Jehova Chu “Thil Inthup Puangtu” A Ni

“In Pathian chu pathiante Pathian, lalte Lal, thil inthup puangtu a lo ni ngei mai e.”—DAN. 2:47.

ENGTIN NGE KAN CHHAN ANG?

Jehova’n hma lam hun chungchâng eng nge kimchang taka min hriattîr?

Sakawlh lu hmasa lam parukte chuan eng nge an entîr?

Sakawlh leh Nebukadnezzara milim hmuh chuan inkungkaihna eng nge an neih?

1, 2. Jehova’n eng nge min hriattîr a, engvângin nge min hriattîr?

PATHIAN Ramin mihringte rorêlna a rawn tihtâwp hunah eng sâwrkârte’n nge leiah thu nei ber dâwn? “Thil inthup puangtu,” Pathian Jehova’n min hriattîr avângin a chhânna chu kan hria a ni. Zâwlnei Daniela leh tirhkoh Johana thuziakte hmangin, chûng sawrkârte nihna chu hre thiam tûrin min ṭanpui a ni.

² Jehova chuan an hnênah sakawlh indawt dân telna inlârna inzawm engemaw zât a pe a. Daniela hnênah pawh mumanga inlârnaa milim hrawl tak awmzia pawh a hrilh bawk a ni. Jehova chuan chûng thuziakte chu kan hlâwkpui atân Bible-ah ziakin, a vawngṭha a. (Rom 15:4) Chutianga a vawn ṭhat chhan chu nakin lawkah Pathian Ramin mihring sawrkârna zawng zawngte a tikehsawm vek dâwn tih kan rin ngheh theih nân a ni.—Dan. 2:44.

3. Hrilh lâwkna dik taka hre thiam thei tûr chuan eng nge kan hriat fiah hmasak phawt ngai a, engvângin nge?

³ A pahniha kan lâk kawp chuan, Daniela leh Johana thuziakte chuan lal pariat, a nih loh leh mihring rorêlna pariat a târ lan mai bâkah, chûng lalte a indawta an lo lan dân tûr thlengin a târ lang bawk a. Mahse, Bible-a chhinchhiah hrilh lâwkna hmasak ber kan hriat thiam chauhvin chûng hrilh lâwknate chu dik takin kan hre thiam thei ang. Engvângin nge? Chu hrilh lâwkna thlen famkimna chu Bible ṭhui khâwmtu a thupui ber a nih avângin. Chu chu hrilh lâwkna dang zawng zawngte thlungkhâwmtu tlângbân ang a ni.

RUL THLAH LEH SAKAWLH

4. Tute’n nge hmeichhe thlah chu din a, chu thlah chuan eng nge a la tih dâwn?

⁴ Eden huana helna a chhuah hnu lawkah Jehova  chuan ‘hmeichhiain’ ‘thlah’ a neih tûr thu a tiam nghâl a. * (Genesis 3:15 chhiar rawh.) Chu thlah chuan a tâwpah rul, Setana lû a la tithitling ang. A hnuah Jehova chuan chu thlah chu Abrahama thlah aṭanga a lo lan tûr thu te, Israel hnam, Juda mi, leh Lal Davida thlah a nih tûr thute a târ lang chho ta zêl a ni. (Gen. 22:15-18; 49:10; Sâm 89:3, 4; Lk. 1:30-33) Chu thlah bul ber chu Isua Krista hi a ni a. (Gal. 3:16) Thlah zawmpuitu chu Kristian kohhrana mi thlarauva hriak thihte an ni. (Gal. 3:26-29) Isua leh hêng hriak thihte hian Pathianin Setana tihboral nâna a hman tûr Pathian Ram chu an din ta a ni.—Lk. 12:32; Rom 16:20.

5, 6. (a) Daniela leh Johana’n sawrkâr lian eng zât nge an târ lan? (b) Thu Puan bua sakawlh lute chuan eng nge an entîr?

⁵ Eden huana pêk hrilh lâwkna hmasa ber chuan Setana pawhin “thlah” a neih tûr thu a sawi bawk a. Chu thlah chuan hmeichhe thlah a huatzia leh a hmêlmâkzia a lan chhuahtîr ang. Rûl thlah chu tute nge ni? Setana’n Pathian a huatna leh Pathian mite a dodâlna entawntu zawng zawngte hi rûl thlah chu an ni. Mihring chanchin tluan chhuakah hian, Setana chuan a thlahte chu politics pâwl, a nih loh leh sawrkâr hrang hrangah te a siam a. (Lk. 4:5, 6) Mahse, mihring sawrkâr tlêm tê chauhvin Pathian mite—Israel hman emaw, hriak thih Kristiante emaw—chungah dodâlna lian tham an thlentîr a ni. Engvângin nge chu chu thil chhinchhiah tlâk tak a nih? Chu chuan Daniela leh Johana inlârna hmuha sawrkâr lian tham pariat chungchâng chauh târ lan a nih chhan min hrilhfiah avângin.

⁶ C.E. kum zabi khatna tâwpah, tho leh Isua chuan tirhkoh Johana hnênah inlârna inzawm ropui tak tak a hmuhtîr a. (Thup. 1:1) Inlârna a hmuhte zînga pakhatah, Johana chuan drakon anga târ lan Diabola, tuifinriat zau tak kama ding chu a hmu a ni. (Thu Puan 13:1, 2 chhiar rawh.) Johana chuan sakawlh ṭihbaiawm tak tuifinriat aṭanga lo chhuak a, Diabola hnên aṭanga thu neihna nasa tak dawng pawh a hmu bawk a. A hnuah vântirhkoh chuan Johana hnênah Thu Puan 13:1-a târ lan sakawlh lem, a nih loh leh a lim sakawlh sen tak chungchâng a sawi a, chu sakawlhin a neih lu sarih chuan “lal pasarih,” a nih loh leh sawrkâr pasarih a entîr thu a hrilh a ni. (Thup. 13:14, 15; 17:3, 9, 10) Johana’n Thu Puan bu a ziah lai chuan, chûng lalte zînga panga chu an tlâwm tawh a, pakhat chuan ro a rêl mêk a, a dang  pakhat chu “a lo la awm rih lo.” Chûng lalram, a nih loh leh khawvêl awptu sawrkârte chu tute nge ni? Thu Puan bu-a târ lan sakawlh lute chu a mal malin i lo ngaihtuah ang u. Daniela thuziakin chûng ramte chungchâng hriat thiamna kimchang lehzual min pêk belh dân leh a châng chuan chûng lalramte an lo lan hma kum zabi tam taka min pêk lâwk dân kan ngaihtuah bawk ang.

AIGUPTA LEH ASSURIA —LU PAKHATNA LEH PAHNIHNA

7. Sakawlh lu pakhatna chuan eng nge a entîr a, engvângin nge?

⁷ Sakawlh lu pakhatna chuan Aigupta a entîr a ni. Engvângin nge? Aigupta chu Pathian mite huatna lantîrtu sawrkâr lian ding hmasa ber a nih vângin. Abrahama thlahte—thutiam hmeichhe thlah lo lanna tûr—chu Aigupta ramah an lo pung ta hle a. Aigupta mite chuan Israel mite chu an awp bet ta a. Setana chuan thutiam thlah lo lan hmaa Pathian mite nuai bo vek chu a tum a ni. Engtin nge a tum? Israel mipa naupang zawng zawng that tûra Pharoa chêttîrna hmangin a tum a ni. Jehova chuan chu a thiltum chu dangin, a mite chu Aigupta sal tânna ata a hruai chhuak a. (Ex. 1:15-20; 14:13) A hnuah Ram Tiamah a hruai thleng ta a ni.

8. Sakawlh lu pahnihna chu eng nge a nih a, chu chuan eng nge tih a tum?

⁸ Sakawlh lu pahnihna chuan Assuria a entîr a. He lalram chak tak pawh hian Pathian mite nuai chimih a tum ve a ni. Jehova chuan Israel hnam sâwm lalram chu an milem biak leh hel hrât avânga hrem nân Assuria chu a hmang ngei mai. Mahse, a hnuah Assuria chuan Jerusalem tihchhiat tumin a bei a ni. Setana chuan a tâwpa Isua lo pianna tûr lal thlah kal zêl tûr chu tihbo a tum a ni thei ang. Chu beihna chu Jehova thiltumah a tel lo va; chuvângin, anmahni rûntu Assuria mite chu tiboralin, a mi rinawmte chu mak tak maiin a chhan chhuak a ni.—2 Lal. 19:32-35; Is. 10:5, 6, 12-15.

BABULON—LU PATHUMNA

9, 10. (a) Jehova chuan Babulon-hovin eng thil an tih nge a phal? (b) Hrilh lâwkna thleng famkim tûr chuan eng thilte nge a thlen ngai?

⁹ Johana sakawlh hmuh lu pathumna chuan Babulon khua khawpuia nei lalram chu a entîr a ni. Jehova chuan Babulon-hovin Jerusalem an tihchhiat a, a mite sala an hruai chu a remti a. Mahse, Jehova chuan chutianga tihmualpho a phal hma chuan hel hmang Israelte hnênah chuan chhiatna an tawn tûr thu a hriattîr lâwk a ni. (2 Lal. 20:16-18) Jerusalem-a ‘LALPA lalṭhutthlênga’ ṭhu tûra tih mihring lalte pawh paih thlâk a nih tûr thu a sawi lâwk a. (1 Chro. 29:23) Mahse, Jehova chuan Lal Davida thlah aṭangin “a neitu tak” a lo chhuah tûr thu leh thu neihna a rawn lâk lêt tûr thu pawh a tiam bawk a ni.—Ezek. 21:25-27.

¹⁰ Hrilh lâwkna dang chuan thutiam Messia, a nih loh leh Hriak Thiha a lo lan hunah Judate’n Jerusalem biak inah Pathian an la biak reng tûr thu a târ lang a. (Dan. 9:24-27) Israel mite Babulon sala an hruai hmaa ziah tawh hrilh lâwkna pakhat chuan Messia chu Bethlehem-a a pian tûr thu a sawi a ni. (Mik. 5:2) Chûng hrilh lâwk thute thleng famkim tûr chuan, Juda mite chu an sal tânna ata an zalên a, an rama an kîr leh a, biak in pawh an sak ṭhat leh a ngai dâwn a. Mahse, Babulon-ho chuan an mi mante chu an chhuah ngai si lo. Engtin nge chu harsatna chu chinfel a nih theih ang? Jehova chuan a zâwlneite hnênah chinfel a nih dân tûr chu a hriattîr a ni.—Amos. 3:7.

11. Babulon Lalram chu eng kawng hrang hranga entîr nge a nih? (Footnote en rawh.)

¹¹ Zâwlnei Daniela chu Babulon sala hruaite zîngah a tel a. (Dan. 1:1-6) Jehova chuan ani chu khawvêl awptu lalram indawt dân  tûr puangtu atân a hmang a ni. Jehova chuan chhinchhiahna chi hrang hrang hmangin chûng thurûkte chu a puang chhuak a. Entîr nân, Babulon Lal Nebukadnezzara chu a mumangah milim hrawl tak a hmuhtîr a ni. (Daniela 2:1, 19, 31-38 chhiar rawh.) Jehova chuan Daniela kal tlangin, chu milim lû rangkachak chuan Babulon Lalram a entîr thu a târ lang a. * A âwm leh a bân tangkarua chuan Babulon zawha khawvêl awptu lalram lo awm tûr chu a entîr a ni. Chu thu neitu chu tu nge ni ang a, engtin nge Pathian mite a cheibâwl ang?

MEDO-PERSIA—LU PALINA

12, 13. (a) Engtin nge Jehova chuan Babulon hnehna chungchâng chu a târ lan? (b) Engvângin nge Medo-Persia chu sakawlh lu palina anga târ lan chu inhmeh tak a nih?

¹² Daniela hun hma kum zabi khat chuangah, Jehova chuan zâwlnei Isaia kal tlangin Babulon hnehtu tûr khawvêl awptu lalram chungchâng kimchang takin a lo târ lang daih tawh a. Babulon khawpui hneh a nih dân tûr mai bâkah, a hnehtu tûr hming thlengin a sawi chhuak vek a ni. Chu hruaitu chu Persia mi Kura a ni. (Is. 44:28–45:2) Daniela chuan Medo-Persia Khawvêl Thu Neitu tûr lalram chungchângah inlârna dang pahnih a hmu a. A pakhatah chuan, chu lalram chu savawm ang tak, a khing lehlama ding anga târ lan a ni a. A hnênah chuan: “Tîsa ei ṭeuh rawh,” tia hrilh a ni. (Dan. 7:5) Inlârna dang lehah chuan Daniela chuan khawvêl awptu tûr lalram pahnih inkawp entîrtu berâmpa, ki pahnih nei a hmu bawk a ni.—Dan. 8:3, 20.

¹³ Jehova chuan Babulon paihthla a, Israel mite an rama kîrtîr lehna hmanga hrilh lâwkna tithleng famkimtu atân Medo-Persia Lalram chu a hmang a. (2 Chro. 36:22, 23) Mahse, chu ram vêk chuan a hnuah Pathian mite a nuai bo ṭhelh a ni. Bible-a Estheri bu chuan Persia ram prime minister Hamana’n phiar rûkna a duan chungchâng a ziak a. Ani chuan Persia Ram zau tak chhûnga chêng Juda zawng zawngte tihhlum vek dân tûr a ruahman a, tihhlum an nih tûr nî thlengin a duang vek hman a ni. Jehova a rawn inrawlh avâng chauhvin A mite chu Setana thlahte huatna ata vênhim an ni leh ta a ni. (Est. 1:1-3; 3:8, 9; 8:3, 9-14) Chuvângin, Medo-Persia chu Thu Puana sakawlh lu palina anga târ lan a ni chu a inhmeh hle a ni.

GRIK—LU PANGANA

14, 15. Jehova chuan hmân lai Grik Lalram chungchângah eng thu kimchang tak nge a târ lan?

¹⁴ Thu Puana sakawlh lu pangana chuan Grik a entîr a. Daniela’n Nebukadnezzara mumang a hrilhfiah ṭuma a lo puan chhuah tawh ang khân, chu ram chu milim pum leh malpui dâr pawhin a entîr bawk. Daniela chuan he Grik ram nih phung leh a rorêltu hmingthang tak chungchâng chipchiar taka târ langtu inlârna pahnih a hmu bawk a ni.

¹⁵ Inlârna pakhatah Daniela chuan Grik chu keitê ang, a hnunga sava thla pali nei angin a hmu a, chu chuan lalramin ram dangte rang taka a lâk tûrzia a târ lang a ni. (Dan. 7:6) Inlârna dangah Daniela chuan ki ropui tak pakhat nei kêlpain ki pahnih nei berâm, Medo-Persia a tihhlum dân a sawi a. Jehova chuan Daniela hnênah kêlin Grik a entîr thu leh, a ki ropui takin a lal ropuite zînga pakhat a entîr thu a hrilh a ni. Daniela chuan ki ropui tak chu a tliah tûr thu leh chu mi hmun aṭanga ki tê zâwk pali a lo ṭo chhuah tûr thu pawh a sawi belh bawk. Chu hrilh lâwk thu chu Grik lalram a rawn din chan chhoh hma kum za tam taka ziah tawh ni mah se, engkim a rawn thleng dik vek a ni. Hmân lai Grik lal hmingthang ber mai Alexander Ropuia chuan Medo-Persia beihnaah chuan hma a hruai a. Mahse,  chu kî chu a tliak ta thuai a, lal ropui tak chu a ropui vâng lai tak, kum 32 mi lek a nihin a thi ta a. A tâwpah a lalram chu a sipai hotu palite’n an insem darh ta a ni.—Daniela 8:20-22 chhiar rawh.

16. Antiochus IV-in eng nge a tih?

¹⁶ Persia a hneh hnuah Grik chuan Pathian mite ram chu a awp ta a. Chutih lai chuan Judate chu Ram Tiam-ah kîr lehin, Jerusalem-ah chuan biak in an sa ṭha leh tawh a. Anni chu Pathian mi thlante an la ni reng a, an biak in sak ṭhat pawh biakna dik hmunpui a la ni chho zêl a ni. Mahse, B.C.E. kum zabi hnihnaah chuan, sakawlh lu pangana, Grik chuan Pathian mite chu a bei ve leh ta a. Alexander-a lalram inṭhen darh pali zînga pakhat rochungtu Antiochus IV chuan Jerusalem biak in tualah chuan milem pathian tân maichâm a din a, Juda sakhaw vawn chu tihhlum theih dân bawhchhiatna a nihtîr a ni. Setana thlah pêngin a lantîr huatna thiltih a va ni tak êm! Mahse, Grik chu khawvêl awptu lalram a nihna ata paih thlâk a ni ta thuai a. Sakawlh lu parukna chu eng nge ni ta ang?

ROME—LU PARUKNA, “ṬIHBAIAWM LEH HLAUHAWM TAK”

17. Sakawlh lu parukna chuan Genesis 3:15 thu thlen famkimnaah eng chanvo pawimawh tak nge a neih?

¹⁷ Johana’n sakawlh chungchâng inlârna a hmuh laia khawvêl awptu lalram chu Rom a ni a. (Thup. 17:10) He lu parukna hian Genesis 3:15-a chhinchhiah hrilh lâwkna thlen famkimnaah chanvo pawimawh tak a nei a ni. Setana chuan Rom hruaitute chu rei lote chhûng atâna thlah “ke artui” tithitlingtu atân a hmang a ni. Engtin nge a hman? Anni chuan Isua chu sawrkâr laka hel anga puhin a chungthu an rêl a, an tihlum a ni. (Mt. 27:26) Mahse, Jehova chuan Isua chu a kaihthawh leh avângin chu hliam chu a dam leh thuai a ni.

18. (a) Eng hnam thar nge Jehova’n a thlan a, engvângin nge? (b) Engtin nge rûl thlah chuan hmeichhe thlah a huatzia a lantîr chhunzawm zêl?

¹⁸ Israel rama sakhaw hruaitute leh Rom mite chuan Isua an phiar a, Israel hnam zînga a tam zâwk lahin ani chu an hnâwl bawk a. Chuvângin, Jehova chuan tîsa lam Israelte chu a mite an nihna ata a bân ta a. (Mt. 23:38; Tirh. 2:22, 23) Hnam thar, “Pathian Israelte” chu a thlang ta a ni. (Gal. 3:26-29; 6:16) Chu hnam chu Judate leh Jentailte hmanga din hriak thih Kristiante an ni. (Eph. 2:11-18) Isua a thih a, a thawhleh hnu pawh chuan, rûl thlah chuan hmeichhe thlah a huatzia chu a la lantîr chhunzawm zêl a. Rom-ho chuan thlah zawmpuitu, Kristian kohhran chu nuai bo tumin ṭum khat aia tam an bei a ni. *

19. (a) Engtin nge Daniela chuan khawvêl awptu lalram parukna chu a hrilhfiah? (b) Thuziak dangah eng nge kan ngaihtuah ang?

¹⁹ Daniela’n Nebukadnezzara hnêna a hrilhfiah mumangah chuan, Rom chu milim kea thîr chuan a entîr a. (Dan. 2:33) Daniela chuan Rom Lalram mai bâkah, Rom aṭanga khawvêl awptu tûr dang lo chhuak tûr chungchâng târ lanna inlârna pawh a hmu bawk a ni. (Daniela 7:7, 8 chhiar rawh.) Kum zabi têl chhûng chuan Rom chu a hmêlmate tâna “ṭihbaiawm leh hlauhawm tak, chak tak mai” angin a lang a ni. Mahse, hrilh lâwkna chuan chu lalram aṭang chuan “ki sâwm” a lo chhuah tûr thu leh chûng zînga pakhat chu a challan zual bîk tûr thu pawh a sawi bawk. Chu ki sâwmte chu eng nge ni a, ki tê tak tê nihna chu eng nge ni? Eng kawngin nge ki tê tak tê leh Nebukadnezzara hmuh milim hrawl tak chu a inzawm? Chu mi chhânna chu phêk 16-naa thuziakah ngaihtuah a ni ang. (w12-E 06/15)

[Footnote-te]

[Zirlai Atâna Zawhnate]