Kohhrana Rilru Put Hmang Ṭha Chu Vênghim Rawh
Kohhrana Rilru Put Hmang Ṭha Chu Vênghim Rawh
“Lalpa Isua Krista khawngaihna chu in thlarau hnênah awm rawh se.”—PHIL. 4:23.
ENGTIN NGE . . .
kan unaute kan kawm laiin kohhrana rilru put hmang ṭha kan awmtîr theih?
thlawhhma rawngbâwlnaa ṭhahnemngaihna hmangin kohhrana rilru put hmang ṭha kan awmtîr theih?
upate hnêna thil sual lian tak tih hriattîrna hmangin kohhrana rilru put hmang ṭha kan awmtîr theih?
1. Engvângin nge Philippi khua leh Thuatira khuaa kohhrante chuan fak an hlawh?
KUM zabi khatnaa Philippi khuaa Kristiante chu an rethei hle a. Mahse, an thil phal a, an Kristian unaute chungah hmangaihna entawn tlâk tak an lantîr a ni. (Phil. 1:3-5, 9; 4:15, 16) Chuvângin, tirhkoh Paula chuan thlarauva thâwk khum a lehkha thawn khârnaah heti hian a ziak thei a ni: “Lalpa Isua Krista khawngaihna chu in thlarau hnênah awm rawh se,” tiin. (Phil. 4:23) Thuatira khuaa Kristiante pawhin chutiang bawk thlarau chu an lantîr avângin, chawimawia awm Isua Krista chuan: “I thiltihzia te, i hmangaihzia te, i rinzia te, i rawngbâwlzia te, i chhelzia te ka hria, i thiltih hnuhnûng berte chu atîra mi ai khân a nasa zâwk tih ka hre bawk,” tiin a hrilh a ni.—Thup. 2:19.
2. Kan kohhrana lang chhuak rilru put hmangah eng nge thawh ve kan neih?
2 Tûn laia Jehova Thuhretute kohhran tinte pawh hian chutiang thlarau, a nih loh leh rilru put hmang chu an lantîr a. Kohhran ṭhenkhat chu ngilneihna leh hmangaihna rilru put hmang an lantîr avânga hriat hlawh an ni a. Kohhran dangte chuan Lalram thu hrilhnaah ṭhahnemngaihna nasa tak neiin, hunbi kima rawngbâwlna an ngaihsânzia an lantîr a. A mi mal anga rilru put hmang ṭha kan neih hian, kohhranah inlungrualna kan awmtîr a, a tlângpui thuin thlarau lamah kohhran kan tihmasâwn a ni. (1 Kor. 1:10) Kawng leh lamah chuan, kan rilru put hmang ṭha lo chuan kohhranah thlarau lama mutthlûkna te, thlarau lama lum chang changna te, leh thil sual tih ngaihtheihna te thlengin a awmtîr thei a ni. (1 Kor. 5:1; Thup. 3:15, 16) In kohhrana lang chhuak rilru put hmang chu eng nge ni? Kohhran chhûngah rilru put hmang ṭha awmtîr tûrin a mi malin eng nge i tih theih?
RILRU PUT HMANG ṬHA AWMTIR RAWH
3, 4. “Inkhâwmna ropui takah” engtin nge Jehova chu lâwm thu kan hrilh theih?
3 Fakna hla phuahtu chuan Jehova hnênah: “Inkhâwmna ropui takah chuan lâwm thu ka hrilh ang chia: mi tam tak zîngah ka fak ang che,” tiin hla a sa a. (Sâm 35:18) Ani chu Pathian chhiahhlawh dangte zînga a awm lai pawhin Jehova fak lovin a awm lo. Vênnainsâng Zirna pawh tiamin chawlhkâr tina kohhran inkhâwma chhânna kan pêk leh kan rinna kan sawi chhuah hian, ṭhahnemngaihna rilru put hmang târ lanna hun remchâng ṭha tak kan nei tihna a ni a. Hetianga kan inzawh ṭheuh hi a ṭha a ni: ‘Inkhâwmnaa chhânna pêk theihna hun remchâng chu ka hmang ṭangkai em? Chûngte atân chuan ka inpuahchah ṭhain, chhânna awmze nei tak ka pe em? Chhûngkaw lû ka nih angin, ka fate chu chhânna pe tûra inpuahchah lâwk tûr leh mahni irâwm chhuaka chhânna pe thei tûrin ka ṭanpui em?’ tiin.
4 Fakna hla phuahtu Davida chuan kan thinlung nghehna chu kan hla sak nên a thlun zawm a. “Ka thinlung hi a nghet a ni, aw Pathian, ka thinlung hi a nghet a ni: hla ka sa ang, a ni, fakna hla ka sa ang,” a ti a ni. (Sâm 57:7) Kristian inkhâwmnaa hman hlate chuan Jehova tân thinlung nghet taka “fakna hla” sak theihna hun remchâng ṭha min pe a ni. Hla ṭhenkhat chu kan bel vak lo a nih chuan, engvângin nge Chhûngkuaa Pathian biakna neih zân hman laia kan zir ṭhin loh vang? ‘Kan dam chhûng zawnga LALPA chawimawia hla sak leh kan nun chhûng zawnga amah faka zai’ chu i tum tlat ang u.—Sâm 104:33.
5, 6. Engtin nge mi dangte chungah khualchhâwn thiamna leh thil phalna kan lantîr theih a, chutianga kan tihna chuan kohhranah eng nge a awmtîr?
5 Kan unaute chunga khualchhâwn thiamna lantîrna chu kohhrana hmangaihna rilru put hmang awmtîr theihna kawng dang a ni a. Hebrai mite hnêna a lehkha thawn bung tâwp berah, Paula chuan he fuihna hi a telh a ni: “Unau inhmangaihna hi awm zêl rawh se. Mikhualte chungah hmangaih chhuah theihnghilh suh u,” tih hi. (Heb. 13:1, 2) Bial kantute leh an nupuite, a nih loh leh kohhrana hunbi kima rawngbâwltute chaw eia kohna chu khualchhâwn thiamna lantîr theihna kawng ṭha tak a ni a. Hmeithaite leh nupa kawp chhawi loh chhûngkuaa mite chu chaw min kîlpui tûr emaw, chhûngkuaa Pathian kan biakna lo tel ve tûr emawin kan sâwm thei bawk.
6 Paula chuan Timothea hnênah mi dangte chu “thil ṭha ti tûrin, thil ṭha tih ngah tûrin, thil phala thawhlâwm peih tûrin, nunna, nunna taktak chu an vawn theih nân, hun lo thleng tûr atân chuan lungphûm ṭha tak an tâna khâwl khâwm” tûra fuih tûrin a ti a. (1 Tim. 6:17-19) Paula chuan a Kristian unaute chu thil phalna rilru put hmang nei tûrin a duh a ni. Kan retheih hle lai pawhin, thil phalna rilru put hmang chu kan awmtîr thei a. Chutianga kan tih theih dân kawng ṭha tak pakhat chu a mamawhte tâna thlawhhma rawngbâwlna leh inkhâwm kalna tûr ruahmansak hi a ni. Chutiang ngilneihna thiltih hlâwkpuitute chungchâng chu eng nge ni ve? Anni chuan vei vahna man to chho zêl phuhrûk nâna theih ang tâwk pêk vêna hmanga an lâwmna an lantîr chuan kohhranah rillru put hmang ṭha an awmtîr a ni ang. Chu bâkah, thlarau lama kan unaute nêna hun hmang tam lehzual tûra ruahmanna kan siam chuan anni chu mamawh leh hmangaih nia inhriatna a neihtîr dâwn lâwm ni? “Rinna chhûngte zînga mi chungah” thil ṭha kan tih a, kan hun leh thil neihte pêk kan inhuam chuan anmahni kan hmangaihna kan tinghet mai ni lovin, kohhrana ngilneihna leh rilru put hmang ṭha awm tûrin kan ṭanpui bawk a ni—Gal. 6:10.
7. Mi dangte mi mal thil thurûk anga vawn tlatna chuan engtin nge kohhrana lang chhuak rilru put hmang ṭha chu a vênhim?
7 Kristian unaute kan hmangaihna tinghettu thil dang leh hi han ngaihtuah teh: inṭhianna leh thurûk vawnna hi. (Thufingte 18:24 chhiar rawh.) Ṭhian dik takte chuan mi mal thilte chu thurûk angin an vawng tlat a. Kan unaute’n an thinlung chhûngril leh ngaihtuahnate min hrilh a, chûng thilte chu tlâng hriatah kan puangzâr dâwn lo tih an chian chuan, kan inhmangaihna awm sa chu a nghet lehzual ang. Thurûk vawng thei ṭhian rinawm tak nihna hmangin kohhranah chhûngkua anga inhmangaihna chu i awmtîr ang u.—Thuf. 20:19.
RAWNGBAWLNAAH ṬHAHNEMNGAI RAWH
8. Laodikei mite chuan eng zilhna nge an dawn a, engvângin nge?
8 Laodikei khaw kohhran hnênah, Isua chuan: “I thiltihziate ka hria, i vawh hek loh va, i lum hek loh hi; i vawh emaw i lum emaw ka duh a ni. Chutichuan lum si lova, vâwt si lova, i lum chang chang avângin ka kâ ata ka chhâk chhuak dâwn a che,” a ti a. (Thup. 3:15, 16) Laodikei mite chuan Kristian rawngbâwlnaah ṭhahnemngaihna an tlachham a ni. Chutiang rilru put hmang chuan an mi mal inlaichînna pawh a nghawng a ni thei. Chuvângin, Isua chuan hmangaih takin a zilh a ni: “Ka hmangaih apiangte chu ka zilhhauvin ka thunun ṭhîn; chutichuan ṭhahnem ngai la, sim rawh,” tiin.—Thup. 3:19.
9. Engtin nge thlawhhma rawngbâwlnaa kan ṭhahnemngaihna chuan kohhrana lang chhuak rilru put hmang chu a thunun?
9 Kohhrana rilru put hmang ṭha leh hrisêl awmtîr tûr chuan thlawhhma rawngbâwlnaa kan ṭhahnemngaihna chu kan ngaihsak tûr a ni. Kohhran ruahmannain a tum ber chu thu hrilhna bial chhûnga berâm ang mite zawn chhuah leh thlarau lama anmahni tihchak a ni a. Chuvâng chuan, Isua angin zirtîr siam hnaah ṭhahnemngai taka kan thawh a ngai a. (Mt. 28:19, 20; Lk. 4:43) Rawngbâwlnaa ṭhahnem kan ngaih poh leh “Pathian hnathawhpuite” anga kan inlungrualna a zual dâwn a ni. (1 Kor. 3:9) Thlawhhma rawngbâwlnaah mi dangte’n an rinna an humhim leh thlarau lam thil an ngaihhlutna an sawi chhuah kan hmuh hian, anmahni hmangaih a, zah lehzual tûra chêttîr kan ni a. Thlawhhmaa ‘rawng bâwl tlânna’ chuan kohhranah inlungrualna a awmtîr bawk a ni.—Zephania 3:9 chhiar rawh.
10. Rawngbâwlnaa kan thiamna tihmasâwn tûra kan thawhrimna chuan kohhrana mi dangte chungah eng nghawng nge a neih?
10 Rawngbâwlnaa kan thiamna tihmasâwn tûra kan thawhrimna pawhin mi dangte chungah nghawng ṭha a nei thei a. Kan mi tawnte kan ngaihsak lehzual a, kan thusawi ngaithlatute thinlung thleng ngei tûra hmasâwn kan tum tlat chuan, rawngbâwlnaa kan phûrna chu a pung dâwn a ni. (Mt. 9:36, 37) Chu chuan kan thawhpuite pawh a tiphûr ve ang. Isua chuan thu hril tûrin a zirtîrte chu a mal mal ni lovin, pahnih zêlin a tîr chhuak a. (Lk. 10:1) Chu chuan infuih tawnna leh inzirtîr tawn theihna hun a pêk mai bâkah, rawngbâwlnaa an phûrna pawh a tizual a ni. Lalram thuchhuahtu ṭhahnemngai takte nêna thawh tlânna chu kan hlut hle a ni lâwm ni? An phûrna chuan thu hrilh rawngbâwlnaah min fuihin, min chawk phûr a ni.—Rom 1:12.
PHUNNAWINA LEH THIL SUAL TIHNA LAKAH INVENG RAWH
11. Mosia hun lai khân Israel ṭhenkhatin eng rilru put hmang nge an neih a, chu chuan an chungah nghawng eng nge a neih?
11 Israelte chuan hnam thar anga an din hnu chawlhkâr engemaw zât lekah lungawi lohna leh phunnawina rilru put hmang an lantîr ṭan a. Chu chuan Jehova leh a aiawhtute laka helna a thlen a ni. (Ex. 16:1, 2) Israel mi Aigupta chhuahsantute zînga mi tlêm tê chauhvin Ram Tiam chu an hmu a. Mosia ngei pawh Israel mite rilru put hmang ṭha lo a chhân lêt dân avângin chu rama a luh chu phalsak a ni lo. (Deut. 32:48-52) Tûn laiah rilru put hmang ṭha lova kan tlûk luh loh nân eng nge kan tih theih?
12. Engtin nge phunnawi duhna rilru put hmang nei lo tûra kan invên theih?
12 Phunnawi duhna rilru put hmang lakah kan invêng tûr a ni a. Inngaihtlâwmna leh thuneitute zahna neihna chuan chutiang mi ni lo tûra min ṭanpui theih rualin ṭhian kawm tûr thlan chungchângah pawh kan fîmkhur a ngai bawk. Intihhlimna thlan dik lohna leh thu bul felte zahna nei lo kan hnathawhpuite emaw, kan school kalpuite emaw nêna hun hman tam lutukna chuan rah ṭha lo a chhuah ang. Rilru put hmang ṭha lo nei emaw, inlâk hran duhna rilru put hmang nei emawte kawm chin tâwk neih chu a finthlâk a ni.—Thuf. 13:20.
13. Mi tichhe thei tak phunnawina thununna chuan kohhranah thlarau lam chhiatna dang eng nge a thlen theih?
13 Mi tichhe thei tak phunnawina thununna chuan mi dangte thlarau lama chhiatna a thlen thei a. Entîr nân, phunnawina chuan kohhrana remna leh inlungrualna a tichhe thei a ni. Chu bâkah, unaute sawisêlna chuan an rilru a tihnat mai bâkah, inrêlna leh phuba lâkna sual thlengin a tihtîr duh thei bawk. (Lev. 19:16; 1 Kor. 5:11) Kum zabi khatna kohhrana phunnawitute chuan “Lalpa thuneihna chu an pawisa lo va, ropuinate an sawichhia a.” (Jud. 8, 16) Kohhrana mawhphurtute chunga phunnawi chîngte chuan Pathian pawm an hlawh lo chiang hle a ni.
14, 15. (a) Thil sual tih chinfel lohva kaltîrna chuan kohhran pum pui chungah nghawng eng nge a neih theih? (b) Mi tuemaw chuan a rûkin thil sual a ti tih hre ta ila eng nge kan tih ang?
14 Zu hman sualna te, saruak lem leh thuziak en te, a nih loh leh nungchang khaw lohna te ang chi sual lian takah tuemaw chu a inhnamhnawih tih hre ta ila engtin nge ni ang? (Eph. 5:11, 12) Thil sual tih laka kan mit tihdel luihna chuan Jehova thlarau hnathawhna tûr a dang theiin, kohhran chhûnga remna a tiderthâwng thei a ni. (Gal. 5:19-23) Korinth khuaa Kristian hmasate’n sual an thenfai a ṭûl ang chiahin, tûn laiah pawh kohhrana lang chhuak rilru put hmang ṭha leh hrisêlna vênhim nân mi tichhe thei thununnate chu kan dah bo a ngai a ni. Kohhrana remna awmtîr tûrin eng nge i tih theih?
15 Atîra kan târ lan tâk ang khân, thil ṭhenkhat chungchânga thurûk kan vawn chu a pawimawh a, a bîk takin mi dangte’n an rilru leh ngaihtuahna min hrilh hunah a ṭûl lehzual a ni. Mi tuemaw chungchânga thurûk thehdarh chu a dik lovin, a pawi hle! Chutiang chu ni mah se, thil sual lian tak tih a nih chuan Bible-in chûng thilte chingfel tûra a tih—kohhran upate—hriattîr tûr a ni. (Leviticus 5:1 chhiar rawh.) Chuvângin, unaupa emaw, unaunu emawin chutiang thil a ti tih kan hriat chuan, chu mi chu upate pan tûr leh an ṭanpuina zawng tûrin kan fuih tûr a ni a. (Jak. 5:13-15) Ani chuan hun engemaw ti chhûnga chutianga a tih loh chuan, keimahni’n kan hriattîr tûr a ni.
16. Engtin nge upate hnêna thil sual tih hriattîrna chuan kohhrana lang chhuak rilru put hmang ṭha chu a humhim?
16 Kristian kohhran chu thlarau lama himna hmun a ni a, upate hnêna thil sual tih hriattîrna hmangin kohhran chu kan vênghim tûr a ni. Upate’n thil sual titu chu a inhriat chhuahtîr a, ani chuan inchhîr a zilhna leh siam ṭhatna a pawm chuan, kohhran tân mi hlauhawm a ni tawh lo. Mahse, sual lian tak titu chu a inchhîr loh va, hmangaih taka upate zilhna a chhân lêt loh chuan engtin nge ni ang? Ani chu kohhran aṭanga hnawhchhuah tûr a ni. Chûng mite kan ‘pawl loh’ hian kan zînga mi tichhe thei thil chu tihbo a niin, kohhrana lang chhuak rilru put hmang ṭha pawh humhim a ni bawk a ni. (1 Korinth 5:11 chhiar rawh.) Ni e, kohhrana lang chhuak rilru put hmang humhim tûr chuan dik taka hma kan lâk ṭheuh va, upahote kan thawhpui a, kan Kristian unaute ṭhatna tûr kan vênhim ṭheuh a ngai a ni.
‘THLARAUVA INPUMKHATNA’ AWMTIR RAWH
17, 18. Engin nge ‘thlarau inpumkhatna vawng tûrin’ min ṭanpui ang?
17 Isua hnungzuitu hmasate chuan ‘zirtîra . . . ṭhahnemngai taka awmin’ kohhranah inlungrualna awm tûrin an ṭanpui a. (Tirh. 2:42) Pathian Lehkha Thua zilhna leh upate hnên aṭanga an dawn kaihhruaina chu an hlut a ni. Tûn laia upate chuan bawi rinawm leh fing tak pâwl an thawhpui avângin, kohhrana mi zawng zawng chu inlungrual taka awm tûra fuih leh ṭanpui an ni. (1 Kor. 1:10) Jehova inawpna pâwl aṭanga kan dawn Bible ṭanchhan zirtîrnaa kan intukluh a, upate kaihhruaina kan zui hian ‘remna phuarnaah chuan thlarau inpumkhatna vawng tûrin kan bei’ tih kan târ lang a ni.—Eph. 4:1-3.
18 Chuvângin, kohhrana rilru put hmang ṭha leh hrisêl chu vênghim tûrin i thawk ṭheuh vang u. Chutianga kan tih chuan ‘Lalpa Isua Krista khawngaihna chu kan thlarau hnênah a awm’ tih kan chiang thei ang.—Phil. 4:23. (w12-E 02/15)
[Zirlai Atâna Zawhnate]
[Phêk 24-naa milem]
Chhânna awmze nei tak pe thei tûra inpuahchahna hmangin rilru put hmang ṭha i awmtîr em?
[Phêk 25-naa milem]
Kan hlate hriat belna hmangin rilru put hmang ṭha awmtîr rawh
