Armageddon Chungchânga Thudik Chu
Armageddon Chungchânga Thudik Chu
‘Chûng ramhuai thlarau chu khawvêl zawng zawnga lalte hnênah an kal a, hmun pakhat Hebrai ṭawnga Har-Magedon an tihah chuan an hruai khâwm ta a.’—THU PUAN 16:14, 16.
ARMAGEDDON tih chu hmun hming a ni a, a châng chuan “Harmagedon” tia koh a ni bawk. Mahse, chu hmun chu he leia hmun awm tak tak niin a lang lo.
Chuti a nih si chuan, “Armagedon” tih thu mal awmze dik tak chu eng nge ni ta ang? Engvângin nge chu chu indona ang chi thilthleng nêna thlun zawm fo a nih?
Armageddon An Tihna Hmunah Hruai Khâwm An Ni
Atîra Hebrai ṭawnga Har–Magedon tih thu mal awmze dik tak chu, “Megido Tlâng” tihna a ni a. Chutiang tlâng chu awm tak tak lo mah se, Megido hmun chu a awm ngei a. Hmân lai Israelte chênna bial hmâr thlang lama kawngpui pali intawh khâwmna hmun pawimawh taka awm a ni. Chu mi hmun bul vêlah chuan indona pawimawh tam tak a thleng ṭhîn a. Chuvângin, Megido tih hming chu indona nêna thlunzawm a lo ni ta a ni. *
Mahse, Megido pawimawhna dik tak chu a indona lam ngawr ngawr ni lovin, chûng indonate a thlen chhan zâwk chu a ni. Megido chu Pathianin Israelte hnêna a pêk Ram Tiam zîngah a tel a. (Exodus 33:1; Josua 12:7, 21) Anni chu anmahni beitute laka vênhim a tiam a, a vênghim ta rêng a ni. (Deuteronomy 6:18, 19) Entîr nân, Kanaan Lal Jabina leh a sipai hotu Sisera’n Israel mite an rawn beih ṭuma Jehova’n mak taka Israelte a vênhimna hmun pawh kha Megido hi a ni.—Rorêltute 4:14-16.
Chuvângin, “Har–Magedon,” a nih loh “Armageddon” tih thu mal chuan entîr pawimawh tak a nei a. Chu chu, hmun pakhata pâwl chak tak pahnih indona nêna thlunzawm a ni.
Thu Puan bua hrilh lâwkna chuan nakin lawkah Setana leh a ramhuaihote’n mihring sawrkârte chu an sipaite hruaikhâwm tûra chêttîrin, Pathian mite leh an rawngbâwlna hmusit taka an beih tûr thu a sawi a. Pathianin chutianga beitute a beih lêt hun chuan mi maktaduai tam tak an boral ang.—Thu Puan 19:11-18.
Engvângin nge Bible-in Pathian “lainatnaa khat, thin nel, ngilneihna ngah” tia koh chuan mi tam takte chu a tihboral ang? (Nehemia 9:17) Chu mi hriat thiam nân, hêng zawhna pathumte hi kan chhân a ngai a ni: (1) Tuin nge indona ṭan? (2) Engvângin nge Pathian a inrawlh? (3) Chu indona chuan he lei leh a chhûnga chêngte chungah eng nghawng kumkhaw daih nge a neih dâwn?
1. TUIN NGE INDONA ṬAN?
Armageddon indona chu Pathian tharum thawhna thiltih a ni lo va, mi ṭhate chu anmahni tihchhiat tumtute laka a humhimna a ni zâwk a ni. He indonaa thinura tharum thawhtute chu “khawvêl zawng zawnga lalte,” khawvêl hruaitute hi an ni. Engvângin nge indona a chhuah? A chhan chu Setana’n milem pawh chêt theih ang maia sawrkârte leh sipaite chu thununin, Pathian Jehova betute bei tûra a la chawh thawh dâwn vâng a ni.—Thu Puan 16:13, 14; 19:17, 18.
Tûn lai ram ṭhenkhatah, zalên taka thusawi theihna leh sakhaw vawn theihna sawi uar hle a nih avângin, sawrkârte’n sakhaw lam thiltih engpawh an khap emaw, an nuai bo emaw chu rin harsa tak a ni ngei ang. Mahse, chutiang beihna chu kum zabi 20-na chhûng khân a thleng a, tûnah pawh a thlêng mêk zêl a ni. * Chuti chung pawhin, tûn hmaa beihna leh Armageddon nêna inkûngkaiha beihna inkârah chuan a lo berah pawh inan lohna lian tham pahnih a awm a. A pakhatnaah chuan, beihna chuan khawvêl pum a huap dâwn a ni. A pahnihnaah chuan, Pathian Jehova chhân lêtna chu tûn hmaa a chhân lêt dân aiin a nasa zâwk hle dâwn a. (Jeremia 25:32, 33) Bible chuan chu inbeihna chu ‘Pathian Engkimtithea ni ropuia indona’ tiin a ko a ni.
2. ENGVANGIN NGE PATHIAN A INRAWLH?
Jehova chuan amah betute chu remna duh tûr leh an hmêlmate pawh hmangaih tûrin a hrilh a. (Mika 4:1-3; Matthaia 5:43, 44; 26:52) Chuvângin, he beihna râpthlâk tak a lo thlen hunah chuan inhumhim nân hriamhrei an lek lo vang. Pathian chu a mite chhanhim tûrin rawn inrawlh lo sela chuan anni chu an mang vek ang a, Pathian hming chu nasa taka tihchhiat a ni dâwn a ni. Hmêlmate’n A mite an tihmang vek theih chuan, chu chuan Jehova chu hmangaihna nei lo, rorêl dik lo, a nih loh leh thiltithei lo angin a lantîr dâwn a. Chutiang thil chu thleng thei rual a ni si lo!—Sâm 37:28, 29.
Pathian chuan tuma boral a duh loh avângin, a thil tih tûr chungchângah vaukhânna chiang tak a pe lâwk a. (2 Petera 3:9) Bible-a thuziak vawn ṭhatte hmangin, ani chuan tûn hma pawhin a mite beihna chu a lo chhâng lêt ṭhîn tih mi zawng zawng hnênah a hriattîr a ni. (2 Lalte 19:35) Bible chuan Setana leh milem pawh chêt theih ang maia a thunun mihringte’n Pathian mite an beih hunah Jehova chu a mite chhanhim tûrin a rawn inrawlh leh dâwn tih min vaukhân bawk. Dik takin, Bible chuan Pathian Jehova’n mi suaksualte a tiboral dâwn tih hun rei tak ata a lo sawi lâwk tawh a ni. (Thufingte 2:21, 22; 2 Thessalonika 1:6-10) Chutih hunah chuan, a beitute chuan rinhlelh rual lohvin Engkimtitheia an lo do reng a ni tih an hre chhuak ngei ang.—Ezekiela 38:21-23.
3. CHU INDONA CHUAN KUMKHAW DAIH NGHAWNG ENG NGE A NEIH DAWN?
Armageddon indona chuan mi maktaduai têlte nunna chu a chhanhim ang. Dik takin, chu chu leia inremna hun inṭanna tûr a ni.—Thu Puan 21:3, 4.
Thu Puan bu chuan he indonaa dam khawchhuak tûr chhiarsên loh “mipui tam tak” chungchâng a sawi a. (Thu Puan 7:9, 14) Hêng mite hian, Pathian kaihhruaina hnuaiah atîra Jehova thiltum angin he lei hi Paradis-a chantîrnaah an ṭanpui ang.
Pathian mite chunga he beihna a lo thlen hun tûr chu kan hria em? (w12-E 02/01)
[Footnote-te]
^ par. 6 Hmun engemaw indona nêna thlunzawm chu thil vâng a ni lo. Entîr nân, atom bomb-in a tihchiat Japan khawpui Hiroshima chu tûnah chuan nuclear indona hlauhawmzia chhinchhiah nâna hman a ni.
^ par. 13 Indopui Pahnihna chhûnga Nazi hovin Judate an suatna chu sawrkâr pakhatin sakhua leh hnam tênaute tihbo vek tuma a beihna pakhat a ni a. Soviet hun lai chuan U.S.S.R. rama sakhaw pâwlte chu nasa taka nêk chêp an ni bawk. Jehova Thuhretute tihchhuah Vênnainsâng (English) May 1, 2011-a lang, “Remna Duh Mite Chuan An Hming Ṭha An Humhim,” tih thuziak chu en rawh.
[Phêk 6-naa milem]
Pathian Jehova chuan tûn hmain a mite a lo humhim tawh ṭhîn
[Phêk 7-naa milem]
Jehova chuan Armageddon indonaah a mite chu a humhim leh ang