Abrahama Rinna Nei Mi Chu

Abrahama chu zân reh takah pâwnah a ding chhuak a. Arsi pêt unna vân thiang tak thlîra a hawi chhoh chuan, chûng arsite ang zâta a thlahte an la tam tûr thu Pathian thutiam chu a hre chhuak lo thei lo. (Genesis 15:5) Abrahama tân chuan arsite chu Jehova thutiam hriat chhuahtîrtu thil hmuh theih a nih bâkah, A nem nghettu a ni bawk. A nihna takah chuan, Jehova’n lei leh vân zau tak leh a chhûnga thil engkim siam tûra thiltihtheihna a neih chuan, Abrahama leh Sari chu fa a neihtîr thei lo vang em ni? Chutiang chu a ni, Abrahama rinna chu.

RINNA CHU ENG NGE NI? Bible-a hman a nih angin, “rinna” tih chu thil hmuh theih lohte awm ngeia hriat tlatna a ni a. Chu chu finfiahna chiang taka innghat a ni. Pathian ringtu chuan Jehova thutiamte thlen famkimna chu thlîr tlatin, thleng famkim tawh ang hialin a ngai tlat a ni.

ENGTIN NGE ABRAHAMA’N RINNA A TAR LAN? Abrahama chuan Pathian thutiamte a rinzia a târ lang a. Rinnain, Abrahama chuan a pianna ram a chhuahsan a, Jehova’n ram dang hmuhtîr tûra A thutiam a hlen dâwn tih a hre tlat a ni. Rinnain, Abrahama chuan Kanaan rama kal kualin, a tâwpah chuan a thlahte’n chu ram chu an la chang dâwn tih a chiang a. Tin, rinnain, Abrahama chuan thuawih takin Isaaka chu inthawina atân hlan a tum a, a ṭûl chuan Jehova’n Isaaka chu a kaitho leh thei tih a hre tlat bawk a ni.—Hebrai 11:8, 9, 17-19.

Abrahama chuan hun kal tawhte aiin nakin hun chu a ngaihtuah zâwk a. Abrahama leh Sari chu Kanaan ram ai chuan Ur khawpuiah an awm nuam zâwk pawh a ni thei; mahse, “an chhuahsan tâk ram chungchâng chu an ngaihtuah zui reng lo.” (Hebrai 11:15; Today’s English Version) Chu ai chuan Pathianin anmahni leh nakina an thlahte mal a sâwm dân tûr chu an ngaihtuah zâwk a ni.—Hebrai 11:16.

Abrahama rinna chuan nghahchhan ṭha a nei em? Tehrêng mai. Jehova chuan a thutiam apiang chu a hlen a. A tâwpah chuan Abrahama thlahte chu Israel tia hriat hnam an lo ni chho va. A hun takah chuan, Jehova’n Abrahama hnêna a tiam Kanaan ram ngeiah chuan Israelte chu an chêng ta a ni.—Josua 11:23.

ENG NGE KAN ZIR TUR CHU? Jehova’n a thutiamte a vawng dâwn tih kan ring tlat thei a. Chûng zînga ṭhenkhat chu mihring thlîrna aṭang chuan thil theih loh angin lang hial thei mah se, “Pathian nên erawh chuan engkim tih theih a ni,” tih kan ring tlat a ni.—Matthaia 19:26.

Abrahama entawn tûr siam chuan hun kal tawha thil awm dân ni lovin, nakina kan la chen  tûr thilte ngaihtuah zâwk tûrin min zirtîr bawk a. Chu chu a ni, Jason-a’n ti tûra a zir chu. Ani chuan a taksa pum tizengtu, natna râpthlâk tak a vei a. “Hun kal tawha thil awm dânte ngaihtuah châng ka nei ngei mai a. Kan nu Amanda-i ka pawm vawng vawng ang chi thil ho tê tête hi a ni ka ngaih êm êm mai chu,” tiin a sawi a ni.

Amaherawhchu, Jason-a chuan kan lei hi paradis-ah a chang thuai dâwn tih leh mi rinawmte chuan hrisêlna ṭha famkim nên chatuana nunna an chang dâwn tih thutiamte pawh tiamin, Jehova’n a thutiam zawng zawng a tifamkim dâwn tih a ring thlap a ni. * (Sâm 37:10, 11, 29; Isaia 35:5, 6; Thu Puan 21:3, 4) Jason-a chuan: “Kan hma lawkah hun ṭha ber a la awm tih ka inhrilh nawn ṭhîn,” a ti. “Nakin lawkah chuan, hêng thil zawng zawng—rilru hahna te, lungngaih manganna te, lungchhiatna te, leh mahni inthiam lohna te—hi a tâwp thuai ang a, chatuan atân a bo hlen ang,” tiin a sawi. Abrahama neih ang rinna kawnga entawn tûr ṭha a va ni tak êm! (w12-E 01/01)

[Footnote]