Jehova Chuan Zalênna Dik Takah Hruai Che Rawh Se
Jehova Chuan Zalênna Dik Takah Hruai Che Rawh Se
“Dân famkim, zalênna dân hi bih [rawh].—JAK. 1:25.
KAN HRILHFIAH THEI EM?
Eng dânin nge zalênna dik takah min hruai a, tute’n nge chu dân chu hlâwkpui?
Zalênna dik tak neih theih dân thurûk chu eng nge ni?
Nunna kawnga awmte chu eng ang zalênnain nge nghâk reng?
1, 2. (a) Khawvêl zalênna chu engtin nge a awm zêl a, engvângin nge? (b) Jehova mite tân eng zalênna nge awm?
DUHAMNA, dân bawhchhiatna, leh tharum thawhna a tam telh telhna khawvêlah kan awm a. (2 Tim. 3:1-5) Chu mi chhân lêt nân, sawrkârte chuan dân an zam belh a, police an rawih belh a, electronic hmanga invilnate an bun belh sauh sauh a ni. Ram ṭhenkhatah chuan, mite chuan an him lehzual nân an inahte alarm an vuah a, tala-te an dah belh bâkah, electric luanna palte pawh an nei hial a ni. Tin, mi tam tak chuan zâna chhuahvah an duh lo va, chhûn emaw, zân emaw pawh ni se an fate chu enkawltu awm lova pâwna an inkhelh an khap hial bawk. Zalênna kan nei tlêm tial tial a ni tih a chiang hle a, chutiang chuan a kal chho zêl dâwn niin a lang bawk.
2 Eden huanah khân, Setana chuan zalênna bul ber chu Jehova hnên ata inlâk hran niin a sawi a. Chu chu dâwt thu râwng tak leh bawraw tak a va ni êm! Mite’n pathian nungchang leh thlarau lama Pathian ramri kham an ngaihthah nasat poh leh a rah chhuah ṭha lo chu an tuar nasa ting mai dâwn a ni lo. He dinhmun chhe zual zêl hian keini Jehova chhiahhlawhte pawh min nghawng a. Chuti chung pawhin, mihringte sual bâwih tânna tâwp hun hmuh theih leh, Bible-in ‘Pathian fate zalênna ropui’ tia a koh chan theih chu kan inbeisei a ni. (Rom 8:21) A nihna takah chuan, Pathian Jehova chuan chu zalênna atân a mite chu a buatsaih ṭan der tawh a ni. Eng kawngin nge?
3. Pathian Jehova chuan Krista hnungzuitute hnênah eng dân nge a pêk a, eng zawhna nge kan ngaihtuah dâwn?
3 A chhânna chu Bible ziaktu Jakoba’n “dân famkim, zalênna dân” a tihah hian a innghat a ni. (Jakoba 1:25 chhiar rawh.) Bible lehlin dangte chuan he mi thu hi “min chhuah zalêntu dân” (The New English Bible) leh “zalênna dân ṭha famkim” (The New American Bible) tiin a let chhuak a ni. A tlângpui thuin, dân chu zalênna nên ni lovin, khuahkhirhna nêna thlunzawm a ni ṭhîn a. Chuti chu, eng nge Bible-in “dân famkim, zalênna dân” a tih hi eng nge ni? Engtin nge chu dân chuan min tihzalên?
CHHUAH ZALENTU DAN CHU
4. Eng nge “dân famkim, zalênna dân” chu ni a, chu chu tute’n nge hlâwkpui?
4 “Dân famkim, zalênna dân” chu Mosia dân a ni lo, chu dân chu bawhchhiatna tilang fiahtu a nih a, Kristaa a famkim tawh avângin. (Mt. 5:17; Gal. 3:19) Chuti chu, Jakoba sawi chu eng dân nge ni ta ang? A sawi tum chu “Krista dân,” a ni a, chu chu ‘rinna dân’ tia koh a ni bawk. (Gal. 6:2; Rom 3:27) Chuvângin, “dân famkim” chuan Pathian Jehova thil min phût engkim a fûn khâwm vek a ni. Hriak thih Kristiante leh “berâm dang” chuan chu dân chu an hlâwkpui ve ve a ni.—Joh. 10:16.
5. Engvângin nge zalênna dân zawm chu a harsat loh?
5 Ram tam takte neih dânte ang lo takin, “dân famkim” chu a hnawk lo va, zawm a harsa hek lo; thupêk hriatthiam awlsam tak leh thu bulte a nih avângin. (1 Joh. 5:3) Isua chuan: “Ka nghâwngkawl chu a nuam a, ka phur pawh a zâng a ni,” a ti. (Mt. 11:29, 30) Chu bâkah, “dân famkim” chu hmangaihnaa innghat leh lungphêk ni lo, mihring rilru leh thinlunga ziak a nih avângin, dân bawhchhetute hremna thui tak ziak chhuak a neih a ngai lo bawk.—Hebrai 8:6, 10 chhiar rawh.
‘DAN FAMKIMIN’ MIN CHHUAH ZALEN DAN
6, 7. Jehova tehnate chungchângah eng nge kan sawi theih a, engvângin nge zalênna dân chuan min chhuah zalen?
6 Pathian Jehova’n a thil siam finna neite tâna ramri a khamte chu an ṭhatna tûr leh an invênhimna tûr a ni. Entîr nân, lei leh vân chunga nghawng nei lei hîpna ang chi leilung dânte hi han ngaihtuah teh. Chutiang dân hnuaia awm chu tuman an sawisêl lo. Sawisêl ahnêkin, chûng dânte chu an ṭhatna tûr a ni tih hriain an ngaihlu zâwk mah a ni. Chutiang bawkin, Krista ‘dân famkima’ lang chhuak nungchang leh thlarau lama Jehova tehnate chu mihringte ṭhatna tûr a ni.
7 Vênghimtu a nih bâkah, zalênna dân chuan mi dangte neih dikna leh zalênna khawih buai si lo leh mahni intina si lovin, kan châkna ṭhate min phuhrûktîr thei a ni. Chuti chu, zalen tak tak dân—kan duhzâwng tih theih dân—thurûk chu châkna ṭha, Pathian Jehova mizia leh tehnate nêna inrem châkna neih hi a ni. Thu danga sawi chuan, Jehova hmangaihte hmangaih dân zir a, a huatte huat dân zir a ni a; chutianga ti tûrin zalênna dân chuan min ṭanpui a ni.—Amos. 5:15.
8, 9. Zalênna dân zâwmtute chuan eng hlâwkna nge an dawn? Hrilhfiah rawh.
8 Ṭha famkim lo kan nih avângin, châkna dik lote do hneh chu harsa kan ti a. Nimahsela, zalênna dân anga kan nun tlat chuan tûn lâ lâa min chhuah zalen theih dân chu kan tem thei a ni. Entîr nân: Bible zirlai thar Jay-a chu vaihlo heh tak a ni a. A thiltihin Pathian a tilâwm lo tih a hriat chuan thu tlûkna a siam a lo ngai ta a. A tisa châkna lamah a inpe zêl dâwn nge ni a, Jehova hnênah a inpe zâwk dâwn? A taksain vaihlo ngaiin, châk hle mah se, finthlâk takin Pathian rawngbâwl chu a thlang ta zâwk a ni. A thiltih a bânsan theih hnu chuan engtin nge a awm? “Zalên nia inhriatna ropui tak ka nei a, ka hlim hle,” tiin a sawi a ni.
9 Jay-a chuan a thiltawn aṭangin ‘tisa dâna an awm’ phaltu khawvêl zalênna chuan mi chu salah a siam zâwk a, Jehova zalênna—‘thlarau dâna awmna’—chuan mi a chhuah zalên bâkah, “nunna leh thlamuanna” kawngah a hruai bawk tih a hre ta a ni. (Rom 8:5, 6) Amah sala siamtu a thiltih ata tlân chhuak tûrin Jay-a chuan khawi aṭangin nge chakna a hmuh? Chu chakna chu amaha awm a ni lo; Pathian hnên aṭanga a dawn a ni zâwk. Ani chuan: “Bible ka zir reng ṭhîn a, thlarau thianghlim dîla ka ṭawngṭai bâkah, Kristian kohhranin phal taka min pêk ṭanpuina duhawm tak chu ka zawng bawk a ni,” tiin a sawi. Hêng hian zalênna dik kan zawnna kawngah keini pawh min ṭanpui thei a ni. Min ṭanpui theih dân i lo en ang u.
PATHIAN THU BIH RAWH
10. Pathian dân “bih” tih chu eng tihna nge ni?
10 Jakoba 1:25 a ṭhen laiah heti hian kan chhiar a ni: “Tupawh dân famkim, zalênna dân hi bih a, chutianga awm reng . . . chu a thil tihah malsâwmin [lâwmin] a awm ang,” tiin. “Bih” tia lehlin atîra Grik thu mal awmzia chu “endik tûra kûn” tihna a ni a, rilru pêk tak zetna a kâwk a ni. Ni e, zalênna dânin kan rilru leh thinlung khawih tûr chuan keimahni lamah kan tih tûrte chu kan tih a ngai a; taima taka Bible zirin, kan thu chhiarte tih tak zetin kan ngaihtuah tûr a ni.—1 Tim. 4:15.
11, 12. (a) Engtin nge Isua chuan thutak nunpui a pawimawhzia a sawi uar? (b) A chunga kan hmuh tâk angin, a bîk takin ṭhalaite tân eng hlauhawm nge pumpelh ngai?
11 Chutih rual chuan, Pathian Thu nunpuina kawngah kan “awm reng,” a nih loh leh kan chhel tlat tûr a ni a, chutiang chuan thutak chu kan nunphung kan nihtîr a ni ang. Isua chuan amah ringtute hnênah chutiang thu bawk chu a sawi a ni: “Ka thua in awm reng chuan ka zirtîrte in ni tak tak ang. Tin, thutak in hria ang a, thutak chuan bâwih a bân ang che u,” tiin. (Joh. 8:31, 32) Lehkhabu pakhat chuan “thil ‘hriat’ chu a hretu tâna thil hlu tak emaw, pawimawh tak emaw” a nih avângin, heta “hria” tih hi ngaihhlutna nei tihna pawh a nih thu a sawi. Chuvângin, kan nunpui hunah chauh thutak kan ‘hre’ tak tak thei a ni. Chutih hunah chuan “Pathian thu” chuan keimahniah hna a “thawk” kan ti thei ang a, kan Pa vâna mi entawn lehzual thei tûrin kan mizia a siam ṭha dâwn a ni.—1 Thes. 2:13.
12 Heti hian inzâwt rawh, ‘Thutak ka hre tak zet em? Chu chu ka nunpui em? Nge ni a, khawvêl “zalênna” ṭhenkhat chu kan la duh cheu zâwk?’ tiin. Kristian nu leh pa enkawlna hnuaia sei lian unaunu pakhat chuan a naupan lai chu ngaihtuah lêtin, heti hian a ziak a ni: “Thutaka sei lian i han nih hian, Pathian Jehova chu kan nei reng a tih theih ang a. Mahse, keimahah hi chuan ani chu ka lo hre chiang miah lo. A thil huatte huat dân ka zir ngai lo va. Ka thiltihte a ngai pawimawh niin ka hre ngai lo a ni. Chutah, harsatna ka tawh hunah pawh a hnên lam ka pan ngai lo va. Keima hriatnaah ka innghat ṭhîn a, engmah hriat ka neih loh avângin chutianga ka awm chu a nuihzatthlâk tawp a ni,” tiin. Lâwmawm takin, chu unaunu chuan a thil ngaihtuah dân hi a dik lo hle tih a hria a, inthlâkthlengna lian tham tak a nei ta a. Tûnah chuan regular pioneer hial a thawk ta a ni.
THLARAU THIANGHLIM CHUAN ZALEN TURIN A ṬANPUI THEI CHE
13. Engtin nge Pathian thlarau thianghlim chuan min chhuah zalen?
13 Korinth thawn hnih 3:17-ah chuan: “Lalpa thlarau awmna apiangah chuan zalênna a awm ṭhîn,” tih kan chhiar a. Engtin nge thlarau thianghlim chuan min chhuah zalên theih? Thil tam takte bâkah, chu chuan keimahniah zalên nâna pawimawh miziate a awmtîr a ni—“Hmangaihna te, hlimna te, remna te, dawhtheihna te, ngilneihna te, ṭhatna te, rinawmna te, thuhnuairawlhna te, insûmtheihna te” chu. (Gal. 5:22, 23) Hêng miziate, a bîk takin hmangaihna tel lo chuan tumah an zalên tak tak thei lo vang—he thu dikzia hi tûn lai khawvêlah hian a lang sa reng a ni. Ngaihvenawm takin, thlarau rah pêng hrang hrangte a târ lan hnuah, tirhkoh Paula chuan: “Chutiang kalhzâwngin Dân thupêk rêng a awm lo ve,” a tih belh a. Chu chu eng a tihna nge ni? Pathian thlarau rah a ṭhan chhohna tûr chu dân engmahin a dang thei lo tihna a ni. (Gal. 5:18) Tihah chuan, chutianga khuahkhirhtu dânin a tum chu eng nge ni tehrêng ang? Pathian Jehova duhzâwng chu chatuana Krista neih ang mizia neih kan tum leh khuahkhirhtu awm miah lova kan lantîr hi a ni si a.
14. Eng kawngin nge khawvêl thlarau chuan amaha intulûtte chu bâwiha a siam ṭhin?
14 Khawvêl thlarau zêl thlûka awmte leh tisa lam châkna thila inhmangte chuan zalên niin an inhria a. (2 Petera 2:18, 19 chhiar rawh.) Mahse, thil nihphung dik tak chu a lêt zâwng a ni hlauh a ni. Mi dangte tihnat châkna an miziate thunun nân dân leh hrai tam tak zam a lo ngai a. Paula chuan: “Dân hi mi fel tak tâna siam a ni lo va, dân pawisa loho leh dân bawhchheho tân . . . a ni,” tiin a sawi. (1 Tim. 1:9-11) Anni pawh sual bâwiha tâng an ni a, pu ber nunrâwng tak “tisa châknate angin” thil an ti a ni. (Eph. 2:1-3) Rannungin a châkna phuhru tûra khawizu lam a pan a, kal sawn thei lova a tân ṭhin angin, hêng mite hian an châkna sual phuhrûk an tumna lamah sual bâwihah an tâng ta ṭhîn a ni.—Jak. 1:14, 15.
KRISTIAN KOHHRAN CHHUNGA ZALENNA
15, 16. Kohhran kan belh hi eng ang khawpa pawimawh nge a nih a, chutah chuan eng ang zalênna nge kan neih?
15 Kristian kohhran i belh ṭan hian, khawtlâng pâwl pakhata lût ang i ni lo. Kohhrana i luh chhan chu Pathian Jehova’n a hîp che vâng a ni. (Joh. 6:44) Engvângin nge a hîp che? Mi dik, Pathian ṭih mi i nih vâng em ni? “Ni lul lo ve!” i ti mai thei. Chuti chu, Pathianin nangmahah hian eng nge a hmuh? Chhuah zalêntu a dân dawng sawng duh thinlung, a thununna duhawm tak hnuaia intulût duh thinlung a hmu a ni. Kohhran chhûngah hian Jehova chuan thlarau lama châwm chein, sakhaw lama dâwtthu leh puithuna âtthlâkte lakah chhuah zalên chein, leh Krista neih ang mizia nei tûra zirtîr chein, i thinlung chu a châwm a ni. (Ephesi 4:22-24 chhiar rawh.) Chu mi avâng chuan, khawvêla “zalênna dâna rorêlsak tûrate,” a nih loh leh mi zalênte zînga mi nih theihna chanvo i nei ta a ni.—Jak. 2:12.
16 Hei hi han ngaihtuah teh: Thinlung zawng zawnga Jehova hmangaihtute zînga i awm hian hlauhna rilru i nei em? Kingdom Hall-a unaute nêna in inbiak hian i thil neihte chu tuemawin a rûk bo hlauvin i vuan nghet tlat ṭhîn em? Chutianga awm ahnêkin, i thla a muangin, i zalên êm êm zâwk mah a ni. Hmun dangah chuan chutiangin i awm ang em? Chutianga i awm chu a rinawm lo hle! Tûna Pathian mite zînga i neih zalênna hi nakina i la neih tûr zalênna tem lâwkna mai a la ni.
‘PATHIAN FATE ZALENNA ROPUI’
17. Engtin nge mihringte zalênna chu “Pathian fate lo lanna” nên a inkûngkaih?
17 Pathian Jehova’n a lei lam chhiahhlawhte tâna a dah zalênna chungchâng sawiin, Paula chuan: “Thil siam zawng zawngte beisei êm êmin, Pathian fate lo lanna chu an nghâkhlel hle si,” a ti a. Tin, heti hian a sawi belh a ni: “Thil siam zawng zawngte ngei pawh chu chhiatna bâwih ata tihchhuahin an awm ang a, Pathian fate zalênna ropuiah chuan an lût dâwn si a,” tiin. (Rom 8:19-21) “Thil siam” tih hian thlarauva hriak thih Pathian fate “lo lanna” hlâwkpuitu tûr leia chatuana nun beiseina neite a kâwk a. Chu an “lo lanna” chu hêng a “fate” vân nunna changa an thawhleh a, Krista ruala leia suahsualna an thenfai hunah leh “mipui tam tak” khawvêl thara an hruai luh hunah a inṭan ang.—Thup. 7:9, 14.
18. Engtin nge thu âwih mihringte tân zalênna chu neih belh zêl a nih ang a, a tâwpah eng zalênna nge an hmuh dâwn?
18 Chhan chhuaha awmte chuan zalênna thar—Setana leh a ramhuaite thununna ata zalênna—chu an nei ang a. (Thup. 20:1-3) Chu chu a va hahdamthlâk dâwn êm! Chu mi hnuah chuan, Krista ṭhian lal leh puithiam mi 1,44,000-te chuan Adama sualna leh ṭhat famkim lohna nuai reh a nih vek thlengin tlanna inthawina chu mihringte chungah an hmang ang a, anni chu an chhuah zalên chhunzawm zêl ang. (Thup. 5:9, 10) Fiahna hnuaia an rinawm tlat avângin, mihringte chuan Pathian Jehova’n an tâna a lo tum zalênna ṭha famkim—‘Pathian fate zalênna ropui’—chu an nei tawh ang. Han ngaihtuah teh! Pathian mithmuha thil dik tih i tum ṭâng ṭâng a ngai tawh lo vang; i taksa pumhlum hi a ṭha famkim tawh ang a, i mizia pawh Pathian anpui mizia anga thlak thleng a ni vek tawh dâwn si a.
19. Tûn laiah, zalênna dik kawnga kal reng tûrin eng nge kan tih zêl ngai?
19 ‘Pathian fate zalênna ropui’ chu i nghâkhlel em? I nghâkhlel a nih chuan, i rilru leh thinlung chu “dân famkim, zalênna dân” hian thunun zêl rawh se. A ni, Pathian Lehkha Thu taima takin zir ang che. Thutak nunpui la, i ta nihtîr rawh. Thlarau thianghlim dîlin ṭawngṭai rawh. Kristian kohhran leh Pathian Jehova min pêk thlarau lam chaw chu a ṭangkai thei ang berin hmang rawh. Pathian kawngte hi a khirh lutuk tia Evi a bum angin, Setana chu inbumtîr ve suh. Diabola hi a fing khermei hle a. Mahse, a dawta thuziaka kan la hmuh tûr angin, “Setanan min dinchan khalh” kher a ngai lo, “a ngamthlêmna chu kan hai si lo va.”—2 Kor. 2:11. (w12-E 07/15)
[Zirlai Atâna Zawhnate]
[Phêk 14-naa milem]
Khawvêl “zalênna” ṭhenkhatte neih chu ka la châk cheu vem?
[Phêk 14-naa milem]
Thutak chu ka nun dân phung ka nihtîr tawh em?
