Pathian Thu Aṭangin Inzir Rawh

Engtin Nge Biakna Dik I Hriat Theih Ang?

He thuziak hian i lo ngaihtuah mai theih zawhnate zâwtin, i Bible-a a chhânna i hmuh theihna laite a târ lang a. Jehova Thuhretute chuan chûng chhânnate sawipui che chu an châk hle a ni.

1. Sakhaw dik pakhat chauh a awm em?

Isua chuan a hnungzuitute hnênah chuan sakhaw dik pakhat chauh a zirtîr a. Chu chu nunnaa hruaitu kawng ang a ni. Chu kawng chungchângah Isua chuan: “A hmutute pawh tlêmtê an ni,” tiin a sawi. (Matthaia 7:14) Pathian chuan a thutak Thua innghat biakna chauh chu a pawm a. Pathian betu dikte chu rinna pakhatah an inpumkhat tlat a ni.—Johana 4:23, 24; 14:6; Ephesi 4:4, 5 chhiar rawh.

2. Engvângin nge Kristiana inchhâl sakhua tam tak a awm?

Zâwlnei derte chuan Kristianna an tibawlhhlawh a, mahni hlâwk nân an lo hmang a ni. Isua sawi lâwk angin, chûng mite chu a “berâm” angin an inlantîr a; mahse, chinghne koham tak angin an che si ṭhîn. (Matthaia 7:13-15, 21, 23) Kristianna der chu a bîk takin Isua tirhkohte thih hnua lo lang chhuak a ni.—Tirhkohte 20:29, 30 chhiar rawh.

3. Biakna dik hriat hran theih dân kawng ṭhenkhat chu engte nge ni?

Pathian betu dikte chuan Bible chu Pathian Thu angin an zah. Anni chuan Bible thu bulte mila nun an tum hrâm hrâm ṭhîn. Chuvângin, sakhaw dik chu mihring ngaih dâna innghat sakhuate lakah chuan a danglam hle a ni. (Matthaia 15:7-9) Pathian betu dikte chu an thu hrilh nêna inmilin an nung ṭhîn.—Johana 17:17; 2 Timothea 3:16, 17 chhiar rawh.

Sakhaw dik chuan Pathian hming, Jehova chu a chawimawi. Isua chuan Pathian hming chu a hriattîr a. Mite chu Pathian hre tûra ṭanpuiin, Pathian hming zahawm, a nih loh leh thianghlim tûra ṭawngṭai tûrin a zirtîr a ni. (Matthaia 6:9) I chênna hmunah, eng sakhuain nge Pathian hming hman chu chawi lâr?—Johana 17:26; Rom 10:13, 14 chhiar rawh.

 4. Engtin nge Pathian betu dikte i hriat theih ang?

Kristian dikte chuan Pathian Ram chanchin an hril. Pathian chuan Isua chu Ram chanchin hril tûrin a rawn tîr a. Pathian Ram chu mihringte beisei tûr awmchhun a ni. Isua chuan a thih nî thlengin chu Ram chanchin chu a hril a. (Luka 4:43; 8:1; 23:42, 43) A zirtîrte pawh Pathian Ram chanchin hril ve tûrin a hrilh a ni. Mi tuemawin Pathian Ram chanchin hrilh tûra a rawn biak che chuan, eng sakhaw vuantu nge nia i rin?—Matthaia 10:7; 24:14 chhiar rawh.

Isua hnungzuitute chu he khawvêl suak sual taka mi hi an ni lo. Anni chu politics-ah emaw, mipui intihbuainaah emaw an tel ngai lo. (Johana 17:16) Chu bâkah, khawvêl thil chîn leh rilru put hmang hlauhawm takte pawh an entawn lo bawk.—Jakoba 1:27; 4:4 chhiar rawh.

5. Kristianna dik chhinchhiahna ber chu eng nge ni?

Kristian dikte chuan inhmangaih tawnna langsâr tak an nei. Anni chuan Pathian Thu aṭangin hnam tina mite zah dân an zir a. Sakhaw dik lote’n hnam leh ramte indona chu nasa takin thlâwp mah se, Pathian betu dikte chuan an thlâwp ve duh lo. (Mika 4:1-4) Chu ai mah chuan, sakhaw dik betute chuan mahni hmasial lo takin an hun leh tha leh zung leh thil neihte chu mi dangte ṭanpui nân leh fuih nân an hmang zâwk a ni.—Johana 13:34, 35; 1 Johana 4:20, 21 chhiar rawh.

Eng pâwlin nge an zirtîrna zawng zawngah Pathian Thu ṭanchhan a, Pathian hming chawimawi a, Pathian Ram chu mihringte beisei tûr awmchhun a nihzia puang chhuak? Eng pâwlin nge hmangaihna nunpui a, indona thlâwp ve duh lo? Thilthlengte chuan Jehova Thuhretute an nihzia a târ lang a ni.—1 Johana 3:10-12. (w11-E 08/01)

Hriat tam lehzual nân, Jehova Thuhretute tihchhuah he Bible Zirtîrna Dik Tak Chu Eng Nge Ni? tih lehkhabu bung 15-na hi en ang che.

[Phêk 24-naa milem]

“Pathian hria an inti a, . . . an thiltihin an phatsan si.”—Tita 1:16