Pathian Hnaih Rawh

“Min Lêttîr Leh Hrâm Ang Che”

Tûn hmain Pathian Jehova i lo be tawh ṭhîn em? Amah biak leh chu i duh a; mahse, ani’n min pawm leh thei ang emaw chu, tiin i inngaihtuah buai em? He thuziak hi ngun takin chhiar ang che. I tân liau liauva ziak a ni si a.

“P ATHIAN Jehova hnênah chuan a lama min lêttîr phal tûr leh a rilru ka tihnat avânga min ngaidam tûrin ka ṭawngṭai ṭhîn,” tiin Kristian zirtîrna a dawnte kalha nung nu pakhat chuan a sawi a. Ani chu i khawngaih em? ‘Pathianin tûn hmaa amah lo be tawh ṭhînte chu engtin nge a ngaih? Anni chu a hre reng em? “Lo lêt leh” tûrin a duh em?’ tiin i ngaihtuah em? Hêng zawhnate chhâng tûrin Jeremia thuziak chu i lo bih chiang ang u. A chhânna chuan i thinlung a thlamuan hle dâwn a ni.—Jeremia 31:18-20 chhiar rawh.

Jeremia’n hêng thute a sawi lai dinhmun chu han ngaihtuah teh. Jeremia hun hma kum sâwmbi engemaw zât, B.C.E. 740-ah Jehova chuan Israel hnam sâwm lalram chu Assuria mite kuta an tlâwm a phal a. * Pathianin he chhiatna hi a mite’n thil sual tak an tih a, a zâwlneite vaukhânna thu a ngaihthah luih fo avângin, anmahni zilh nân a hmang a ni. (2 Lalte 17:5-18) Pathian laka inla hrang a, an ram ata hmun hla taka hruai chhuah an nihna chuan Pathian mite rilru chu a thlâk danglam em? Pathian Jehova’n anni chu a theihnghilh ṭhak em? Pathianin anni chu an ramah a lêttîr leh ang em?

“Ka Inchhîr”

Pathian mite chu sala hruai an nih laiin an inhre chhuak a, chu chuan inchhîrna nei tûrin a chêttîr a. Rilru taka an inchhîrna chu Pathian Jehova chuan a hmuh hmaih lo. An zaa Ephraim anga sawi, hnawh chhuah Israelte rilru put hmang leh an thil vei dân Jehova sawi chhuah chu lo ngaithla teh.

“Ephraima inṭah chu ka hre lul mai,” Jehova chuan a ti a. (Châng 18) An kawng sual zawh rah chhuah avânga Israelte ṭap thâwm chu a hria a. “Inṭah” tih thu mal chu “thing emaw, khûr emaw,” tihna a ni thei tih mi thiam pakhat chuan a sawi a. Anni chu fapa awm ṭha duh lovin a chunga harsatna a inthlentîrte ngaihtuah lêt a, pawi ti taka a lu thing a, ina haw leh châkna nasa tak a nei ang mai an ni. (Luka 15:11-17) Chûng mite chuan eng nge an sawi?

“Nangin mi hrem . . . bâwngpa tuai sâwi loh ang maiin.” (Châng 18) Pathian mite chuan hrem an phu tih an hria a ni. Bâwngpa tuai sâwi loh ang mai an ni si a. Heta khaikhinna thu awmzia chungchângah lehkhabu pakhat chuan anni chu “nghâwngkawl a bah duh loh avânga vuak tuar” bâwngpa tuai ang mai an ni, tihna niin a sawi.

“Mi lêttîr la, ka lêt ang e, LALPA ka Pathian i ni miau si a.” (Châng 18) Inngaihtlâwmna rilru neiin, mite chuan Pathian an au va. Thil sual tihna kawngah an vâk bo va, mahse, tûnah chuan a duhsakna dawng leh tûrin ṭanpuina an ngên a ni. Bible lehlin pakhat chuan: “Nang hi kan Pathian i ni—min lêttîr  leh hrâm ang che,” tiin a let chhuak a ni.—Contemporary English Version.

“Ka inchhîr teh a, . . . Ka zak a, a ni, . . . ka kimkî a ni.” (Châng 19) Pathian mite chuan thil sual an tih avângin pawi an ti a. A mawh chu an phurin, an thiam lohna chu an pawm a ni. Tin, hmuhsit leh hnâwl nia inhriatna an nei bawk.—Luka 15:18, 19, 21.

Israelte chu an inchhîr a. Nasa taka lungngaiin, Pathian hnênah an sualte an puang a, an kawng sual zawh chu an kalsan a ni. An inchhîrna chuan Pathian rilru a khawih ang em? Anni chu a lêttîr leh phal ang em?

“A Chungah Zah Ka Ngai Ngei Dâwn A Ni”

Jehova chuan Israelte nên inzawmna ṭha bîk tak a nei a. Heti hian a sawi a ni: “Israel tân pa ka ni. . . . Ephraim chu ka fa tîr a ni,” tiin. (Jeremia 31:9) Engtin nge hmangaihna nei pa ber chuan tih tak zeta inchhîrna nei a fapa chu a pawm leh loh vang? Pathian Jehova’n Pa ber anga a rilru put hmang a sawi chu lo chhinchhiah ang che.

“Ephraim chu ka fapa duh tak, ka nau ngainat tak a nih vâng em ni, amah ka thunun apianga ka thinlungah a chên tlat ṭhin hi?” (Châng 20) Hêng thute hi a va duhawm tak êm! Fate thunun tlattu hmangaihna nei nu leh pa angin, Pathian tân a fate ‘thununna’ thu sawi chhuah a ngai a, an kawng sual zawhna lakah a vaukhân nawn fo a ni. Luhlul taka a thu an ngaihthlâk loh hian anni chu sala hruaibo a phal a, mahni in leh lo an chhuahsan chu a remti a ni. Chutianga a hrem chu ngai mah se, anni chu a theihnghilh chuang lo. Chutianga theihnghilh chu atân thil theih a ni lo. Hmangaihna nei pa ber tân fate theihnghilh theih rual a ni si lo va. Mahse, Pathianin a fate laka inchhîrna dik a hmuh hian engtin nge a awm?

“Ka thinlungin a lainat ṭhîn a, a chungah zah ka ngai ngei dâwn a ni.” (Châng 20) Jehova chuan a fate tân thil ṭha ber a duhsak a. Tih tak zeta an inchhîrna chuan a thinlung a khawihin, a lama an lo lêt leh chu a duh tak meuh meuh a ni. Isua sawi fapa tlân bo tehkhin thua pa ber angin, Pathian Jehova chuan a fate chu “a khawngaih êm êm a,” in lama a fate lawm luh leh chu a châk hle a ni.—Luka 15:20.

“Jehova’n Min Lêttir Leh Ta!”

Jeremia 31:18-20 thute chuan Pathian Jehova khawngaihna leh ngilneihna min hriatthiamtîr a. Pathianin tûn hmaa a rawng bâwl tawh ṭhînte chu a theihnghilh lo. Chutiang mite chuan lo lêt leh duh ta se, engtin nge ni ang? Pathian chu “ngaihdam . . . peih” tak a ni a. (Sâm 86:5) Inchhîrna thinlung nêna a lam rawn pantute chu a hnâwl ngai lo vang. (Sâm 51:17) Chu mi nêna inkalh takin, anni chu hlim takin a lo lâwm zâwk ṭhîn a ni.—Luka 15:22-24.

Atîra kan sawi tâk nu chuan Jehova lama lêt leh tûrin hma a la a, tualchhûnga Jehova Thuhretute kohhran chu a va tlawh a. Atîrah chuan a insitna rilru chu a paih phawt a ngai a ni. Ani chuan: “Phu lo ka inti hle,” tiin a sawi. Mahse, kohhran upate chuan ani chu fuihin, thlarau lama chakna nei lêt leh tûrin an ṭanpui a. Tûnah chuan nasa taka lâwmna neiin, “Jehova’n min lêttîr leh ta chu a va ropui tak êm!” a ti vawng vawng mai a ni.

Jehova i lo be tawh ṭhîn a, biak leh duhna i neih chuan, tualchhûnga Jehova Thuhretute kohhran be pawp tûrin kan sâwm a che. Pathian Jehova chuan inchhîrna neite’n a hnêna, “Min lêttîr leh hrâm ang che,” an tih hian, Pathian Jehova chuan an chungah khawngaihna leh ngilneihna a lantîr ṭhîn tih hre reng ang che. (w12-E 04/01)

[Footnote]