“Hunte leh Hunbite” Pathian Jehova Chu Rinchhan Rawh

“Hunte leh hunbite a tidanglam a: lalte a sawn bo va, lalte a tungding a.”—DAN. 2:21.

ENGTIN NGE KAN CHHAN ANG?

Engtin nge thil siam leh hrilh lâwkna thleng famkimte hian Jehova chu Hun Vawng Diktu Ropui tak a nihzia a târ lan?

Jehova chu “hun leh hunbite” Pathian a ni tih kan hriatthiamna chuan eng ti tûrin nge min chêttîr?

Engvângin nge Jehova hun ruat chu khawvêla thilthlengte leh mihring ruahmannate’n a thunun loh?

1, 2. Jehova’n hun a hriat thiam tak zetzia engin nge târ lang?

PATHIAN JEHOVA chuan mihring a siam hma daihin hun tehna tûr chu a siam a. Thil siam nî a ni linaah Pathian chuan: “Chhûn leh zân ṭhenna tûrin vân boruak zau takah chuan êntute awm sela, chûngte chu chhinchhiahna te, hun bi te, nî te, kum te hriatna tûr ni rawh se,” a ti a. (Gen. 1:14, 19, 26) Pathian Jehova duhzâwng nêna inmilin, chutiang tak chuan a thleng ta rêng a ni.

² Mahse, tûn thleng hian, scientist-te chu hun nihphung chungchângah an la inhnial reng a. Encyclopedia pakhat chuan: “Hun hi khawvêla thil hriat thiam harsa berte zînga mi a ni a, tuma’n a nihphung dik tak an sawi thei lo,” a ti a. Mahse, Jehova chuan hun hi a hre thiam chiang hle. Ani chu “vân Siamtu . . . leilung hi dina Siamtu” a ni tlat si a. Ani chuan ‘a tâwp tûr chu atîr aṭang rêngin a sawi ṭhîn a, thil a la tih lohte chu hmasâng aṭang rêngin a sawi ṭhîn’ bawk. (Is. 45:18; 46:10) Amah leh a Thu, Bible kan rinna tihzual tum chungin, thil siam leh hrilh lâwkna thleng famkim tawhte’n Jehova chu Hun Vawng Diktu Ropui a nihzia a târ lan dân i lo ngaihtuah ang u.

THIL SIAMTEN HUN VAWNG DIKTU ROPUI RINNA MIN NEIHTIR

3. Engtin nge Pathian hun vawn dikzia chu thil siamah a lan chhuah?

³ Pathian Jehova thil siam engkim—a lian ber aṭanga a tê berte—chuan hun an vawng dik hle a. Entîr nân, atom chu hunbi nei takin a che reng a ni. Atom chêt dân rinchhana siam hun teh nâna hman ber sana-te chu kum maktaduai 80-ah second 1 chauhvin a dik lo thei a ni. Planet leh arsite pawh hun bi nei takin an inher a. Vân boruaka an inher dân tûr hriat lâwk theihna chu sik leh sa chhinchhiah nân leh zin kawng hriat theih nâna hman a ni.  Pathian Jehova—hêng “sana” rin tlâk takte Siamtu—chu ‘thiltihtheihna lama chak’ leh kan chawimawi phu ber a ni.—Isaia 40:26 chhiar rawh.

4. Engtin nge thlai leh thil nungte aṭanga lang chhuak hun vawn dikna chuan Pathian finna a târ lan?

⁴ Hun vawn dikna chu thlai leh thil nungte aṭang pawhin a hmuh theih a. Thlai leh nungchate nun phung chu sana anga sawi theih tûr chhûng lama hun vawngtu hian a kaihruai a ni. Sava tam tak chuan hmun danga an pêm ṭan hun tûr hriat theihna an nei a. (Jer. 8:7) Mihringte pawhin sana anga sawi theih tûr chhûng lama hun vawngtu chu an nei a, chu chuan chhûn leh zân a hriattîr ṭhîn. Khawvêl lehlama thlawhnaa zin mi tân, hun thar mila a awm theih nân a taksa chuan a chhûng lam sana chu a herh rem a ngai a, chu mi atân ni engemaw zât a ngai ṭhîn a ni. Dik takin, thilsiam aṭanga lang chhuak hun chungchânga entîrna tam tak chuan “hunte leh hunbite” Pathian finzia leh thiltihtheihzia a târ lang chiang hle. (Sâm 104:24 chhiar rawh.) Ni e, Hun Vawng Diktu Ropui tak chu fing ber leh thiltithei ber a ni a. A duhzâwng apiang a hlen chhuak thei tih kan ring tlat thei tihna a nih chu!

A HUN TAKA HRILH LAWKNA THLENG FAMKIMTE CHUAN RINNA MIN NEIHTIR

5. (a) Mihringte hma bâk tûr kan hriat theih dân kawng awmchhun chu eng nge ni? (b) Engvângin nge Jehova chuan nakina thil lo thleng tûrte leh a lo thlen hun tûrte chu a sawi lâwk theih?

⁵ Thil siamte chuan Pathian Jehova “nihna, mita hmuh theih loh” a miziate chungchâng tam tak min zirtîr a; mahse, Mihringte hma bâk tûr chu eng nge ni? tih ang chi zawhna pawimawh takte chu a chhâng lo. (Rom 1:20, C.L. Re-edited.) A chhânna hmuh nân, Pathianin a Thu, Bible-a a târ lan chu kan en a ngai a ni. Chu mi kan han bih chian chuan, a hun taka thleng dik hrilh lâwknate chu kan hmu a. Jehova chuan hma lam hun chu dik taka a hmuh lâwk theih avângin thil lo thleng tûrte chu a sawi lâwk thei a ni. Chu bâkah, Pathian Jehova chuan a thiltum leh a hun duan mila thilte a thlentîr theih avângin, Bible sawi lâwkte chu a hun takah a thleng ṭhîn bawk.

6. Jehova’n Bible hrilh lâwknate thlen famkimna kan hriat thiam a duhzia engin nge târ lang?

⁶ Jehova chuan amah betute chu Bible hrilh lâwknate hre thiam a, hlâwkpui tûrin a duh a. Pathian hun sawi dân chu keini sawi dân nên inang lo mah se, thil lo thleng tûr leh a lo thlen hun tûr a sawi lâwk rêng rêng hian kan hriat thiam theih tûr zâwng ṭawngkam a hmang ṭhîn. (Sâm 90:4 chhiar rawh.) Entîr nân, Thu Puan bu chuan ‘dârkâr leh nî leh thla leh kum atâna buatsaih tawh vântirhkoh palite’ chungchâng a sawi a—chûngte chu kan hriat thiam theih hunbi thliahna vek a ni. (Thup. 9:14, 15) Hrilh lâwknate a hun thlap thlapa a thlen dik dân kan hmuhna chuan “hunte leh hunbite” Pathian leh a Thu-ah rinna min neihtîr tûr a ni. Entîrna ṭhenkhat lo en ta ila.

7. Engtin nge Jerusalem leh Judai ram chungchânga Jeremia hrilh lâwkna thleng famkim chuan Jehova chu Hun Vawng Diktu Ropui a nihzia a târ lan?

⁷ A hmasa berin, B.C.E. kum zabi sarihnaah lo kîr leh ta ila. ‘Judate lal, Jehoiakima, Josia fapa a lal kum linaah’ chuan Hun Vawng Diktu Ropui tak hnên aṭangin ‘Juda mite zawng zawng chungchâng chu Jeremia hnênah a lo thleng a.’ (Jer. 25:1) Jehova chuan Jerusalem tihchhiat a nih tûr thu leh Juda mite Judai ram aṭanga Babulon-a hruai chhuah an nih tûr thu a hrilh lâwk a. Chutah chuan “Babulon lal rawng kum sawmsarih an bâwl ang.” Babulon sipaite chuan B.C.E. 607-ah Jerusalem chu an tichhia a, Juda mite chu Babulon-a hruai an ni ta ngei a ni. Mahse, kum 70 hnuah chuan eng nge lo thleng ang? Jeremia chuan heti hian a hrilh lâwk a: “LALPA chuan heti hian a ti si a, Babulon tân kum sawmsarih chu a kin veleh ka rawn kan ang che u a, in hnêna ka thutiam ṭha tak chu ka hlen ang a, he hmunah hian ka kîrtîr  leh ang che u,” tiin. (Jer. 25:11, 12; 29:10) Chu hrilh lâwkna chu a hun takah—Media leh Persia-in Juda mite Babulon sal tânna ata an chhuahtîr hnu B.C.E. 537-ah—a thleng famkim a ni.

8, 9. Messia lo lanna tûr leh vâna Lalram din a nih tûr chungchânga Daniela hrilh lâwkna chuan Jehova chu “hunte leh hunbite” Pathian a nihzia engtin nge a târ lan?

⁸ Hmân laia Pathian mite chungchânga hrilh lâwkna dang hi han ngaihtuah leh teh. Juda mite’n Babulon an chhuahsan hma kum hnihna vêlah chuan Pathianin zâwlnei Daniela kal tlangin Jerusalem sa ṭha leh tûra thupêk a chhuah hnu kum 483-ah Messia a lo lan tûr thu a sawi lâwk a. Media leh Persia lal chuan B.C.E. 455-ah Jerusalem sa ṭha leh tûra thupêk chu a chhuah a ni. Chu mi hnu kum 483-na chiah—C.E. 29-ah—Nazaret Isua chu baptisma a channaah thlarau thianghlima hriak thih a niin, Messia a lo ni ta a ni. *—Neh. 2:1, 5-8; Dan. 9:24, 25; Lk. 3:1, 2, 21, 22.

⁹ Tûnah chuan chu Lalram chungchânga Bible hrilh lâwkna chu lo en ta ila. Bible hrilh lâwkna chuan Messia Lalram chu kum 1914-ah vâna din a nih tûr thu a târ lang a. Chu chu lei chungpikna thlentu tûr vân aṭanga Setana paih thlâk a nihzia hriltu Isua lo awm lehna “chhinchhiahna” chu pêin a ti a ni. (Mt. 24:3-14; Thup. 12:9, 12) Chu bâkah, Bible hrilh lâwkna chuan “Jentailte nî a kin” hun tûr leh Messia Lalram-in vâna ro a rêl ṭan hun tûr chiah—kum 1914—chu a târ lang bawk a ni.—Lk. 21:24; Dan. 4:10-17. *

10. Kan hma lamah eng thilte nge a hun takah a lo thlen ang?

¹⁰ Kan hmaa lo la thleng tûr chu Isua sawi lâwk “hrehawm nasa tak” hi a ni a. Chu chu a Kum Sâng Rorêlna-in a zawm ang. Chûng zawng zawngte chu a hun ruatah tak a lo thleng famkim ngei dâwn tih rinhlelh rual a ni lo. Jehova chuan chûng thilte lo thlen nân a “nî leh a hun” tûr chu Isua leia a awm lai pawh khân a lo ruat diam tawh a ni.—Mt. 24:21, 36; Thup. 20:6.

“REMCHANNATE LEI ZEL RAWH U”

11. Tâwpna kan hnaih tawhzia hriatna chuan eng anga min nghawng tûr nge a nih?

¹¹ Messia Lalramin ro a rêl ṭan tawh tih leh ‘tâwpna huna’ chêng kan nihzia hriatna chuan engtin nge min nghawng ang? (Dan. 12:4) Mi tam tak chuan khawvêl dinhmun chhe zêl chu hmu reng mah se, chûngte chuan ni hnuhnûngte chungchânga Bible hrilh lâwkna a tithleng famkim tih erawh an hre lo. Anni chuan engtik nîah emaw chuan he khawvêl hi a tlûk chhiat mai an ring pawh a ni thei a, a nih loh leh mihringte thawhrimna chuan “muanna leh himna” a la thlen mai an ring pawh a ni thei bawk. (1 Thes. 5:3) Keini’n engtin nge kan rin ve? Setana khawvêl tâwpna hnaih tawh takah kan awm tih kan hriat chuan, kan hun la  neihte chu “hunte leh hunbite” Pathian rawngbâwl nân leh amah hre tûra mi dangte ṭanpui nâna hman chu kan tum tûr a ni lâwm ni? (2 Tim. 3:1) Kan hun hman dân tûr chungchângah chuan thu tlûkna finthlâk kan siam tûr a ni.—Ephesi 5:15-17 chhiar rawh.

12. Nova hun lai chungchânga Isua thusawi aṭangin eng nge kan hriat theih?

¹² Rilru la pêng thei thil hlîra khat he khawvêla “remchânnate lei zêl” chu thil awlsam a ni lo. Isua chuan: “Nova dam lai ang bawk kha Mihring Fapa lo kal lehna chu a ni ang,” a ti a. Nova dam lai hun chu eng ang nge a nih? Chutih laia khawvêl chu tihtâwp a ni dâwn tih sawi lâwk a ni a. Chûng hun laia mi suaksualte chu khawvêl pum huap Tuilêt-ah an thi vek dâwn a ni. “Felna thu hriltu” a nih angin, Nova chuan a hun laia mite hnênah Pathian thuchah chu rinawm takin a puang chhuak a. (Mt. 24:37; 2 Pet. 2:5) Mahse, mite chu “an eiin an bâr a, nupui pasal an innei ṭhîn; tui a lo lêt a, an zaa a lâk bo vek hma loh chuan engmah an hre [duh] lo.” Chuvângin, Isua chuan a hnungzuitute chu heti hian a vaukhân a ni: “Inring rengin awm rawh u, in rin loh hunah Mihring Fapa a lo kal dâwn si a,” tiin. (Mt. 24:38, 39, 44) Nova hun laia mite ang ni lovin, Nova ang nih kan tum tûr a ni. Inring renga awm tûrin engin nge min ṭanpui ang?

13, 14. Mihring Fapa lo kalna kan nghah lai hian, Pathian Jehova chungchânga eng hriatrengnain nge rinawm taka a rawng bâwl tûrin min ṭanpui ang?

¹³ Mihring Fapa chu kan rin loh huna lo kal tûr ni mah se, Jehova chu Hun Vawng Diktu Ropui a ni tih kan hre reng tûr a ni. A hun ruat chu khawvêl thilthlengte leh mihring ruahmannate hian a thunun ve lo. Jehova chuan a duhzâwng tithleng famkim tûr zâwngin hun leh thil awm dânte chu a thunun a ni. (Daniela 2:21 chhiar rawh.) Dik takin, Thufingte 21:1 chuan heti hian min hrilh a ni: “Lal thinglung chu LALPA kutah a awm a, tui luanna kawng angin, a duh duhnaah a tikawi ṭhîn,” tiin.

¹⁴ Jehova chuan a thiltumte a hun ruat taka a thlen famkim theih nân thilthlengte chu a thunun thei a. Khawvêla inthlâkthlengna pawimawh tam takte chuan hrilh lâwknate a tithleng famkim chho zêl a, a bîk takin khawvêl pum huap Pathian Ram chanchin ṭha hrilhna chungchânga hrilh lâwkna chu a tithleng famkim a ni. Soviet Union tlûkchhiatna leh a rah chhuah kha han ngaihtuah teh. Chutiang khawpa ranga politics lama inthlâkthlengna nasa tak a thleng thei ang tih ringtu an awm mang meuh lo vang. Mahse, he inthlâkthlengna avâng hian tûn hmaa chanchin ṭha hrilh theih lohna hmunahte pawh thu kan hrilh theih phah ta a ni. Chuvângin, “hun leh hunbite” Pathian rawng bâwl tûrin remchânnate i lei zêl ang u.

JEHOVA HUN RUAT CHU RING RAWH

15. Inawpna pâwlin siam remna a neihte chu kan ring thlap a ni tih engtin nge kan lantîr theih?

¹⁵ Tûn ni hnuhnûnga Lalram thu hrilhnaa tel chhunzawm zêl tûr chuan Jehova hun ruat kan rin a ngai a. Khawvêl dinhmun inthlâk thleng zêlte avângin zirtîr siam hna kan thawh dân siam rem deuh pawh a ngai mai thei a ni. Inawpna pâwl chuan Lalram thuchhuahtu kan nih anga kan rawngbâwlna chu a ṭûl dân azirin an siam rem chho zeuh zeuh pawh a ni thei bawk. Pathian Fapa, “kohhranho lû” hnuaia rinawm taka rawngbâwl a, chûng siam remnate zâwm tlatin, “hun leh hunbite” Pathian kan rinzia kan lantîr a ni.—Eph. 5:23.

16. Engvângin nge Jehova’n a hun takah min ṭanpui dâwn tih kan rin theih?

¹⁶ Jehova chuan a hun takah “puih kan ngaih huna ṭanpuina” min pe ang tih ring tlat chungin, a hnênah inthlahrung miah lova kan ṭawngṭai chu a duh a ni. (Heb. 4:16) Chu chuan mi mal tin min hmangaih a, min ngaihsakzia a târ lang a ni lâwm ni? (Mt. 6:8; 10:29-31) Pathian Jehova kan rinna chu a ṭanpuina dîla ṭawngṭai  ziah leh kan ṭawngṭaina leh a kaihhruaina mila thil tiin kan lantîr a ni. Chu bâkah, kan unaute tâna ṭawngṭaisak chu kan theihnghilh ngai lo bawk.

17, 18. (a) Nakin lawkah Jehova’n a hmêlmate chungah eng nge a tih dâwn? (b) Eng thang nge kan pumpelh ang?

¹⁷ Tûn hi ‘rinna tlâkchham’ hun a ni lo va; rinna nghet tak neih hun a ni zâwk a ni. (Rom 4:20) Pathian hmêlma—Setana leh a thununna hnuaia awmte—chuan keimahni pawh tiamin Isua’n A hnungzuitute hnêna a pêk hna an thawhna chu tihtâwp an tum a. (Mt. 28:19, 20) Diabola beihna tâwk chung pawhin, Jehova chu “Pathian nung . . . mi zawng zawng Chhandamtu a ni a, a ringtute Chhandamtu a ni” tih kan hria a. Ani chuan “amah ngaihsaktute chu thlêmna ata chhan chhuah dân” a hria a ni.—1 Tim. 4:10; 2 Pet. 2:9.

¹⁸ Nakin lawkah Jehova chuan he khawvêl suaksual tak hi a rawn titâwp dâwn a. A tihtâwp dân tûr kimchang leh a tihtâwp hun tûr dârkâr chiah hre lo mah ila, Krista chuan Pathian hmêlmate chu a hun takah a rawn tiboralin, Jehova lalchungnunna chu thiam a rawn chantîr ang tih erawh kan hria a ni. Chuvângin, tûna kan chênna “hun leh hunbite” hriat thiam loh chu a va pawi dâwn êm! “Siam tirh aṭangin engkim a awm pângngai angin chi thlahtute muthilh nî ata tawh kha a la awm zêl alâwm,” tih ngaih dân dik lo thangah chuan i tlu lût ngai lo vang u.—1 Thes. 5:1; 2 Pet. 3:3, 4.

“NGHAH PEIHNA LANTIR RAWH”

19, 20. Engvângin nge Jehova chungah nghah peihna kan lantîr ang?

¹⁹ Mihringte tâna a tîra Jehova thiltumah chuan amah leh a thil siam mawi takte chungchâng chatuana zirna hun neih a tel a. Thuhriltu 3:11 chuan heti hian a sawi a ni: “Engkim hi an hun ṭheuhvah chuan mawi takin a siam a; mihring rilruah chuan chatuan a dah bawk a; mahse, chuti pawhin anni chuan Pathianin a tîr ata a tâwp thlenga thil a tih chu an hmu chhuak thei chuang lo,” tiin.

²⁰ Jehova’n mihringte tâna a thiltum a thlâk ngai loh avângin kan va lâwm tak êm! (Mal. 3:6) Pathianah chuan “danglamna leh herna hlim rêng rêng a awm thei lo.” (Jak. 1:17) A hun duan chu mihringte hun tehna, leilung inher kualna ang chite hian a thunun ve lo va. Jehova chu “Lalber chatuana awm” a ni. (1 Tim. 1:17) Chuvângin, “kan chhandamna Pathian chungah nghah peihna” i lantîr tlat ang u. (Mk. 7:7, NW) Ni e, “LALPA beisei zawng zawngte u, chak takin awm ula, in thinlung chu intihuai rawh se.”—Sâm 31:24. (w12-E 05/15)

[Footnote-te]

[Zirlai Atâna Zawhnate]

[Phêk 21-naa milem]

Daniela chuan Pathian pêk hrilh lâwkna thlen famkimna chu a ring

[Phêk 23-naa milem]

Jehova duhzâwng tih nân i hun neihte i hmang ṭangkai em?