Inring Renga Awmna Kawnga Isua Entawn Tûr Siam Chu Zui Rawh
Inring Renga Awmna Kawnga Isua Entawn Tûr Siam Chu Zui Rawh
“Inring rengin ṭawngṭai rawh u.”—MT. 26:41.
ENGTIN NGE KAN CHHAN ANG?
Engtin nge kan ṭawngṭaina chuan inring rengin kan awm tih a târ lan theih?
Eng kawngtein nge thu hrilhnaah inring rengin kan awm tih kan târ lan theih?
Fiahna kan tawh laiin, engvângin nge inring renga kan awm a pawimawh a, engtin nge chu chu kan tih theih?
1, 2. (a) Inring renga awmna kawnga Isua entawn tûr siam chungchângah eng zawhna nge lo chhuak thei? (b) Isua entawn tûr siam ṭha famkim chu sual nei mihringte tân a ṭangkai em? Hrilhfiah rawh.
HETI hian i ngaihtuah mai thei: ‘Inring renga awmna kawnga Isua entawn tûr siam zui chu thil theih a ni tak zet em? Isua chu mi ṭha famkim a ni si a! Chu mai a ni lo, Isua chuan hma lam hun—a hun lai aṭanga kum sâng têl hial pawh—hriat theih châng a nei si a! Inring renga a awm a ngai tak zet em?’ tiin. (Mt. 24:37-39; Heb. 4:15) Inring renga awm a pawimawhna leh a hmanhmawhthlâk dân kan hriat theih nân chûng zawhnate chu i lo chhâng phawt ang u.
2 Entawn tûr siam ṭha famkim chu sual nei mihringte tân a ṭangkai ang em? Ṭangkai e, a chhan chu zirtîrtu ṭha hnên aṭang leh a entawn tûr siam aṭanga inzir theih a nih avângin. Entîr nân, mi pakhatin thal kah a zir hmasak ber lai chu han mitthla teh. A tum a kâp fuh thei miah lo va; mahse, zir zawm zêlin, a tichhin zêl a. Hmasâwn tûrin amah zirtîrtu, thal kah thiam tak kah dân chu ngun takin a zir a ni. Zirlai chuan amah zirtîrtu din dân te, a bân dah dân te, leh a kutzungṭang hmanga thal hrui a kawih dânte chu ngun takin a en a. Tlêm tê têin, thal hrui kawih nat chen tûr te, thli thâwt dânin thal a nghawng dân te chu a zir a, ṭan a la chho zêl a ni. Amah zirtîrtu a entawn zêl chuan a tum tak fuh teuh telh telh tûrin a thal chu a tin thei tial tial a. Chutiang bawkin, Isua kaihhruaina leh a entawn tûr siam ṭha famkim zuina hmangin Kristian ṭha nih kan tum zui zêl a ni.
3. (a) Engtin nge Isua chuan inring renga a awm a ngai tih a târ lan? (b) He thuziakah hian eng nge kan ngaihtuah ang?
3 Mahse, inring renga awm chungchâng chu eng nge ni? Isua chuan he mizia hi a mamawh tak zet em? A mamawh chiang hle a ni. Entîr nân, a lei lam nun tâwp dâwn zân khân, Isua chuan a tirhkoh rinawmte chu: “Mi vênpui rawh u,” tiin a ngên a. “Thlêmnaa in luh loh nân inring rengin ṭawngṭai rawh u,” tiin a sawi belh bawk a ni. (Mt. 26:38, 41) Englai pawhin inring rengin awm reng mah se, Isua chuan a mangan lai hian inring lehzuala awm a, a theih ang tâwka a Pa vâna mi hnaih tlat chu a duh a. A hnungzuitute chu, chu mi hun atân mai ni lo, nakin hun atân zêl pawha inring renga an awm a ngai tih a hria a ni. Chuvângin, Isua’n inring renga awm tûra min duh chhan i lo ngaihtuah ang u. Chu mi hnuah chuan, kan nî tin nunah inring renga awmna kawnga Isua kan entawn theih dân kawng thum kan bih chiang ang.
ISUA’N INRING RENGA KAN AWM A DUH CHHAN
4. Nakin hun tûr kan hriat lohna leh inring renga kan awm a ngaihna chu engtin nge a inkûngkaih?
4 A tâwi zâwnga sawi chuan, Isua’n inring renga kan awm a duh chhan chu kan thil hriatte leh hriat lohte vâng a ni. Mihring anga he leia a awm lai khân, Isua chuan nakina thil lo thleng tûr zawng zawng chu a hre vek em? Hre vek lo, inngaitlâwm takin heti hian a pawm a ni: “Chu mi nî leh a hun thu chu Pa chauh lo chuan tuman, vâna vântirhkohte pawhin, Fapa pawhin an hre lo,” tiin. (Mt. 24:36) Khatih lai khân, “Fapa,” Isua chuan he khawvêl suaksual tâwpna lo thlen hun tûr chiah chu a hre lo va. Tûnah keini’n kan hria em? Nakin hun tûr kan hriatna chu a beitham viau vem? Tehrêng mai! He kalhmang suaksual titâwp tûra Jehova’n a Fapa a rawn tirh hun tûr chiah chu kan hre lo. Hre ta ila, inring renga kan awm chu a ngai tak zet ang em? Isua hrilhfiah angin, tâwpna chu thâwk leh khatah rin loh taka a lo thlen dâwn avângin, inring renga kan awm a ngai a ni.—Matthaia 24:43 chhiar rawh.
5, 6. (a) Engtin nge nakin hun tûr leh Pathian thiltumte kan hriatna chuan inring renga kan awm a ngaihna chu a nghawng? (b) Setana chungchâng kan hriatna chuan engvângin nge inring renga awm tum lehzual tûra min chêttîr ang?
5 Kawng lehlamah chuan, Isua chuan a chhehvêla mite hriat miah loh, nakin hun tûr chungchânga thil ropui tam tak chu a hria a. Isua tluk chuan thil kan hre lo va; mahse, ama zârah Pathian Ram chungchâng leh chu miin nakin lawka a rawn hlen chhuah tûrte chu kan hre deuh ṭeuh a ni. School-ah a ni emaw, hnathawhna hmunah a ni emaw, a nih loh leh kan thu hrilhna bialah emaw pawh ni se, kan chhehvêl kan han en hian, mi tam zâwkte chuan hêng thutak ropui tak takte hi an hre lo tih kan hmu a ni lâwm ni? Chuvângin, inring renga awm chhan tûr dang kan nei a ni. Isua anga kan inrin reng a, Pathian Ram chungchânga kan thil hriatte mi dangte hnêna hrilh theihna hun remchâng kan zawn reng a ngai a. Chutiang hun remchâng tinte chu a hlut êm avângin, hmang ṭangkai lova awm chu kan duh lo a ni. Mite nunna hi a derthâwng si a!—1 Tim. 4:16.
6 Isua chuan inring renga awmtîrtu thil dang pawh a hria a. Ani chuan Setana’n amah thlêm thûk a, tiduhdah a, a rinawmna tihchhiatsak chu a tum tlat tih a hria a. Chu hmêlma hlauhawm tak chuan Isua fiah nân a “remchân hun” chu a zawng reng a ni. (Lk. 4:13) Isua chu a inthlahdah ngai lo. Thlêmna a ni emaw, dodâlna a ni emaw, a nih loh leh tihduhdahna a ni emaw pawh ni se, fiahna engpawh atân inring renga awm chu a duh a ni. Chutiang dinhmunah kan awm ve a ni lâwm ni? Setana chu ‘sakeibaknei rûm ṭhîn angin a ei theih tûr zawngin a la phi ruai’ reng tih kan hria a. Chuvâng tak chuan a ni, Pathian Lehkha Thuin Kristian zawng zawngte chu: “Ngaihven ula, fîmkhur rawh u,” tia a fuih ni. (1 Pet. 5:8) Mahse, engtin nge chutianga kan awm theih ang?
ṬAWNGṬAINA KAWNGA INRING RENGA AWM THEIH DAN
7, 8. Isua’n ṭawngṭaina chungchângah eng fuihna nge a pêk a, eng ang entawn tûr nge a siam?
7 Bible chuan thlarau lama harhvânna, a nih loh leh inring renga awmna leh ṭawngṭaina a inkûngkaih hnaihzia a sawi a. (Kol. 4:2; 1 Pet. 4:7) Amah vênpui tûra a hnungzuitute a tih hnu lawkah, Isua chuan: “Thlêmnaa in luh loh nân inring rengin ṭawngṭai rawh u,” tiin a sawi a ni. (Mt. 26:41) Dinhmun hrehawm tak an tawh lai chauhvin an ṭawngṭai tûr tihna a ni em? Ni lo ve, chu thurâwn chu nî tina kan nunpui tûr thu bul a ni.
8 Isua chuan ṭawngṭaina kawngah entawn tûr ṭha tak a siam a. Ṭum khat chu a Pa hnênah a ṭawngṭai zankhua tih i hre chhuak thei ngei ang. Thil awm dân chu mitthla i lo tum ang u. (Luka 6:12, 13 chhiar rawh.) Isua chu Galili ram, sangha manna khua Kapernaum bula a awm lai a nih ngei a rinawm a. Tlai lamah chuan, Isua chu Galili dîl hmuh theihna tlângah a lâwn chho a ni. Thim thet theta ram awm dân a han thlîr chuan, Kapernaum leh a bul hnai khuaa khâwnvâr chhit êng phe zauh zauhte chu a hmu ngei ang a. Mahse, Jehova hnêna a han ṭawngṭai ṭan chuan, a rilru a pe ding hle a. Hun a kalin, dârkar a liam zêl a. Tlâng hnuai khuaa khâwnvâr chhitte an timit hlawm tawh tih emaw, vâna thla kal delh delh emaw, a nih loh leh a bul hnai thingbuka zâna eizawng nungchate thâwm emaw chu a hre chang lo. A ṭawngṭaina chu thu tlûkna lian tham tak siam ngai—a tirhkoh 12-te thlan—chungchâng a ni deuh ber ang. A Pa hnênah a zirtîr tinte chungchânga a ngaihtuahna leh a rilru veizâwngte a phawrh chhuakin, kaihhruaina leh finna a dîl ngawrh hle ang tih chu kan mitthla thei a ni.
9. Zankhuaa Isua ṭawngṭaina aṭangin eng nge kan zir theih?
9 Isua entawn tûr siam aṭangin eng nge kan zir theih? Ṭawngṭai nân hun rei tak kan hmang tûr a ni tih hi em ni kan zir chu? Ni lo ve, a hnungzuitute chungchângah: “Thlarau zawngin a peih a, tisa erawh chu a chak lo a ni,” tia hre thiam taka a sawi avângin. (Mt. 26:41) Mahse, Isua kan entawn thei a. Entîr nân, thlarau lama keimahni, kan chhûngte, a nih loh leh kan Kristian unaute nghawng thei thu tlûkna engpawh kan siam hmain kan Pa vâna mi chu kan râwn em? Kan ṭawngṭainaah rinnaa kan unaute chungchâng kan telh em? Thu ngai chham nawn mai aiin, rilru tih tak zetin kan ṭawngṭai em? Isua chuan a Pa nêna innêl tak leh mi mal taka an inbiakna chu a hlut tih chhinchhiah bawk ang che. He buaina khawvêlah hian, thil pawimawh ber theihnghilh chu a awlsam hle a. Mahnia tih tak zeta ṭawngṭai nân hun tam tâwk kan insiam chuan, thlarau lamah kan harhvâng lehzual ang. (Mt. 6:6, 7) Jehova kan hnaih lehzualin, amah nêna kan inlaichînna tihngheh lehzual a, chu mi tichhe thei thil engpawh pumpelh chu kan duh hle ang.—Sâm 25:14.
THU HRILHNA KAWNGA INRING RENGA KAN AWM THEIH DAN
10. Isua’n thu hrilh theihna hun remchâng a dap reng tih eng entîrnain nge târ lang?
10 Isua chu Jehova pêk a hna chungchângah pawh inring rengin a awm a. Rilru pe vak lo chung pawha thawh theih, harsatna lian tham tak thlen chuang si lo hna ṭhenkhat a awm thei a. Mahse, hna tam tak chu thawh laia rilru pêk ding ngai leh harhvâng renga awm ngai a ni a, Kristian rawngbâwlna pawh chutiang chi chu a ni. Isua chu a hna chungchângah a harhvâng reng a, chanchin ṭha hrilh theihna hun remchâng a dap reng a ni. Entîr nân, Isua leh a zirtîrte chu zîng tûk puma an kal hnuah Sukar khua an va thleng a, zirtîrte chu ei tûr leiin an kal chhuak a. Isua chu tuichhunchhuah bulah chuan châwl hahdam tûrin a ṭhu a; mahse, harhvâng renga a awm avângin thu hrilh theihna hun remchâng a hmu a ni. Samari hmeichhe pakhat chu tui chawi tûrin a rawn kal a. Isua chuan hun rei lo te chhûng han chhîn zawk chu a thlang thei a. Titipui loh chhan tûrte pawh a ngaihtuah thei reng a ni. Mahse, chu hmeichhia chu titipui tûrin hma a la a, chu mi khuaa mi tam takte nghawngtu thu hrilhna thiltithei tak chu a nei ta a ni. (Joh. 4:4-26, 39-42) Nî tina kan hmuhte hnêna chanchin ṭha hrilh theihna hun remchâng dap nasa lehzualin, inring renga awmna kawnga Isua entawn tûr siam chu kan zui lehzual thei ang em?
11, 12. (a) Engtin nge Isua’n a hna aṭanga lâk pên tumtute chu a chhân lêt? (b) A hna chungchângah Isua’n eng ang inbûk tâwkna nge a târ lan?
11 Amah duhsaktute chuan Isua chu a rawngbâwlna aṭanga a rilru lâk pên tum châng an nei a. Kapernaum khuaah khân, Isua’n mak tak maia dam lote a tihdamnain mipui rilru a khawih êm avângin, an hnêna awm reng tûrin an duh a ni. Chu chu hriat thiam awm tak zawng a ni a. Mahse, Isua hna chu khaw khat chauh ni lovin, “Israel hnam berâm bo” zawng zawngte hnêna thu hrilh a ni a. (Mt. 15:24) Chuvângin an hnênah chuan: “Khaw dangahte pawh Pathian ram chanchin ṭha ka hril tûr a ni, chu mi avâng chuan tirh ka ni si a,” tiin a hrilh a ni. (Lk. 4:40-44) Isua’n a rawngbâwlna chu a nunah a ngai pawimawh ber a ni tih a chiang hle. Engmah a inkhawih buaitîr lo a ni.
12 Isua chu a hnaa a inpêk êm avângin sakhaw âtchilh bur mi emaw, sakhuana avânga hrehawm thei ang bera nung mi emaw a ni em? Rawngbâwlnaa a inhman êm avângin chhûngte mamawh hre lo khawpin a inla hrang em? Chutiang a ni lo, Isua chuan inbûk tâwkna kawngah entawn tûr ṭha famkim a siam a ni. Ani chuan nunna a ngaihlu a, ṭhiante nêna hun hlimawm tak hman chu nuam a ti a ni. Chhûngkuate chu a hlut a, an mamawh leh an buainate a hriat thiamzia a târ lang a, naupangte a ngainatna chu tîm miah lovin a târ lang a ni.—Marka 10:13-16 chhiar rawh.
13. Kan Lalram thu hrilhnaah engtin nge inring renga awmna kawnga Isua entawn tûr siam leh a inbûk tâwkna chu kan entawn theih?
13 Inring renga awmna kawnga Isua entawn tûr siam kan zui rual hian, engtin eng amah anga kan inbûk tâwk ve theih ang? He khawvêl hian kan rawngbâwlna ata min lâk pên chu kan phal lo va. Min duhsaktu ṭhiante leh chhûngkhatte’n kan rawngbâwlnaa inthlahdah deuh tûrin min ti emaw, nun pângngai an tih anga nung tûrin min ti emaw pawh ni se, rawngbâwlna ngaihthah chu kan duh lo. Isua entawnin kan rawngbâwlna chu chaw angin kan thlîr zâwk a ni. (Joh. 4:34) Kan rawngbâwlna chuan thlarau lama chak tûrin min ṭanpui a, min tihlim bawk. Mahse, a lutuk anga lan te, mahni intihfel te, a nih loh leh sakhuana avânga hrehawm thei ang bera nun te chu kan duh lo. Isua angin, “Pathian hlim” chhiahhlawh inbûk tâwk tak leh hlim tak nih chu kan duh a ni.—1 Tim 1:10, New World Translation.
FIAHNA HNUAIA INRING RENGA AWM THEIH DAN
14. Fiahna kan tawh laiin eng tih duhna nge kan do ang a, engvângin nge?
14 Kan hmuh tawh angin, inring renga awm tûra Isua fuihna hmanhmawhthlâk tak ṭhenkhat chu fiahna a tawh laia a pêk a ni a. (Marka 14:37 chhiar rawh.) Harsatna kan tawh laiin a entawn tûr siam chu kan mamawh lehzual a ni. Fiahna hnuaia an awm hian, mi tam tak chuan thu dik pawimawh tak, a pawimawh êm avânga Thufingte lehkhabuin vawi hnih lai a sawi lan chu an theihnghilh ṭhîn a ni: “Mi ngaiha kawng dik ni âwm taka lang a tâwp chu thihna kawng ni si a awm,” tih chu. (Thufingte 14:12; 16:25) A bîk takin harsatna khirh tak kan tawh laia mahni ngaihtuahna kan rinchhan chuan, mahni leh kan hmangaihte chu dinhmun hlauhawm taka kan dah mai a rinawm hle.
15. Chhûngkaw lû chuan sum leh pai lama harsatna hnuaiah eng thlêmna nge a tawh theih?
15 Entîr nân, chhûngkaw lû chuan ‘mahni chhûngte’ tisa lama enkawl tûrin nêksâwrna nasa tak a tâwk thei a. (1 Tim. 5:6) Ani chuan Kristian inkhâwm te, chhûngkuaa Pathian biakna te, leh thu hrilh rawngbâwlna te ngaihthahtîr thei hnate thawh châkna a nei thei a ni. Mihring ngaih dân ringawta a innghah chuan, chutiang hnate han thawh mai chu thiamawm tak leh dik tak angah a lang hial thei ang. Mahse, chu chuan thlarau lama dam lohna emaw, thihna emaw a thlen thei a ni. Thufingte 3:5, 6-a fuihna awm zawm chu a va ṭha zâwk dâwn êm! Chutah Solomona chuan: “I thinlung zawng zawngin LALPA ring la, nangma hriatnaah innghat suh; I kawng zawng zawngah amah hre reng la, i kawngte chu a kawhhmuh zêl ang che,” tih a sawi a ni.
16. (a) Isua’n mahni finna aia Jehova finna rinchhanna kawngah entawn tûr eng nge a siam? (b) Engtin nge chhûngkaw lû tam tak chuan harsatna tawh laiin Jehova rinchhanna kawnga Isua entawn tûr siam chu an zui?
16 Isua chuan fiaha a awm lai khân, mahni hriatnaa innghah chu a hnâwl ṭhak a ni. Han ngaihtuah teh! He leia nung dam tawh azawnga fing ber chuan mahni finnaa innghat loh a thlang a nih chu. Entîr nân, Setana’n a thlêm nawn ṭhin khân, Isua chuan: “Tih ziak a ni,” tiin a chhâng lêt fo a ni. (Mt. 4:4, 7, 10) Thlêmna do nân a Pa finna chu a rinchhan a; chutiang chuan Setana neih loh leh hmuhsit tak mizia, inngaihtlâwmna chu a târ lang a ni. Chutiang chuan kan ti ve em? Inring renga awmna kawnga Isua entawn tûr siam zuitu chhûngkaw lû chuan, a bîk takin hun khirh tak hnuaiah Pathian Thu a inkaihhruaitîr a ni. Khawvêl pumah hian chhûngkaw lû tam tak chuan chutiang chiah chuan an ti a. Anni chuan Pathian Ram leh biakna thianghlim chu khawvêl sum leh pai ai pawhin an nunah an dah hmasa a. Chutiang chuan an chhûngte chu kawng ṭha berin an enkawl a ni. Jehova chuan a Thu-in a tiam angin, tisa lama an chhûngkua enkawl tûra an thawhrimna chu mal a sâwm a ni.—Mt. 6:33.
17. Engin nge inring renga awmna kawnga Isua entawn tûr siam zui tûrin chêttîr che?
17 Isua chuan inring renga awmna kawngah entawn tûr ṭha ber a siam tih chu rinhlelh rual a ni lo. A entawn tûr siam chu a hman tlâkin, a ṭangkai a, nun chhanhimna a ni hial bawk. Setana chuan thlarau lama muthlu tûr, i rinna tichau tûr, biakna lama inthlahdah tûr, leh i rinawmna vawng lo tûra thlêm che chu a châk hle tih hre reng rawh. (1 Thes. 5:6) Ani chu hlawhtlintîr suh ang che! Ṭawngṭai kawngah te, thu hrilh kawngah te, leh fiahna i hmachhawn hunahte chuan Isua angin inring rengin awm rawh. Chu kawng i zawh chuan, he khawvêl tâna ni hnuhnûng tâwp dâwnah pawh hian nun hausa, nun hlim, leh hlawhtling tak i nei ang. Inring renga i awm chuan, Pu berin he khawvêl tâwpna a rawn thentîr hunah pawh harhvâng taka i awmzia leh a Pa duhzâwng i tihzia a rawn hmu ang. Jehova chuan i rinawmna avânga lâwmman pêk che chu nuam a va ti dâwn êm!—Thup. 16:15. (w12-E 02/15)
[Zirlai Atâna Zawhnate]
[Phêk 14-naa milem]
Isua’n tuichhunchhuaha hmeichhe hnênah thu a hril. Nî tina thu hril tûrin eng hun remchângte nge i insiam?
[Phêk 15-naa milem]
I chhûngkaw thlarau lam mamawh i enkawlna chuan inring renga i awmzia a târ lang
