Library Inrem Tak

“Thu hrilh lâwk rêng rêng hi mihring thua chhuak a ni ngai si lo a, miten thlarau thianghlim tirhin Pathian hnên ata an sawi zâwk ṭhîn a ni.”—2 PETERA 1:21.

ENGTIN NGE BIBLE CHU A DANGLAM? Hmân laia ziak thute chu a inkalh fo ṭhîn a, hun khata ziakte pawh a inkalh ṭhîn a ni. Mi chi hrang hrangin, hmun hrang hrang leh hun hrang hranga an ziah lehkhabute chu a inrem ngai meuh lo. Chuti chung pawhin, Bible chuan a bu 66-te chu Ziaktu pakhat ziah a ni a; chuvângin thu inrem tak pakhat a pe chhuak niin a inchhâl a ni.—2 Timothea 3:16.

ENTIRNA PAKHAT: B.C.E. kum zabi 16-naa berâm vêngtu Mosia chuan Bible bu hmasa berah mihringte chhandamtu tûr “thlah” a lo pian tûr thu a ziak a. Chu lehkhabu chuan a hnuah chu thlah chu Abrahama te, Isaaka te, leh Jakoba te thlah aṭanga a lo lan tûr thu a hrilh lâwk a ni. (Genesis 3:15; 22:17, 18; 26:24; 28:14) A hnu kum 500 vêlah, zâwlnei Nathana chuan thutiam thlah chu lal Davida thlah aṭangin a lo lang dâwn tih a sawi a. (2 Samuela 7:12) Chu mi hnu kum sângkhatah, tirhkoh Paula chuan chu thlah chu Isua leh a hnungzuitute hmanga din a nih tûr thu a hrilhfiah a. (Rom 1:1-4; Galatia 3:16, 29) A tâwpah chuan, C.E. kum zabi khatna a lo tâwp chuan, Bible bu hnuhnûng ber chuan chu thlah zînga telte chuan leiah Isua thu hriattîrna an nei ang a, vânah kaihthawh an ni ang a, Isua nên kum 1,000 ro an rêl dâwn tih a hrilh lâwk a ni. Chu thlah infinkhâwm chuan Diabola chu tiboralin, mihringte chu a chhan chhuak ang.—Thu Puan 12:17; 20:6-10.

BIBLE LAMA MI THIAMTE SAWI CHU: Bible bu 66-te chipchiar taka a bih chian hnuah, Louis Gaussen-a chuan “kum sângkhat leh za-nga chhûnga mi tam takte ziah he lehkhabu hi a chhûng thu a inrem tlat avângin a ropui a, . . . a ziaktute chuan Pathian Fapa hmanga khawvêl chhandamna chungchâng hre kim vek lo mah se, anni chuan thiltum pakhat ûmin, an bei ṭâng tâng peih” hi mak a tih thu a ziak a ni.—Theopneusty—The Plenary Inspiration of the Holy Scriptures.

ENGTIN NGE I NGAIH? Kum 1,500 aia tam chhûng, mi 40 laiin an ziah lehkhabu chu a chhûng thu a inrem vek i beisei em? Nge ni a, Bible hi a danglam bîk zâwk? (w12-E 06/01)

[Phêk 7-naa thu lâk chhuah]

“Hêng thuziakte dah khâwm a nih hian lehkhabu pakhatah a chang a . . . Thu leh hla tihchhuah tawh zawng zawng zîngah hetiang rêng rêng hi a la awm lo va, a tluk teuh pawh a awm hek lo.”—THE PROBLEM OF THE OLD TESTAMENT, BY JAMES ORR