Pathian Thilpêk Inneihna Chu I Ngaihlu Tak Zet Em?
Pathian Thilpêk Inneihna Chu I Ngaihlu Tak Zet Em?
“Jehova chuan thilpêk pe che uin, pasalte ina khawsak theihna hmuhtîr che u rawh se.”—RUT. 1:9, New World Translation.
A CHHANNA ZAWNG RAWH:
Engvângin nge hmân lai Pathian chhiahhlawhte chuan a thilpêk inneihna chu an ngaihlu kan tih theih?
Kawppui tûr chungchânga kan duh thlanna Jehova’n a ngai pawimawh hle tih engtin nge kan hriat?
Inneihna chungchânga Bible zilhna thu eng hi nge nunpui i tum?
1. Nupui pêk a nih laia Adama awm dân chu sawi rawh.
“HEI zet chu ka ruh ang ruh neia, ka tisa ang tisa nei ngei chu a ni: mipa laka lâk chhuah a nih avângin ‘Hmeichhia’ tih tûr a ni ang.” (Gen. 2:23) Mipa hmasa ber Adama chu nupui a han neih chuan a va hlim tak êm! Chuvângin, a hlimzia hla thua a chham chhuak pawh hi a mak lo ve! Jehova chuan Adama tui taka a muthilhtîr hnuah, a nâkruh pakhat aṭangin he hmeichhe hmêl ṭha tak hi A siam a. A hnuah Adama chuan a hmingah Evi a sa a ni. Pathian chuan anni chu hlim takin a inneihtîr a. Jehova chuan Evi siam nâna Adama nâkruh ngei a hman avângin, tûn laia nupa tupawh aiin Adama leh Evi-te inzawmna chu a nghet zâwk hle a ni.
2. Engvângin nge mipa leh hmeichhiate chu an inhîp tawn?
2 Jehova chuan a finna tlukpui nei lo hmangin mihringte chu inngaihzâwn theihna—mipa leh hmeichhia inhîp tawntîrtu mizia—neiin a siam a. The World Book Encyclopedia chuan: “Nupate chu mipat hmeichhiatna hmang dûn tûr leh inngaizâwng reng tûrin an inbeisei ṭhîn,” tiin a sawi. Jehova mite zîngah chu beiseina anga nung nupa chhiar sên loh an awm a ni.
INNEIHNA THILPEK CHU AN NGAIHLU
3. Engtin nge Isaaka’n nupui a hmuh?
3 Mi rinawm Abrahama chuan inneihna chu a ngaihlu hle a. Chuvângin, Isaaka tâna nupui zawng tûrin a chhiahhlawh zînga upa ber chu Mesopotamia ramah a tîr a ni. A chhiahhlawhpa ṭawngṭaina chuan rah ṭha tak a chhuah a. Pathian ṭih mi Rebeki chu Isaaka nupui duh tak lo niin, Abrahama thlah vawnghim tûra Jehova ruahmanna siamah chanvo a nei ve ta a ni. (Gen. 22:18; 24:12-14, 67) He thu hi mi tuemawin—tum ṭha tak nei pawh ni se—mahni thuin mi dangte tân nupui pasal an zawnsak thei tihna angah kan ngai tûr a ni lo. Tûn lai khawvêlah hian, mi tam tak chuan mahni nupui pasal atân mahni duhzâwng ngei chu an thlang a. Innei tûrte chu Pathian tuah rem ni lo mah se, Kristiante’n Pathian kaihhruaina an dîl a, a thlarau an inkaihhruaitîr chuan he mi kawngah leh nun kawng dangah Pathianin anni chu a kaihruai ang.—Gal. 5:18, 25.
4, 5. Engin nge Sulam nula leh berâm vêngtu tlangvâl kha an inhmangaih hle tih rinnghehtîr che?
4 Hmân lai Israel mi Sulam nula hmêl ṭha tak chuan a ṭhiante chu Lal Solomona nupui tam takte zînga pakhat ni tûra thlêm lo tûrin a duh a. Heti hian a sawi a ni: “Ka ngên tlat che u, aw Jerusalem fanute, hmangaihna chu chawk thova tiharh lo tûrin, amahin a duh hmâ chuan,” tiin. (HTK. 8:4) Sulam nula leh berâm vêngtu tlangvâl pakhat chu an inngaina hle a. Nula chuan inngaitlâwm takin: “Ka lo ni e Saron ros pâr leh phaizâwla lilî,” a ti a. Mahse, berâm vêngtu tlângvâl chuan: “Hlîng zînga lilî ang hi ka hmangaih chu a ni, lânûte zîngah,” tiin a chhâng a ni. (HTK. 2:1, 2) An inhmangaih hle tihna a nih chu.
5 Sulam nula leh berâm vêngtu tlangvâl chuan Pathian an hmangaih ber tlat avângin, an inneih hunah pawh an inzawmna chu a nghet hle dâwn a ni. Dik takin, Sulam nula chuan a hmangaih berâm vêngtu tlangvâl hnênah chuan: “Min dah ta che, i ṭângah valṭhî angin, i bânah bânbun iangin; thihna angin a chak si, hmangaihna hi, thîkna chu Seol angin a nunrâwng. A alh chhuak chu meialh chhuak a lo ni a, [“Jehova,” NW] meialh nasa tak mai chu [a hnên aṭanga lo chhuak a ni si a]. Tui tam takin a tidai thei lo, hmangaihna zawng, tui lianin a chîm pil thei hek lo; miin a in ro zawng zawng hmangaih aiah a pêk zawh chuanin hmusitin a awm ngei dâwn e,” tiin a hrilh a ni. (HTK. 8:6, 7) Nupui pasal neih chungchâng ngaihtuah hunah, Jehova chhiahhlawh tân hetiang thova inpêkna hi beisei tûr a ni dâwn lâwm ni?
PATHIAN NGAIH PAWIMAWH DUHTHLANNA
6, 7. Kawppui tûr chungchânga kan duh thlanna chu Jehova tân thil pawimawh tak a ni tih engtin nge kan hriat theih?
6 Kawppui tûr chungchânga i duh thlanna chu Jehova chuan a ngai pawimawh hle. Kanaan mite chungchângah Israelte chu hetiang thupêk hi pêk an ni: “Nupui pasalah in nei tûr a ni hek lo, in fanute chu an fapate in neihtîr tûr a ni lo va, an fanute chu in fapate in neihtîr tûr a ni hek lo. In fapate, mi zui lai hi pathian dangte biakna lamah an hruai kawi mai ang a; tin, LALPA thin pawh chu in chungah a thawk ang a, a tiboral thuai mai ang che u,” tiin. (Deut. 7:3, 4) A hnu kum zabi engemaw zâtah puithiam Ezra pawhin: “Thil in lo tisual ta a, Israel mite thiam lohna belhchhahin hnam dang hmeichhiate nupuiah in nei a,” tiin a puang chhuak bawk a ni. (Ezr. 10:10) Tin, tirhkoh Paula pawhin a Kristian unaute hnênah: “Nupui chu a pasal a dam chhûng chuan phuar a ni; nimahsela a pasal a thih tawh chuan a duh apiang a nei thei ang, amaherawhchu Lalpaa awm mi a ni tûr a ni,” tiin.—1 Kor. 7:39.
7 Jehova chhiahhlawh inpumpêk tawhin ring lo mi a neih chuan, chu chu Pathian thu âwih lohna thiltih a ni a. Ezra hun laia Israel mite chuan “hnam dang hmeichhiate nupuiah” neiin, rinawm lo takin thil an ti a, Pathian Lehkha Thu-in chiang taka a sawite pawlh dal tum chu thil dik lo tak a ni ang. (Ezra 10:10; 2 Kor. 6:14, 15) Ring lotu nupui pasala nei Kristian chu entawn tlâk a ni lo va, ani chuan Pathian thilpêk inneihna a ngaihhlu lo a ni. Baptisma chang tawhin chutianga ring lo mi a neih chuan Pathian mite zînga a mawhphurhna ṭhenkhat a chân phah thei a ni. Chu bâkah, ṭawngṭainaa, ‘Jehova, i thu ka âwih lo lui a,’ tia kan sualzia pawm reng chunga, ‘Mahse, malsâwmna min vûr tho tho rawh,’ tia ṭawngṭaia a malsâwmna beisei chu thil inâwm lo tak a ni ngei ang.
KAN PA VANA MI CHUAN KAN TANA ṬHA BER TUR A HRIA
8. Inneihna chungchânga Pathian kaihhruaina kan zawm a ngaih chhan hrilhfiah rawh.
8 Khâwl siamtu chuan khâwl hnathawh dân chiah chu a hria a. Khâwl rem khâwm a ngaih chuan, a tih dân tûr min hrilh vek thei a ni. A nih leh, a kaihhruaina chu zâwm lovin, kan duh ang zâwng zâwngin rem khâwm ta ila engtin nge ni ang? Khâwl chuan hna a thawk thei a nih pawhin chhiatna a thlen duh ngei ang. Chutiang bawkin, nupa hlim ni thei tûr chuan inneihna Siamtu Pathian Jehova kaihhruaina kan zui tûr a ni.
9. Engvângin nge Jehova chuan khawharna leh inneihnain a thlen theih hlimna a hre thiam kan tih theih?
9 Jehova chuan mihring leh inneihna chungchânga hriat tûr awm zawng zawng chu a hre kim vek a. Mihringte’n ‘chi tam tak thlaha an lo pun’ theih nân, anni chu mipat hmeichhiatna hman duhna neiin a siam a ni. (Gen. 1:28) Hmeichhe hmasa ber a siam hma khân Pathianin: “Mihring amah chauhva awm hi a ṭha lo ve; amah ṭanpuitu tûr a kawppui âwm mi ka siamsak teh ang,” tia a lo sawi avângin, khawharna a hre thiam hle tih kan hre thei a. (Gen. 2:18) Inneihnain a thlen theih hlimna pawh a hre chiang hle bawk.—Thufingte 5:15-18 chhiar rawh.
10. Eng thilte’n nge Kristian nupa nun chu thunun ang?
10 Adama’n mihringte hnêna sual leh ṭhat famkim lohna a hlan chhâwn avângin, tûn laiah inneihna ṭha famkim a awm thei lo va. Mahse, Jehova chhiahhlawhte zîngah chuan Pathian Thu zawm a nih phawt chuan inneihna hlimawm tak chu neih theih a ni. Entîr nân, nupa nun chungchâng Paula fuihna thu chiang tak hi han ngaihtuah teh. (1 Korinth 7:1-5 chhiar rawh.) Bible chuan nupate tân fa neih nân chauhva mipat hmeichhiatna an hman chu a phût lo. Mipat hmeichhiatna chuan rilru lam leh tisa lama mamawh a phuhru thei a ni. Mahse, pângngai lo taka mipat hmeichhiatna hman erawh chuan Pathian a tilâwm lo. Kristian nupate chuan an nuna he pêng pawimawh tak hi hmangaihna dik inlantîr theihna tûr zâwngin, dimdâwihna nên an hmang duh ngei ang. Chutih rualin, Jehova tilâwm lo thei thiltih engpawh chu an pumpelh tûr a ni.
11. Ruthi chuan Jehova duhzâwng mila thil a tih avângin eng anga malsâwm nge a nih?
11 Inneihna chu hlimawm tak a ni tûr a ni a, hlimawm lo leh ninawm tak a ni tûr a ni lo. A bîk takin, Kristian in chhûngkhur chu hahdamna leh thlamuanna hmun a ni tûr a ni. Kum 3,000 vêl kaltaa hmeithai pitar Naomi leh a monu hmeithai pahnih Orpi leh Ruthi te Moab ram aṭanga Judai ram pana an kal laia thilthleng kha han ngaihtuah teh. Naomi chuan a monute chu an chipuite hnêna kîr leh tûrin a ngên a. Moab mi Ruthi chuan Naomi vuan tlatin, Pathian dik lakah a rinawm tlat a, ‘inhumhim nâna a thlahnuai a rawn chuha chuan a ṭhat man a pe ṭeuh dâwn’ tih a ring tlat a ni. (Rut. 1:9; 2:12) Pathian thilpêk inneihna ngaihhlu tak Ruthi chu Jehova betu dik tak, upa lam tawh Boaza nupui a lo ni ta a ni. Pathian khawvêl thara a rawn thawhleh huna Isua Krista thlahtute zîngah a tel tih a inhriat hun chuan a hlim hle ngei ang. (Mt. 1:1, 5, 6; Lk. 3:23, 32) Jehova duhzâwng mila thil a tih avânga a dawn malsâwmna chu a va ropui tak êm!
INNEIHNA HLAWHTLING NEIH NANA ZILHNA THU ṬHA TAK
12. Khawi aṭangin nge miin inneihna chungchânga zilhna thu ṭha tak a hmuh theih?
12 Inneihna Siamtu chuan inneihna hlawhtling neih nâna kan hriat ngai thilte chu min hrilh a. Mihring zîngah hian Amah ang tluka hria tumah an awm lo. Bible chu inneihna chungchânga zilhna thu ṭha leh dikte lo chhuahna awmchhun a ni a; chuvângin, zilhna petu apiang chuan Bible tehna ṭanchhanin a pe tûr a ni. Entîr nân, tirhkoh Paula chuan thlarauva thâwk khumin heti hian a ziak a ni: “Tupawhin mahni a inhmangaih angin mahni nupui hmangaih ṭheuh sela, nupui pawhin a pasal hlau thiam rawh se,” tiin. (Eph. 5:33) He Bible fuihna thu-ah hian Kristian puitlingte tâna hriat thiam theih loh tûr engmah a awm lo. Mahse, zawhna lo awm ta chu, Jehova Thu an zâwm ang em? tih hi a ni. Inneihna thilpêk an ngaihhlut tak zet chuan an zâwm ngei ang. *
13. Petera thawn khat 3:7-a zilhna thu zawm lohna chuan eng thil nge a thlen theih?
13 Kristian pasal chuan a nupui chu hmangaih takin a cheibâwl ṭhîn tûr a ni a. Tirhkoh Petera chuan heti hian a ziak a ni: “Nangni pasalte u, in nupuite nên in khawsak dânah bêl keh awl zâwk an nih hre thiam ula, khawngaih thilpêk nunna chanpuitu che u an nih hriain chawimawi rawh u, tichuan in ṭawngṭainate dâl a ni dâwn lo nia,” tiin. (1 Pet. 3:7) Pasalin Jehova zilhna thute a zawm loh chuan a ṭawngṭainate dâlin a awm thei a. An nupa thlarau lam dinhmun chungah pawh nghawng pawi tak a nei theiin, rilru hahna nasa tak te, inhnialna te, leh nunrâwnnate thlengin a awmtîr thei a ni.
14. Hmangaihna nei nupui chuan in chhûngkhurah nghawng ṭha eng nge a neih theih?
14 Jehova Thu leh a thlarau thianghlim inkaihhruaitîrtu nupui chuan in chhûngkhurah remna leh hlimna awmtîr tûrin tih theih tam tak a nei a. Pathian ṭih mi pasal tân chuan nupui hmangaih a, tisa lam leh thlarau lama vênhim chu thil pângngai tak a ni. Ani chuan a pasal hmangaihna dawn chu a thlahlel hle a; mahse, hmangaihna dawng tûr chuan ngainatawm tak a nih a ngai bawk a ni. Thufingte 14:1 chuan: “Hmeichhe fing zawng zawngin in an sa a, a â erawh chuan anmahni kut ngeiin an ṭhiat ṭhîn,” tiin a sawi a. Nupui fing leh hmangaihna nei chuan a chhûngkuaah hlawhtlinna leh hlimna awm tûrin nasa takin a ṭanpui a. Pathian thilpêk inneihna a ngaihhlut tak zetzia a lantîr bawk a ni.
15. Ephesi 5:22-25-naah eng zilhna thu nge kan hmuh?
15 Isua’n kohhranho a cheibâwl dân entawntu nupate chuan Pathian thilpêk inneihna an ngaihhlutzia an lantîr a ni. (Ephesi 5:22-25 chhiar rawh.) Nupate’n chapona te, naupang chhia ang maia inbiak duh lohna te, a nih loh leh Kristian tâna mawi lo mize dangte avânga an nupa inkâr tichhe lova, an inhmangaih tak zet hian malsâwmna an va dawng nasa ṭhîn tak êm!
TUMAN ṬHEN SUH SE
16. Engvângin nge Kristian ṭhenkhat nupui pasal nei lova an awm?
16 Mi tam zâwk chuan engtik hunah emaw nupui pasal neih chu tum mah se, Jehova chhiahhlawh ṭhenkhat chuan an mi duhzâwng leh Pathian pawm mi an hmuh loh avângin kawppui nei lovin an awm a. Mi dangte chuan Pathian thilpêk kawppui nei lova awm theihna chu an dawn avângin rilru la pêngtu awm miah lohvin Jehova rawng an bâwl thei a ni. Mahse, kawppui neih lohna chu Jehova ramri kham chhûng ngeia hman tûr a ni thung.—Mt. 19:10-12; 1 Kor. 7:1, 6, 7, 17.
17. (a) Inneihna chungchânga Isua thusawi eng nge rilrua kan vawn reng ang? (b) Kristian tupawhin mi dang nupui pasal awhna an neih ṭan chuan eng nge an tih nghâl vat ang?
17 Nupui pasal nei kan ni emaw, ni lo emaw pawh ni se, kan vai hian Isua thusawi chu rilruah kan vawng reng tûr a ni: “Atîr ata an siamtu [Pathian] khân hmeichhia leh mipaa a siam leh, ‘He mi avâng hian mipain a nu leh a pa a kalsan ang a, a nupui a vuan ang; tichuan an pahnih chuan tisa pum khat an lo ni tawh ang,’ a ti tih in chhiar lo vem ni? Chutichuan pahnih an ni tawh lo va, tisa pum khat an ni tawh zâwk a ni. Chuvângin Pathianin a zawm tawh chu mihringin ṭhen suh se,” tih hi. (Mt. 19:4-6) Mi dangte nupui pasal awhna neih chu sual a ni. (Deut. 5:21) Kristian tupawhin chutianga awhna a neih ṭan chuan, chu châkna bawlhhlawh a lo neih tawh avânga rilru hrehawmna nasa tak a tawrh phahna tûr pawh ni se, paih bo tûrin hma a la nghâl vat tûr a ni. (Mt. 5:27-30) Chutiang ngaihtuahna siam ṭhat leh kan thinlung bumhmang ber mai châkna ṭha lote thunun chu a pawimawh hle.—Jer. 17:9.
18. Pathian thilpêk inneihna kan thlîr dân tûr chungchâng chu engtin nge i ngaih?
18 Pathian Jehova leh a thilpêk inneihna ropui tak chungchâng hriatna nei lo mite pawh inneihna thilpêk avângin lâwmna engemaw chen chu an lantîr a. Keini “Pathian hlim” Jehova rawngbâwltute tân phei chuan a thilpêk zawng zawngte chunga lâwmin, Pathian pêk inneihna kan ngaihhlutzia kan lantîr lehzual tûr a va ni êm!—1 Tim. 1:11, NW. (w12-E 05/15)
[Footnote]
^ par. 12 Inneihna chungchâng hriat chian lehzual nân, “Keep Yourselves in God’s Love” tih lehkhabu bung 10 leh 11-na en rawh.
[Zirlai Atâna Zawhnate]
[Phêk 12-naa thu lâk chhuah]
Inneihna hlimawm chuan Jehova a chawimawi a, chhûngkuaa mi tinte chungah hlimna nasa tak a thlen thei
[Phêk 11-naa milem]
Ruthi chuan Pathian thilpêk inneihna a ngaihhlutzia a lantîr
[Phêk 13-naa milem]
Jehova thilpêk inneihna i ngaihhlut tak zetzia i lantîr em?
