“LALPA Chu A Thianghlim E, A Thianghlim E, A Thianghlim E”
Pathian Hnaih Rawh
“LALPA Chu A Thianghlim E, A Thianghlim E, A Thianghlim E”
PATHIAN Jehova chungchâng—a nihna—chu ṭawngkam khat chauhvin sawifiah dâwn ta la eng thu mal nge i hman ang? B.C.E. kum zabi riatnaah khân, zâwlnei Isaia chu inlârna hmuhtîr a ni a, chu inlârnaah chuan thlarau thil siamte’n Jehova nihna pawimawh ber mai—a thianghlimna—sawifiahtu thu mal hmanga Amah an chawimawi lai chu a hmuin, a hria a ni. Chu Isaia thil hmuh leh hriatte chuan mak tihna min neihtîrin, Jehova min hnaihtîr lehzual tûr a ni. Isaia 6:1-3-a thute kan ngaihtuah lai hian, chuta awm ve angah lo inchan ang che.
Isaia chuan eng nge a hmuh? “Lalpa chu lalṭhutphah sâng tak chawisâna a ṭhu ka hmu a,” tiin a sawi a ni. (Châng 1) Isaia chuan Lal Chungnungber Jehova hmêl chu a hmu tak tak lo. Tisa mit chuan thlarau ram chu hmuh theih a ni si lo va. Bible chuan: “Tuman eng lai mahin Pathian an hmu lo,” tiin chiang takin a sawi a ni. (Joh. 1:18) Chuvângin, Isaia thil hmuh chu inlârna a ni. * Chuti chung pawhin, inlârna chu a chiang hle a, a tak êm avângin Isaia chuan mak a ti hle a, Jehova hmêl hmu tak tak ang maiin a chhânglêt a ni.
A hnuah Isaia chuan mi dang tumahin inlârnaa an hmuh ve loh thil chu a hmu a. A thil hmuh chu heti hian a ziak a ni: “[Jehova] kiangah chuan serafte an ding a: thla paruk an nei ṭheuh va, an thla pahnihin an hmai an khuh a, pahnihin an kephahte an khuh a, pahnihin an thlâwk a,” tiin. (Châng 2) Serafte chu thlarau thil siam nihna sâng tak chelh an ni a. Bible ziaktute zîngah chuan Isaia hi an chanchin ziaktu awmchhun a ni. Serafte chu an tâna Pathianin ti tûra a duhte thawk tûrin an inpeih reng a. A hmaa rawngbâwl theihna chanvo an neih Pathian an ngaihsânzia leh an zahzia lantîr nân an hmai leh an kete chu an khuh tlat a ni.
Isaia chuan a thil hmuhte mai bâkah a thil hriatte pawh chu mak a ti hle a. Vân lam zaipâwl ang maiin, Serafte chuan a ruala aw chhuahin an zai a. Isaia chuan heti hian a ziak a ni: “‘Sipaihote LALPA chu a thianghlim e, a thianghlim e, a thianghlim e,’ . . . tiin, an inau tawn an inau tawn ṭhîn a,” tiin. (Châng 3) He Hebrai thu mal “thianghlim” tia lehlin hian faina leh engmah pawlh lohna pawh a kâwk a. “Thil sual laka fihlîm ṭhak leh inlahrang hlak sawina” pawh a ni bawk. Chutianga zaipâwl hla inchhâng niâwm tak an sakah chuan serafte chuan “thianghlim” tih thu mal chu vawi thum ngawt an chham a, chu chu Jehova chu kawng engkima thianghlim lawr lak a nihzia sawi uarna a ni. (Thu Puan 4:8) Chuvângin, thianghlimna chu Pathian nihna langsâr ber a ni a. Jehova chu engmah pawlh loh, fai, leh sawisêlbo pumhlûm ṭhak a ni.
Jehova a thianghlim tih hriatna chuan amah min hnaih zualtîr tûr a ni. Engvâng nge? Mihring hruaitu bawlhhlawh leh sual takte ang lo takin, Jehova chu thil sual lakah a fihlîm ṭhak a. A thianghlimna chuan ani chu Pa ṭha ber, Lal fel, leh thlei bîk nei lo Rorêltu a ni dâwn tih min rinnghehtîr a. Thianghlimna nihna bera nei Pathian chuan min tibeidawng ngai lovang tih rinnghehna tûr chhan ṭha tak kan nei a ni. (w11-E 12/01)
[Footnote]
^ par. 4 Insight on the Scriptures chuan heti hian a hrilhfiah a ni: “Miin chhûn ên laia Pathian hnên aṭanga inlârna a dawn hian, chu chu a rilru harhfîm laia chiang taka hmuhtîr niin a lang. A hnuah inlârna hmutu chuan a ngaihtuah chhuak leh theiin, ama irâwm chhuakin a sawi chhâwng emaw, a ziak chhuak emaw thei a ni,” tiin.—Jehova Thuhretute tihchhuah.
[Phêk 32-naa thu lâk chhuah]
Jehova a thianghlim tih hriatna chuan amah min hnaih zualtîr tûr a ni
