Jehova’n A Chhûngkua A La Khâwm

‘Thlarau inpumkhatna chu vawng tûrin ka ngên a che u.’—EPH. 4:1-3.

ENGTIN NGE KAN HRILHFIAH ANG?

Pathian Jehova chuan a thiltum a hlawhtlin ngei theih nân eng ruahmanna nge a siam?

Engtin nge ‘thlarau inpumkhatna kan vawn’?

Engin nge ‘inkhawngaih tawn’ tûrin min ṭanpui ang?

1, 2. Lei leh mihringte tâna Jehova thiltum chu eng nge ni?

CHHUNGKUA tih ṭawngkam hian eng nge a hriat chhuahtîr che? Hmangaihna leh hlimna em ni? Tum thuhmun nei a, chu mi hlen tuma thawh tlân chu em ni? Nge ni a, ṭhang lian a, inzir a, ngaih dân kan inhrilh tawnna tûr hmun him tak em ni zâwk? Chhûngkaw inngaihsak tak kâra seilian i nih chuan chutiang chu i hriat chhuah ngei a rinawm. Jehova ngei chu chhûngkaw Dintu a ni. (Eph. 3:14, 15) Ani chuan lei leh vâna a thil siam zawng zawngte chu rilru thlamuang tak, inrin tawnna nei, leh inpumkhata awmtîr chu a tum a ni.

² Mihringte an lo sual tâk hnu chuan lei leh vâna Pathian chhûngkaw zînga mi an ni zêl thei ta lo va; mahse, Jehova thiltum chu a hlawhchham chuang lo. Ani chuan lei Paradis hi Adama leh Evi thlahte hmangin a tikhat ngei ngei dâwn a. (Gen. 1:28; Is. 45:18) Chu a thiltum tihhlawhtlin nân a ṭûl ang angin ruahmanna a siam a ni. Chûng ruahmannate zînga tam tak chu inpumkhatna thupuia nei Bible-a Ephesi bu-ah kan hmu thei a. Chu mi bua Bible châng ṭhenkhat chu ngaihtuahin, a thil siamte inpumkhat tûra Jehova thiltum kan thlâwp theih dân i lo en ang u.

A THILTUM TIHHLAWHTLIN NANA TUNA JEHOVA THILTIH

3. Ephesi 1:10 târ lan dânin, hun bi kim a thlen hunah Pathianin eng nge a tih ṭan a, engtikah nge chhâwng hmasa zâwk chu a inṭan?

³ Mosia chuan Israelte hnênah: “LALPA kan Pathian  chauh chu LALPA a ni,” a ti a. (Deut. 6:4) Jehova thiltih leh a thiltumte chu a inrem thlap zêl a ni. Chuvângin, “hun bi kim” a thlen hunah Pathianin a thil siam finna nei zawng zawngte inpumkhat nân ruahmanna a siam ṭan a ni. (Ephesi 1:8-10 chhiar rawh.) He ruahmanna hi chhâwng hnihin a hlen chhuak ang. A chhâwng khatnaah, Pathian chuan hriak thihho chu thlarau lama an Lû, Isua Krista kaihhruaina hnuaia vâna nung tûrin a buatsaih a. Chu chu, C.E. 33 Pentikost-a vâna Krista ruala rorêl tûrte Pathian Jehova’n a lâk khâwm khân a inṭan a ni. (Tirh. 2:1-4) Hriak thihte chuan Krista tlanna inthawina zârah nung tûra mi fela puan an nih tawh avângin, “Pathian fate” anga pawm an ni tih an inhre nghâl a ni.—Rom 3:23, 24; 5:1; 8:15-17.

4, 5. Hun bi kim a thlen huna Pathian thiltih chhâwng hnihna chu eng nge ni?

⁴ A chhâwng hnihna chuan Krista Messia Lalram hnuaia lei Paradis-a chêng tûrte chu a buatsaih a. Chuta chêng hmasa tûrte chu, “mipui tam tak” te an ni. (Thup. 7:9, 13-17; 21:1-5) Anni chu, Kum Sâng Rorêl chhûnga tho leh mi maktaduai tam takin an rawn zawm ang. (Thup. 20:12, 13) Chûng tho lehte’n kan inpumkhatna an rawn târ lan nasat lehzual dân tûr chu han ngaihtuah teh! Kum sângkhat tâwpah chuan, “lei chunga thil awmte” chuan fiahna hnuhnûng ber chu an tâwk ang a. Chuta rinawmte chu lei lama “Pathian fate” anga pawm an ni tawh ang.—Rom 8:21; Thup. 20:7, 8.

⁵ Pathian thiltum tihhlawhtlin nâna a thiltih chhâwng hnih, vân lam leh lei lama thil awmte lâk khâwmna chu tûn laiah a rualin a thleng mêk a ni. Mahse, a mi mal angin engtin nge tûn laia Pathian thiltih chu kan thlâwp?

‘THLARAU INPUMKHATNA CHU VAWNG RAWH’

6. Engtin nge Pathian Lehkha Thu chuan Kristiante chu inkâwm ṭhîn tûr an nih thu a târ lan?

⁶ Pathian Lehkha Thu chuan Kristiante chu fâwk khâwm, a nih loh leh hmun khata kal khâwm tak tak ṭhîn tûr an nih thu a târ lang a. (1 Kor. 14:23; Heb. 10:24, 25) Chutianga tih chu bazâr tûr emaw, inkhêl en tûr emawa kal khâwm a, hmun khata hun hman tlân mai a ni lo. Inpumkhatna dik tak chu chutiang mai piah lam chu a ni a. Chutiang inpumkhatna chu Pathian Jehova kaihhruaina kan nunpui a, a thlarau thianghlim kan inthununtîr hian kan nei ṭhîn a ni.

7. ‘Thlarau inpumkhatna vawng’ tih awmzia chu eng nge ni?

⁷ Jehova chuan Krista tlanna inthawina zârah a hriak thihte chu fate ang leh berâm dangte chu ṭhiante angin mi felah pawm ve ve mah se, he khawvêla kan la chên chhûng hi chuan mi mal inrem lohna neuh neuh hi chu a la awm zêl dâwn a. (Rom 5:9; Jak. 2:23) Chutiang ni lo se chuan, “indawh tawn” tûra Pathian thlarauva thâwk khum fuihna thu hi pêk kan ngai lo vang. Engtin nge unaute nena inpumkhatna chu neih theih a nih? “Inngaihtlâwmna leh thuhnuairawlhna” kan neih a ngai a. Chu bâkah, Paula chuan “remna phuarnaah chuan thlarau inpumkhatna chu vawng tûra bei” tûrin min fuih a ni. (Ephesi 4:1-3 chhiar rawh.) He fuihna zawmnaah hian Pathian thlarau thununna hnuaia intukluh leh keimahnia thlarau rah lan chhuahtîrna a tel a. Chu thlarau rah chuan mite ṭhen hrang ṭhîn tisa thiltihte ang lo takin, inlaichînna a siam ṭha ṭhîn a ni.

8. Eng kawngin nge tisa thiltihte chuan inpumkhat lohna a awmtîr?

⁸ “Tisa thiltihte” chuan inlungrual lohna a awmtîr dân hi lo chhinchhiah teh. (Galatia 5:19-21 chhiar rawh.) Inngaihna chuan mi chu Pathian Jehova leh kohhranho lak ata a la hrang a; tin, uirêna chuan nunrâwng takin fate chu nu leh pa lak ata a la hrang theiin, a thiam zâwkte pawh an kawppui hnên ata a la hrang thei bawk. Thil châr tûr a pakhat zâwk chauh a fai chuan a inchâr nghet tak tak thei ṭhîn lo. Chutiang bawkin, bawlhhlawhna chuan Pathian leh amah hmangaihtute nên mi chu a inpumkhattîr  tak tak thei lo. Hurna * chuan Pathian dân felte ngaihthah pumhlûmna a lantîr a. Tisa thiltih dangte chuan mite inkâra inṭhen hranna a awmtîr bâkah, Pathian laka inṭhen hranna pawh a awmtîr ṭheuh bawk. Chutiang nungchang chu Jehova mizia nên a inkalh chiang hle.

9. Engtin nge ‘thlarau inpumkhatna vawng tûra’ kan beih leh beih loh kan inenfiah theih?

⁹ Chuvângin, kan vai hian heti hian kan inzâwt tûr a ni: ‘“Remna phuarnaah chuan thlarau inpumkhatna chu vawng tûrin” eng ang takin nge ka beih? Buaina a lo chhuah hunah engtin nge ka chhân lêt? Ṭhian engemaw zâtin min ṭan ka beisei avângin, ka lungnih lohna chu mi tam tak hnênah ka sawi chhuak em? Inlaichînna siam ṭha tûra theih tâwp chhuah aiin, upate chu ka lama ṭang a, buaina min chinfelsak tûrin ka beisei em? Mi dangte chu ka chunga an lungnih lohnate an hriat chhuah loh nân ka pumpelhin, anmahni hlat tâwka awm ka tum tlat em?’ tiin. Chutianga thiltih chu Jehova’n Kristaa thil zawng zawng fâwk khâwm leh a tumna nêna inmila kan chêtzia târ lanna a ni thei dâwn em ni?

10, 11. (a) Unaute nêna inrem chu eng ang taka pawimawh nge ni? (b) Eng thiltihin nge remna leh thlarau lama hausakna awmtîr?

¹⁰ Isua chuan: “Chutichuan, maichâm bula i thilpek i hlan lai ngeia i unauvin i chungah lungnih lohna a nei tih i hriat chhuah leh chuan, chuta maichâm hmaah chuan i thil pêk chu hnutchhiah la, kal langin i unau rem zet la, chu mi hnuah chuan i thilpêk chu rawn hlân rawh. I khingpui chu . . . rem thuai rawh,” tiin a sawi a. (Mt. 5:23-25) Jakoba pawhin “felna rah chu remna siamtute tân remnain tuh a ni,” tiin a ziak bawk. (Jak. 3:17, 18) Chuvângin, remna tel lo chuan nungchang fel kan nei thei lo a ni.

¹¹ Entîr nân, indo ṭhinna ramahte chuan an ram leilung hmun thuma ṭhena hmun khat chu rah puah bomb (land mines) avângin thlai chîn theih lovin a awm a. Bomb a puah hian lo neitute’n ram an kalsan a, khawtê-ah hnathawh tûr a vâng a, khawpuiah pawh ei tûr a vâng ta ṭhîn. Chutiang bawkin, kan unaute nêna kan inremna tibuai thei mizia engemaw kan neih chuan thlarau lama kan ṭhanna tûr chu dâlin a awm ṭhîn. Mahse, ngaihdam nghâl duhna leh mi dangte ṭhatna tûra thil tihna hmangin, thlarau lama hausakna dik tak rah chhuak thei dinhmun chu kan siam a ni.

12. Engtin nge upate chuan inpumkhat tûra min ṭanpui theih?

¹² Chu bâkah, “mihringte hnêna thilpêkte,” a nih loh leh upate chu inpumkhatna awmtîrtu ṭha tak an ni bawk a. Anni chu ‘rinnaa thu khat vuaa kan zaa kan awm’ theih nâna min ṭanpuitu tûrte an ni. (Eph. 4:8, 13) Rawngbâwlnaa  upate’n min thawhpui a, Pathian Thu ṭanchhana an ngaih dânte min pêk hian mihring thara inthuamna kawnga hma sâwn tûrin min ṭanpui tihna a ni. (Eph. 4:22-24) An fuihna che aṭang chuan Pathian Jehova’n a Fapa awpna hnuaia khawvêl thara nung thei tûra buatsaih che a tum dân chu i hmu thei em? Upate u, chutiang chu thiltuma nei chungin mi dangte siam ṭhat chu in tum em?—Gal. 6:1.

‘INKHAWNGAIH TAWN ULA’

13. Ephesi 4:25-32-a fuihna thute kan zawm loh chuan eng nge lo thleng ang?

¹³ Ephesi 4:25-29 chuan kan pumpelh tûr nungchangte a târ lang a. Chu mi zîngah chuan dâwt sawi te, thinrim leh thatchhiat te, leh thil ṭha leh mi tichak thei aia sawichhiatna ṭawngkam ṭha lote a tel a ni. Miin he fuihna thu hi a zawm loh chuan Pathian thlarau a tilungngai ang, thlarau thianghlim chu inpumkhatna awmtîrtu chakna a ni si a. (Eph. 4:30) A dawt leha Paula thuziak zawm pawh hi remna leh inpumkhatna neih nâna thil pawimawh tak a ni bawk. Heti hian a ziak a ni: “Khâkna te, thinurna te, tauhna te, ânna te, sawichhiahna te zawng zawng chu bânsanin awm rawh se, sualna zawng zawng nên. Tin, inkhawngaih tawna lainatna neiin awm ula, Pathianin Kristaa a ngaidam che u ang bawkin inngaidam tawn rawh u,” tiin.—Eph. 4:31, 32.

14. (a) ‘Inkhawngaih ula’ tih thumal hian eng nge min sihhmuh? (b) Engin nge khawngaihna nei tûrin min tanpui ang?

¹⁴ ‘Inkhawngaih ula’ tih fuihna chuan khawngaihna neih loh hun kan nei a, he mi kawngah hian hma kan sâwn a ngai tih min sihhmuh a ni. Kan rilru veizâwngte aia mi dangte rilru vei zâwng ngai pawimawh zâwk tûra inzir chu thil inâwm a va ni tak êm! (Phil. 2:4) Kan thil sawi tum ṭhenkhat chuan mi a chawk hlimin, mi fing tak angin min lantîr dâwn pawh a ni thei; mahse, chutianga sawi chu khawngaihna a ni ang em? Chutianga ngaihtuah lâwkna chuan ‘inkhawngaih tawn’ tûrin min ṭanpui ang.

CHHUNGKUAAH HMANGAIHNA LEH ZAHNA LANTIR DAN ZIR RAWH

15. Ephesi 5:28-ah hian Krista’n kohhranho a cheibâwl dân chungchâng a eng ber nge Paula’n a sawi thawi?

¹⁵ Bible chuan Krista leh kohhran inlaichînna chu nupa inlaichînna nên a tehkhin a. Chu chuan chhûngkuaah pasalin kaihhruaina a pe tûr a ni tih leh hmangaihna leh ngaihsakna a lantîr tûr a ni tih min hriat chhuahtîr bâkah, nupui tân pawh intukluh a ngai tih min hriat chhuahtîr nghâl tûr a ni. (Eph. 5:22-33) Paula’n: “Chutiang bawkin pasalte pawhin mahni taksate angin mahni nupuite chu an hmangaih tûr a ni,” tia a ziah khân, ‘chutiang bawkin’ a tih hian eng a tihna nge? (Eph. 5:28) Chu mi hmaa a thusawi chuan ‘Kristan kohhranho a hmangaih a, an aia a inpêkna leh anni chu tuia sila thu hmanga a tihfaina’ chungchâng min hriattîr a. Chuvângin, Kristaa thil zawng zawng fâwk khâwm tûra Jehova thiltum nêna inmila thil ti tûr chuan pasal chu a chhûngte thlarau lama châwm tûrin a harhvâng tûr a ni.

16. Nu leh pate’n Pathian Lehkha Thu-in a pêk in chhûngkhura an mawhphurhnate an hlen chhuah hian eng nge a rah chhuah ṭhin?

¹⁶ Nu leh pate chuan an fate enkawl tûrin Jehova’n mawhphurhna a pe tih an hre reng tûr a ni a. Lungchhiatthlâk takin, tûn lai khawvêla mi tam tak chuan ‘hmangaihna pianpui an nei lo.’ (2 Tim. 3:1, 3) Pa tam tak chuan an mawhphurhnate an hlen lo va—an fate tâna hrehawmna leh chhiatna an thlen a ni. Mahse, Paula chuan Kristian pate chu: “Nangni pate u, in fate tithinur suh ula, Lalpa thununnaah leh zilhnaah chuan enkawl zâwk rawh u,” tiin a fuih a ni. (Eph. 6:4) Naupangte chuan hmangaihna leh thu neihna chungchânga an ngaih dân hmasa ber chu chhûngkua aṭang lo chuan khawi aṭangin nge an zir tehrêng ang? An fate hnêna chûng thilte hlawhtling taka zirtîrtu nu leh pate chuan a thiltum tihhlawhtlin nâna tûna Jehova thiltih nêna inmilin hna an thawk a ni. Kan inte chu thinrimna leh tauhna  leh sawichhiatna ṭawngkam te hman lohna leh hmangaihna awmna hmun nuam tak nihtîrin kan fate hnênah thil pawimawh tak, hmangaihna leh thu neitute zah dân kan zirtîr a. Chu chuan Pathian khawvêl thara nung thei tûrin anni chu a buatsaih ang.

17. Diabola do tûrin eng nge kan mamawh?

¹⁷ Lei leh vâna remna tibuai hmasa bertu Diabola chuan Pathian duhzâwng tih kan tumna chu a dodâl tlat ang tih kan hriat a ṭûl a. Inṭhenna punchhohna te, innei lova khawsak dun duh zâwk avânga inneihna tihbona te, leh neih inang inneihna te hian Setana thiltum a hlawhtlinzia a târ lang. Tûn laia mite mizia leh rilru put hmang ang chu kan pu lo. Krista chu kan entawn tûra chu a ni zâwk! (Eph. 4:17-21) Chuvângin, Diabola leh a ramhuaiho hlawhtling taka kan do theih nân “Pathian râlthuam famkimin inthuam” tûra fuih kan ni.—Ephesi 6:10-13 chhiar rawh.

“HMANGAIHNAAH AWM RAWH U”

18. Kristian inpumkhatna kan neih chhan ber eng nge ni?

¹⁸ Kristian inpumkhatna kan neih theih chhan ber chu hmangaihna a ni a. Kan “Lalpa pakhat chauh,” kan “Pathian . . . pakhat chauh” kan hmangaihna leh keimahni kan inhmangaih tawnna avângin, ‘remna phuarnaah chuan thlarau inpumkhatna chu vawn’ kan tum nghet tlat a ni. (Eph. 4:4-6) Isua chu chutiang hmangaihna chungchângah chuan hetiang hian a ṭawngṭai a: “Hênghote tân chauh hian ngensak ka ni lo, an thu avânga kei mi la ring tûrte tân pawh ngensak ka ni bawk e; an zaa pumkhat an nihna tûrin; Ka Pa, nang keimaha i awm leh, kei nangmaha ka awm ang bawk hian, anni pawh keimahnia an awmna tûrin . . . Tin, an hnênah i hming ka hriattîr a, ka hriattîr leh fo vang; nangin kei mi hmangaihna kha anmahniah a awm a, kei pawh anmahnia ka awm theihna tûrin,” tiin.—Joh. 17:20, 21, 26.

19. Eng nge tih kan tum tlat ang?

¹⁹ Kan ṭhat famkim lohna avânga rilru phîr kan neih chuan, hmangaihna chuan fakna hla phuahtu anga ṭawngṭai ve tûrin min chêttîr rawh se. Ani chu heti hian a ṭawngṭai a ni: “I hming ṭih tûrin thinlung sakhat mi puttîr ang che,” tiin. (Sâm 86:11) Hmangaihna ngah kan Pa leh a mi pawmte laka min lâk hran tumtu Diabola beihna do chu i tum tlat ang u. Kan chhûngkuaah te, kan rawngbâwlnaah te, leh kohhranahte pawh ‘fa duh takte anga Pathian awm dân latute ni tûr leh hmangaihnaa awm’ reng tûrin theihtâwp i chhuah ang u.—Eph. 5:1, 2. (w12-E 07/15)

[Footnote]

[Zirlai Atâna Zawhnate]

[Phêk 29-naa milem]

A thilpêk chu maichâma kalsanin, a unau a va rem phawt

[Phêk 31-naa milem]

Nu leh pate u, in fate hnêna mi dangte zah dân zirtîr rawh u