Thawnthu Ni Lo, Thu Dik Tak

“A bul ata engkim fel takin [“dik takin,” New World Translation] ka chhui a.”—LUKA 1:3.

ENGTIN NGE BIBLE CHU A DANGLAM? Thawnthu phuahchawpte chuan thil thlenna hmun te, a thlen hun te, leh an hmingte sawi lang fak si lovin beng a titlai êm êm ṭhîn a. Chu mi nêna inkalh takin Bible chuan, hmân laia thilthleng chhiarsên lohte chu kimchang takin a sawi lang a, chu chuan a chhiartute chu a “thusawite chu a dik hle” tih thu tâwp a siamtîr a ni.—Sâm 119:160, The Psalms for Today, by R. K. Harrison.

ENTIRNA PAKHAT: Bible chuan: ‘Babulon lal Nebukadnezzara chuan . . . [Juda Lal] Jehoiakina chu Babulon-ah a hruai a,’ a ti a. Chu mi hnuah, “Babulon lal Ezil-merodakan a lal ṭan kumin Juda lal Jehoiakina chu tân in ata a hruai chhuak a,” a ti bawk. Chu bâkah, “a châwm nân a hmuh tâwk tûr lalin ni tin, [Jehoiakina] dam chhûng zawng chuan chanvo a siamsak reng a,” a ti bawk a ni.—2 Lalte 24:11, 15; 25:27-30.

THIL HLUI LAI CHHUAKTUTE HMUH CHHUAH CHU: Hmân lai Babulon khaw tlu chhe tawhah chuan, thil hlui lai chhuaktute chuan Nebukadnezzara II-na lal laia mi tawh, ram inrêlbâwlna chungchânga ziakna lehkha pawimawh an lai chhuak a. Chutah chuan mi tângte leh lal ina khawsa ve mi dangte hnêna an chaw sem dânte an ziak chhuak a. An ziah chhuahte zîngah chuan “Yahud (Judai) ram lal Yaukin-a [Jehoiachina]” leh a chhûngte pawh an tel a ni. A nih leh, Nebukadnezzara thlâktu, Ezil-merodaka a awm leh awm loh chungchâng hi eng nge ni ve thung? Susa khawpui bula hmuh chhuah no tung mawi-ah chuan heti hian a inziak a ni: “Babulon Lal Nebukadnezzara fapa, Babulon Lal Amil-Marduk-a [Ezil-merodaka] lal in,” tiin.

ENGTIN NGE I NGAIH? Sakhaw lehkhabu thianghlim dangte chuan hmân lai thilthleng chanchinte chu hetianga chiang leh dikin a sawi lang em? Nge ni a, Bible hi a danglam bîk zâwk? (w12-E 06/01)

[Phêk 5-naa thu lâk chhuah]

“Thil thlen dân indawt leh a ram leilung chanchinte chu hmân lai lehkha pawimawh dang eng pawh aiin a dik zâwkin a rin tlâk zâwk a ni.” —A SCIENTIFIC INVESTIGATION OF THE OLD TESTAMENT, BY ROBERT D. WILSON

[Phêk 5-naa milem]

Judai Lal Jehoiakina Chanchin a Chuanna Babulon Thuziak Pawimawh

[Milem Hawhtîrtu]

© bpk, Berlin/Vorderasiatisches Museum, SMB/Olaf M. Tessmer/Art Resource, NY