Pathian Thu Aṭangin Inzir Rawh

Pathian Ram Chu Eng Nge Ni?

He thuziak hian i lo ngaihtuah mai theih zawhnate zâwtin, i Bible-a a chhânna i hmuh theihna laite a târ lang a. Jehova Thuhretute chuan chûng chhânnate sawipui che chu an châk hle a ni.

1. Pathian Ram chu eng nge ni?

Pathian ram chu vân lam sawrkâr a ni a. Chu chuan sawrkâr dang zawng zawng chu rawn thlâkin, Pathian duhzâwng vânah leh leiah hian a thlentîr ang. Chuvângin Pathian ram chu kan mamawh chingfeltu tûr sawrkâr ṭha a ni.—Daniela 2:44; Matthaia 6:9, 10 chhiar rawh.

Lalram chuan lal a nei tûr a ni a. Jehova chuan a Fapa, Isua chu A Lalrama Lal ni tûrin a ruat a ni.—Luka 1:30-33 chhiar rawh.

2. Engvângin nge Isua chu Rorêltu atâna duhthusâm a nih?

Pathian Fapa chu ngilnei tak, thu dika ding nghet, leh mite ṭanpui tûra thiltihtheihna nei a nih avângin Lal atâna duhthusâm a ni. (Matthaia 11:28-30) Kaihthawh leh a nih hnuah, Isua chu vânah a chho va, Jehova ding lamah lalna a chan hun tûr chu a nghâk a. (Hebrai 10:12, 13) A tâwpah Pathian chuan vân aṭanga rorêl ṭan tûrin thuneihna a pe ta a ni.—Daniela 7:13, 14 chhiar rawh.

3. Isua rualin tute’n nge rorêl ve dâwn?

“Mi thianghlimte” tia koh pâwl pakhat chu vâna Isua rorêlpui tûra Pathian thlan a ni a. (Daniela 7:27) Mi thianghlimte ni tûra thlan hmasakte chu Isua tirhkoh rinawmte kha an ni. Jehova chuan mi rinawm a hmei a pate chu mi thianghlimte angin tûn thlengin a la thlang zawm zêl a. Isua angin, anni chu thlarau taksa pua kaihthawh an ni.—Johana 14:1-3; 1 Korinth 15:42-45 chhiar rawh.

Mi engzât nge vâna kal? Isua chuan anni chu “pâwl tlêmte” tiin a ko va. (Luka 12:32) A tâwpah chuan anni chu mi 1,44,000 an tling chho vang a, Isua nên lei chungah chuan ro an rêl ang.—Thu Puan 5:9, 10; 14:1 chhiar rawh.

 4. Pathian Ram chuan engtikah nge ro a rêl ṭan?

Isua chu kum 1914 * khân Lal a ni ṭan a. Chu mi hnu lawkah, Setana leh a vântirhkohte chu leiah a paih thla a ni. (Thu Puan 12:7-10, 12) Chuta ṭang chuan mihringte hrehawmna chu nasa takin a pung chho va. Indona te, lîrnghîng te, ṭâm te, hri te, leh dân bawhchhiatnate chu he khawvêl hi a ni hnuhnûngah a awm tih chhinchhiahna zînga mi a ni a. (2 Timothea 3:1-5) Pathian Ram hlâwkpui duh zawng zawngte chuan chuta Lal, Isua hnungzuitu nih dân an zir tûr a ni.—Luka 21:7, 10, 11, 31, 34, 35 chhiar rawh.

5. Pathian Ram chuan eng nge a hlen chhuah?

Khawvêl puma thu hrilhna hmangin, Pathian Ram chuan hnam tina mi maktaduai têlte chu Pathian kawngte zir tûrin a ṭanpui dêr tawh a. (Matthaia 24:14) Leia he kal hmang suaksual a tihtâwp hunah, Pathian Ram chuan Isua khua leh tui rinawm “mipui tam tak” chu a vênghim ang.—Thu Puan 7:9, 10, 13-17 chhiar rawh.

Kum 1,000 chhûngin, Lalram chuan lei hi paradise-ah zawi zawiin a chantîr ang a. A tâwpah Isua chuan Lalram chu a Pa hnênah a hlân kîr leh ang. (1 Korinth 15:24-26) Pathian Ram chungchâng hrilhhriat duh tuemaw i nei em?—Sâm 37:10, 11, 29 chhiar rawh. (w11-E 07/01)

Hriat tam lehzual nân Jehova Thuhretute tihchhuah Bible Zirtîrna Dik Tak Chu Eng Nge Ni? tih lehkhabu bung 8 leh 9-na hi en ang che.

[Footnote]