“Kristian” Zawng Zawng Hi Kristian An Ni Vek Em?

KRISTIAN eng zât nge awm? Atlas of Global Christianity târ lan dânin, kum 2010-ah mi tlûklehdingâwn 2.3 dâwn lai an awm a ni. Mahse, chûng Kristiante chu thurin leh kal phung hran nei ṭheuh pâwl 41,000 aia tamah an awm tih chu lehkhabu chuan a târ lang bawk. “Kristian” sakhua tam tak a awm avângin, a chungchâng ngaihtuahtu mi ṭhenkhat chu an mangangin, an beidawng hial a ni. Anni chuan heti hian an ngaihtuah ngei ang, ‘Kristian anga inchhâl zawng zawngte hi Kristian an ni tak zet em?’ tiin.

Thil awm dân chu kawng dang aṭangin lo thlîr ta ila. Zinmi chuan ramri-a awm sawrkâr hotute hnênah a ram mi nihna a hrilh a ngai ṭhîn a. Chu a inchhâlna nemngheh nân passport ang chi lehkha pawimawh a hmuhtîr a ngai bawk a ni. Chutiang bawkin, Kristian dik chuan Krista a rin thu sawi mai aia tam a tih a ngai a. Chhinchhiahna dang a neih a ngai bawk a ni. Chu chu eng nge ni thei ang?

“Kristian” tih ṭawngkam chu C.E. 44 hnu lama hman ṭan a ni a. Bible thilthleng chanchin ziaktu Luka chuan: “Antiokei khuaah chuan a ni, zirtîrteho chu ‘Kristian’ an tih hmasak ber ni,” tiin a ziak a ni. (Tirhkohte 11:26) Kristian tia kohte hi Krista zirtîrteho an ni tih chhinchhiah ang che. Engin nge mi chu Isua Krista zirtîr nihtîr? The New International Dictionary of New Testament Theology lehkhabu chuan: “Zirtîrte anga Isua zui tih awmzia chu tiam chin awm lova [mahni] nunna zawng zawng . . . dam chhûng zawnga pêk hi a ni,” tiin a sawi. Chuvângin, Kristian dik chu Kristianna Dintu, Isua zirtîrna leh kaihhruaina zawng zawng tiam chin awm lova zuitu hi a ni.

Tûn lai Kristiana inchhâlte zîngah hian chutiang mi chu hmuh theih a ni em? Isua ngei chuan a hnungzuitu dikte chhinchhiahna chungchângah eng nge a sawi? Bible-in hêng zawhnate a chhân dân ngaihtuah tûrin kan sâwm a che. A dawta thuziakahte chuan, Isua’n a hnungzuitu dikte chhinchhiahna a sawi palite kan bih chiang ang. Kum zabi khatnaa Kristiante’n chûng chhinchhiahnate an tlin dân kan ngaihtuah hmasa ang a. Tin, tûn laia Kristiana inchhâl tam takte zînga chûng chhinchhiahna tlintute chu hriat kan tum bawk ang. (w12-E 03/01)