“Tunge Ka Hlauh Vang?”
“Tunge Ka Hlauh Vang?”
“Ka chungah indona lo chhuak mah sela, chuti pawhin ka ring tlat ang.”—SAM 27:3.
HENG BIBLE CHANGTE AṬANGIN, ENGIN NGE HUAISENNA NEI TURA ṬANPUI THEI CHE?
Sâm 27:1
Sâm 27:4
Sâm 27:11
1. Sâm 27-na chuan eng thil nge hre thiam tûra min ṭanpui dâwn?
ENGVANGIN nge khawvêl dinhmunin chhiat lam a pan zêl chung pawhin, kan thu hrilhna chuan hma lam a pan zêl? Mi tam takin ei leh bâr lama harsatna an tawh laiin, engvângin nge kan hun leh tha leh zung chu rawngbâwl nân phal taka kan pêk? Mi dang tam takin nakin hun tûr an hlauh hle laiin, engtin nge kan huaisen theih? Thlarauva thâwk khum Lal Davida hla, Sâm 27-na chuan a chhânna min pe a ni.
2. Hlauhna chuan mi chu engtin nge a awmtîr a, mahse eng nge kan rin tlat theih?
2 Davida chuan a fakna hla chu heti hian a ṭan a ni: “LALPA chu ka êng leh mi chhamdamtu a ni; tunge ka ṭih ang? LALPA chu ka nunna kulhbîng a ni; tunge ka hlauh vang?” tiin. (Sâm 27:1) Hlauhna chuan mi chu engmah tithei lo khawpin a tichau thei a. Mahse, hlauhna eng pawh chuan Jehova ṭihtu chu a tibuai tûr a ni lo. (1 Pet. 3:14) Jehova chu kan kulhbîng kan nihtîr hian, “him takin [kan] awm ang a, thil ṭha lo hlau lovin [kan] awm hle hle ang.” (Thuf. 1:33; 3:25) Engvângin nge?
“LALPA CHU KA ENG LEH MI CHHAMDAMTU A NI”
3. Eng kawngin nge Jehova chu kan tân êng a nih a; mahse, eng nge kan tih ngai?
3 Hmeh belna ṭawngkam “LALPA chu ka êng . . . a ni,” tih hian Jehova’n chinchâng hriat lohna leh thlarau lam thimna ata min chhuah zalên tih min hriattîr a. (Sâm 27:1) Êng tak tak chuan kan kawnga awm thil hlauhawm leh harsatnate min hmuhtîr thei a; mahse, a dah bo chuang lo. Kan thil hmuhte azirin finthlâk takin thil kan ti tûr a ni. Chutiang bawkin, Jehova chuan khawvêla thilthlengte awmze bulpui chu min hriattîr a. He khawvêla awm thil hlauhawmte lakah min vaukhân bawk a. Tin, engtik lai pawha ṭangkai Bible thu bulte min pe bawk; mahse, kan thil zirte kan nunpui tlat chu a ngai a ni. Chutianga kan nunpui chuan, “mi dotute” emaw, “min zirtîrtu zawng zawng” emaw aia fing zâwkin thil kan ti thei ṭhîn a ni.—Sâm 119:98, 99, 130.
4. (a) Engvângin nge Davida chuan rin tlatna nêna “LALPA chu . . . mi chhandamtu a ni,” a tih theih? (b) Eng hunah nge a bîk takin Jehova chu kan tân chhandamtu a nih dâwn?
4 Sâm 27:1-a Davida thu chuan tûn hmaa Pathian Jehova’n a chhan chhuah, a nih loh leh a chhandam dân a hre chhuak a ni thei ang tih a târ lang a. Entîr nân, Jehova chuan ani chu “sakeibaknei kutbâwr ata leh savawm kutbâwr ata” a chhan chhuak a ni. Tin, mi hrawl Goliatha a hnehtîr bawk. A hnuah, Lal Saula’n Davida feia a khawh pawh khân Jehova chuan ani chu a chhan chhuak bawk a ni. (1 Sam. 17:37, 49, 50; 18:11, 12; 19:10) Davida’n rin tlatna nêna “LALPA chu . . . mi chhandamtu a ni,” a ti thei pawh hi a mak lo ve! Jehova chu Davida tâna chhandamtu a nih angin a mite tân chhandamtu a ni leh ang. Engtin nge? Amah betute chu lo thleng tûr “hrehawm nasa tak ata” chhan chhuahna hmangin.—Thup. 7:14; 2 Pet. 2:9.
HLAWHTLINNATE HRE RENG RAWH
5, 6. (a) Huaisenna nei tûrin kan thil hriat rengna chuan eng chanvo nge a neih? (b) Jehova’n a mite a humhim dân chanchin chuan engtin nge huaisenna a pêk che?
5 Huaisenna neih nâna thil pawimawh tak pakhat chu Sâm 27:2, 3 hian a târ lang a. (Chhiar rawh.) Davida chuan Jehova chhan chhuahna a lo hmuh tawhte chu a hre reng a ni. (1 Sam. 17:34-37) Chûng thilte a hriat rengna chuan harsatna tâwp khâwk pawh hmachhawn tûrin huaisenna a pe a ni. I thil lo tawn tawhte aṭangin chutiang huaisenna i nei thei em? Entîr nân, buaina namai lo i tawh chungchângah tih tak zeta ṭawngṭaiin, Jehova chuan chu buaina hmachhawn thei tûra i mamawh finna emaw, chakna emaw chu a pe tawh che em? A nih loh leh, hlim taka i rawngbâwlna tûr dâltu harsatna paih bo a nih dân emaw, rawngbâwlna kawngka zau tak leh sâwt tak i tâna a inhawn dân emaw chu i hre chhuak thei em? (1 Kor. 16:9) Chutiang thilte i hriat rengna chuan i chungah eng rah nge a chhuah? Chûng i thil hriat rengte chuan harsatna leh dodâlna nasa zâwk pawh hneh thei tûr emaw, tuar thei tûr emawin Jehova chuan a ṭanpui thei che tih rin tlatna a pe che em?—Rom 5:3-5.
6 Sawrkâr thiltithei tak chuan Jehova Thuhretute chu a pâwl anga nuai bo vek tum ta se, engtin nge ni ang? Tûn laia mi tam tak chuan tih an lo tum tawh ṭhîn a; mahse, an hlawhchham a ni. Jehova’n hun kal tawha a mite a ṭanpui dân ngaihtuahna chuan nakin hun hmachhawn tûra kan mamawh huaisenna min pe ang.—Dan. 3:28.
BIAKNA DIK NGAIHLU RAWH
7, 8. (a) Sâm 27:4 thu aṭangin, Davida chuan Jehova hnênah eng nge a dîl? (b) Jehova thlarau lam biak in ropui tak chu eng nge ni a, chutah chuan biakna chu eng anga hlan nge a nih?
7 Huaisenna atâna thil pawimawh tak dang chu biakna dik kan ngainatna hi a ni. (Sâm 27:4 chhiar rawh.) Davida hun lai chuan ‘Jehova in’ chu Pathian biakna puan in hi a ni a. A fapain a hnua a sak atâna biak in ropui tak sak dân tûr ruahmanna siamtu chu Davida bawk hi a ni. A hnu kum zabi tam takah, Isua chuan pawm tlâka Pathian Jehova biakna chu Pathianin mal a lo sâwm tawh ṭhin, in ropui takah a innghat tawh dâwn lo tih a sawi lang a. (Joh. 4:21-23) Tirhkoh Paula chuan Hebrai bung 8 aṭanga 10-ah chu thlarau lam biak in chu C.E. 29-a Isua’n baptisma changa Jehova duhzâwng ti tûra a inhlan khân a lo lang ṭan tih a târ lang a ni. (Heb. 10:10) He thlarau lam biak in ropui tak hi Isua tlanna inthawina rinna avânga pawm tlâka Pathian kan pan theihna tûra Jehova ruahmanna siam a ni. A nih leh, chutah chuan engtin nge Pathian kan biak? ‘Rinna famkim leh thinlung tak zeta’ ṭawngṭaina te; nghîng lova kan beiseina puan chhuahna te; tin, kohhran inkhâwm leh chhûngkuaa Pathian biakna nei tûra kan kal khâwm huna unaute fuihna te, ngaihtuahna te, leh chawh thawhna te hmangin thlarau lam biak in ropui takah chuan Pathian kan bia a ni. (Heb. 10:22-25) Biakna dik atâna ruahmanna ngaihhlutna chuan he ni hnuhnûng hun khirh takah hian min tichak ang.
8 Khawvêl zawng zawngah hian, Jehova mi rinawmte chuan nasa lehzualin rawng an bâwlin, ṭawng tharte an zir a, Lalram thuchhuahtu mamawh zualna hmunahte an insawn hlawm a ni. An thiltih chuan fakna hla phuahtu angin Jehova hnêna thil dîl pakhat an neihzia a târ lang. Anni chuan Jehova mawina hmuh an duh a, eng pawh thleng se, rawngbâwlna thianghlima tel chu an duh a ni.—Sâm 27:6 chhiar rawh.
PATHIAN ṬANPUINA RING RAWH
9, 10. Sâm 27:10-a kan hmuh thu awmzia chu eng nge ni?
9 Davida chuan Jehova a rinna chu he thute sawiin, a sawi chhuak a ni: “Ka nu leh ka pate chuan mi kalsan mah se, LALPAN min enkawl ang,” tiin. (Sâm 27:10, footnote, C.L. Re-edited) Samuela bu khatna bung 22-a chhinchhiah thute aṭangin Davida nu leh pate chuan an kalsan lo tih kan hre thei a. Mahse, tûn laia mi tam tak chuan an chhûngte hnâwlna nasa ber chu an tawrh a ngai a ni. Chuti chung pawhin, chutianga kalsan mi tam tak chuan Kristian kohhranah ṭanpuina leh vênhimna duhawm tak an hmu a ni.
10 Mi dangte kalsan a mite ṭanpui tûrin Jehova chu a inpeih a; chutiang a nih chuan, harsatna dang an hmachhawn hunah pawh a ṭanpui dâwn lâwm ni? Entîr nân, ei leh bâr lama kan chhûngte mamawh enkawlna lam kan ngaihtuah a nih chuan, Jehova’n min ṭanpui dâwn tih kan chiang thei a ni lâwm ni? (Heb. 13:5, 6) Ani chuan a mi rinawmte dinhmun tawh leh thil mamawh zawng zawng chu a hre thiam a ni.
11. Jehova kan rinna chuan mi dangte chungah eng nghawng nge a neih theih? Entîrna pe rawh.
11 Liberia rama Bible zirlai Victoria-i chanchin hi han ngaihtuah teh. Baptisma chang thei tûr khawpa hma a sâwn chuan, a khawsakpui mipa chuan amah leh a fa pathum chu a kalsan a. In leh hna thawh tûr a nei lo chung pawhin thlarau lamah hma a sâwn ṭha hle a ni. Victoria-i’n baptisma a chan hnu chuan, kum 13 mi a fanu chuan sum tam tak awmna pawisa bag a chhar hlauh mai a. Thlêmna pumpelh an duh avângin pawisa awm zât chu chhiar pawh an chhiar lo. Pawisa bag neitu sipaipa chu an be pawp nghâl zâwk a ni. Chu sipai chuan mi zawng zawngte hi Jehova Thuhretute angin dik sela chuan, khawvêl zawng zawng hi a ṭha zâwk ang a, remna a awm lehzual ang tih a sawi a ni. Victoria-i chuan Bible aṭangin Jehova thutiam khawvêl thar chanchin chu sipaipa hnênah chuan a hrilh ta a. Victoria-i rinawmnain a rilru a khawih êm avângin, lâwmman atân sum tam tham tak a pe ta a ni. Dik takin, Jehova’n kan mamawh min pe thei tih an rinna chuan Jehova Thuhretute chu rinawmna sawisêl bo a neihtîr a ni.
12. Thil kan chân chung pawha Jehova rawng kan bâwl hian eng nge kan târ lan? Entîrna pe rawh.
12 A nih loh leh, baptisma la chang lo thuchhuahtu, Sierra Leone rama mi Thomas-a awm dân tûr hi han ngaihtuah teh. Secondary shcool-ah zirtîrtu hna thawk mah se, engemaw chinfel ngaite chinfel thleng, kum khat dâwn lai hlawh a la thei lo va. Hlawh a lâk theih nâna Thomas-a tâna thil tih ngai hnuhnûng ber chu eng nge ni? School-a thu neitu ber—sakhaw puithiam—va hmuh a ni. An puithiam chuan Jehova Thuhretute thurin leh an thurin a inan loh thu a lo hrilhfiah a. Thomas-a chu a hnathawh leh Bible ṭanchhan a thurin inkâra duh thlang tûrin a tilui ta a ni. Thomas-a chuan kum khat dâwn lai a hlawh chu chânin a hna a bânsan a, radio leh mobile phone siam ṭhatna lam hna a thawk ta a ni. Hei leh hetiang chi entîrna dang tam takte hian ei leh bâr lama harsatna chu mi dangte thil hlauh ni mah se, thil engkim Siamtu leh a mite Humhimtu Pathian Jehova kan rin chuan kan mamawh nei lova awm chu kan hlauh a ngai lo vang.
13. Engtin nge ram retheiahte hian Lalram thuhrilh rawngbâwlna chuan hma a sâwn?
13 Ei leh bâr harsatna rama awm Lalram thuchhuahtute chu mak tak maiin an phusa a. Engvâng nge ni ang? Branch office pakhat chuan heti hian a ziak a ni: “Bible zirna pawmtu in neitu tam tak chu hnathawh nei lo, Bible zirna atâna hun tam zâwk nei theite an ni a. Unaute pawhin thu hrilh nân hun an nei tam zâwk thei a ni. Mite, a bîk takin dinhmun harsat lehzualna hmuna awmte chu ni hnuhnûnga kan awm tawhzia hrilh hriat an ngai lo; an mit ngeiin an hmu si a,” tiin. Thuchhuahtu pakhatin a chawhruala Bible zirna pathum an kaihhruaina rama missionary thawk unaupa pakhat chuan: “Thuchhuahtu a tam zâwkte chuan samkhai taka an nun a, zâr buaitu an neih tlêm avângin, thlawhhma rawngbâwl nân leh Bible zirna atân hun an nei tam lehzual a ni,” tiin a ziak ve bawk.
14. Eng kawngtein nge mipui tam tak chuan Pathian vênhimna an neih theih?
14 Jehova chuan a mite chu a pâwl anga tisa lam leh thlarau lama ṭanpui tûr, vênghim tûr, leh chhan chhuak tûrin min tiam a, chu chu kan rinchhan a. (Sâm 37:28; 91:1-3) “Hrehawm nasa tak” ata dam khawchhuak mipui chu an tam hle dâwn a ni. (Thup. 7:9, 14) Chu mipui chu a pâwl angin, he ni hnuhnûng chhûng zawngin an boral lo vang. Anni chu fiahna leh Jehova nêna an inlaichînna vênhim nâna an mamawh apiang pêk an ni ang. Tin, hrehawm nasa tak tâwp lamah, Jehova chuan a mite chu a vênghim dâwn a ni.
“AW LALPA, I KAWNG CHU MI ENTIR LA”
15, 16. Pathian kaihhruaina zawm chu eng angin nge kan hlâwkpui? Entîrna pe rawh.
15 Huaisen taka awm reng tûr chuan, Pathian kawnga kaihhruaina kan dawn reng a ngai a ni. Chu chu Davida ṭawngṭaina: “Aw LALPA, i kawng chu mi entîr la; ka hmêlmate avâng hian kalkawng phei takah mi hruai ang che,” tih aṭangin a lang a ni. (Sâm 27:11) He ṭawngṭaina mila thil ti tûr chuan Jehova inawpna pâwl kal tlanga kan dawn Bible ṭanchhan kaihhruainate ngun taka ngaihsak a, zawm nghâl ṭhin a ngai a. Ṭûl lo taka leiba neihna pumpelhtu tam tak chuan tûn hnai lawka tlâk chhiatna hun chhûng hian nun tisamkhai tûra fuihna fing tak an hlâwkpui thu an sawi thei a. An enkawl theih tawh loh thilte avânga harsatna neih aiin, anni chu an rawngbâwlna zauh tûrin an zalên ta zâwk a ni. Heti hian kan inzâwt ṭheuh tûr a ni, ‘Bible leh bâwih rinawm leh fingte tihchhuah lehkhabua ka thu chhiar apiang chu, mi mal chânna tûr pawh ni se, ka nunpui nghâl ṭhîn em?’ tiin.—Mt. 24:45.
16 “Kalkawng phei,” a nih loh leh dikna kawnga Jehova kan inzirtîr a, kan inhruaitîr hian hlauh chhan tûr engmah kan nei lo. United States-a regular pioneer pakhatin an chhûngkuaa hun kima rawngbâwltîr thei tûr hna a han dîl chuan, an hotupa chuan college zir chhuak lo tân chu dinhmun chu a chan ngai dâwn loh thu a lo hrilh a ni. Hei hi nangma chunga thleng ni ta se, zirna sâng ûm lova hun bikima rawng i lo bâwl chu i inchhîr ang em? Chawlhkâr hnih a liam hnuah, chu hotupa chu a hna ata bân a ni a, manager dang chuan kan unaupa chu a thiltum chungchâng a zâwt a ni. Ani chuan a nupui nên Jehova Thuhretute hun bikima rawngbâwltu an nih thu leh nih zêl a tum thu a hrilh a ni. Unaupa’n eng dang mah a sawi hmain, manager chuan: “In danglam bîk a ni tih ka hria alâwm! Ka pa a thih dâwn khân, in unau pahnihte chuan a tân nî tin Bible an rawn chhiarsak ṭhîn a. Chuta ṭang chuan, hun remchâng ka neih hunah Jehova Thuhretute zînga tuemaw ber chu ka ṭanpui ang tiin ka lo intiam a, chu chu ka hlen dâwn a ni,” tiin a sawi ta phawng mai a. A tûkah, kan unaupa chuan director hmasa zâwkin a lo pêk duh loh hna ngei chu a nei ta a ni. Dik takin, kan nuna Lalram kan dah hmasak ber hian, Jehova chuan mamawh châkkhai min pe tûra a thutiam chu a hlen ngei ngei ṭhîn a ni.—Mt. 6:33.
RINNA LEH BEISEINA A PAWIMAWH
17. Engin nge nakin hun huaisen taka hmachhawn tûrin min ṭanpui ang?
17 Davida chuan a dawtah rinna leh beiseina a ṭûlzia sawi uarin: “Mi nung ramah hian LALPA ṭhatna hmuh inring suh ila chuan ka chau tawh tûr a ni,” a ti a. (Sâm 27:13) Ni e, Pathian min pêk beiseina leh Sâm 27-a kan hmuhte ngaihhlutna tel lo chuan kan chau chhe dêr tawh ang! Chuti chu, a tâwpa Armageddon thlentîrtu tûr thilte kan hmachhawn hian, chakna leh chhan chhuahna chu inring tâwk takin i dîl zêl ang u.—Sâm 27:14 chhiar rawh. (w12-E 07/15)
[Zirlai Atâna Zawhnate]
[Phêk 23-naa milem]
Davida chuan Jehova chhan chhuahna thiltihte a hriat rengna aṭangin chakna a nei
[Phêk 25-naa milem]
Ei leh bâr lama harsatna chu rawngbâwlna zauhna hun remchâng angah kan thlîr em?
