A Chhânna Hmuh Tumin

“Mi tin deuhthaw hian [Isua] nihna chungchângah ngaih dân engemaw tak an nei a. Eng ang khawpa ring emaw, ringhlel emaw pawh ni ila, ‘He mi hi tu nge ni?’ tih kan ngaihtuah ṭheuh a ni.”—ZIAKMI STAN GUTHRIE-A.

MITE chuan Isua nihna hriat an châk hle a. A chanchin ziahna lehkhabute chu hralh tla ber berte a ni. A chungchâng târ lanna film-te pawh a lâr hle bawk. Chuti chung pawhin, Isua chungchângah chuan zawhna a la awm ta reng a. Mite chuan Isua nihna dik tak chungchângah ngaih dân inang lo tak tak an nei hlawm a ni.

Kum tam vak lo kalta khân, chanchinbu mi pahnihte chuan Internet hmangin “Isua hi tu nge ni?” tih zawhna an zâwt a. A chhânna an hmuhte zîngah hêngte hi a tel a ni.

● “Khawngaihna kawnga entawn tlâk taka insiamtu rabbi (zirtîrtu) a nih hmêl.”

● “Ani chu mi pângngai tak, ṭha tak leh ropui taka nung si hi a ni.”

● “Isua hi a awm ngei tih finfiahna a awm lo.”

● “Isua chu Pathian Fapa, sualna ata min chhan chhuak tûra lo piang a, thi a, tho leh taa hi a ni. Tûnah hian ani chu a nung reng a, leiah hian A lo kal leh dâwn.”

● “Isua Krista chu Pathian fapa neihchhun, pathian leh mihring nihna famkim a ruala nei kawp a ni tih ka ring.”

● “Isua chanchin chu puitlingte tâna thawnthu phuahchawp a ni.”

Hêng thlîr dân chi hrang in ang lo tak takte hi a dik vek thei lo tih a chiang hle. Isua chungchânga kan zawhnate atâna chhânna rin tlâk min pe thei innghahna tlâk lehkhabu a awm em? He chanchinbu chhuahtute hian Bible chu Pathian Thu a ni tih leh, Bible chauhvin Isua chungchânga thudik zawng zawng min hrilh a ni tih an ring a ni. *—2 Timothea 3:16.

A dawta thuziakah chuan, Bible-in Isua chungchânga zawhna lâr zual ṭhenkhat a chhân dân chu kan hmu ang. Isua ngei chuan “amah . . . ring apiang” tân chhandamna kawng a inhawn thu a sawi a ni. (Johana 3:16) Chûng chhânnate chu bih chiang a, Isua chungchânga zir belh leh amaha rinna lantîr dân zir i ngaih leh ngaih loh hre tûrin kan sâwm a che. (w12-E 04/01)

[Footnote]