A Chhânna Hriat A Pawimawh Em?

“Thutak in hria ang a, thutak chuan bâwih a bân ang che u.”—JOHANA 8:32.

BIBLE-AH chuan Isua chungchânga rin dân hrilhhaithlâk tak tak leh mi hruai bo hial theite laka min chhuah zalên thei thutak a chuang a. Mahse, a chungchâng kan rin dân chuan pawimawhna a nei tak zet em? Aw, nei e. Jehova’n a ngai pawimawh a. Isua pawhin a ngai pawimawh bawk a. Chuvângin, keini pawhin kan ngai pawimawh tûr a ni.

● Engvângin nge Jehova’n a ngaih pawimawh? A awlsam zâwnga sawi chuan, “Pathian chu hmangaihna” a nih vâng a ni. (1 Johana 4:8) Jehova chuan kum khuaa hlim taka nung tûrin min duh a. Isua chuan heti hian a sawi a ni: ‘Pathianin khawvêl [mihringte] a hmangaih êm êm a, chutichuan a Fapa mal neih chhun a pe a, amah chu tupawh a ring apiangin . . . chatuana nunna an neih nân,’ tiin. (Johana 3:16) Pathian chuan a Fapa chu min Chhan Chhuaktu ni tûr leh atîra A thiltum nêna inmila he lei Paradis-a chatuana kan nun theihna kawng min hawnsaktu ni tûrin a rawn tîr a. (Genesis 1:28) Pathian chuan a Fapa chungchâng thutak zir a, an thil zir nunpuitute hnêna chatuan nunna pêk chu a châk hle a ni.—Rom 6:23.

● Engvângin nge Isua’n a ngaih pawimawh? Isua pawhin mihringte a hmangaih a. Kan tân inhuam taka a nun pein, mahni inphat hmangaihna a lantîr a ni. (Johana 15:13) Chutianga tihna hmangin chhandamna kawng awm chhun chu a hawng tih a hre thiam a. (Johana 14:6) Isua’n a tlanna inthawina a tam thei ang berin an hlâwkpui a duh tih chu a mak dâwn em ni? Chuvângin, a hnungzuitu dik takte chu Pathian duhzâwng leh a thiltum chungchâng khawvêl puma mite zirtîr tûrin mawhphurhna a pe a ni.—Matthaia 24:14; 28:19, 20.

● Engvângin nge chu chu kan ngaih pawimawh ang? I thil ngaih pawimawh tak—i hrisêlna leh i chhûngte—chu han ngaihtuah lawk teh. Nangmah leh i hmangaih takte tân hrisêlna ṭha leh nun nuam zâwk neih chu i thlahlel em? Jehova chuan Isua kal tlangin, nangmah leh i hmangaihte tân hrisêlna ṭha famkim leh natna leh hrehawm tawrhna awm tawh lohna khawvêl thara tâwp nei lo nun neih theih beiseina chu a pe che u a ni. (Sâm 37:11, 29; Thu Puan 21:3, 4) Chutiang khawvêla nun chu i duh em? I duh a nih chuan i tân thil tih ngai engemaw a awm a ni.

A thupui ruala târ lan Bible châng: “Thutak in hria ang a, thutak chuan bâwih a bân ang che u,” tih kha han en leh ta la. Isua chungchâng thutak leh Pathian thiltum thlen famkimna kawnga a chanvo neihte hriatna chuan bâwih tânna zawng zawnga hrehawm ber—sual leh thihna bawih—ata min bân thei a ni. Mahse, chu chhuah zalênna hmu tûr chuan ‘thutak i hriat’ a ngai a. Engvângin nge chu thutak chungchâng leh nangmah leh i hmangaihte’n in hlâwkpui theih dân chu i zir belh loh vang? Jehova Thuhretute chuan ṭanpui che an châk hle si a. (w12-E 04/01)