Mite Chu ‘Thoharh’ Tûrin Ṭanpui Rawh
Mite Chu ‘Thoharh’ Tûrin Ṭanpui Rawh
“Tûn lai thil awmzia in hriat avâng leh muhîl thawhharh a hun tawh tak zet tih in hriat avângin.”—ROM 13:11.
KAN HRILHFIAH THEI EM?
Engvângin nge Kristiante tân thlarau lama harhvân a pawimawh?
Engvângin nge rawngbawltu harhvângte chuan ngaithla a, thil an chîk?
Kan rawngbâwlnaah ngilneihna leh dimdâwihna chuan eng hmun nge a chan?
1, 2. Eng kawngin nge mi tam tak chu an thawhharh a ngaih?
KUM tin hian mi sâng têlte chu motor khalh laia an mut a chhuah emaw, an mutthlûk hial emaw avângin an boral a. Mi dangte chuan an thawh hma loh vâng emaw, hnathawhna hmuna an mutthlûk vâng emawin hna an chân bawk. Mahse, thlarau lama mutthlûkna chuan chu aia nghawng pawi zâwk chu a nei a. He thil pawimawh tak chungchângah hian a ni, Bible chuan: “Inringa puan veng chu a eng a thâwl e,” a tih ni.—Thup. 16:14-16.
2 Jehova ni ropui a lo hnaih telh telh hian, mi nâwlpuite chu thlarau lamah an muhîl a. Kristianna rama hruaitu ṭhenkhat phei chuan an berâmte chu ‘mut heh tak’ angin an sawi a ni. Thlarau lama muthilhna chu eng nge ni? Engvângin nge Kristian dikte chu inring reng, a nih loh leh harhvâng renga an awm a pawimawh? Engtin nge mi dangte chu chutiang muthilhna ata thoharh tûra kan ṭanpui theih?
THLARAU LAMA MUTHILHNA—ENG NGE A NIH?
3. Thlarau lama harhvâng lote chungchâng chu engtin nge i sawi ang?
3 Muhîlte chu a tlângpui thuin an che châng lo va. Chu mi nêna inkalhin, thlarau lama muhîlte chu thlarau lam thilah ni lovin, thil dangah an buai hle thei a ni. Anni chu nî tin nun lungkhamin, nawmsakna te, hming thanna te, a nih loh leh hausakna te ûmnaah chuan an inhmang pawh a ni thei. Hêng thiltih zawng zawnga inhmangin, thlarau lam thil chu an ngaihsak mang lo. Mahse, thlarau lam thila harhvângte chuan ‘ni hnuhnûngah’ kan nung a ni tih an hriat avângin, Pathian duhzâwng tihnaah theih tâwp chhuahin an inhmang a ni.—2 Pet. 3:3, 4; Lk. 21:34-36.
4. “Mi dangte angin i muhîl suh ang u,” tih fuihnain a sawi tum chu eng nge ni?
4 1 Thessalonika 5:4-8 chhiar rawh. Hetah hian tirhkoh Paula chuan ringtute chu ‘mi dangte anga muhîl lo’ tûrin a fuih a. Eng a tihna nge ni? Kan ‘muthilh’ theih dân kawng khat chu, nungchang lama Jehova tehnate ngaihthah hi a ni a. Kan ‘muthilh’ theih dân kawng dang chu Jehova’n Pathian ngaihsak lo mite a tihboral hun a hnai tawh tih ngaihthah hi a ni. Chutiang Pathian ngaihsak lo mite nun kawng leh rilru put hmangte chu kan inthununtîr tûr a ni lo.
5. Thlarau lama muhîlte chuan eng ang rilru put hmang nge an neih?
5 Mi ṭhenkhat chuan an chunga rorêltu tûr Pathian awm lovah an ngai a. (Sâm 53:1) Mi dangte chuan Pathian hian mihringte hi a ngaihsak lo va, chuvângin, amah ngaihsakin awmzia a nei lo niin an hre bawk. Mi dang lehte chuan eng kohhran emaw ber vawnna chuan Pathian ṭhiana min siam an ring ve bawk. Chûng zawng zawngte chu thlarau lamah an muhîl a. Anni chu an thawh harh a ngai a ni. Engtin nge anni chu kan ṭanpui theih ang?
KAN HARHVANG RENG TUR A NI
6. Engvângin nge Kristiante chuan thlarau lama harhvân reng an tum ang?
6 Mi dangte kai harh tûr chuan keimahni kan thawhharh a ngai a ni. Chutah chuan eng nge tel? Pathian Thu chuan entîr nei muthilhna chu zu in buai te, zu ruih te, hur te, inngaih te, insual te, leh inîtsîk ang chi “thima thiltih” nên a thlunzawm a ni. (Rom 13:11-14 chhiar rawh.) Chutiang nungchangte pumpelh chu a harsat mai thei a. Invên reng a ngai a ni. Motor khalh laia mutthlûk palh a hlauhawmzia ngainêptu chuan a nun chu dinhmun hlauhawm takah a dah a ni. Kristiante tân chuan thlarau lama muthilhnain thihna a thlen theih tih hriat chu a va pawimawh tak êm!
7. Engtin nge mite thlîr dân dik lo neihna chuan min nghawng theih?
7 Entîr nân, Kristian tuemaw chuan a thu hrilhna bial chhûnga mi zawng zawngin chanchin ṭha an hnâwl ṭhak niin a hre mai thei a. (Thuf. 6:10, 11) Ani chuan heti hian a chhût mai thei, “Tuma’n an chhân lêt dâwn si loh chuan engah nge mite hnêna thu hrilh tûr emaw, ṭanpui tûr emawa ka thatho viau ang?’ tiin. Mi tam takte chu tûnah thlarau lamah an muhîl mêk pawh a ni ngei ang; mahse, an dinhmun leh rilru put hmang chu a inthlâkthleng hlauh thei a. Mi ṭhenkhat chuan tho harhin, an chhâng lêt a ni. Mite ngaihven tûr zâwnga Lalram thuchah hrilh theih dân kawng tharte tihchhinna hmanga keimahni kan harhvân reng chuan anni chu kan ṭanpui thei ang. Harhvâng taka awm reng tûr chuan kan rawngbâwlna pawimawhzia kan inhriatnawntîr reng a ngai a ni.
ENGIN NGE KAN RAWNGBAWLNA CHU PAWIMAWH TAK NIHTIR?
8. Engvângin nge kan Kristian rawngbâwlna chu a pawimawh êm êm?
8 Tûna mite chhân lêt dân chu engpawh ni se, kan thu hrilhna chuan Jehova a chawimawi a, a thiltum hlen chhuahnaah hmun pawimawh tak a chang a ni. Nakin lawkah, chanchin ṭha awih duh lotute chuan hremna an tuar ang a. Mite’n kan thu hrilhna an chhân lêt dân azirin an chung thu chu rêl a ni ang. (2 Thes. 1:6-10) Chu bâkah, “mi felte leh fel lote thawhlehna a awm” dâwn tho avângin, theih tâwpa thu hrilh a ṭûl lo tia ngaih dân siam chu Kristian tân a dik lo hle ang. (Tirh. 24:15) “Kêl” anga ruatte chu “kumkhaw hremnaah” chuan an kal ang tih Pathian Thu aṭangin kan hre thiam a ni. Kan thu hrilhna chuan Pathian khawngaihna a târ lang a, mite chu ‘kumkhaw nunna’ chang thei tûra insiam ṭhat theihna kawng a hawnsak a ni. (Mt. 25:32, 41, 46; Rom 10:13-15) Thu kan hrilh loh chuan, engtin nge mite’n nunna pe thei thutak hriat theihna hun remchâng an neih ang?
9. Engtin nge chanchin ṭha hrilhna chu nangmah leh mi dangte’n in hlâwkpui theih?
9 Chanchin ṭha hrilhna chu keimahni ngei pawhin kan hlâwkpui a. (1 Timothea 4:16 chhiar rawh.) Jehova leh Lalram beiseina chungchâng sawi chhuahna chuan Pathian i rinna leh amah i hmangaihna chu a tinghet zual a ni lâwm ni? Chu chuan Kristian miziate nei chho zêl tûrin a ṭanpui che a ni lâwm ni? Rawngbâwlnaa tela Pathian i ngaihsakzia târ lanna chuan i hlimna a belhchhah a ni lâwm ni? Mi dangte hnêna thutak zirtîr theihna chanvo neitute chuan an zirpuite’n nuna hmasâwnna nei tûra Pathian thlarau ṭanpuina an hmuhna aṭangin hlimna an nei a ni.
THIL CHIK MI NI RAWH
10, 11. (a) Engtin nge Isua leh Paula chuan harhvâng tak leh thil chîk mi an nihzia an târ lang? (b) Harhvânna leh thil chîk mi nihna chuan kan rawngbâwlna a tihhmasâwn theih dân târ lang rawh.
10 Mite chanchin ṭha ngaihvenna chu kawng chi hrang hranga kaihthawh theih a ni a. Chuvângin, Kristian rawngbâwltute chu an harhvângin, thil chîk mi an ni tûr a ni. He mi kawngah hian Isua chu kan entawn tûr a ni a. Mi ṭha famkim a nih angin, ani chuan Pharisaite thinrimna sawi chhuah loh te, hmeichhe suaksual inchhîr tak zetna te, leh hmeithai pakhat inpêkna rilru te chu a hre thei a ni. (Lk. 7:37-50; 21:1-4) Isua chuan mi tinte thlarau lam mamawh chu a chhâng lêt thei a. Mahse, Pathian chhiahhlawhte tân thil chîk mi ni tûrin an ṭhat famkim kher a ngai lo. Chu chu tirhkoh Paula chuan a târ lang a. Hnam hrang hrang leh mize hrang hrang neite rilru la thei tûr zâwngin a thusawite chu a siamrem a ni.—Tirh. 17:22, 23, 34; 1 Kor. 9:19-23.
11 Isua leh Paula te anga harhvâng tak leh thil chîk mi nih tum tlatna hmangin, kan mi tawhte tuina chawh thawh dân ṭha ber chu kan hre thei ang. Entîr nân, mite i biak dâwnin, an hnam chîn dân te, tuizâwng te, a nih loh leh chhûngkaw dinhmunte târ lang theitu thilte chu hmuh tum ang che. An thil tih lai chu enin, anmahni i biak ṭan hunah chu mi chungchâng chu hawihhâwm takin i sawi tel thei ang.
12. Rawng kan bâwl laiin, kan kawppui nêna inbiakna chungchângah engvângin nge kan fîmkhur ang?
12 Thil chîk mi, mi harhvâng tak chuan rilru la pêng thei thilte pumpelh chu a tum ṭhîn. Rawngbâwlnaa kan kal laia thawhpuite nêna inbiakna chuan mi a tichak thei hle a. Mahse, thlawhhma rawngbâwlnaa kan tel chhan ber chu mi dangte hnêna thu hrilh a ni tih hriat reng chu kan duh a ni. (Thur. 3:1, 7) Chuvângin, in dang kan pan laia kan titina chuan kan thu hrilhna a tihbuai loh nân kan fîmkhur tûr a ni a. Tuina neite hnêna hrilh kan duh thute chungchâng sawi dun chu kan thil tum bera rilru pêk theih dân kawng ṭha tak a ni. Chu bâkah, cell phone chuan ṭangkai lehzual tûra rawngbâwl tûrin min ṭanpui châng nei mah se, kan phone dawnin in neitu nêna titina a tihbuai loh nân kan fîmkhur tûr a ni.
MI MAL NGAIHSAKNA LANTIR RAWH
13, 14. (a) Engtin nge mi ngaihven zâwngte chu kan hriat theih? (b) Engin nge mite thlarau lam thil ngaihsakna chu kaitho thei?
13 Rawngbâwltu harh fîmte chuan an mi tawnte thusawi chu ṭha takin an ngaithla ṭhîn a. In thu hrilh rawngbâwlna biala mi tuemaw chu a rilru phawrh chhuak tûrin eng zawhna nge i zawh theih? Sakhaw tam tak a awm chhan te, tualchhûnga thleng tharum thawhna te, a nih loh leh sawrkâr thil tihhlawhtlin lohte chungchâng a ngaimawh em? Nunna nei thil siam ropui tak takte chungchâng sawina hmangin emaw, Bible thurâwn hman tlâk dân sawina hmangin emaw thlarau lam an ngaihvenna chu i kai tho thei em? Ṭawngṭaina hi Pathian awm ring lotu ṭhenkhat pawh tiamin mi tinte ngaihven a ni a. Mi tam tak chuan ṭawngṭaina ngaithlatu an awm meuh emaw chu tiin an ngaihtuah a. Mi dangte chuan: Pathianin ṭawngṭaina zawng zawng a ngaithla em? A ngaihthlâk loh chuan a ngaihthlâk theih nân eng nge kan tih ang? tiin an ngaihtuah bawk.
14 Thuchhuahtu thiltawn nei tam tawhte tih dân enin, titina ṭan dân kan zir ṭeuh theih ngei a rinawm a. Mite dâwp ang emaw, an chungchânga va inrawlh ang emawa lang si lova an titipui dân chu lo chhinchhiah ang che. Engtin nge an ṭawngkam chhuak leh hmêl lan dân chuan in neitu thlîr dân hriat thiam an duhzia a târ lan?—Thuf. 15:13.
NGILNEIHNA LEH THIAMNA
15. Thu kan hrilhnaah engvângin nge ngilneihna kan lantîr ang?
15 Tui taka i muhîl lai kaihthawh chu i duh em? Mi tam tak chu kaihthawh thut an nih hian an lungni ṭhîn lo. Dîm taka inkaihthawh chu a duhawm zâwk tlângpui a ni. Thlarau lama mite muhîl kaihthawh tum pawh chutiang bawk chu a ni a. Entîr nân, mi i va tlawha chu a lo thinrim viau a nih chuan, engtia tih nge ṭha ber tlângpui ang? Ngilnei takin amah i hriatthiamzia sawi la, a rilru tlang taka a sawi chhuah avângin lâwmthu i hrilh hnuah ṭha takin kalsan ang che. (Thuf. 15:1; 17:14; 2 Tim. 2:24) I ngilneihna chuan Thuhretu dangte’n an tlawh leh huna chhâng lêt ṭha zâwk tûrin ani chu a chêttîr mai thei asin.
16, 17. Engtin nge kan rawngbâwlnaah hriat thiamna kan hman theih?
16 A châng chuan chhân lêtna ṭha lo pawh i hneh thei a. Ṭhenkhat chuan, titina tihtâwp dân awlsam ber anga a lan avâng maiin, “Ngawi teh, sakhaw vawn lai ka nei ve alâwm,” tiin emaw, “Ka ngaihven lo ve,” tiin emaw an chhâng mai thei che a. Mahse, ngilnei tak leh thiam taka i tih zêl chuan, in neitu thlarau lam thil ngaihvenna kaitho thei zawhna rilru la tak i zawh theih ngei a rinawm a ni.—Kolossa 4:6 chhiar rawh.
17 Kan thusawi ngaithla hman lo khawpa buai anga inngaite kan tawh châng chuan an dinhmun hriatthiampui a, kalsan mai chu a ṭha ber a. Mahse, a châng chuan thu awmze nei leh tawi fel tak a sawi theih a ni tih i hre mai thei a ni. Unau ṭhenkhat chuan minute khat aia rei lo chhûngin Bible châng rilru khawih thei tak an chhiarsak hnuah in neitu hnênah zawhna pakhat an hnutchhiah thei a ni. A châng chuan an thusawi tawi fel tak chuan in neitu tuina a chawh thawh avângin titina tawi tê nei tûrin an buai lutuk lo thei a ni. Dinhmunin a zir hunah engvângin nge chutianga i tihchhin loh vang?
18. Tawnchawp thu hrilhnaa hlawhtling lehzual tûrin eng nge kan tih ang?
18 Tawnchawpa thu hril tûra kan inbuatsaih chuan, kan nî tin thiltihnaa kan mi tawhte chanchin ṭha ngaihvenna chu kan kaihthawhsak thei a ni. Unau tam tak chuan an kawr ipte-ah emaw, handbag-ah emaw thu leh hla chhuah ṭhenkhat an ak ṭhîn a. A remchân huna mi dangte hrilh mai theih tûr Bible châng pawh rilruah an vawng thei bawk a ni. Chutiang ti tûra i inbuatsaih theih dân tûr chungchângah in kohhrana rawngbâwlna enkawltu emaw, pioneer-te emaw chu i râwn thei ang.
NGILNEI TAKA CHHUNGTE THLARAU LAMA KAITHOVIN
19. Engvângin nge kan chhûngkhatte ṭanpui chu kan bânsan mai loh vang?
19 Kan chhûngkhatte chanchin ṭha pawm tûra ṭanpui chu kan duh ṭheuh va. (Jos. 2:13; Tirh. 10:24, 48; 16:31, 32) Anmahni ṭanpui tuma kan hma lâk ṭanna an hnâwl chuan, tihnawn leh kan châk loh phah thei a. An rilru put hmang thlâkthleng tûrin tih theih emaw, sawi theih emaw nei lo angah kan inngai mai thei. Mahse, thilthleng engemaw chuan i chhûngte nun emaw, thil thlîr dân emaw chu a thlâkthleng thei a. A nih loh leh, rah ṭha chhuah thei tûrin an hnêna thutak hrilhfiah dân i lo thiam lehzual tawh pawh a ni thei bawk.
20. Engvângin nge chhûngkhatte biak huna remhriatna neih a pawimawh?
20 Kan chhûngkhatte rilru veizâwng chu kan zahsak tûr a ni a. (Rom 2:4) Thu hrilh rawngbâwlnaa kan mi tawnte chunga kan tih ang bawkin, anni chu ngilnei takin kan be tûr a ni lâwm ni? Zaidam tak leh zah takin anmahni chu bia la. Ninawm si lovin, thutakin a ṭha zâwnga a nghawng dân che chu lantîr rawh. (Eph. 4:23, 24) Jehova’n i nun a tihhausak dân leh ‘i ṭhatna tûra nangmah zirtîrtu,’ a nih dân chiang takin lantîr rawh. (Is. 48:17) I chhûngkhatte chuan nangmahah Kristian nun dân entawn tlâk tak chu hmu rawh se.
21, 22. Chhûngkhatte thlarau lama ṭanpui tum ṭâng ṭâng a hlutzia târ langtu thiltawn pakhat sawi rawh.
21 Tûn hnai khân, unaunu pakhat chuan heti hian a ziak a: “Ka unau 13-te hnênah chuan ṭawngkam leh chêtzia hmanga thu hrilh chu ka tum reng a. A mal mala an hnêna lehkha thawn lovin kum khat pawh ka liamtîr ngai lo. Chuti chung pawhin, kum 30 chhûng chu kan chhûngkuaa Thuhretu awmchhun ka ni,” tiin.
22 Unaunu chuan heti hian a sawi zâwm a: “Ni khat chu, mêl za têla hlaa awm ka unaunu chu ka bia a. Ani chuan an kohhrana rawngbâwltu chu amah Bible zirpui tûra a sâwm thu leh chu mi chuan a zirpui ngai loh thu min hrilh a ni. Amah ṭanpui ka duh thu ka han hrilh chuan: ‘Aw le, mahse, Jehova Thuhretu erawh ka ni ngai lo vang tih ka hrilh nghâl ang che,’ tiin min chhâng a. Bible Zirtîrna Dik Tak Chu Eng Nge Ni? tih lehkhabu ka thawn hnu chuan, ni engemaw zât danah ka be ṭhîn a. Mahse, lehkhabu chu keu pawh a lo la keu lo. A tâwpah chuan, a lehkhabu la tûrin ka ti a, minute 15 chhûng vêl chu Bible châng târ lan ṭhenkhat chhiarin, kan sawi dûn thei a. Chutianga vawi engemaw zât kan inbiak hnu chuan minute 15 aia rei zir chu a duh ta a. Tichuan, zirna nei tûrin aman min rawn phone ṭan ta a, a châng phei chuan ka thawh hma tein min rawn bia a, ni khatah vawi hnih lai min rawn phone châng pawh a nei a ni. A kum lehah chuan baptisma a chang a, a kum lehah chuan pioneer a thawk ṭan ta a ni,” tiin.
23. Engvângin nge thlarau lama muthilhna ata tho harh tûra mite ṭanpui chu kan bânsan loh vang?
23 Mite thlarau lama an muthilhna ata tho harh tûra ṭanpui chu thiamna chi khat a ni a, bânsan lo va beih ṭâng ṭâng a ngai a. Mahse, mite chuan anmahni kaih harh tûra kan beihna chu an chhâng lêt zêl a ni. Thla tin hian, a chawhrualin mi 20,000 chuang zelin Jehova Thuhretute angin baptisma an chang a ni. Chuvângin, Paula’n kum zabi khatnaa a unaupa Arkippa a fuihna: “Rawngbâwlna Lalpaa i hmuh kha hlen tûrin fîmkhur rawh,” tih hi i ngai pawimawh ṭheuh vang u. (Kol. 4:17) A dawta thuziak chuan hmanhmawhna rilru nêna thu hrilh tih awmzia hre thiam tûrin min ṭanpui ang. (w12-E 03/15)
[Zirlai Atâna Zawhnate]
[Phêk 13-naa bâwm]
HARHVANG TAKA AWM THEIH DAN
▪ Pathian duhzâwng tiin buai reng rawh
▪ Thima thiltihte pumpelh rawh
▪ Thlarau lama muthilh a hlauhawmzia hre rawh
▪ In thu hrilhna biala mite chungah thlîr dân dik nei rawh
▪ Mi dangte hnêna thu hrilh dân kawng thar hmang chhin rawh
▪ I rawngbâwlna a pawimawhzia hre reng rawh
