“Hei Hi Chatuana Nunna A Ni”

“Hei hi chatuana nunna a ni, nang Pathian tak chauh leh i tirh Isua Krista hriat hi.”—JOHANA 17:3.

HRIATNA chuan nun a chhanhim thei a. Thla kaw mi Nouhou-a a dam loh chuan, a nu—Niger rama khawtlâng hrisêlna enkawlna lama thawk—chuan a tih tûr chu a hria a ni. Ani chuan a fapa tân chini te, chi te, leh tui thianghlimte chu chawhpawlhin, ORS a siamsak a ni. UNICEF târ lan dân chuan, a fapa “reilotêa a dam chhuah chhan chu a nuin vawilehkhata hma a lâk nghâl vâng leh khawtlâng hrisêlna enkawlna a dawn vâng a ni.”

Bible aṭanga hriatna pawhin nun a chhanhim thei bawk a. Bible ziaktu hmasa ber Mosia chuan: “In tân thil engmah lo mai mai a ni lo va, in nunna a ni si; tin, hêng thil ti hian . . . in dam rei dâwn a ni,” tiin a sawi. (Deuteronomy 32:47) Bible chuan min dam reitîr tak tak thei em? Chu chu eng kawngin nge kan tân nunna a nih?

Kan hmuh tâk thuziak pangate hian Bible hi hrilh lâwkna rin tlâk tak a nihna te, thawnthu ni lo thu dik tak leh science lama a dikna te, a chhûng thu a inremna te, leh a kaihhruaina ṭangkai takte avângin eng dang nên maha khaikhin rual a ni lo tih a târ lang a. Hei hian Bible hi a danglam bîk hle tih a nemnghet a ni. Chuvângin, dam reina—chatuana nunna—kawng kawhhmuh nia a inchhâlna chuan ngun taka i bih chian a phu a ni lâwm ni?

Bible hriatna dik hian tûna rilru lama damna min pêk theih dân leh nakina hlimna a thlen theih dân zir tûrin kan fuih a che. Jehova Thuhretute chuan chutiang hriatna nei tûra ṭanpui che chu an châk hle a ni. (w12-E 06/01)

[Phêk 9-naa bâwm/milem]

A hnuaia târ lan zawhna pawimawh kan zawh ṭhinte lungawithlâk taka a chhânna pawh chuan Bible chu a tidanglam bîk hle a ni:

• Engvângin nge leia kan awm?

• Engvângin nge hrehawm tawrhna a tam êm êm?

• Ka hmangaih tak thi tawhte tân beisei tûr engemaw tal a awm em?

Hêng zawhnate Bible-in a chhân dân chu Jehova Thuhretute tihchhuah Bible Zirtîrna Dik Tak Chu Eng Nge Ni? tih lehkhabu-ah hian i hmu thei a ni.