Science Lamah A Dik

“Thutak nghehzia hriattîr tûr che leh . . . thutak chu i lêtpui theih nân remruat dân leh hriatna ṭha tak ka ziaksak che a ni lâwm ni?”—THUFINGTE 22:20, 21

ENGTIN NGE BIBLE CHU A DANGLAM? Hmân lai lehkhabuahte chuan tûn lai science lam thiamnain a dik lo hulhual tih an finfiah, ngaih dân hlauhawm tak leh rin tlâk lo tak takte a chuang fo va. Tûn laiah ngei pawh, lehkhabu ziaktute chuan thil hmuh chhuah tharte nêna inrem tûrin an thuziak chu an siam ṭha zêl a ni. Mahse, Bible chu Siamtu ziah a nih bâkah, a Thu pawh ‘chatuana awm reng’ tûr niin a inchhâl a ni.—1 Petera 1:25.

ENTIRNA PAKHAT: Mosia Dân chuan Israelte chu “riahhmun pâwn lamah” zunram thiar a, vûr leh ṭhîn tûrin thu a pe a. (Deuteronomy 23:12, 13) Mihring emaw, ran emaw ruang khawih tawh phawt chu fai taka insil tûrin thu a pe bawk. (Leviticus 11:27, 28; Number 19:14-16) Phârte pawh an endik a, kai darh theih an ni tawh lo tih an chian hma loh chuan an khung hrang ṭhîn bawk.—Leviticus 13:1-8.

TUN LAIA DAMDAWI LAM THIAMNA SCIENCE-IN A TAR LAN CHU: Inthiarna ṭha tak neih te, kut sil te, leh inkhung hrante chu natna laka invên dân kawng ṭangkai tak a la ni reng a. Tui hmanna êk in ṭha (septic-tank) kan neih loh chuan U.S. Centers for Diseas Control and Prevention (CDC) chuan heti hian rawtna a siam a ni: “Zun leh êk chu meter 30 [feet 100] vêla hlaah inthiar a, phûm bo zêl tûr a ni,” tiin. Vêng chhûngah zunram thiarna kawnga inthlahdah an awm loh hian tuihri natna chuan za zêla 36-in a tlêm phah ṭhîn tih World Health Organization chuan a sawi. Kum 200 aia tlêm kalta khân, damdawi lama mi thiamte chuan ruang an khawih zawha kut an sil ṭhin loh avângin dam lo tam takte hnênah natna hrik an kaichhâwntîr tih an hmu chhuak a ni. CDC chuan kut sil chu “natna hrik laka invên dân kawng ṭha ber” a la ti cheu a ni. A nih leh, phâr natna vei emaw, natna dang vei emawte khung hran chungchâng chu eng nge ni? Tûn hnai mai khân, Saudi Medical Journal chanchinbu chuan heti hian a sawi a ni: “Hri a lên ṭan tirh hian, a darh zau zêl tûr vênhim dân kawng awmchhun chu a veitu khung hran hi a ni,” tiin.

ENGTIN NGE I NGAIH? Hmân lai sakhaw lehkhabu thianghlim dangte chu tûn lai science lam thil nêna inrem tûrin i beisei em? Nge ni a, Bible hi a danglam bîk zâwk? (w12-E 06/01)

[Phêk 6-naa thu lâk chhuah]

“Mosia hun laia invawn thianghlim dân tûr chungchâng chhiar chu ropui ti lo an awm lo vang.—MANUAL OF TROPICAL MEDICINE, BY DRS. ALDO CASTELLANI AND ALBERT J. CHALMERS