Pathian Thu Aṭangin Inzir Rawh

Engtin Nge Pathian I Hnaih Theih Ang?

He thuziak hian i lo ngaihtuah mai theih zawhnate zâwtin, i Bible-a a chhânna i hmuh theihna laite a târ lang a. Jehova Thuhretute chuan chûng chhânnate sawipui che chu an châk hle a ni.

1. Pathianin ṭawngṭaina zawng zawng a ngaithla em?

Jehova chuan hnam tina mite chu ṭawngṭaia amah hnaih tûrin a sâwm a. (Sâm 65:2) Mahse, ṭawngṭaina zawng zawng chu a ngaithla lo. Entîr nân, Israel mite’n thil sual an tihluih tlat khân, Pathian chuan an ṭawngṭaina a ngaithla duh lo a ni. (Isaia 1:15) Chu bâkah, nupuite cheibâwl ṭha lotu ṭawngṭaina pawh a ngaithla lo thei a ni. (1 Petera 3:7) Mahse, Pathian chuan thil sual nasa tak tite pawh an inlamlêt chuan an ṭawngṭaina a chhâng tho vang.—2 Chronicles 33:9-13 chhiar rawh.

2. Engtin nge kan ṭawngṭai ang?

Ṭawngṭaina hi chanvo hlu tak, kan biakna pêng pakhat a nih avângin Jehova hnênah chauh kan ṭawngṭai tûr a ni. (Matthaia 4:10; 6:9) Mi ṭha famkim lo kan nih avângin Isua hmingin kan ṭawngṭai tûr a ni; amah chu “kawng” ruat a nih tlat avângin. (Johana 14:6) Jehova chuan thiam sa emaw, ziah chhuah sa emaw kan sawi nawn mai chu a duh lo va, thinlung tak aṭanga kan ṭawngṭai chu a duh a ni.—Matthaia 6:7; Philippi 4:6, 7 chhiar rawh.

Min Siamtu chuan ri lo va ṭawngṭaina pawh a hre thei a. (1 Samuela 1:12, 13) Zîng thawh hlim leh zân mut dâwn te, chaw ei dâwn te, leh buaina kan tawh huntea ṭawngṭai tûrin min sâwm a ni.—Sâm 55:22; Matthaia 15:36 chhiar rawh.

3. Engvângin nge Kristiante chu an inkhâwm ṭhin?

Pathiana rinna nei lo mite leh leia remna awm tûr a tiam nuihsantute zînga chêng kan nih avângin Pathian hnaih chu a awlsam lo va. (2 Timothea 3:1, 4; 2 Petera 3:3, 13) Chuvângin, kan Kristian unaute nêna mi tichak thei inkawm khâwmna kan neih chu a ngai a ni.—Hebrai 10:24, 25 chhiar rawh.

Pathian hmangaihtu mite nêna in inkawm chuan Pathian i hnaih thei a. Jehova Thuhretute inkhâwmna chuan mi dangte rinna hlâwkpui theihna hun remchâng a pe a ni.—Rom 1:11, 12 chhiar rawh.

 4. Engtin nge Pathian i hnaih theih?

Bible aṭanga i thil zirte chhût ngunna hmangin Jehova chu i hnaih thei a. A thiltih te, a kaihhruaina te, leh a thutiamte ngun takin ngaihtuah ṭhîn ang che. Ṭawngṭaina nêna chhût ngunna chuan Pathian hmangaihna leh finna ngaihhlutna thinglung a siam a ni.—Josua 1:8; Sâm 1:1-3 chhiar rawh.

Pathian chu rinchhan a, amaha rinna i neih chauhvin i hnaih thei a ni. Mahse, rinna chu thil nung châwm reng ngai ang a ni a. I thu rinte i rin chhan ennawn ṭhinna hmangin i rinna chu i châwm reng tûr a ni.—1 Thessalonika 5:21; Hebrai 11:1, 6 chhiar rawh.

5. Engtin nge Pathian hnaih chu i hlâwkpui ang?

Jehova chuan amah hmangaihtute chu a ngaihsak a. An rinna leh an chatuan nun beiseina tichhe thei thil engpawh lakah a vênghim ṭhîn. (Sâm 91:1, 2, 7-10) Kan hrisêlna leh hlimna tichhe thei nun kawng zawh lo tûr pawhin min vaukhân bawk. Jehova chuan nun kawng ṭha ber min zirtîr a ni.—Sâm 73:27, 28; Jakoba 4:4, 8 chhiar rawh. (w11-E 09/01)

Hriat tam lehzual nân, Jehova Thuhretute tihchhuah ible Zirtîrna Dik Tak Chu Eng Nge Ni? tih lehkhabu bung 15-na hi en ang che.