Engtin Nge Isua’n Politics A Thlîr?

CHANCHIN ṬHA ziaktute chuan Isua’n rawng a bâwl laia politics lam thil vawi engemaw zât a hmachhawn thu an sawi a. Entîr nân, kum 30 mi a nih a, baptisma a chan hnu lawkah Diabola chuan khawvêl awptu ni tûrin a thlêm a. A hnua a rawngbâwlnaah, mite chuan lala siam an tum bawk a. Chu mi hnuah pawh mite chuan politics lama inhmang tûra nawr an la tum cheu a ni. Engtin nge Isua’n a chhân lêt? Chûng thilthlengte chu tûnah lo ngaihtuah ta ila.

Khawvêl awptu. Chanchin Ṭha ziakte chuan Diabola’n Isua hnêna “khawvêl ram zawng zawng” chunga thuneihna pêk a tum thu an sawi a. Isua tân khawvêl awptu niin, a thiltihtheihna hmang ta se, hrehawm tuarte tâna thil a tih nasat theih dân tûr chu han ngaihtuah teh! Mihringte hmasâwnna tûr tih tak zeta ngaihtuahtu politics lam ngaihven mi tuin nge chutiang sâwmna chu hnâwl tehrêng ang? Mahse, Isua chuan a hnâwl tlat a ni.—Matthaia 4:8-11.

Lal. Isua hun laia mite chuan ei leh bâr leh politics lama an harsatna su kiang theitu tûr rorêltu an mamawh hle a. Isua thiltihtheihnate chuan an rilru a hneh êm avângin, politics zawm tûrin an duh a ni. Engtin nge Isua’n a chhân lêt? Chanchin Ṭha ziaktu Johana chuan heti hian a sawi a ni: “Amah chu lala siam tûra man luih tumin an lo kal dâwn tih Isuan a hria a, tlângah amah chauhvin a kal hrang leh ta a,” tiin. (Johana 6:10-15) Isua chuan politics-a inhnamhnawih a duh lo tih a chiang hle.

Politics lama mi inhmang. Isua thih hma lawka thilthleng kha han ngaihtuah teh. Rom aṭanga inlâk hran duhtu Pharisaiho zirtîrte leh Rom awpna duhtu Heroda pâwla mite chuan Isua an rawn pan a. Anni chuan Isua chu politics-a inhmang a, ṭan lam nei tûrin an duh a, Judate tân Rom hnêna chhiah chawi tûr a nih leh nih loh an zâwt a ni.

Marka chuan Isua chhân dân chu heti hian a chhinchhiah a ni: “‘Engah nge mi fiah? Duli mi han lâk ula, ka lo en ang e,’ a ti a. Tin, an rawn la a. Tin, ani chuan an hnênah, ‘Hei hi tu lem leh tu hming nge ni?’ a ti a. Tin, anni chuan, ‘Kaisara’ an ti a. Tin, Isuan an hnênah, ‘Kaisara thilte chu Kaisara hnênah pe ula, Pathian thilte chu Pathian hnênah pe ta che u,’ a ti a,” tiin. (Marka 12:13-17) Isua’n chutianga a chhân chhan sawiin, kohhran leh politics sawrkâr inan lohna târ langtu, Church and State—The Story of Two Kingdoms tih lehkhabu chuan heti hian a  sawi a ni: “Ani chuan politics lama messia anga thiltih chu a duh lo va, fîmkhur takin Kaisara leh Pathian inkârah ramri fel tak a kham a ni,” tiin a sawi.

Hei hi retheihna te, eirûkna te, leh rorêl dik lohnate ang chi buainate chuan Krista rilru a khawih lo tihna a ni lo. Chu ai mahin, a vêla mite dinhmun khawngaihthlâk tak chuan a rilru a khawih hle tih Bible chuan a târ lang zâwk mah a ni. (Marka 6:33, 34) Isua’n hrehawm tuarte khawngaih hle mah se, a hun laia thu buaiahte inhnamhnawih tûra mi ṭhenkhatte ṭan lâkna chu kalhin, khawvêla rorêl dik lohnate tibo tûrin hma a la lo a ni.

Hêng entîrnate hian Isua’n politics lama inrawlh a duh lohzia a târ lang chiang hle. A nih leh, tûn laia Kristiante chu engtin nge? Anni chuan eng nge an tih ang? (w12-E 05/01)