Armageddon Mi Ṭhenkhat Sawi Dân Chu Eng Nge Ni?

“Hmun pakhat Hebrai ṭawnga Har–Magedon an tihah chuan an hruai khâwm ta a.”—THU PUAN 16:16.

“ARMAGEDDON” tih thu mal i han hriat hian i rilruah eng nge lo lang? Chhiatna râpthlâk tak a lo lan ngei a rinawm. He thu mal hi Bible-ah vawi khat chauh lang mah se, chanchin thar theh darhtute leh sakhaw hruaitute chuan an sawi châmchi ṭhîn a ni.

Armageddon chungchânga ngaih dân lâr takte chu Bible zirtîrna nên a inmil em? A chhânna hriat chu manhla tak a ni. Engvângin nge? Armageddon chungchânga thu dik hriatna chuan ṭûl lo taka hlauhna ata a chhuah zalen theih che mai bâkah, i hma lam hun a tihên theih a, Pathian chungchânga i ngaih dân pawh a thunun theih bawk avângin.

A hnuaia zawhna pathumte hi ngaihtuahin, Armageddon chungchânga ngaih dân lâr takte leh Bible zirtîr dân dik takte chu khaikhin ang che.

 1. ARMAGEDDON HI MIHRINGTE THLENTIR CHHIATNA A NI EM?

Chanchinbu mite leh zir chîk mite chuan “Armageddon” tih thu mal chu mihringte thlentîr chhiatna râpthlâk tak sawi nân an hmang fo va. Entîr nân, Khawvêl Indopui I-na leh II-na chu Armageddon anga sawi a ni. Chûng indopuite hnuah chuan mite chuan United States leh Soviet Union-te chu atom bomb-a an inbeih mai an hlau hle a. Indona chhuak mai thei chu dinhmun chu chanchinbu mite chuan “thermonuclear Armageddon” tiin an ko a ni. Tûn laiah, leilung bawlhhlawhnain sik leh sa nasa taka a tihdanglam hlautu, zir chîk mite chuan “climate Armageddon” a lo thleng dâwn tiin an vaukhân ve bawk.

An sawi dân chuan: Mihringte hian leilung leh a chhûnga chêng zawng zawngte thunun theihna sâng ber an nei a. Sawrkârte’n fing taka thil an tih loh chuan leilung hi a chhe hlen ṭhak ang.

Bible zirtîrna chu: Mihringte’n leilung an tihchhiat chu Pathianin a phal lo vang. Bible-in Pathian Jehova * chuan leilung hi “engmah lovah a siam lo” tih min hrilh chiang a. Ani chuan: “Mihring awm nân a din zâwk a ni.” (Isaia 45:18) Pathian chuan he leilung hi mihringte tihchhiata a awm chu a phal lo vang a, ‘lei tichhetute chu a tichhe’ zâwk ang.—Thu Puan 11:18.

2. ARMAGEDDON TIH HI LEILUNG CHHIATNA A NI EM?

Chanchinbu mite chuan leilung chhiatna râpthlâk tak sawi nân “Armageddon” tih thu mal hman châng an nei a. Entîr nân, kum 2010 khân, report pakhat chuan “Haiti Rama ‘Armageddon’” chungchâng a sawi a. Chu chu, Haiti ram tichhetu lîrnghîng râpthlâk tak avânga awm hrehawm tawrhna te, chhiatna te, leh nun chânnate chungchâng a sawina a ni. Chanchin thar lakhâwmtute leh film siamtute chuan he thu mal hi thilthleng tawhte mai ni lovin, a lo thlen mai an hlauh takte sawi nân pawh an hmang bawk. Entîr nân, “Armageddon” chu arsi thlâwkin lei a rawn suta thil awm dân tûr nia an ngaihruatte sawifiah nân an hmang a ni.

An sawi dân chuan: Armageddon chu pawisawi lote pawh thliar chuang lo va tihlum hmiah hmiahtu thilthleng hi a ni a. Mahni invên nân tihtheih i nei mang meuh lo.

Bible zirtîrna chu: Armageddon chu thliar bîk nei lova mite tihlumtu thilthleng a ni lo. Chutih ahnêkin, Armageddon a lo thlen hun chuan mi suaksualte chauh tihboral an ni ang. Bible chuan nakin lawkah, “mi suaksual chu a awm tawh dâwn si lo: a ni, a awmna hmun chu en en mah la, a awm tawh lo vang” tih min tiam a ni.—Sâm 37:10.

3. PATHIANIN ARMAGEDDON-AH HE LEI HI A TICHHIA ANG EM?

Sakhaw mi tam tak chuan, sual leh ṭha inhmachhawnna hun tâwp ber a lo thleng ang a, chu chuan kan chênna khawvêl hi a tichhe vek ang tih an ring a ni. Princeton Survey Research Associates-in United States-a ngaih dân lâkkhâwmna a neihah puitling zaa 40-te chuan “Armageddon indonaah” he khawvêl hi a boral an ring a ni.

 An sawi dân chuan: Mihringte hi he leia chatuana nung tûra siam an ni lo va, kan lei pawh hi chatuana awm tûra duan a ni hek lo. Pathian chuan mihringte hi engtik hun emawa thi vek tûrin a siam a ni.

Bible zirtîrna chu: Bible chuan Pathianin “leilung nghahchhante chu a phûm a, kumkhuaa a nghîn loh nân,” tih chiang takin a sawi. (Sâm 104:5) Leilung luahtute chungchângah chuan Bible-in heti hian a sawi a ni: “Mi felte chuan ram hi an luah ang a, a chhûngah hian kumkhuain an awm ang,” tiin.—Sâm 37:29.

Bible chuan Armageddon chungchânga ngaih dân lâr tam tak a kalh tih a chiang hle. Chuti chu, thu dik eng nge ni ta ang? (w12-E 02/01)

[Footnote]