Inphatsanna Ni Hnuhnûnga Kan Awm Tawhzia Hriltu Chu!

“Thianghlim tak [“rinawm tak,” NW] leh fel tak leh demawm lo taka kan awmzia kha.”—1 THES. 2:10.

HENG THU PAWIMAWHTE LA CHHUAK RAWH

Delili te, Absaloma te, leh Juda Iskariota-te rinawm lohna aṭangin eng vaukhânna nge kan zir theih?

Engtin nge Jonathana leh Petera-te târ lan rinawmna chu kan entawn theih?

Engtin nge kan kawppuite leh Jehova chunga kan rinawm tlat theih?

1-3. (a) Hun ṭha lo hriltu chu eng nge ni a, chutah chuan eng nge tel? (b) Eng zawhna pathum nge kan chhân ang?

DELILI te, Absaloma te, leh Juda Iskariota te chuan inanna eng nge an neih? Anni chu an rinawm lo ṭheuh a ni—Delili chu amah hmangaihtu, rorêltu Samsona chungah; Absaloma chu a pa, Lal Davida chungah; leh Juda chu a Pu, Krista Isua chungah a rinawm lo a ni. An thiltih pawi tak chuan mi dangte chungah chhiatna râpthlâk tak a thlen ṭheuh a nih chu! Mahse, engvângin nge chu chu kan ngaihven ang?

² Lehkha ziaktu pakhat chuan rinawm lo taka inphatsanna chu tûn lai thil ṭha lo hluar takte zîngah a telh a. Chutiang a nih chu kan beisei tûr a ni. “Khawvêl tâwpna chhinchhiahna” a pêk khân, Isua chuan: “Mi tam tak . . . an inmantîr tawn,” a nih loh leh an inphatsan tawn ang tih a sawi a ni. (Mt. 24:3, 10) “Phatsan” tih awmzia chu mi tuemaw chu “rinawm lohna hmanga hmêlma kuta pêk, a nih loh leh hlan” hi a ni a. Chutiang rinawm lohna chuan Paula’n mite chu “phatsantute” an ni ang tia a sawi lâwk ‘ni hnuhnûnga’ kan awm tawhzia a nemnghet a ni. (2 Tim. 3:1, 2, 4, Parallel Bible) Lehkhabute leh film-ahte chuan rinawm lohna thiltihte chu lantîr a niin, pawi lutuk lo anga târ lan ni mah se, a takah chuan rinawm lohna leh inphatsanna chuan lungngaihna leh hrehawm tawrhna a thlen a ni. Chutiang thiltih chu ni hnuhnûnga kan awm tawhzia hriltu a va ni tak êm!

³ Hmân laia mi rinawm lote chanchin Bible-a chuangte aṭangin eng nge kan zir theih? Mi dangte chunga rinawmte entîrna engte nge kan entawn  theih? Tu chungah nge kan rinawm tlat ang? I lo en ang u.

HUN KAL TAWHA VAUKHANNA TAR CHHUAHTE

4. Engtin nge Delili chuan Samsona chu a phatsan a, engvângin nge chu chu thil tenawm tak a nih?

⁴ A hmasain, rorêltu Samsona’n a hmangaih mi vervêk tak Delili chanchin kan ngaihtuah phawt ang a. Samsona chuan Pathian mite tâna Philistia mite beihnaa hmahruaitua ṭan a tum a ni. Delili chuan Samsona a hmangaih tak tak lo tih an hriat avâng a ni ngei ang, Philistia mi lian panga chuan ani chu an thah theih nân chakna ropui tak a neih chhan hre chhuak tûrin thamna lian tham tak pêk an tiam a. Mi duhâm Delili chuan thamna chu a la a; mahse, Samsona thurûk hriat chhuah a tumna chu vawi thum lai a hlawhchham tawh a ni. Tichuan, ani chuan ‘nî tin a ngên tlut tlut a, a thlêm ṭhîn a.’ A tâwpah chuan, “thihna khawp hialin [Samsona] rilru a lo mangang ta a.” A tâwpah, a sam a meh ngai loh thu leh a meh chuan a chakna a hloh tûr thu chu a hrilh ta a ni. * Chu chu hriain, Delili chuan a mal chunga a muthilh lai chuan Samsona sam chu a mêt ta a; tichuan, a hmêlmate’n an duh ang anga an sawisak theih nân an kutah a pe ta a ni. (Ro. 16:4, 5, 15-21) A thiltih chu a va tenawm tak êm! A duhâm avângin, Delili chuan amah hmangaihtu chu a phatsan a ni.

5. (a) Engtin nge Absaloma chu Davida chungah a rinawm loh va, chu chuan a chungchâng eng nge a târ lan? (b) Engtin nge Davida chuan Ahithophela phatsanna chu a ngaih?

⁵ A dawt lehah chuan mi rinawm lo Absaloma hi han ngaihtuah teh. A tumsân lutuk avângin a pa, Lal Davida lalṭhutthlêng luahlân chu a tum tlat a. Absaloma chuan thutiam vervêk tak leh hmangaihna der hmangin an zînga tlâktlum chu a tum a, “Israel mite thinlung chu a hîpsak” ta ṭhîn a ni. Tin, anni leh an thil mamawhte ngaihsak tak zet angin, anni chu lo chelhin, a lo fâwp ṭhîn bawk. (2 Sam. 15:2-6) Absaloma chuan Davida mi rin tak, Ahithophela pawh a lamah a ṭantîr thei a, helna chu thlâwpin ani pawh phatsantu a lo ni ve ta a ni. (2 Sam. 15:31) Sâm 3-na leh 55-naah Davida chuan chutiang rinawm lohnain amah a nghawng dân chu a târ lang a ni. (Sâm 3:1-8; Sâm 55:12-14 chhiar rawh.) Absaloma chuan a tumsânna leh Jehova ruat lal bâwraw taka phiarrûkna hmangin Pathian lalchungnunna a zah lohzia a târ lang a. (1 Chro. 28:5) A tâwpah chuan, Absaloma helna chu a hlawhchhamin, Jehova hriak thih a nih angin Davida chuan ro a rêl zawm a ni.

6. Engvângin nge Juda chuan Isua a phatsan a, Juda hming chu eng nêna thlunzawm nge a lo nih tâk?

⁶ Tûnah chuan Krista chunga phatsantu Juda Iskariota thiltih hi han ngaihtuah teh. Isua’n a tirhkoh 12-te nêna Kalhlên Kût a hman tâwp ber ṭum chuan an hnênah: “Tih tak meuhvin ka hrilh a che u, in zînga mi pakhat hian mi mantîr [a nih loh leh, mi phatsan] ang,” tiin a hrilh a. (Mt. 26:21) Chu mi zân vêk chuan Gethsemani huana an awm laiin Petera te, Jakoba te, leh Johana te hnênah: “En teh u, mi mantîrtu tûr chu a lo hnaih tâk hi,” tiin a hrilh bawk a ni. Juda chu phiarrûknaa a thurualpui dangte nên huanah a lo lang nghâl a, “tichuan Isua chu a va pan ta nghâl a, ‘Chibai, Rabbi!’ tiin a fâwp ta ngawih ngawih a.” (Mt. 26:46-50; Lk. 22:47, 52) Juda chuan ‘mi thiam thisen a mantîr a,’ Krista chu a hmêlmate kutah a pe ta a ni. Sum ngaina mi Juda chuan eng zât nge a hmuh? Tangka 30 lek a hmu a nih chu! (Mt. 27:3-5) Chu mi hun aṭang chuan ṭawng ṭhenkhatah, Juda tih hming chu  “phatsantu” tih nêna thlunzawm a lo ni ta a, a bîk takin ṭhian anga lang sia mi dang tuemaw phatsantu sawina a ni. *

7. (a) Absaloma leh Juda leh (b) Delili nun aṭangin eng nge kan zir theih?

⁷ Hêng vaukhânna târ chhuahte aṭang hian eng nge kan zir? Absaloma leh Juda chuan Jehova hriak thih an phatsan avângin tâwpna zahthlâk tak an tâwk ve ve a. (2 Sam. 18:9, 14-17; Tirh. 1:18-20) Delili hming chu vervêkna leh hmangaihna der nêna thlunzawm a ni kumkhua tawh ang. (Sâm 119:158) Jehova duhsakna min chântîr thei tumsânna emaw, duhâmna emaw lam âwm duhna pumpelh chu a va pawimawh tak êm! Rinawm lohna mize huatthlala tak hnâwl tûra min ṭanpui nân hei aia thiltithei zâwk a awm chuang dâwn em ni?

MI RINAWMTE CHU ENTAWN RAWH

8, 9. (a) Engvângin nge Jonathana chuan Davida chungah a rinawm dâwn tih thu a tiam? (b) Engtin nge Jonathana chu kan entawn theih?

⁸ Bible chuan mi rinawm tam takte chanchin pawh a târ lang bawk a. Chûng zînga pahnihte chanchin chu ngaihtuahin, an hnên aṭanga kan thil zir theihte kan en ang a, a hmasain, Davida chunga rinawmna târ langtu mi pakhat aṭangin i lo ṭan ang u. Lal Saula fapa upa ber Jonathana chu Israel lalṭhutthlêng roluahtu tûr a ni a. Mahse, Jehova chuan Israel lal ni tûrin Davida chu a thlang a ni. Jonathana chuan Pathian thu tlûkna siam chu a zah a. Davida chu a khingpui angin thîkna nên a thlîr lo. Chu aimahin, Jonathana “nunna leh Davida nunna chu a lo inzawm ta chiah mai a,” Davida chungah a rinawm dâwn tih thu a tiam a. Davida chu a thuam te, a khandaih te, a thalngul, leh a taihrênna lamin a pe a ni. (1 Sam 18:1-4) Johnathana chuan ‘Davida kut tihchaksak’ tûrin a tih theih apiang chu a ti a, Saula hmaah Davida tâna dingin a nun pawh a thâp hial a. Jonathana chuan Davida hnênah: “Israelte lalah i awm ang a, kei i dawttu ka ni ang,” tiin rinawm takin a hrilh a ni. (1 Sam. 20:30-34; 23:16, 17) Jonathana thih hunah Davida chuan a sûnna leh a hmangaihna ṭah hla nêna a târ lang pawh hi a mak hran lo.—2 Sam. 1:17, 26.

⁹ Jonathana chuan tu chunga rinawm tûr nge a nih a hre chiang hle a. Jehova Lalchungnunnaah a intulût ṭhak a, Davida chu Pathian hriak thih a nih angin a thlâwp tlat a ni. Chutiang bawkin tûn laiah pawh, kohhranah chanvo engemaw bîk tak kan chang lo a nih pawhin, kan zînga hmahruai tûra ruat unaupate chu kan thlâwp tlat tûr a ni.—1 Thes. 5:12, 13; Heb. 13:17, 24.

10, 11. (a) Engvângin nge Petera chu Isua chunga a rinawm tlat? (b) Engtin nge Petera kan entawn theih a, chu chuan engti tûrin nge min chêttîr ang?

¹⁰ Entîrna ṭha kan ngaihtuah leh tûr chu  Isua chunga rinawm tûra intiamtu, tirhkoh Petera hi a ni. Krista’n nakin lawka a hlan tûr a taksa leh thisena rinna neih a pawimawhzia sawi nâna entîr nei ṭawngkam a hman khân, a zirtîr tam tak chuan a thu chu khirh an ti hle a, an kal bosan a. (Joh. 6:53-60, 66) Tichuan, Isua chuan a tirhkoh 12-te lam hawiin: “Nangni pawhin kal bo in duh ve em?,” tiin a zâwt a. “Lalpa, tu hnênah nge kan kal ang? Nangin chatuana nunna thu i nei alâwm. Nang Pathian mi thianghlim chu i ni tih kan âwih ta a, hriat pawh kan hria e,” tia chhângtu chu Petera a ni. (Joh. 6:67-69) Petera chuan Isua’n a inthawina chungchâng a sawi zawh chiah chu a hre thiam vek tihna a ni em? Ni kher lo. Chuti chung pawh chuan Pathian Fapa hriak thih chunga rinawm chu a tum tlat a ni.

¹¹ Petera chuan Isua’n ngaih dân dik lo a nei a, nakinah A thusawi chu A sût leh mai ang tiin a ngaihtuah lo. Isua’n “chatuana nunna thu” a nei tih chu inngaitlâwm takin a pawm zâwk a ni. Chutiang bawkin tûn laiah “sum enkawltu rinawm” tih chhuah Kristian thu leh hla chhuaha thu engemaw chu hriat thiam harsa kan tih emaw, kan ngaihtuahna nên a inmil theih loh emaw hunah engtin nge kan chhân lêt? Kan thlîr dân nêna inmil tûra thlâkthlengna nghah ai chuan hriat thiam kan tum ngat ngat zâwk tûr a ni.—Luka 12:42 chhiar rawh.

I KAWPPUI CHUNGAH RINAWM RENG RAWH

12, 13. Engtin nge inphatsanna chuan nupa inkârah bu a khuar ṭan theih a, engvângin nge chu chu kum upat vâng nia sawi theih a nih loh?

¹² Inphatsanna chu eng ang kawng pawh ni se, thil suaksual tak a ni a, chu chuan Kristian chhûngkua leh kohhrana inremna leh inpumkhatna a tihchhiat chu kan phal tûr a ni lo. Chu chu rilrua vawng rengin, kan nupui pasalte leh kan Pathian chunga kan rinawm tlat theih dân i lo ngaihtuah ang u.

¹³ Uirêna chu inphatsana rilru tina thei berte zînga mi a ni a. Uirê chuan a kawppui chunga a rinawm ṭhinna chu bawhchhiain, mi dang tuemaw chungah a ngaihsakna a pe a ni. Phatsana awm chu vawi leh khatah a mal ta thut a, a nun chu a inbingbilet thawk a ni. Tûn hmaa lo inhmangaih tawh ṭhîn mi pahnih inkârah engtin nge chutiang thil chu a thlen theih? A thlen ṭan dân chu nupate rilru lama an inhlatna aṭangin a ni fo ṭhîn. Mihringte inlaichînna lam zirtu mi thiam Professor Gabriella Turnaturi chuan “inlaichînna lama inpêk pumhlûm loh tial tial chu inphatsanna bu khuar ṭanna” niin a sawi. Kawppui laka inhlatna hi hun rei tak innei tawh kum upa lamte chungah pawh a thleng a ni. Entîr nân, kum 50 mi chuan amah hîptu hmeichhe dang nêna an awm dun theih nân a nupui rinawm tak kum 25 chhûng a lo neih tawh chu a ṭhen a. Ṭhenkhat chuan chu chu kum upat lama rilru buaina vâng nia sawiin an thiam chawp a. Mahse, kawppuite chunga rinawm loh chuan thiam chantîr theih a ni lo. Chu chu inphatsanna—upat lama inphatsanna—a ni si a.

14. (a) Engtin nge Jehova chuan nupa inkâra inbumna awm chu a ngaih? (b) Isua’n nupa inkâra rinawmna chungchângah eng nge a sawi?

¹⁴ Bible ṭanchhan awm lova an kawppui kalsantute chu Jehova’n engtin nge a ngaih? Kan Pathian chuan ‘inmâk hi a hua a,’ an kawppui cheibâwl ṭha lo leh kalsantute chu nasa takin a dem a ni. (Malakia 2:13-16 chhiar rawh.) A Pa angin Isua pawhin, mi chuan a kawppui pawi sawi lo chu hnâwl emaw, kalsan emawin, thil engmah thleng lo anga awm chu a theih loh tih a zirtîr a ni.—Matthaia 19:3-6, 9 chhiar rawh.

15. Nupui pasal neite chuan an kawppuite chungah engtin nge an rinawm lehsual theih?

¹⁵ Nupui pasal neite chu an kawppuite chungah engtin nge an rinawm theih? Pathian Thu chuan: “I tleirâwl lai nupuiah [a nih loh leh pasalah] chuan hlim rawh,” a ti a; tin,  “I nupui, [a nih loh leh, i pasal] i hmangaih hnênah chuan nun nuam takin awm rawh,” a ti bawk. (Thuf. 5:18; Thur. 9:9) Nupate chu an lo upat zêl hian an inlaichînnaah—tisa lam leh rilru lamah—an ‘inpe pumhlûm’ tûr a ni a. Chu mi awmzia chu an inngaihsak tawnin, hun an hmang dûnin, an inhnaih tawn tûr tihna a ni. An inneihna leh Jehova nêna an inlaichînna vawn ṭhat chu an tum ber tûr a ni a. Chu mi ti thei tûr chuan, nupate chuan Bible an zir dun a, rawngbâwlnaa an thawh dun a, Jehova malsâwmna dîla an ṭawngṭai dun chu a ngai a ni.

JEHOVA CHUNGAH RINAWM RENG RAWH

16, 17. (a) Chhûngkuaah leh kohhranah Jehova chungah kan rinawmna chu eng anga fiah nge a nih mai theih? (b) Hnawhchhuaha awm chhûngkhatte kâwm lo tûra Jehova thupêk zawmnain rah ṭha a chhuahzia engin nge târ lang?

¹⁶ Kohhranah hian ‘rinnaa an dik [a nih loh leh, an hrisêl] theihna tûra na taka’ zilhna tâwk sual pawi tak ti an awm a. (Tit. 1:13, 14) An nungchang avângin, ṭhenkhat chu hnawhchhuah an ngai a. Zilhna chuan “chu mia sawizawia awmte” chu thlarau lamah a tungding leh a ni. (Heb. 12:11) Chhûngkhat emaw, ṭhian hnai tak emaw hnawhchhuaha awm kan neih chuan engtin nge ni ang? Tûnah chuan, thil sual titu chung ni lovin, Pathian chunga kan rinawmna chu fiahin a lo awm ta a. Jehova chuan hnawhchhuaha awm tumah kâwm lo tûra a thupêk kan zawm leh zawm loh hre tûrin min en reng a ni.—1 Korinth 5:11-13 chhiar rawh.

¹⁷ Hnawhchhuaha awm chhûngkhatte kâwm lo tûra Jehova thupêk chhûngkuain rinawm taka an zawmnain rah ṭha a chhuah theihzia entîrna pakhat chauh hi lo ngaihtuah teh. Tlangvâl pakhat chu kum sâwm chuang lai hnawhchhuah a ni a, chutih hun chhûng chuan a pa, a nu, leh a unaupa pali-te chuan amah an ‘pâwl lo va.’ A châng chuan an thiltihnaa tel ve a tum ṭhîn a; mahse, tuman kâwm duh lovin an rinawm tlat a ni. Lâk luh leh a nih hnuah, a chhûngte a ngaih ṭhinzia leh a bîk takin, zâna amah chauhva a awm huna a ngaih ṭhinzia a saw a ni. Mahse, a chhûngte’n chhe tê pawhin lo kâwm ta se, chu chu a lungâwipui dâwn tih a sawi a. A chhûngte nêna inbiak pawhna che tê pawh a neih tâk lohvah chuan, a chhûngte a ngaihna chuan Jehova nêna an inlaichînna siam ṭha tûrin a chêttîr ta a ni. Hnawhchhuaha awm i chhûngkhat kâwm lo tûra Pathian thupêk bawhchhiat i duh hunah he entîrna hi ngaihtuah ang che.

18. Rinawm a ṭhatna leh rinawm lohna sawhkhâwkte kan en hnu chuan, eng nge tih i tum tlat?

¹⁸ Suahsualna leh rinawm lohna khawvêlah hian kan chêng a. Mahse, Kristian kohhrana min hual vêltute zîngah hian rinawmna kawnga entawn tûr kan hmu thei a ni. “Nangni ringtute chunga thianghlim tak [“rinawm tak” NW] leh fel tak leh demawm lo taka kan awmzia kha min hriatpuitute in ni, Pathian nên,” tia sawi ang maiin, an nun dân chuan an tân thu a sawisak a ni. (1 Thes. 2:10) Pathian chungah leh unaute chunga rinawm reng chu i tum tlat ang u. (w12-E 04/15)

[Footnote-te]

[Zirlai Atâna Zawhnate]

[Phêk 16-naa milem]

Mi dangte’n hnâwl mah se, Petera chu Pathian Fapa hriak thiha chungah a rinawm tlat