Tûn Laiah Kristiante’n Eng Nge An Tih Ang?

TUN laia Kristian dikte chu politics-ah an tel ve lo. Engvângin nge an tel loh? Isua entîrna an zui vâng a ni. Isua chuan ama chungchângah: “Kei khawvêla mi ka ni lo,” tiin a sawi a. A hnungzuite hnênah pawh: “Khawvêla mi in ni . . . lo,” tiin a sawi bawk. (Johana 15:19; 17:14) Kristiante politics-a inhnamhnawih loh tûr chhan ṭhenkhat hi ngaihtuah ta ila.

1. Mihring theihna chuan chin tâwk a nei. Bible chuan mihringte hian mahnia ro inrêl tûrin theihna leh dikna an nei lo tih a sawi a. Zâwlnei Jeremia chuan: “Tungchhova kal mihringah hian, a pheikhai hruai tûr a awm lo,” tiin a ziak a ni.—Jeremia 10:23.

Mihringte chu thlâwk thei tûra siam an nih loh ang bawkin, hlawhtling taka ro inrêl thei tûra siam an ni lo. Sawrkârte’n tih theih chin tâwk an neihzia sawiin, David Fromkin-a chuan: “Sawrkârte chu mihring hmanga din a ni a; chuvângin, thil an tisual thei a, a hma lam hun pawh a chiang lo thei a ni. Thu neihna engemaw tak chu an hmang a; mahse, chin tâwk a nei a ni,” tiin a sawi. (The Question of Government) Chuvângin, Bible-in mihringte rin chhan lo tûra min vaukhân pawh hi a mak lo ve!—Sâm 146:3.

2. Thlarau sualho chuan an thunun mêk. Setana’n Isua hnêna khawvêl thu neihna pêk a tum lai khân, Isua chuan khawvêl ram zawng zawngte pe tûrin Diabola’n thu neihna a nei tih chu a pha lo va. Dik takin, a hnuah phei chuan Setana chu “khawvêl lal” tiin a ko hial a ni. Chu mi hnu kum engemaw zâtah, tirhkoh Paula pawhin Setan chu “he khawvêl pathian” tiin a sawi bawk. (Johana 14:30; 2 Korinth 4:4)  Paula chuan a Kristian unaute hnênah: “Kan buante hi . . . lalnate leh, thuneihnate leh, he thim chunga khawvêl rorêltute leh, vân hmunahte thlarau sualho awmte an ni zâwk e,” tiin a ziak a ni. (Ephesi 6:12) Mite hriat lohva khawvêla rorêltu chu thlarau sualhote an ni. Chu thu chuan politics kan thlîr dân eng angin nge a thunun ang?

He khaikhinna hi han ngaihtuah teh: Lawng tête chu tuipui luang chak takin a luanna lam lama a hruai kual ang bawkin, mihring politics sawrkârna pawh hi thlarau sual thiltithei takte chuan an duhna lam lamah an hruai kual a ni. Tin, chûng lawng tê pute chuan tuipui luang chak tak luan dân an thlâk theih loh ang bawkin, politician-te pawhin thlarau sualhote thununna chu an thlâk danglam thei lo a ni. Chûng thlarau sualho chuan mihringte chu siam ṭhat theih loh khawpa tihchhiat an tum a, ‘leiah chungpikna’ an thlen a ni. (Thu Puan 12:12) Chuvângin, inthlâkthlengna dik tak chu Setana leh a ramhuai thiltithei takte aia chak zâwk chauhvin a thlentîr thei a. Chu mi rawn thlentîr Theitu chu Pathian Jehova a ni.—Sâm 83:18; Jeremia 10:7, 10.

3. Kristian dikte chuan Pathian Ram chauh an thlâwp. Isua leh a zirtîrte chuan Pathianin a hun ruatah lei chunga rorêltu tûr vânah sawrkâr a din dâwn tih an hria a. Bible chuan chu sawrkâr chu Pathian Ram tiin a ko va, Isua Krista chu Lal atâna thlan a ni tih a târ lang bawk. (Thu Puan 11:15) Chu Lalram chuan mi zawng zawng a khawih tel avângin, Isua chuan “Pathian ram chanchin ṭha” chu a zirtîrna thupui berah a hmang a. (Luka 4:43) A zirtîrte pawh: “I ram lo thleng rawh se” tia ṭawngṭai tûrin a zirtîr bawk. Engvângin nge? Chu Ram rorêlna hnuaiah chuan Pathian duhzâwng chu lei leh vâna tih a nih ngei dâwn avângin.—Matthaia 6:9, 10.

A nih leh, mihring siam sawrkârte chungah hian eng nge lo thleng dâwn? Bible chuan ‘khawvêl zawng zawnga’ sawrkârte chu tihchhiat vek an ni ang tih a sawi. (Thu Puan 16:14; 19:19-21) Miin mihring siam politics sawrkâr zawng zawngte Pathianin a rawn tibo thuai dâwn tih a rin tak zet chuan, chûng politics pâwlte chu a thlâwp duh lo vang. Tihah chuan, tihchhiat hmabâk mihring siam sawrkârte a thlâwp chuan, Pathian dodâl zâwngin thil a ti tihna a ni dâwn si a. (w12-E 05/01)

[Phêk 6-naa thu lâk chhuah]

Jehova Thuhretute chuan politics hmanga siam ṭhatna thlâwp lovin, Pathian Ram an thlâwp tlat