Armageddon Indona Chu Engtikah Nge A Lo Thlen Dâwn?

“Ka han en a, tin, ngai teh, mipui tam tak tuma chhiar sên loh, hnam tin zînga mi te, chi tin zînga mi te, mi tin zînga mi te, ṭawng tin zînga mi te . . . ka hmu a . . . hêng hi hrehawm nasa tak ata chhuakhote kha an ni.”—THU PUAN 7:9, 14.

ARMAGEDDON indona atân ruahmanna siam fel a ni ta. Engtin nge a nih?

Tûnah chuan Jehova rawng bâwl a, Bible nungchang tehna sâng takte mila nung khawvêl pum huap pâwl pakhat a awm reng tawh a. Pathian ṭanpuinain hnam tin, chi tin, leh ṭawng tina mi maktaduai têlte chu inunauna duhawm tak leh lungrual tak siam tûrin an kal khâwm mêk a. Chu inunauna chu Jehova Thuhretute zîngah a awm a ni.—Johana 13:35.

Rei lo têah Setana chuan a sipaite chu hruai khâwmin, chhantu nei lo anga lang hêng remna duh mite a beihna nasa ber chu a rawn ṭan ang. (Ezekiela 38:8-12; Thu Puan 16:13, 14, 16) Chu chu engtin nge i chian theih? Bible chuan Armageddon indona lo thlen hun hre thei tûra min ṭanpuitu tûr thilthleng engemaw bîk takte chu a târ lang a. Chûng thilthleng tûr a sawite zînga tam tak chu a thleng famkim der tawh a ni.

Thil Thleng Famkim Tawh I Hmuhte

Isua zirtîrte chuan a hnênah “khawvêl tâwpna” a hnai tih an hriat theih dân tûr an zâwt a. (Matthaia 24:3) Isua chuan: “Hnam hrang leh hnam hrang an indo vang a, ram hrang leh ram hrang an indo vang a; hmun hrang hrangah ṭâmte a tla ang a, lîrte a nghîng ang,” tia chhângin, chutiang thil a thlen hun tûr chu a sawi a. Tichuan, heti hian a sawi a ni: “Chûng zawng zawng chu nau vei ṭantirhna a ni,” tiin. (Matthaia 24:7, 8) Tirhkoh Paula chuan chu mi hun vêk chu ‘ni hnuhnûngte’ tiin a sawi a, chûng nîte chu “hun khirh takte” a ni ang tih a sawi bawk a ni. (2 Timothea 3:1) Chûng hrilh lâwknaa târ lan thilte chu a thleng famkim mêk niin i hria em?

Engvângin nge chu chu hun khirh tak a nih ang? Tirhkoh Johana chuan a chhan a sawi a  ni. Ani chuan Setana leh a ramhuaihote’n he lei chung chauhva thil an tih theih hun tûr “hun tlêm tê” chungchâng chu a sawi lâwk a. Chu mi hun chhûng chuan Setana chu ‘thinur êm êm’ anga sawi a ni bawk. (Thu Puan 12:7-12) Hmun khatah mai ni lo, khawvêl hmun tina mite hian thinurna leh tharum thawh duhna rilru put hmang an nei niin i hria em?

Isua pawhin he hun khirh tak chhûng hian hna ropui tak thawh chhuah a ni ang tih a sawi bawk a. “He [Pathian] ram chanchin ṭha hi hnam zawng zawng hriattîrna tûrin khawvêl zawng zawngah hrilhin a awm ang; chu mi zawhah chuan tâwpna chu a lo thleng ang,” tiin a sawi a ni. (Matthaia 24:14) Tûnah hian Jehova Thuhretute chuan ram 235 aia tamah ṭawng 500 aia tamin Pathian Ram chanchin ṭha chu an hril a. An tih chhuah Bible ṭanchhan thu leh hla chhuah pahnih Vênnainsâng leh Awake! magazine-te hi khawvêla sem chhuah tam ber a ni. Thuhretute chuan ṭawng 100 vêlin Bible an letling tawh bawk. An hna hi mahnia inpete’n an thawk a, phal taka pêk thawhlâwm hmanga chhawmdâwl a ni. He thu hrilhna chhinchhiah tlâk tak hi Isua hrilh lâwkna thlen famkimna a ni thei ang em?

Bible chuan Pathian Jehova leh amah dotute inkâra indona a thlen hma lawka thilthleng tûrte pawh a sawi bawk a. A thlen famkimna kan la hmuh tûr chutiang hrilh lâwkna pathum i lo ngaihtuah ang u.

A Thlen Famkimna I La Hmuh Thuai Tûrte

Hrilh Lâwkna 1-na. Bible chuan hnamte’n “muanna leh himna” tih thu puan chhuah chhinchhiah tlâk tak an puang dâwn tih a sawi a. Anni chuan buaina liam tham tak takte chingfel ṭêp tawh niin an inhre mai thei. Mahse, chu thu puan chhuah chu muanna rêng rêngin a zui lo vang.—1 Thessalonika 5:1-3.

Hrilh Lâwkna 2-na. A dawtah chuan, sawrkâr hrang hrangte chuan khawvêl sakhaw pâwlte beih chu an tum ang a. Bible-ah chuan, chûng sawrkârte chu sakawlh hmanga entîr a ni a; khawvêl sakhaw dik lo chu sakawlh chunga chuang hmeichhia chuan a entîr a ni. (Thu Puan 17:15-18) Entîr nei sakawlh chuan Pathian aiawh anga dik lo taka inchhâl sakhuate tiboralin Pathian duhzâwng chu tum lo deuhvin a ti ang.

Tirhkoh Johana chuan entîrna hmangin heti hian a târ lang a ni: “Ki sâwm i hmuh leh sakawlh ngei chuan nawhchizuar chu an hua ang a, engmah nei lo leh saruakin an siam ang a, a sa pawh an ei ang a, meiin an hâl ral ang. . . . A duhzâwng an tihna . . . tûrin Pathianin an thinlungah a tîr si a,” tiin.—Thu Puan 17:16, 17.

Hrilh Lâwkna 3-na. He sakhaw dik lo beihna hlawhtling tak hnuah, Setana chuan Pathian Jehova betute bei tûrin hnamte chu a hruai khâwm ang.—Thu Puan 7:14; Matthaia 24:21.

Engtin Nge A Nghawng Dâwn Che?

Bible zir chianna hun remchâng i la nei lo a nih chuan, kan sawi tâk thilte a lo thleng ngei dâwn tih rin chu harsa i ti mai thei a. Mahse, chûng thilte chu akip akawiin a lo thleng ngei ang tih leh nakin lawkah a lo thleng dâwn tih rinna tûr chhan ṭha tak a awm a ni. Bible hrilh lâwkna thleng famkim tawh tam takte chuan chutianga rin theihna tûr chhan ṭha chu min pe a ni. *

Jehova Thuhretute’n ‘Pathian Engkimtitheia ni ropuia indona’ a hnai tawh tih an rin nachhan leh chu mi nî chu i hlauh a ngaih loh chhan hre thiam tûrin engvângin nge hun i insiam loh vang? Anni chu Pathian Jehova vênhimna dawngtute zînga mi i nih theih nâna tih ngai nia Bible-in a sawite chu sawipui tûr chein sâwm ang che. (Thu Puan 16:14) I thil zirte chuan nakin hun i thlîr dân chu a thlâk danglam mai thei asin. (w12-E 02/01)

[Footnote]

[Phêk 8-naa thu lâk chhuah]

Jehova Thuhretute rawngbâwlna hi Bible hrilh lâwkna thlen famkimna a ni thei ang em?