Jehova Ropuina I En Chhuahtir Em?
Jehova Ropuina I En Chhuahtir Em?
“Keini chuan . . . dârthlalang angin Jehova ropuina kan ên chhuahtîr ṭhîn.”—2 KOR. 3:18, New World Translation.
ENGTIN NGE KAN CHHAN ANG?
Sualna nei kan ni chung pawhin engtin nge Jehova kan chawimawi theih?
Engtin nge kan ṭawngṭaina leh Kristian inkhâwmnaa kan telna chuan Pathian ropuina ên chhuahtîr tûra min ṭanpui?
Engin nge Jehova chawimawi reng tûra min ṭanpui thei?
1, 2. Engvângin nge Jehova miziate entawn thei tûra inbeisei chu thil inâwm tak a nih?
ENG kawng emaw tak chuan nu leh pate anna kan nei ṭhîn a. Chuvângin, tuemawin mipa naupang hnêna, ‘I pa ang chiah i nih hi,’ an tih pawhin mak kan ti hran lo. Hmeichhe naupang hnênah pawh, ‘I nu min hriat chhuahtîr hle mai’ an ti mai thei bawk. Tin, fate chuan an nu leh pate chu an entawn fo ṭhîn bawk a ni. A nih leh, keini’n tu nge kan entawn? Kan Pa vâna mi, Jehova chu kan entawn ve thei em? Amah chu hmu thei lo mah ila, a Thu zirna te, a thil siam thlîrna te, leh Pathian Lehkha thua chuang, a bîk takin Pathian Fapa Isua Krista ṭawngkam leh a thiltih chhût ngunnate hmangin a mize hlu takte chu kan hre thei a. (Joh. 1:18; Rom 1:20) Chuvângin, kan tân Jehova ropuina ên chhuahtîr chu thil theih a ni.
2 Adama leh Evi a siam hma pawh khân, Pathianin mihringte tâna a duhzâwng chu mihringte’n an hlen chhuak theiin, a miziate an ên chhuahtîr ang a; chu chu a ropuina tûr a la ni dâwn tih a ring tlat a ni. (Genesis 1:26, 27 chhiar rawh.) Pathian ngaihsakna lantîr tûr chuan min Siamtu miziate kan lantîr tûr a ni a. Chutianga kan tih chuan kan hnam te, kan lehkha thiam dân te, leh kan lo chawr chhuahnate chu engpawh ni se, Pathian ropuina ên chhuahtîr theihna chanvo ropui tak kan nei thei a ni. Engvângin nge? ‘Pathian chuan mi duhsak bîk a neih loh va, hnam tin zîngah tupawh amah ṭiha fel taka ti apiang a lâwmzâwng mi an nih ṭhîn’ avângin.—Tirh. 10:34, 35.
3. Kristiante’n Jehova rawng an bâwlnaah eng nge an tawn theih?
3 Hriak thih Kristiante chuan Jehova ropuina an ên chhuahtîr a. Chuvângin, thlarauva hrin tirhkoh Paula chuan heti hian a ziak a ni: “Keini chuan kan zain hmai khuh lovin darthlalang angin Jehova ropuina kan ên chhuahtîr ṭhîn a, ropuina aṭanga ropui zêlin, chu mi anpui ngeia awm tûrin tihdanglamin kan awm ṭhîn,” tiin. (2 Kor. 3:18, NW) Zâwlnei Mosia kha Sinai Tlâng aṭanga Thu Sâwm Pêk kenga a rawn chhuk khân, Jehova nêna an inbiakna avângin a hmai vun chu a êng a ni. (Ex. 34:29, 30) Tûn laiah chutiang thil chu Kristiante’n tawng lovin, an hmai vun chu êng ve lo mah se, mi dangte hnêna Jehova chungchâng te, a mizia te, leh mihringte tâna a thiltum ropui takte chungchâng an hrilh hian an hmêlah hlimna êng a lang chhuak a ni. Hmân laia dâra siam dârthlalang tle tak ang maiin, hriak thihte leh leia an thawhpuite chuan an nunah leh rawngbâwlnaah Jehova ropuina chu an ên chhuahtîr a ni. (2 Kor. 4:1) Pathian ngaihsakna nungchang leh Lalram thuchhuahtu anga i rawngbâwlna hmangin Jehova ropuina i ên chhuahtîr ve em?
JEHOVA ROPUINA EN CHHUAHTIR KAN CHAK
4, 5. (a) Paula ang bawkin, eng harsatna nge kan neih ve? (b) Engtin nge sual chuan mihringte a nghawng?
4 Jehova chhiahhlawh kan nih angin, kan thiltih engkima min Siamtu chawimawi leh tihropui chu kan châk a. Mahse, kan tih duh chu kan ti lo fo. Paula pawhin chutiang harsatna chu a nei a ni. (Rom 7:21-25 chhiar rawh.) Chutiang harsatna kan neih chhan chu hrilhfiahin, Paula chuan: “Mi zawng zawngin thil an tisual tawh vek a, Pathian ropuina an chang zo ta lo,” tiin a ziak a ni. (Rom 3:23) Ni e, sualna nei Adama hnên aṭanga an rochun avângin, mihringte chu ‘Sual Rorêlna’ hnuaiah an intulût ta a ni.—Rom 5:12; 6:12.
5 Sual chu eng nge ni? Jehova miziate, a kawngte, a tehna te, leh a duhzâwngte nêna inkalh thil engpawh hi sual a ni. Sual chuan Pathian nêna mite inlaichînna a tichhia a. Thal kâptuin tibuaitu thil engemaw avânga a tum a ṭhelh ang bawkin, sual chuan kan tum min ṭhelhtîr a ni. Tum rêng vâng emaw, tihpalh thil thuin emaw thil kan tisual thei a. (Num. 15:27-31) Sual chu mihringah a bet thûk hle a, Siamtu nêna an inkârah daidanna a siam a ni. (Sâm 51:5; Is. 59:2; Kol. 1:21) Chuvângin, mi nâwlpuite chu Jehova nên an inrem lo hulhual a, Pathian ropuina ên chhuahtîr theihna chanvo ropui tak chu an chân a ni. Sual chu mihringte tihrehawmtu natna râpthlâk ber a ni chiang hle.
6. Sual nei mihringte ni mah ila, engtin nge Pathian kan chawimawi theih?
6 Mi sual kan ni chung pawhin, Jehova chu “beiseina Pathian,” a nih loh leh beiseina petu Pathian a ni a. (Rom 15:13) Ani chuan sual tihbona hmanrua—Isua Krista tlanna inthawina—chu a ruahman a ni. Chu inthawina rinna hmang chuan “sual bâwiha” awm tawh lovin, Jehova ropuina ên chhuahtîr thei dinhmunah kan ding tawh zâwk a. (Rom 5:19; 6:6; Joh. 3:16) Pathian Jehova nêna he inlaichînna ṭha neihna chuan tûna malsâwmna leh nakina ṭha famkima chatuana nun chu min tiam a ni. Sual nei mihring la ni reng mah ila, Pathianin a ropuina ên chhuahtîr thei mite anga min thlîr chu malsâwmna a va ni tehlul êm!
PATHIAN ROPUINA EN CHHUAHTIRIN
7. Pathian ropuina ên chhuahtîr tûr chuan keimahni chungchângah eng nge kan pawm ngai?
7 Pathian ropuina ṭha taka ên chhuahtîr thei tûr chuan sual lam tih duhna kan nei tih kan pawm tak zet a ngai a. (2 Chro. 6:36) Pathian chawimawi thei tûr khawpa hma kan sâwn theih nân chûng kan chak lohna laite chu kan pawm a, thunun tûra hma kan lâk a ngai a ni. Entîr nân, saruak lem leh thuziakte bih chînna sual ṭha lo taka kan tlûk luh chuan, thlarau lama ṭanpuina kan mamawh tihna a ni a, ṭanpuina dawng tûrin hma kan la nghâl tûr a ni. (Jak. 5:14, 15) Chutianga tih chu Pathian chawimawi zâwnga nung tûra hma lâk ṭanna a ni ang. Jehova betute kan nih angin, a tehna felte mila kan nun leh nun loh kan inenfiah chhunzawm zêl tûr a ni. (Thuf. 28:18; 1 Kor. 10:12) Kan chak lohna neihte chu engpawh ni se, Pathian ropuina kan ên chhuahtîr theih nân kan chak lohnate thunun chu kan tum tlat reng tûr a ni.
8. Mi ṭha famkim ni lo mah ila, eng nge kan tih ang?
8 Isua chu Pathian tilâwm reng a, A ropuina ên chhuahtîr rengtu mihring awmchhun a ni a. Isua angin ṭha famkim lo mah ila, a entawn tûr siam chu kan zui theiin, zui kan tum bawk tûr a ni. (1 Pet. 2:21) Jehova chuan theihtâwp kan chhuahna leh hma kan sâwn dân chu bûk tawnin, amah chawimawi tuma ṭan kan lâkna chu mal a sâwm ṭhîn a ni.
9. Pathian thil phût tlin duhna nei Kristiante nunah Bible-in eng hmun nge a chan?
9 Jehova Thu, Bible chuan hmasâwn theihna kawng min kawhhmuh thei a. Bible thu ngun taka zir leh kan zirte chhût ngun chu a pawimawh hle a ni. (Sâm 1:1-3) Nî tina Bible chhiarna chuan hmasâwn zêl tûrin min ṭanpui ang. (Jakoba 1:22-25 chhiar rawh.) Bible hriatna hi kan rinna nghahchhan a nih bâkah, sual lian tak ti lo tûr leh Jehova tihlâwm tum tlat tûra min ṭanpuitu a ni.—Sâm 119:11, 47, 48.
10. Engtin nge ṭawngṭaina chuan Jehova rawng bâwl tam lehzual tûra min ṭanpui theih?
10 Pathian ropuina ên chhuahtîr tûr chuan, kan “ṭawngṭai fan fan” a ngai bawk a. (Rom 12:12) A pawm tlâka rawng bâwl tûra min ṭanpui tûrin Jehova hnênah kan ṭawngṭai thei a, kan ṭawngṭai tûr a ni bawk. Kan ṭawngṭainaah chuan thlarau thianghlim te, rinna nei lehzual tûr te, thlêmna do thei tûra chakna te, leh “thutak thu fel taka hmang” thei tûrtein kan dîl thei a ni. (2 Tim. 2:15; Mt. 6:13; Lk. 11:13; 17:5) Naupangin a pa a rinchhan tlat angin, kan Pa vâna mi Jehova kan rinchhan a ngai a ni. A rawng bâwl tam lehzual tûra a ṭanpuina kan dîl chuan, min ṭanpui ang tih kan ring tlat thei a ni. Amah tibuaitu angah i inngai ngai lo vang u. Chutih ahnêkin, ṭawngṭaia amah fakin, a hnênah lâwmthu sawi ila, a bîk takin fiahna kan tawh hunah a kaihhruaina leh a hming thianghlim chawimawi tûr zâwnga a rawng kan bâwl theih nân a ṭanpuina chu i dîl zâwk ang u.—Sâm 86:12; Jak. 1:5-8.
11. Engtin nge kohhran inkhâwmte chuan Pathian ropuina ên chhuahtîr tûra min ṭanpui?
11 Pathian chuan a berâm hlu takte enkawl tûrin “bawi rinawm, fing tak” a ruat a. (Mt. 24:45-47; Sâm 100:3) Bâwih pâwl chuan an Kristian unaute’n Jehova ropuina an ên chhuahtîr dân chu an ngaihven hle a ni. Kan lan nalh zâwk theih nâna puan ṭhuitu hnêna thawmhnaw kan siam ṭhattîr ang bawkin, Kristian rawngbâwltu kan nih anga kan lan dân chu kan inkhâwmna hian a siam ṭha a ni. (Heb. 10:24, 25) Chuvângin, inkhâwm hi a hun takah i thleng ṭhîn ang u; kan thleng tlai ṭhîn a nih chuan, Jehova chhiahhlawhte kan nih anga kan lan nalh zâwk theihna tûra thlarau lama ‘siam ṭhatna’ ṭhenkhat chu kan dawng dâwn lo a ni.
PATHIAN I ENTAWN ANG U
12. Engtin nge Pathian kan entawn theih?
12 Jehova ropuina ên chhuahtîr tûr chuan, “Pathian awm dân latute” kan nih a ngai a. (Eph. 5:1) Jehova kan entawn theih dân kawng khat chu a thil thlîr dân anga thlîr hi a ni. A thil thlîr dân nêna inmil lo va nun tumna engpawh chuan amah a chawimawi lo va, kan tân chhiatna a ni bawk. Khawvêl pum pui hi mi suaksual Diabol-Setana thununna hnuaia a awm avângin, Jehova huat zâwngte hua a, a ngainat zâwngte ngaina tûr chuan kan thawh rim a ngai a. (Sâm 97:10; 1 Joh. 5:19) Pathian rawngbâwl dân dik awmchhun chu engkim a ropuina tûr hlîra tih hi a ni tih thinlung taka kan rin thlap a ngai a ni.—1 Korinth 10:31 chhiar rawh.
13. Engvângin nge sual hi kan huat ang a, chu chuan eng ti tûrin nge min chêttîr ang?
13 Jehova chuan sual a hua a, keini pawhin kan haw ve tûr a ni. Dik takin, thil sual ti chiah si lova kan kal hnaih theih chin hriat tum ai chuan, a theih ang tâwka hlaah kan kiansan zâwk tûr a ni. Entîr nân, Pathian chawimawitu ni tlâk lova min siamtu kalpênna suala tlu lo tûrin kan invên a ngai a. (Deut. 13:6-9) Chuvângin, kalpênna emaw, unauva inchhâl Pathian chawimawi si lo apiang emaw nên chuan inkûngkaihna rêng i nei lo vang u. Chutiang mi chu kan chhûngkaw zînga mite pawh ni se, inkungkaihna kan nei tûr a ni lo. (1 Kor. 5:11) Kalpêngte emaw, Jehova inawpna pâwl sawichhetute emaw hnial thlâk tumna chuan hlâwkna engmah min pe lo va. A nihna takah chuan, lehkhabu emaw, Internet emawa chhuah pawh ni se, an thu chhuahte chhiar chu a dik lo va, kan thlarau lam atân a hlauhawm a ni.—Isaia 5:20; Matthaia 7:6 chhiar rawh.
14. Pathian ropuina ên chhuahtîr tûra kan beih hian, eng mizia nge keimahniah langsâr ber ang a, engvângin nge?
14 Hmangaihna lantîr hi kan Pa vâna mi kan entawn theih dân kawng langsâr tak a ni a. Amah ang bawkin hmangaihna kan nei tûr a ni. (1 Joh. 4:16-19) Dik takin, kan inhmangaih tawnna chuan Isua zirtîrte leh Jehova chhiahhlawhte kan nihzia a târ lang a ni. (Joh. 13:34, 35) Kan pianpui sualna rawn inrawlh châng chu awm mah se, chu chu thununin, engtik lai pawha hmangaihna nei kan ni tûr a ni. Hmangaihna leh Pathian ngaihsakna mize dangte kan neihna chuan ngilnei lo taka thil ti lo tûr leh thil sual ti lo tûrin min vêng ang.—2 Pet. 1:5-7.
15. Engtin nge hmangaihna chuan mi dangte nêna kan inlaichînna a nghawng?
15 Hmangaihna chuan mi dangte tâna thil ṭha tih duhna min neihtîr a. (Rom 13:8-10) Entîr nân, kan kawppuite hmangaihna chuan inneihna khum tibawlhhlawh lo tûrin min chêttîr ang a. Kohhran upate hmangaihna leh an rawngbâwlna ngaihhlutna chuan an thu âwih tûr leh an kaihhruaina hnuaia intulût tûrin min ṭanpui ang. Nu leh pa hmangaihtu fate chuan an thu an âwihin, an chawimawi a, an sawichhe ngai lo. Kan mihringpuite kan hmangaih chuan mahni aia hniam zâwk angin kan thlîr lo vang a, zahpah lo takin kan be hek lo vang. (Jak. 3:9) Tin, Pathian berâmho hmangaihtu upate chuan berâmte chu dimdâwih takin an cheibâwl bawk ang.—Tirh. 20:28, 29.
16. Engtin nge hmangaihna chuan kan rawngbâwlnaah min ṭanpui ang?
16 Hmangaihna mizia chu kan rawngbâwlnaah pawh a lang chhuak tûr a ni a. Jehova chu kan hmangaih êm avângin, in neitu ṭhenkhatin kan thusawi an ngaihsak lo emaw, an chhâng lêt ṭha lo emaw a nih pawhin kan lunghnual duh lo vang. Chu ai mahin, chanchin ṭha kan hril chhunzawm zêl zâwk ang. Hmangaihna chuan rawngbâwlna atâna ṭha taka inpuahchah a, hlawhtlin tum tlat tûrin min chêttîr ang. Pathian leh ṭhenawmte kan hmangaih tak zet chuan, Ram chanchin ṭha hrilh chu hna angin kan ngai lo vang a. Chanvo ropui tak angin kan thlîr zâwk ang a, hlim takin kan thawk ang.—Mt. 10:7.
JEHOVA CHU CHAWIMAWI ZEL RAWH
17. Engvângin nge Pathian ropuina kan tlin lo tih pawm chu kan ṭangkaipui?
17 Khawvêla mi nâwlpuite chuan sual hi thil pawi tak a nihzia an hre lo va, keini erawh chuan kan hria a ni. Chu chuan sual lam ngaihtuahnate do lêt reng a pawimawhzia hre reng tûrin min ṭanpui a. Sual lam ngaihtuahna nei kan ni tih pawmna chuan chhia leh ṭha hriatna min sawizawitîr a; chu chuan kan rilru leh thinlunga thil sual tih châkna a lo lan huna thil dik ti tûrin min chêttîr ang. (Rom 7:22, 23) Dik takin, kan chak lo pawh a ni thei; mahse, Pathian chuan eng dinhmun hnuaiah pawh thil dik ti tûrin min tichak thei a ni.—2 Kor. 12:10.
18, 19. (a) Engin nge thlarau suaksualho awmte chu hlawhtling taka min dotîr thei? (b) Eng nge tih kan tum tlat ang?
18 Jehova chawimawi tûr chuan thlarau suaksualho awmte kan do a ngai bawk a. Pathian min pêk thlarau lam râlthuam famkim chuan hlawhtling takin min dotîr thei a ni. (Eph. 6:11-13) Setana chuan Jehova chauhvin neih a phu chawimawina chu rûksak tumin a bei reng a. Jehova nêna kan inlaichînna pawh tihchhiat tumin theihtâwp a chhuah reng bawk. Mahse, ṭha famkim lo mi dang maktaduai tam takin kan ruala rinawmna vawnga Pathian an chawimawi chu Setana tân a va tlâwmthlâk tak êm! Chuvângin, “Nang, kan Lalpa leh kan Pathian, ropuina te, chawimawina te, thiltihtheihna te chu hmu tlâk i ni e; nangin engkim i siam a, i duh avânga awm leh siam a ni bawk si a,” titu vâna thil siamte ang hian Jehova chu i fak chhunzawm zêl ang u.—Thup. 4:10, 11.
19 Eng thil pawh lo thleng se, Jehova chawimawi zêl chu i tum tlat ang u. Mi rinawm tam takin amah entawn leh a ropuina ên chhuahtîr tuma theihtâwp an chhuah lai a hmuh hian Jehova thinlung chu a lâwm êm êm a ni. (Thuf. 27:11) Kan rilru veizâwng chu: “Aw Lalpa ka Pathian, ka thinlung zawng zawngin ka fak ang chia; i hming hi kumkhuain ka chawimawi ang,” titu Davida rilru nên inrem rawh se. (Sâm 86:12) Sawisêl bova Jehova ropuina kan ên chhuahtîr theih hun tûr leh chatuana amah kan chawimawi theih hun tûr chu kan va nghâkhlel tawh tak êm! Chu chu thuâwih mihringte thiltawn hlimawm tak a la ni thuai dâwn a ni. Chatuana Jehova ropuina ên chhuahtîr theih beiseina nei chungin tûnah pawh hian i ên chhuahtîr em? (w12-E 05/15)
[Zirlai Atâna Zawhnate]
[Phêk 30-naa milem]
Hêng kawngte hmang hian Jehova ropuina i ên chhuahtîr em?
