân hna hnuaihnung tak thawhsak chu a inhuam a ni.

ENGTIN NGE ABRAHAMA’N INNGAIHTLAWMNA A TAR LAN? Abrahama chuan mi dangte rawng chu lâwm takin a bâwl. Atîra kan sawi tâk ang khan, Abrahama’n mikhual pathum a hmuh chuan, an mamawh phuhru tûrin a tlân nghâl vat a. A nupui, Sari pawhin ei tûr a buatsaih ṭan nghâl bawk. Mahse, thil tam tak dang ti bawktu chu lo chhinchhiah rawh: Abrahama chu mikhualte hmu tûrin a va tlân a, thil ei tûrin a sâwm a, bâwng rual awmna lama va tlânin talh tûr ran a thlang a, mikhualte hmaah thil zawng zawng chu a chhawp a ni. A chhiahhlawhte tih atâna dah vek lovin, he mi inngaitlâwm tak hian hna hnuaihnung takte chu a thawk ta zâwk a ni. Mi dangte rawngbâwlsak chu a tân hna hniam lutuk a ni lo.

Abrahama chuan a thu hnuaia awmte thurâwn a ngaithla. Bible chuan Abrahama leh  Sari te inbiakna tlêm tê chauh a târ lang a. Mahse, Abrahama’n Sari ngaih dân chu ngaithlain, chutianga thil a tih thu vawi hnih lai kan chhiar a ni. (Genesis 16:2; 21:8-14) Sari thurâwn pakhat zâwk phei chu atîrah “Abrahama ngaih chuan thil ṭha lo tak a ni.” Mahse, Jehova’n Abrahama a biak a, Sari ngaih dân ṭha a tih thu a hriattîr hnu chuan, Abrahama chuan inngaitlâwm taka zâwmin, a thurâwn pêk ang chuan thil a ti a ni.

ENG NGE KAN ZIR TUR CHU? Kan inngaihtlâwm tak zet chuan, lâwm takin mi dangte rawng kan bâwlsak ang a. Mi dangte nuam tih nâna kan theih ang tâwk tih chu kan hlimpui ang.

Mi dangte thurâwn pêk kan chhân lêt dân aṭangin inngaihtlâwmna kan târ lang thei bawk a. Mahnia kan ngaihtuah chhuah a nih loh vâng maia mi dangte ngaih dân hnâwl ai chuan, an thusawi ngaithlâk chu a finthlâk a ni. (Thufingte 15:22) Chutiang rilru zau tak put chu a bîk takin thuneihna engemaw chen neite tân a ṭangkai hle a ni. Supervisor John-a chuan: “Hotu ṭha chuan mite’n zalên taka ngaih dân an sawi theihna tûr boruak ṭha a siam tih ka hmu chhuak a ni,” tiin a sawi a. “I kut hnuaia thawk tuemaw chuan i aiin thil tih dân ṭha zâwk a hre mai thei tih pawm tûr chuan inngaihtlâwmna neih a ngai a. Mahse, tumahin—hotu pawhin—ngaih dân ṭha chu a nei vek thei lo,” tiin a sawi belh a ni.

Mi dangte thurâwn ngaihthlâkna leh an tâna hna hnuaihnung thawhna hmanga Abrahama kan entawn hian, Jehova duhsak kan hlawh ṭhîn. “Pathianin chapote a dodâl a, inngaitlâwmte erawh chu khawngaihna a pe si ṭhîn” tih a ni si a.—1 Petera 5:5. (w12-E 01/01)

[Footnote]