“Inhmangaih Ula”

“Thupêk thar ka pêk che u hi, inhmangaih ula; keiin ka hmangaih ang che u hian nangni pawh inhmangaih ula. In inhmangaih chuan mi zawng zawngin ka zirtîrte in ni tih chu miah chuan an hria ang.”—JOHANA 13:34, 35.

A Awmzia Chu: Krista chuan a hnungzuitute chu anmahni a hmangaih anga inhmangaih tûrin a hrilh a. Engtin nge Isua’n anni chu a hmangaih? A hun lai chuan hnam dangte huatna leh hmeichhiate hnuaichhiahna a hluar hle chung pawhin, ani chuan mi zawng zawng a hmangaih vek a ni. (Johana 4:7-10) Hmangaihna chuan Isua chu mi dangte ṭanpui nân a hun te, a tha leh zungte pe tûra a chêttîr bâkah, a mi mal nawmsakna tûrte pawh chân phal tûrin a chêttîr a ni. (Marka 6:30-34) A tâwpah chuan, Krista’n a hmangaihna chu a ropui thei ang berin a târ lang a. “Kei berâm vêngtu ṭha ka ni; berâm vêngtu ṭhain berâmte tân a nun a pe ṭhîn,” tiin a sawi a ni.—Johana 10:11.

Kristian Hmasate’n An Tlin Dân: Kum zabi khatnaa Kristiante chu “unaupa” emaw, “farnu,” a nih loh leh unaunu emaw tiin an inko va. (Philemona 1, 2) An tân chuan “Juda leh Grik mite chu engah mah an danglam chuang si lo va, Lalpa pakhat an zaa chunga Lalpa a ni a,” chuvângin hnam tin zînga mite chu Kristian kohhran chhûngah lawm luh an ni. (Rom 10:11, 12) C.E. 33 Pentikost hnu lamah chuan, Jerusalema zirtîrte chuan “an rote, an sumte an hralh a, an châkkhai daih lek ṭheuhvin an zaa hnênah chuan an sem ṭhîn a.” Chu chu eng atân nge? Baptisma chang tharte chu Jerusalem khuaa ‘tirhkohte zirtîra an awm reng’ theih nân a ni. (Tirhkohte 2:41-45) Engin nge chutianga awm reng tûra chêttîr? Tirhkohte thih hnu kum 200 aia tlêmah, Tertullian-a chuan mi dangte’n Kristiante chungchâng a sawi chu heti hian a sawi chhawng a ni: “An inhmangaih tawnzia hi; mi dang tâna an nun pêk an inhuam tawnzia hi,” tiin.

Tûn Laiah Tute’n Nge Tlin?: The History of the Decline and Fall of the Roman Empire (1837) lehkhabu chuan kum zabi tam tak kalta chhûng khân Kristiana inchhâlte chu “Kristian sakhua ring lotute kut an tawrh aia nasain an innghaisa tawn” tih a sawi. Tûn hnaia America rama zirna pakhat chuan sakhaw mite—a tam zâwkte Kristian anga inchhâlte—zîngah chuan hnam inhuatna a awm tih a târ lang. Ram pakhata kohhrana inkhâwm ṭhînte chuan ram danga an kohhran mi leh sate nên inkûngkaihna engmah an nei lo va, chuvângin a ṭûl hunah pawh ram danga an kohhran mi leh sate chu an ṭanpui thei lo emaw, an ṭanpui hreh emaw a ni.

Kum 2004-ah thla hnih chhûng leka Florida state hurricane thlipui pali laiin a nuai khân, Florida Emergency Operations Committee chairman-in ṭanpuina an dawnte ṭha taka hman a nih leh nih loh a endik a. Ani chuan Jehova Thuhretute tluka inruahman ṭha an awm lo tih sawiin, Thuhretute mamawh ang ṭanpuina pêk a tum hial a ni. A hma kum 1997 khân, leilung chhiatna tâwkte chhawmdâwl tûra kal Jehova Thuhretute chuan damdawi te, ei tûr te, leh thawmhnawte kengin, an Kristian unau Democratic Republic of Congo rama awmte leh mi dang ṭanpui ngaite ṭanpui tûrin an va kal a. Europe rama awm an unaute chuan U.S. dollar maktaduai khat hu tâwk vêl ṭanpuina an pe a ni. (w12-E 03/01)