‘Pa Chanchin Fapain A Puang Duh’
‘Pa Chanchin Fapain A Puang Duh’
“Pa . . . chu tunge a nih, Fapa leh an hnêna Fapain a puan duhnate chauh lo chuan tuman an hre lo.”—LK. 10:22.
ENGTIN NGE KAN CHHAN ANG?
Engvângin nge Isua chu a Pa chanchin puang tûra a tlin ber?
Engtin nge Isua chuan mi dang hnênah a Pa chanchin a puan?
Eng kawngin nge Isua chu Pa chanchin puanna kawngah kan entawn theih?
1, 2. Eng zawhnain nge mi tam takte chu tihrilhhai a, engvângin nge?
‘PATHIAN chu tu nge a nih?’ He zawhna hian mi tam takte chu a tihrilhhai hle. Entîr nân, Kristian hmingpu a tam zâwkte chuan Pathian chu Trinity a nih ring mah se, he thurin hi hriat thiam theih a ni lo tih an pawm a ni. Lehkha ziaktu pakhat, sakhaw hruaitu ni bawk chuan heti hian a sawi a ni: “Hei hi mihring hriat thiam phâk bâk thurin a ni a. Thil nih dân pângngai emaw, chhan leh vâng neia mihring thil chhût dân emaw piah lam thil a ni,” tiin. Kawng leh lamah chuan, chanchhâwnna ngaih dân pawmtu zawng zawng deuhthaw chuan Pathian a awm an ring lo thung a. Anni chuan thil siam ropui tak takte hi tihpalh thil thua lo awm niin an sawi a ni. Chuti chung pawh chuan, Pathian awm hnâwl aiin, chanchhâwnna ngaih dân theh lârtu Charles Darwin-a chuan: “Hêng zawng zawngte hi mihringte hriat thiam phâk bâk a ni tia thu tlûkna siam chu ka tân a him ber ang,” tiin a sawi a ni.
2 An thurin chu engpawh ni se, mi zawng zawng deuhthaw chuan Pathian awmna nêna inkûngkaih zawhnate chu an ngaihtuah a. Mahse, thu tâwp lungawithlâk tak an siam theih loh hian, tam tak chuan Pathian an zawnna chu an bânsan mai ta ṭhîn a ni. Setana chuan “ring lote rilru a tidel ta” si a. (2 Kor. 4:4) Mi a tam zâwkte’n lei leh vân Siamtu, Pa chungchânga thu dik an hre lo leh an buai hle pawh hi a mak lo ve!—Is. 45:18.
3. (a) Tuin nge Siamtu chanchin kan hnênah puang? (b) Eng zawhnate nge kan ngaihtuah ang?
3 Mahse, mite tân Pathian chungchâng zir chu a pawimawh hle. Engvângin nge? ‘Lalpa [“Jehova,” New World Translation] hming lamte’ chauh chhandam an nih dâwn avângin. (Rom 10:13) Pathian hming lamnaah chuan Jehova chu Mi tak tak anga hmêlhriat a tel a ni. Isua Krista chuan a zirtîrte hnênah he hriatna pawimawh tak hi a hrilh a. An hnênah Pa chanchin chu a puang a ni. (Luka 10:22 chhiar rawh.) Engvângin nge Isua chuan Pa chanchin chu tu dang zawng aia a puan chhuah theih? Engtin nge a puan chhuah? Mi dangte hnêna Pa chanchin puan chhuahnaah engtin nge Isua kan entawn theih? Hêng zawhnate hi i lo ngaihtuah ang u.
ISUA KRISTA—PA CHANCHIN PUANG TURA TLING BER CHU
4, 5. Engvângin nge Isua chu Pa chanchin puang tûra dinhmun ṭha bera a din?
4 Isua chu a Pa chanchin puang tûrin a tling ber a ni. Engvângin nge? Nunna dang zawng zawngte siam a nih hma daihin, thlarau thil siam, a hnua Isua lo ni ta chu “Pathian Fapa mal neih” angin vânah a awm dêr tawh a ni. (Joh. 1:14; 3:18) Dinhmun danglam bîk tak a va ni êm! Thil siam dangte an awm hmain, Fapa chuan a Pa ngaihsakna zawng zawng chu a dawng a, A chanchin leh A miziate chu a zir a. Pa leh Fapa chuan kum chhiar sên loh chhûng chu nasa taka inbiain, inngainatna thûk tak an nei chho a ni. (Joh. 5:20; 14:31) Fapa chuan Pa mizia chu a va hre chiang dâwn êm!—Kolossa 1:15-17 chhiar rawh.
5 Pa chuan Fapa chu a tâna Thusawitu, “Pathian Thua” ni tûrin a ruat a. (Thup. 19:13) Chuvângin, Isua chu mi dangte hnêna Pa chanchin puang tûrin a tling ber a ni. Inâwm takin, Chanchin Ṭha ziaktu Johana chuan Isua, Pathian ‘Thua’ chu “Pa ângchhûnga awm” angin a târ lang a ni. (Joh. 1:1, 18) Chu ṭawngkam hmangin Johana chuan kum zabi khatnaa chaw kîl dân chu a sih hmuh a. Chutih lai chuan chaw an kîlin, mi pakhat chu a vei lama mi ângchhûng hnaih zâwngin a ṭhu âwn ṭhîn. In hnaih taka an awm avângin an pahnih chuan awlsam takin an titi thei a. Chutiang bawkin, “Pa ângchhûnga awm” Fapa chuan a Pa nên titina thûk tak a nei a ni.
6, 7. Engtin nge Pa leh Fapa inlaichînna chuan hma a sâwn chhoh zêl?
6 Pa leh Fapa inlaichînna chuan hma a sâwn chho zêl a. Fapa chu ‘ni tin [Pathian] lâwmna a lo ni.’ (Thufingte 8:22, 23, 30, 31 chhiar rawh.) Chutiang a nih chuan, hna an thawh dunna leh Fapain a Pa miziate entawn dân a zirna aṭanga an inlaichînna a nghet lehzual hi a âwm hle a ni. Finna nei thil siam dangte an siam leh Jehova’n a mi mala a dâwr dân a hmuhna chuan Fapain Pathian mizia a ngaihhlutna chu a tizual ngei ang.
7 A hnua Setana’n rorêl tûra Jehova dikna neih a chona pawh chuan Fapa chu dinhmun khirh tak hnuaia Jehova’n hmangaihna te, rorêl dikna te, finna te, leh thiltihtheihnate a târ lan dân hriat theihna hun remchâng a pe a ni. Chu chuan, Isua chu a hnua leia rawng a bâwlnaa harsatna a tawhte hmachhawn tûrin a ṭanpui ngei ang.—Joh. 5:19.
8. Engtin nge Chanchin Ṭha ziakte chuan Pa mizia tam tak zir tûra min ṭanpui?
8 Jehova nêna inlaichinna ṭha a neih avângin, Fapa chuan Pa chanchin chu mi dang zawng aiin a hrilhfiah kim thei zâwk a. A Fapa mal neih chhun zirtîrna leh thiltihte ngaihtuah aia Pa hriat theih dân kawng ṭha zâwk eng nge awm thei tehreng ang? Entîr nân, “hmangaihna” tih thu mal dictionary hrilhfiah dân aṭanga a awmzia hriat thiam tak zet a harsat dân tûr hi han ngaihtuah teh. Isua rawngbâwlna leh mi dangte a ngaihsak dân chungchânga Chanchin Ṭha ziaktute thuziak nung tak ngaihtuahna aṭangin “Pathian chu hmangaihna a ni,” tih thu chu kan hre thiam hle thei a. (1 Joh. 4:8, 16) Leia a awm laia zirtîrte hnêna Isua târ lan Pathian mize dangte chungchâng pawh chutiang bawk chu a ni.
ISUA’N A PA CHANCHIN A PUAN DAN
9. (a) Isua chuan eng kawng pawimawh tak pahnihin nge a Pa chanchin a puan? (b) Isua’n a zirtîrna hmangin a Pa chanchin a puang tih târ langtu entîrna pakhat pe rawh.
9 Engtin nge Isua chuan a zirtîrte leh nakina a hnungzuitu lo la ni tûrte hnênah Pa chanchin a puan? Kawng pawimawh tak pahnihin a puang a ni: a zirtîrna leh a chêtzia hmangin. A zirtîrna chu i lo ngaihtuah hmasa ang u. A hnungzuitute hnêna Isua thil zirtîr chuan a Pa ngaihtuahna, rilru, leh kawngte hriat thiamna thûk tak a neihzia a târ lang a ni. Entîr nân, Isua chuan a Pa chu berâm pakhat vâk bo pawh kal chhuaka zawngtu berâmte ngaihsak tak nên a tehkhin a. Ani chuan a neituin berâm bo a zawn hmuhin, “sawmkua leh pakua vâk bo lote chungah ai chuan, a chungah a lâwm zâwk” tih a sawi a ni. Chu tehkhinna chu eng anga hman nge ni? Isua chuan heti hian a hrilhfiah a ni: “Chutiang bawkin hêng mi tête zînga pakhat boral pawh hi in Pa vâna mi duhzâwng a ni lo ve,” tiin. (Mt. 18:12-14) He tehkhin thu aṭang hian Jehova chungchâng eng nge i zir theih? Hlutna nei lo leh theihnghilh nia i inhriat châng pawhin, i Pa vâna mi chuan a ngaihven chein, a ngaihsak che a ni. A mithmuhah chuan, “hêng mi tête zînga” pakhat i ni.
10. Engtin nge Isua chuan a chêtzia hmanga a Pa chanchin a puan?
10 Isua’n a zirtîrte hnêna Pa chanchin a puan dân kawng hnihna chu a chêtzia hmangin a ni. Chuvângin, tirhkoh Philipa’n Isua hnêna: “Pa chu . . . min hmuhtîr te che,” a tih khân, ani chuan: “Tupawh mi hmu chu Pa hmu a ni,” tiin a sawi thei a ni. (Joh. 14:8, 9) Isua’n a Pa miziate a târ lan dân entîrna ṭhenkhat hi han ngaihtuah teh. Phâr pakhatin tidam tûra Isua a ngen khân, ani chuan “phâr bawm” pa chu a dek a: “Ka duh e, lo thianghlim tawh ang che,” a ti a. Tihdama a awm tâk hnu chuan, Isua hnêna thiltihtheihna petu chu Jehova a ni tih a hre chiang ngei ang le. (Lk. 5:12, 13) Chu bâkah, Lazara a thih pawh khân, Isua chu “a rilruin a rûm a, a lungngai a, . . . a ṭap ta a,” zirtîrte chuan Pa khawngaihna Isuaa lang chu an hmu thiam ngei ang. Isua chuan Lazara chu kaitho dâwn mah se, Lazara chhûngte leh a ṭhiante hrehawm tawrhna chu a tawrhpui a ni. (Joh. 11:32-35, 40-43) Pathian zahngaihzia târ langtu Isua thiltihte chungchâng ziakna Bible châng duh deuh mai i nei ngei ang.
11. (a) Isua’n biak in a thenfai khân, a Pa chungchâng eng nge a târ lan? (b) Isua’n biak in a thenfai chanchin chu engvângin nge a thlamuanthlâk?
11 Mahse, Isua’n biak in a thenfaina aṭangin eng thu tâwp nge kan i siam theih? Thilthleng chu han mitthla teh: Isua chuan hruihrual a siam a, sebâwng leh berâm zuartute chu a hnawt chhuak a. Tangka thlengtute tangka chu a paih darh a, an dawhkânte a namthlûksak bawk a ni. (Joh. 2:13-17) A thiltih chuan zirtîrte chu Lal Davida hrilh lâwkna thu: “I ina ka ṭhahnemngaihnain mi ei zo,” tih chu a hriat chhuahtîr a. (Sâm 69:9) Khauh taka hma lain, Isua chuan biakna dik vênhim a duh hle tih a târ lang. Chu chanchinah chuan Pa mizia chu i hmu em? Chu chuan Pathianin leia suahsualna nuai bo tûrin thiltihtheihna nasa tak a nei mai ni lovin, chutianga ti tûrin châkna nasa tak a nei bawk tih min hriattîr a ni. Isua’n thil sual tihna a chhân lêt dân chuan leia suahsualna hluar tak a hmuh avânga Pathian rilru awm dân tûr chu a târ lang a ni. Hei hi rorêl dik lohna kan hmachhawn huna min thlamuantu a va ni tak êm!
12, 13. Isua’n a zirtîrte a cheibâwl dân aṭangin Jehova chungchâng eng nge kan zir theih?
12 Entîrna dang pakhat i lo ngaihtuah leh ang u—Isua’n a zirtîrte a cheibâwl dân chu. Anni chu ropui ber nih inchhuhin an inhnial reng ṭhîn a. (Mk. 9:33-35; 10:43; Lk. 9:46) A Pa bulah hun rei tak a awm avângin, Isua chuan chutianga chapona rilru put hmang Jehova thlîr dân chu a hria a ni. (2 Sam. 22:28; Sâm 138:6) Chu bâkah, Isua chuan chutiang rilru put hmang chu Setana’n a târ lang tih a hmu bawk a. Mi chapo takte chuan challanna leh dinhmun sângte chu an ngai pawimawh hle a ni. Chuvângin, Isua tân chuan zirtîrna a pêk, a zirtîrte zînga ropui duhna rilru put hmang awm zawm zêl hmuh chu a va lungngaihthlâk dâwn êm! Tirhkoh atâna a thlante zîngah pawh chutiang rilru put hmang nei an awm si a! Anni chuan Isua leia a awm tâwp nî thlengin ropui duhna rilru put hmang chu an lantîr a ni. (Lk. 22:24-27) Mahse, Isua chuan ama inngaihtlâwmna rilru put hmang an la entawn dâwn tih beiseina nei chungin ngilnei takin a thunun chho zêl a ni.—Phil. 2:5-8.
13 Isua’n a zirtîrte neih rilru put hmang dik lo dawhthei taka a siam ṭhat dânah Pa mizia chu i hmu thiam em? Isua thiltih leh ṭawngkam chhuakah hian thil sual an ti fo chung pawha a mite kalsan lotu, Pa chu i hmu thei em? Pathian miziate kan hriatna chuan thil kan tihsual huna kan inchhîrzia hrilh tûrin min chhêttîr a ni lâwm ni?
FAPA CHUAN A PA CHANCHIN A PUANG DUH
14. Engtin nge Isua chuan a Pa chanchin a puan duhzia a târ lan?
14 Thuneihna pumhlûm nei rorêltu tam tak chuan thil chinchâng hrilh lovin, mite chu thunun leh engmah hre lova dah an tum a. Chu mi nêna inkalh takin, Isua chuan mi dangte hnênah Pa chanchin a puang duh a, A nihna zawng zawng chu a hrilh vek a ni. (Matthaia 11:27 chhiar rawh.) Chu bâkah, Isua chuan a zirtîrte chu ‘mi diktak, [Pathian Jehova] chu hre tûrin hriat theihna a pe’ a ni. (1 Joh. 5:20) Chu chu eng tihna nge ni? Isua chuan a hnungzuitute rilru chu Pa chanchin a zirtîrte hre thei tûrin a hawnsak a. Ani chuan a Pa chu hriatthiam theih loh Tirnity zînga mi anga zirtîrin a Pa nihna chu a thup bo lo a ni.
15. Engvângin nge Isua chuan a Pa chanchin ṭhenkhat chu a puan loh?
15 Isua chuan a Pa chanchin a hriat zawng zawng chu a puang vek em? Puang vek lo ve, a thil hriat tam takte chu finthlâk takin a sawi lang lo. (Johana 16:12 chhiar rawh.) Engvângin nge? Chutih lai chuan a zirtîrte’n chûng hriatna chu an ‘tlin rih dâwn loh’ vâng a ni. Mahse, Isua sawi angin, “thlamuantu,” a nih loh leh ṭanpuitu thlarau thianghlim a lo thlen hunah chuan an hnênah hriatna tam lehzual pêk a ni ang a, chu chuan “thutak zawng zawngah” chuan anni chu a hruai lût ang. (Joh. 16:7, 13) Nu leh pa fingte chuan an fate chu thil hre thiam thei tûr khawpa an lo puitlin hma loh zawng thil ṭhenkhat an hrilh loh ang bawkin, Isua chuan a zirtîrte chu Pa chanchin ṭhenkhat hre thiam tûra an puitlin hma loh zawng a hrilh hrih lo a ni. Isua chuan ngilnei takin an tlin tâwk chu a ngaihtuah tel a ni.
JEHOVA HRE TURA MI DANGTE ṬANPUIIN ISUA ENTAWN RAWH
16, 17. Engvângin nge mi dangte hnêna Pa chanchin hrilh thei dinhmuna i din?
16 Mi tuemaw i han hriat chian a, a mize duhawm takte i ngaihhlut chuan, mi dangte hnêna a chanchin hrilh i châk ṭhîn a ni lâwm ni? Leia a awm lai khân, Isua chuan a Pa chanchin a sawi a. (Joh. 17:25, 26) Mi dangte hnêna Jehova chanchin puanna hmangin Isua kan entawn thei ang em?
17 Kan hmuh tawh angin, Isua chuan mi dangte aiin a Pa chu a hre chiang zâwk a. Mahse, a thil hriat ṭhenkhat chu mi dangte hrilh a duh a, a hnungzuite chu Pathian miziate an hriat thian lehzual nân hriat theihna pawh a pe hial a ni. Isua ṭanpuinain tûn laia mi tam takte hriat loh kan Pa chanchin chu kan hria a ni lâwm ni? Isua chuan a thu zirtîrte leh a chêtzia hmanga kan hnênah a Pa chanchin a puan avângin kan va lâwm tak êm! Pa kan hriat avângin kan inchhuang hle thei a ni. (Jer. 9:24; 1 Kor. 1:31) Jehova hnaih kan tum tlat ang bawkin, ani chuan min hnaih tawh a. (Jak. 4:8) Chuvângin, chu kan hriatna chu mi dangte hrilh hre ve thei tûr dinhmunah kan ding a ni. Chu chu engtin nge kan tih theih?
18, 19. Eng kawngtein nge mite hnêna Pa chanchin i puan theih? Hrilhfiah rawh.
18 Kan ṭawngkam leh thiltih hmanga Pa chanchin puang chhuaka Isua kan entawn a ngai a. Thlawhhma rawngbâwlnaa kan hmuh mi tam tak chuan Pathian chu tu nge a nih an hre lo tih rilruah vawng tlat rawh. Zirtîrna dik lo chuan Pathian chungchângah ngaih dân dik lo a neihtîr thei a. Bible-a târ lan a nih angin, Pathian hming te, mihringte tâna a thiltum te, leh a miziate chungchânga kan thil hriatte chu an hnênah i hrilh ang u. Chu bâkah, tûn hmaa kan hriat thiam loh zâwnga Pathian miziate târ langtu Bible chângte chu kan unaute nên i sawiho ṭhîn bawk ang u. Chutiang chuan anni pawhin hlâwkna an hmu ve thei ang.
19 Isua entawn tum reng chunga kan chêtzia hmanga Pa chanchin puan chhuah chungchâng chu eng nge ni? Mite’n Krista kan hmangaih tih kan thiltiha an hmuh hunah, Pa leh Isua lama hîpin an awm ang. (Eph. 5:1, 2) Tirhkoh Paula chuan: “Mi zirtute ni rawh u, kei pawhin Krista zirtu ka ni ang bawk hian,” tiin min fuih a ni. (1 Kor. 11:1) Kan chêtzia hmanga Jehova hmu tûra mite kan ṭanpui thei hi chanvo ropui a va ni êm! Ni e, mi dangte hnêna Pa chanchin puanna hmangin Isua chu i entawn ṭheuh zêl ang u. (w12-E 04/15)
[Zirlai Atâna Zawhnate]
