Isua Hnêna Zawhna Pakhat

Pathian ṭihna nei mi tam tak chuan sakhua chu politics-a inhnamhnawih tûr niin an ngai a. Anni chuan sakhuain mihringte buaina su kiang tûra a ṭanpui theih an ring a ni. Amaherawhchu, ringtu dangte chuan sakhua leh politics chu awm hrang tûrah an ngai thung. Nangma ngaih dân chuan politics-a sakhaw chanvo chu eng nge ni? He pâwl thiltithei tak pahnihte hi an ṭang kawp tûr a ni em?

ISUA KRISTA chu “mihringte sakhaw lam chanchina thiltithei ber” nia sawi a ni a. Chuvângin, a hnênah chuan, Sakhuana hi politics-ah a inhnamhnawih tûr a ni em? tih zawhna kan zâwt thei angah han inchan teh. Ani’n engtin nge min chhân ang? Leia a awm laiin, Isua chuan chu zawhna chu a thusawi leh thiltih hmangin a lo chhâng tawh a ni. Entîr nân, Tlâng Chunga Thusawi hmingthang takah Isua chuan a hnungzuitute’n khawtlâng thila an inrawlh chin tûr an hriat theih nân kaihhruaina a pe a. Chu thusawi hmingthang tak aṭanga thu pawimawh ṭhenkhat chu lo ngaihtuah ta ila.

Mi Dangte Nun An Nghawng

Isua chuan khawvêl chunga a hnungzuitute rilru put hmang tûr chu heti hian a sawi a ni: “Lei chi in ni e; nimahsela chi hi a dâk tawh chuan engin nge an tihal leh ang? chuta chinah chuan paih chhuaha, mihringte rah mai mai chauhvah lo chuan eng atân mah a tlâktlai lo. Khawvêl êng in ni e. . . . In êng chu mi mit hmuhin êng rawh se, chutichuan in thil tih ṭhatte an hmu ang a, in Pa vâna mi an chawimawi thei ang,” tiin. (Matthaia 5:13-16) Engvângin nge Isua chuan a hnungzuitute chu chi leh êng nêna a tehkhin?

Isua thusawi chuan a hnungzuitute chu mi tlêm tê tân mai ni lo, mi zawng zawng tâna chi an nihzia a târ lang. Anni chu mi tlêm tê tân mai ni lo, thil hmu fiah duh zawng zawngte tâna êng an ni bawk. Chûng thute hmangin Isua chuan a hnungzuitute chu mite laka inkulh hrang lo tûra a duhzia chiang takin a târ lang a ni. Engvângin nge an inkulh hran chu a duh loh?

Hei hi ngaihtuah teh: Chi chu ei tûr nêna chawhpawlh a nih loh chuan ei tûrte a vawngṭha thei lo va. Khâwnvâr pawhin pindan aṭanga hmun hla taka dah a nih chuan pindan a tiêng thei lo a ni. Chuvângin, Isua’n a zirtîrte chu mipui lak aṭanga inkulh hrang a, ringtu hlîr awmna khawtlâng din tûrin thu a pe ngai lo va. A hnungzuitute chu sakhaw thil avânga pâwn lam khawvêl nêna inzawmna nei miah lova awm tûrin a fuih ngai hek lo. Chutih ahnêkin, chiin ei tûr a pawlh a ngaih ang bawk leh êngin thim a hnawh kian a ngaih ang bawkin, Kristiante pawhin mi dangte nunah nghawng an neih a ngai a ni.

“Khawvêla Mi An Ni Lo”

Mahse, a hnungzuitute hnêna inkulh hrang lo tûra Isua kaihhruaina pêk chuan politics lama Kristiante rilru put hmang tûr chungchângah zawhna pawimawh tak a chawk chhuak a ni. Engvângin nge? A thih hma lawkah, Isua chu a zirtîrte tân heti hian a ṭawngṭai a: “Nangin anni chu khawvêl ata i lâk chhuah tûra ngên ka ni lo va, mi sual lakah chuan i hum tûr ka ti zâwk a ni. Anni chu khawvêla mi an ni lo, kei khawvêla mi ka ni lo ang bawk hian,” tiin. (Johana 17:15, 16) Chuti chu, engtin nge Kristiante tân an khawtlânga tel reng si a, khawvêl mi nih si loh chu thil theih a nih? A chhânna hriat nân zawhna dang pahnih i lo ngaihtuah belh ang u: (w12-E 05/01)

• Engtin nge Isua’n politics a thlîr?

• Tûn laiah Kristiante’n eng nge an tih ang?