Jehova Chuan A Mite Chhan Chhuah Dân A hria

“Lalpa chuan amah ngaihsaktute chu thlêmna ata chhan chhuah dân . . . a hria.”—2 PET. 2:9.

ENGVANGIN NGE JEHOVA CHU KAN RIN TLAT THEIH?

A thiltum hlen chhuahnaa thil thlen hun tûr a hria tih chungchângah.

A mite thlavâng hauhva rawn inrawlh nân a thiltihtheihna a hmang dâwn tih chungchângah.

Thil thleng pawimawhte lo inher chhuah dân tûr a hriat chungchângah.

1. “Hrehawm nasa tak” chu eng dinhmunte’n nge zui dâwn?

SETANA khawvêl chunga Pathian rorêlna chu vawi leh khatah a lo thleng thut ang. (1 Thes. 5:2, 3) “LALPA ni ropui tak” a lo thlen chuan, khawvêl mipuite chu an buai nuai nuai ang. (Zep. 1:14-17) Hrehawm tawrhna leh lungngaihna nî a ni ang a. Chu chu mangan hun a ni ang a, “chutianga nasa rêng rêng chu leilung pian tirh ata tûn thlengin a la awm ngai lo.”—Matthaia 24:21, 22 chhiar rawh.

2, 3. (a) Pathian mite chuan “hrehawm nasa tak” chhûngin eng nge an tawh dâwn? (b) Engin nge kan hmaa thil lo thleng tûr atân min tichak thei?

² “Hrehawm nasa tak” vawrtâwp a thlen dâwn hnaihah, Pathian mite chu ‘Magog rama mi Goga’ chuan theih tâwp chuahin a bei ang a. Chu mi chhûng chuan, “chhûmin ram a tuam mup mup ang mai hian” Pathian mite bei tûrin “sipai rual nasa tak” an lo thawk ang. (Ezek. 38:2, 14-16) Chutih hunah chuan Jehova mite chhan tûrin mihring siam pâwl eng mah a rawn inrawlh lo vang a. An dam khawchhuahna chu Pathianah chauh a innghat dâwn a ni. Chutianga tiboraltu an hmachhawn hun chuan engtin nge an chhân lêt ang?

³ Jehova chhiahhlawh i nih chuan, hrehawm nasa tak chhûng hian Jehova’n a mite chu a chhanhim thei tih leh a chhanhim bawk dâwn tih i ring em? Tirhkoh Petera chuan: “Lalpa chuan amah ngaihsaktute chu thlêmna ata chhan chhuah dân leh fel lote chu rorêl nî atân hrem chunga khêk dân a hria,” tiin a ziak a. (2 Pet. 2:9) Hun kal tawha Jehova chhan chhuahna thiltihte ngaihtuahna chuan kan hmaa thil lo thleng tûr atân min tichak thei a ni. Jehova’n a mite a chhan chhuak thei tih rin tlatna min petu tûr entîrna pathum i lo ngaihtuah ang u.

KHAWVEL PUM HUAP TUILETA DAM KHAWCHHUAHNA

4. Tuilêt chungchângah engvângin nge hun vawn dik a pawimawh?

⁴ A hmasain, Nova hun laia Tuilêt chanchin thuziak hi han ngaihtuah ta ila. Jehova duhzâwng hlen chhuah nân hun  vawn dik a pawimawh hle a. Tui a lo lêt hmaa lawng hrawl tak tuk zawh a ngai a, nungchate chu lawng chhûnga luhtîr vek a ngai bawk a ni. Genesis chuan lawng chu a hun taka tuk zawh a nih loh palh tâkin tiin, Tuilêt inṭan hun tûr rêl fel nân Jehova’n lawng tuk zawh thleng a nghah thu a sawi lo. Chu ai mah chuan, Nova hnêna lawng tuk chungchâng a hrilh hma daihin, Pathian chuan Tuilêt a thlen ṭan hun tûr chu a ruat nghet tawh a ni. Chu chu engtin nge kan hriat theih?

5. Genesis 6:3-a chhinchhiah thu puanchhuahnaah Jehova’n eng nge a târ lan, chu chu engtik khân nge a târ lan?

⁵ Bible chuan Jehova’n vânah thupêk a chhuah tih min hrilh a. Genesis 6:3 sawi dânin, ani chuan: “Ka thlarau chuan mihring chu kumkhuain a bei fo lo vang, anni pawh chu tisa an ni si a: nimahsela kum za leh kum sawmhnih chu an la dam ang,” a ti a. Chu chu mi nâwlpuite dam rei zâwng sawina a ni lo. Jehova’n leia Pathian ngaihsak lote thian fai tûra hma a lâk hun tûr a puan chhuahna a ni zâwk a ni.. B.C.E. 2370-ah Tuilêt a inṭan avângin, Pathianin he thu hi B.C.E. 2490-ah a puang chhuak kan ti thei a ni. Chutih lai chuan Nova chu kum 480 mi a ni a. (Gen. 7:6) A hnu kum 20, B.C.E. 2470-ah Nova chuan fapate a nei ṭan a ni. (Gen. 5:32) Chutih lai chuan Tuilêt inṭan nân kum za vêl la awm mah se, Jehova’n mihringte chhanhimnaa Nova chanvo pawimawh tak tûr chu a la hrilh lo a ni. Pathian chuan Nova hrilh tûrin eng chen nge a nghah dâwn?

6. Engtik khân nge Jehova chuan Nova chu lawng tuk tûra thu a pêk?

⁶ Jehova chuan a thiltih tûr chu Nova hnênah hrilh lovin kum sâwmbi têl a ngawihpui rih niin a lang. Eng ṭanchhanin nge chu thu tâwp chu kan siam theih? Thlarauva thâwk khum thuziak chuan Pathianin Nova hnêna lawng tuk tûra thu a pêk khân, Nova fapate chu an puitling tawh a, nupui an nei hlawm tawh tih a târ lang a ni. Jehova chuan Nova hnênah: “Ka thuthlun chu i chungah ka tinghet . . . ang a; lawngah chuan i lût tûr a ni; nang i lût tûr a ni a, i fapate leh i nupui leh i fapate nupuite pawh i hnênah an lût ve tûr a ni,” tiin a hrilh a. (Gen. 6:9-18) Chuvângin, Nova chuan lawng tuk tûra thupêk chu Tuilêt a thlen hma kum 40 emaw, 50 emaw vêlah a dawng chauh a ni thei ngei ang.

7. (a) Engtin nge Nova leh a chhûngte chuan rinna an târ lan? (b) Engtik khân nge Pathianin Nova hnênah Tuilêt inṭan hun tûr chiah chu a hrilh?

⁷ Lawng an tuk lai chuan, Nova leh a chhûngte chuan Pathianin a thiltum a hlen dân tûr leh Tuilêt ṭan hun tûr chu an ngaihtuah ngei ang. Mahse, thil nih dân tûr kimchang an hriat lohna chu lawng tuk hna chawlhsan phah nân an hmang lo. Bible thuziak chuan: “Chutiang chuan Novan a ti a; Pathianin a hnêna thu a pêk zawng zawng ang ngei chuan a ti ta a,” tih a sawi a ni. (Gen. 6:22) Tuilêt a thlen hma ni sarih lekah—Nova leh a chhûngte tân lawnga nungchate hruai luh nâna hun an mamawh tâwk chauh a awm tawh tihah—Jehova chuan Nova hnênah Tuilêt inṭan hun tûr chiah chu a hrilh ta chauh va. Chuvângin, “Nova chu kum 600 a nih kum, a thla hnihna ni sâwm leh ni sarih niah” vân tukverhte a inhawn meuh chuan, engkim peih fel a lo ni tawh a ni.—Gen. 7:1-5, 11.

8. Tuilêt chanchin chuan engtin nge Jehova’n a mite chhan chhuah hun a hria tih min rinnghehtîr?

⁸ Tuilêt chanchin chuan Hun Vawn Dik kawnga Jehova thiamna mai ni lovin, Chhan Chhuaktu a nihna kawnga a thiamna pawh a finfiah a ni. He khawvêl tâwp hun tûr a chhiar ṭan hian, Jehova thiltum engkim chu ama hun ruatah, a “ni leh a hun,” a nih loh leh a dârkâr ngeiah a lo thleng dâwn tih kan chiang thei a ni.—Mt. 24:36; Habakuka 2:3 chhiar rawh.

TUIPUI SENA CHHAN CHHUAHNA

9, 10. Engtin nge Jehova chuan Aigupta sipaite awh nân a mite chu tâwktarh anga a hman?

⁹ Tûnah chuan, Jehova’n a thiltum hlen chhuahnaah thilte a thlen hun tûr chu a thunun tlat tih kan lo hre ta a. Kan ngaihtuah tûr entîrna pahnihna chuan a mite chhan chhuak tûra Jehova kan rin theih chhan dang a târ lang a ni: Ani chuan tiam chin nei lo a thiltihtheihna nasa tak chu a duhzâwng thlentîr nân a hmang ang. Jehova chuan a chhiahhlawhte a chhan chhuak thei tih  a chian êm avângin, a châng chuan a hmêlmate a awh theih nân a chhiahhlawhte chu tawktarha hman châng a nei a. Israel mite Aigupta sal ata a chhuahtîr khân chutiang chuan a hmang a ni.

¹⁰ Aigupta aṭanga kal chhuak Israelte kha maktaduai thum vêl an tling ngei ang a. Jehova chuan Israelte chu Pharaoa ngaiha kawng bova vâkvai mai mai anga lang tûr zâwngin Mosia chu a hruai kualtîr a ni. (Exodus 14:1-4 chhiar rawh.) Chu tâwktarh chu do zo lovin, Pharaoa chuan a sipai rualte hruaiin sal tâng chhuak hlimte chu a ûm a, anni chu Tuipui Sen-ah chuan a dang bet ta a. Chhuahna kawng rêng a kaw lo niin a lang a ni. (Ex. 14:5-10) Mahse, a nihna takah chuan Israel mite chu dinhmun hlauhawmah an ding lo. Engvângin nge? Jehova chu an tân a rawn inrawlh dâwn avângin.

11, 12. (a) Engtin nge Jehova chu a mite tâna a rawn inrawlh? (b) Pathian inrawlhna chuan eng nge a rah chhuah a, he thuziak hian Jehova chungchâng eng nge min zirtîr?

¹¹ Israelte hma hruaitu “chhûm ding” chu an hnung lamah a insawn a, Pharaoa sipaite va panna tûr chu dâlin, anni chu thim hnuaiah a dah bawk a. Mahse, Israelte tân chhûm chuan zân chu mak tak maiin a tiêng thung a ni. (Exodus 14:19, 20 chhiar rawh.) Tichuan, Jehova’n khawchhak thli na tak thlehtîrin tuite chu a ṭhen a, “tuipui chu lei chârah a chantîr a.” Chu chuan hun rei fê chu a awh ngei ang, thuziak chuan thlî chu “zankhuain” a thlehtîr hnuah chauh “Israela thlahte chu tuipui chhûng lei charah chuan an kal ta a,” a tih avângin. Indo tawlailîr hmanga kal Pharaoa sipaite nêna khaikhin chuan Israelte chu an kal chak lo hle a. Mahse, Jehova’n Israelte tâna a beih avângin, Aigupta mite tân chuan ûm phâk rual an ni lo. “Aigupta mite chu a zuk timangang ta a. An tawlailîr kete chu a thlawnsak a, an khalh chak thei ta lo va.”—Ex. 14:21-25.

¹² Israelte vaukam lehlam him taka an thlen hnuah Jehova chuan Mosia hnênah: “Aigupta mite, an tawlailîrte, an sakawr chung chuang mite chu tuiin a rawn chîm leh theihna tûrin i kut kha tuipui chungah han phar rawh khai,” tiin thu a pe a. Sipaite’n tui luang chak tak tlânchhiatsan an tum chuan “LALPAN Aigupta mite chu tuipui chhûngah chuan a paih thla ta a.” Tlân chhuahna kawng rêng a awm lo va. “Pakhat mah chhuak rêng rêng an awm hauh lo.” (Ex. 14:26-28) Chutiangin, Jehova chuan a mite chu eng dinhmun hnuaiah pawh chhan chhuak tûra thiltihtheihna a neihzia a târ lang a ni.

JERUSALEM TIHCHHIATNA PUMPELHIN

13. Isua’n eng kaihhruaina nge a pêk a, a hnungzuitute chuan eng nge an ngaihtuah mai theih?

¹³ Jehova chuan a thiltum thlen famkim nân thil a lo inher chhoh zêl dân tûr chu a hre thlap a. Chu mi pawimawhzia chu tûna kan ngaihtuah tûr entîrna pathumnain a târ lang a ni: kum zabi khatnaa Jerusalem hualna chu. Jehova chuan a Fapa kal tlangin, Jerusalem leh Judai rama awm Kristiante tân C.E. 70-a khawpui tihchhiat a nih hmain chhan chhuahna thlentu tûr kaihhruaina a pe a ni. Isua chuan: “Tiṭiautu tenawm, zâwlnei Daniela sawia kha, hmun thianghlima dinga in hmuh hunah chuan . . . Judai rama awmte chu tlangahte tlân bo rawh se,” a ti a. (Mt. 24:15, 16) Mahse, chu hrilh lâwkna a thlen famkimna chu engtin nge Isua hnungzuitute chuan an hriat theih ang?

14. Engtin nge Isua kaihhruaina awmzia chu thil lo thlengte chuan a tihchian chhoh zêl?

¹⁴ Thil a lo inher chhoh zêl chuan Isua thusawi awmzia chu a lo chiang telh telh a. C.E. 66-ah Cestius Gallus-a hnuaia Rom sipaite chu Juda helna timit tûrin Jerusalem a rawn thleng a. Mi Ṭhahnemngaite tia hriat Juda helte biak in  kulhbîng chhûngah inhumhimna an zawn chuan Rom sipate chuan biak in bang chu an bei ṭan ta a ni. Harhvâng taka awm Kristiante tân chuan a awmzia chu a lang chiang ta hle: Milem bia sipaite’n an puanzârte (‘thil tenawm’) kengin Jerusalem biak hungna kulh (‘hmun thianghlim’) an thleng tawh, tih chu. Chu chu a ni, Isua hnungzuitute tâna “tlangahte tlân bo” hun chu. Mahse, huala awm khawpui chu engtin nge an chhuahsan theih ang? Beisei loh takin thil a rawn inher chho zêl dâwn a ni.

15, 16. (a) Isua chuan eng kaihhruaina chiang tak nge a pêk a, engvângin nge a hnungzuite tân chu mi zawm chu a pawimawh? (b) Chhan chhuah kan nihna chu engah nge a innghah?

¹⁵ A chhan hriat hauh lovin, Cestius Gallus-a leh a sipaite chu Jerusalem aṭanga inhnûkdâwkin, an hnung tawlh a. Mi Ṭhahnemngaite chuan an va ûm a ni. Pâwl indote an awm loh tâkah chan, Isua hnungzuitute chuan tlân chhuahna hun remchâng an nei ta thut mai a. Isua chuan an thil neihte kalsan a, vuaicha lova kal chhuak nghâl tûrin kaihhruaina chiang tak a lo pe diam tawh a ni. (Matthaia 24:17, 18 chhiar rawh.) Chutianga chhuah nghâl vat chu a ṭûl tak zet em? A chhânna chu a lang chiang thuai ang. Ni engemaw zât lekah Mi Ṭhahnemngaite chu lo kîr lehin, Jerusalem leh Judai rama awmte chu an pâwl zâwm tûrin an tilui a. Juda pâwl hrang hrangte chu thuneihna an inchuh avângin khawpui chhûng dinhmun chuan chhiat lam a pan nasa hle a. Tlân chhuah chu a harsa tial tial a ni. C.E. 70-a Rom sipaite an lo kîr leh chuan tlân chhuah chu thil theih a ni ta lo. (Lk. 19:43) Tawi khaw muangte chu dan chêpin an awm ta! Tlânga tlân Kristiante tân chuan Isua kaihhruaina zui chu nun chhanhimna a lo ni a. Jehova chuan a mite chhan chhuah dân a hria tih chu mahni ngeiin an hmu ta a ni. He thilthleng aṭang hian eng nge kan zir theih?

¹⁶ Hrehawm nasa tak chhûnga thil a rawn inher chhoh zêl chuan, Kristiante tân Pathian Thu leh a inawpna pâwl aṭanga kaihhruaina an hmuhte an zawm chu a ngai dâwn a ni. Entîr nân, ‘tlanga tlân bo’ tûra Isua thupêk chu tûn laiah pawh a hman theih a. Kan tlân bo dân tûr chiah chu hriat a la ni lo mai a ni. * Mahse, Jehova chuan chûng kaihhruainate kan zawm a ngaih hun a lo thlen chuan a awmzia a tichiang dâwn tih kan ring tlat thei a ni. Kan chhan chhuahna chu thu âwihnaah a innghah dâwn avângin, heti hian kan inzâwt tûr a ni: ‘Jehova’n a mite tân tûna a pêk kaihhruainate chu engtin nge ka chhân lêt? Ka chhâng lêt nghâl vat ṭhîn nge ni a, zawm ka hreh ṭhîn zâwk?’ tiin.—Jak. 3:17.

THIL LO THLENG TURTE ATANA INTIHCHAK

17. Habakuka hrilh lâwkna chuan lo awm tûr Pathian mite beihna chungchâng eng nge a târ lan?

¹⁷ Tûnah chuan, atîra kan târ lan tâk Goga beihna nasa takah khân lo kîr leh ta ila. Chu mi nêna inkûngkaih hrilh lâwknaah, Habakuka chuan: “Ka hriatin ka khûr, ti rilan, a awah ka khâ a inkhâwng; ka ruh a muatin, ka khûr a, mahni hmunah: mahse sipai rual pui ang buaina nî mipui chunga [Pathian] a lo thlen hunin ka nghîng lo vang,” tiin a sawi a. (Hab. 3:16) Pathian mite beihna lo awm tûr chanchin a hriatna ringawt pawhin, zâwlnei chu a tirilah a man a, a khâ a khâwntîr bâkah, a chakna a tibo bawk a ni. Habakuka chhân lêt dân chuan Goga’n min beih huna kan dinhmun chu khirh hle anga a lan tûrzia a târ lang a. Mahse, zâwlnei chuan Jehova ni ropui chu ngawi renga nghah a inhuam a, Jehova’n a mite a chhan chhuak dâwn tih chu a ring tlat a. Chutiang rin tlatna chu kan nei ve thei a ni.—Hab. 3:18, 19.

18. (a) Engvângin nge lo awm tûr beihna chu hlauh loh chhan tûr kan neih? (b) A dawta thuziakah eng nge kan sawiho vang?

¹⁸ Kan hmuh tâk entîrna pathumte chuan Jehova’n a mite chhan chhuah dân a hria tih a târ lang a. A thiltum chu hlawhchham thei a ni lo; hnehna a chang ngei dâwn a ni. Mahse, chu hnehna ropui taka tel ve thei tûr chuan a tâwp thlengin kan rinawm tûr a ni. Engtin nge Jehova chuan tûna kan rinawmna vawng thei tûra min ṭanpui? Chu chu a dawta thuziakah târ lan a ni ang. (w12-E 04/15)

[Footnote]

[Zirlai Atâna Zawhnate]