Zalênna Pathian Rawng Chu Bâwl Rawh
Zalênna Pathian Rawng Chu Bâwl Rawh
“Pathian kan hmangaihna chu hei hi a ni, a thupêkte kan zawm hi; a thupêkte chu a khirh si lo va.”—1 JOH. 5:3.
KAN CHHANG THEI EM?
Engtin nge Setana chuan Pathian dânte chu khirh tak anga lantîr a tum?
Engvângin nge ṭhian kawm chungchângah kan fîmkhur hle a ngaih?
Engin nge zalênna Pathian chunga rinawm reng tûrin min ṭanpui ang?
1. Engtin nge Pathian Jehova chuan zalênna chu a thlîr a, chu chu Adama leh Evi a cheibâwlnaah engtin nge a târ lan?
ZALENNA pumhlûm Neitu awmchhun chu Pathian Jehova hi a ni a. Mahse, a zalênna neih chu a hmang dik lo ngai lo va; a chhiahhlawhte thiltih engkim lah a thunun tlat hek lo. Chutianga tih ahnêkin, an hnênah chuan an châkna dikte phuhru tûra hma an lâk theih nân zalên taka duhthlan theihna a pe zâwk a ni. Entîr nân, Pathian chuan Adama leh Evi hnênah khuahkhirhtu thupêk pakhat chauh—“a chhia leh a ṭha hriatna thing rah ei” khapna thupêk chauh—a pe a ni. (Gen. 2:17) Anmahni Siamtu duhzâwng tihna kawngah chuan zalênna an va nei nasa tak êm!
2. Engvângin nge kan nu leh pa hmasa berte chuan Pathian pêk zalênna chu an hloh?
2 Engvângin nge Pathian chuan kan nu leh pa hmasa berte hnênah heti khawpa zalênna a pêk? Ama anpuia a siam a, chhia leh ṭha hriatna a pêk avângin, anmahni Siamtu a nih anga amah an hmangaihnain kawng dika a hruai a beisei tlat vâng a ni. (Gen. 1:27; Rom 2:15) Lungchhiatthlâk takin, Adama leh Evi chuan anmahni Nunna-Petu ropui tak leh a hnên ata an dawn zalênna chu an ngai hlu lo va. Ngaihhlut ahnêkin, Setana pêk chhuah dân lo anga zalênna, nungchang lama zalênna neih chu an thlang ta zâwk a ni. Mahse, zalênna nasa zâwk an neih loh mai bâkah, kan nu leh pa hmasa berte chuan an tu leh fa tûrte chu rahchhuah râpthlâk tak nei sual hnênah chuan an hralh ta zâwk a ni.—Rom 5:12.
3, 4. Jehova tehnate chungchângah Setana chuan engtin nge min bum a tum?
3 Setana chuan thlarau thil siam tam takte bâkah, mihring ṭha famkim pahnihte pawh Pathian lal chungnunna hnâwl tûra a thlêm thlûk theih chuan, keini pawh min thlêmthlu ve thei ngei ang. A thiltih dân chu a inang deuh reng a. Ani chuan Pathian tehnate chu khirh tak, nun hlimawm leh nuam tak min lâk bosaktu anga thlîr tûrin min bum a tum a ni. (1 Joh. 5:3) Chutiang ngaih dân neite kan kawm fo chuan, chu chuan kan chungah thiltihtheihna nasa tak a nei thei a ni. Nungchang bawlhhlawhnaa inhnamhnawih kum 24 mi unaunu pakhat chuan: “Ṭhian sual chuan ka chungah nghawng thui tak a nei a, a bîk takin ṭhiante laka danglam bîk nih ka hlauh avângin min nghawng nasa lehzual a ni,” tiin a sawi. Chutiang ṭhiante nêksâwrna chu i tâwk ve pawh a ni mai thei.
4 Ṭhiante nêksâwrna ṭha lo chu kohhran chhûng aṭanga lo chhuah châng a awm thei hi a pawi hle mai. Thuhretu ṭhalai pakhat chuan: “Ring lotute nêna inngaizâwng ṭhalai ṭhenkhat ka hria a. Mahse, a tâwpah chuan anni ruala ka kawm tam zawh poh leh anmahni ka ang tawlh tawlh tih ka hria a. Ka thlarau lam nun chuan a tawrh phah ṭan ta a ni. Inkhâwmnaa thlarau lam chaw chu tui ka ti tawh lo va, rawngbâwlin ka chhuak tawh mang meuh lo bawk. Chu chu ka ṭhian kawm thlâk a hun tawh tih min hriattîrtu a ni a, ka kâwm tawh lo ta rêng bawk a ni!” tiin a sawi. I ṭhiante’n i chunga thununna an neih theih dân chu i hria em? He Bible-a entîrna hi han ngaihtuah teh.—Rom 15:4.
AN THINLUNG A RUKSAK
5, 6. Engtin nge Absaloma chuan mite a bum a, a ruahmanna chu a hlawhtling em?
5 Bible-ah chuan mi dangte chunga thununna ṭha lo tak nei mite entîrna tam tak a chuang a. Chutiang entîrna pakhat chu Lal Davida fapa, Absaloma hi a ni. Ani chu tlangvâl hmêlṭha tak a ni a. Mahse, a hnuah chuan Setana ang maiin duhâm taka tumsânna chuan a thinlung a luahkhahtîr a, ama chan tûr ni lo a pa lalṭhutthlêng chu a awt ta a ni. * A rûka a pa lalna chhuhsak a tumna lamah, Absaloma chuan a chipui Israel mite hmakhua ngai êm êm angin a inlantîr a, chutih rual chuan lal ina mite hian anmahni an ngai pawimawh lo tih vervêk takin a sihhmuh ṭhîn a ni. A ni, Eden huana Diabola ang maiin, Absaloma chuan nunrâwng taka a pa a sawichhiat laiin mite ṭhatna tûr duhsaktu angin a inlantîr a ni.—2 Sam. 15:1-5.
6 Absaloma ruahmanna vervêk tak chu a hlawhtling em? Bible chuan: “Absaloma chuan Israel mite thinlung chu a hîpsak,” a tih avângin engemaw chen chu a hlawhtling ngei a ni. (2 Sam. 15:6) Mahse, a tâwpah chuan Absaloma chuan a chapona chu a tlûkchhiat phah ta a. Chu chuan, amah leh a hnungzuitu sâng tam takte thihna râpthlâk tak a thlen ta bawk a ni.—2 Sam. 18:7, 14-17.
7. Absaloma chanchin aṭangin eng nge kan zir theih? (Phêk 19-a milem chu en rawh.)
7 Engvângin nge chûng Israelte chu awlsam taka bum theih an nih? Absaloma thutiamte an duh pawh a nih mahna. A nih loh leh Absaloma hmêl ṭhatna chuan a hneh pawh a ni thei ang. Eng pawh lo ni ta se, hei hi kan chiang thei a ni: Pathian Jehova leh a lal thlana chungah an rinawm lo, tih hi. Tûn laiah, Setana chuan Jehova mite rilru rûk bosak nân Absaloma ang mi tam takte chu a la hmang zêl a. Anni chuan, ‘Jehova tehnate chu a khirh lulai êm mai. Jehova rawng bâwl lotute hi han en teh u. Nuam an tih êm hi!’ an ti mai thei. Chutiang dâwtthu bawlhhlawh takte chu i hmu tlang theiin, Pathian chungah i rinawm zêl ang em? Jehova “dân famkim” Krista dân chauhvin zalênna dik takah a hruai thei che tih i hre tlat ang em? (Jak. 1:25) Chutianga i awm theih nân, chu dân chu ngaina la, i Kristian zalênna hmang sual tûra thlêmna lakah tlâwm ngai suh ang che.—1 Petera 2:16 chhiar rawh.
8. Jehova tehnate palzût chuan hlimna a thlen lo tih eng ang thiltawnte’n nge târ lang?
8 A bîk takin, ṭhalaite chu Setana chuan a tum bîk ṭhîn a. Tûna kum 30 pêl tawh unaupa pakhat chuan a tleirâwl lai hun chungchângah: “Nungchang lama Jehova tehnate chu min vênghimtu ang ni lovin, min khuahkhirhtu angin ka thlîr zâwk a,” tiin a sawi. Chuvângin, mipat hmeichhiatna sualah a tlu ta rêng a. Mahse, chu chuan hlimna a pe lo. “Nasa taka inthiam lohna leh pawi tihna chu kum tam tak chhûng ka nei,” tiin a sawi a ni. Unaunu pakhat pawhin a tleirâwl lai hun ngaihtuah lêtin, heti hian a ziak a ni: “Nungchang bawlhhlawhnaa ka inhman hnu chuan engmah ni lo, ruak ngawt nia inhriatna ka nei a. Kum 19 lai a liam hnuah pawh, rilruah a lo lang leh ṭhîn,” tiin. Unaunu dang pakhat pawhin: “Ka nungchangin ka mi hmangaih takte thinlung a tikehchhia tih hriatna chuan rilru lam, thlarau lam, leh ngaihtuahna lamah ka chungah nghawng nasa tak a nei a. Jehova duhsakna tel lova nun chu thil râpthlâk tak a ni,” tiin a sawi bawk. Setana chuan chutiang sualna sawhkhâwkte i ngaihtuah chu a duh lo a ni.
9. (a) Eng ang zawhnate’n nge Pathian Jehova leh a dân leh thu bulte kan thlîr dân chhût tûra min ṭanpui thei? (b) Pathian hriat chian chu engvângin nge thil pawimawh tak a nih?
9 Thutaka awm ṭhalai tam tak—leh kum upa lamte—chuan thil sual tih hlimpuina chu a man a to thei hle tih a harsa zâwnga an zir ṭhîn hi chu a pawi ṭhîn hle! (Gal. 6:7, 8) Chuvângin heti hian inzâwt rawh: ‘Setana ngamthlêmnate chu a nihna dik tak, inbumna nunrâwng tak a ni tih ka hria em?’ ‘Pathian Jehova chu ka Ṭhian ṭha ber, engtik lai pawha thutak sawi a, ka ṭhatna tûr min duhsaktu ber angin ka thlîr em?’ ‘Ani chuan thil ṭha tak leh hlimna nasa ber min neihtîr thei thilte chu min pe lovin a awm ngai lo vang tih ka ring tak zet em?’ tiin. (Isaia 48:17, 18 chhiar rawh.) Hêng zawhnate thinlung taka chhâng thei tûr chuan, Jehova hriat satliah chu a tâwk lo. Amah kan hriat chian leh Bible dân leh thu bulte chu min khuahkhirhna ni lovin, min hmangaihzia târ lanna a ni tih i hriat a ngai a ni.—Sâm 25:14.
FINNA LEH THUAWIHNA THINLUNG DIL RAWH
10. Engvângin nge Lal Solomona la naupang tak mai chu entawn kan tum ang?
10 Solomona chu tlangvâl mai a la nih laiin, inngaitlâwm takin heti hian a ṭawngṭai a ni: “Kei zawng naupang chhia mai ka ni a; thu haw lam leh kal lam pawh hi ka la hre lo,” tiin. Tichuan, finna leh hriatna, a nih loh leh thuâwihna thinlung chu a dîl ta a ni. (1 Lal. 3:7-9, 12) Chu a dîlna chu Pathian Jehova’n a chhâng a; naupang emaw, upa tawh lam emaw pawh ni la, i dîlna pawh a chhâng ve ngei dâwn a ni. Pathian Jehova chuan mak tak maiin finna leh hriatthiamna chu a pe dâwn lo che a. Mahse, tih tak zeta a Thu i zir a, thlarau thianghlim i dîl a, Kristian kohhran kal tlanga pêk thlarau lama châwmnate i hman ṭangkai chuan a tifing dâwn che a ni. (Jak. 1:5) Dik takin, hêng thilte hmang hian Pathian Jehova chuan a chhiahhlawh naupangte takngial pawh a thurâwn ngai pawimawh lote aiin a tifing zâwk a, he khawvêla “mi fing leh mi bengvârte” ai pawhin a tifing zâwk a ni.—Lk. 10:21; Sâm 119:98-100 chhiar rawh.
11-13. (a) Sâm 26:4, Thufingte 13:20, leh 1 Korinth 15:33 aṭangin eng thil hlu takte nge kan zir theih? (b) Hêng Bible thu bulte hi engtin nge i nunpui dâwn?
11 Pathian Jehova hriat chian nâna Bible zir leh kan thil chhiarte ngun taka ngaihtuah a hlutna hriat theih nân, hêng Bible chângte hi han ngaihtuah teh. Bible châng tinah chuan kan ṭhian kawm nêna inkûngkaih thu bul pawimawh tak a tel a ni: “Mi engmah lo mai maite hnênah ka ṭhu ngai lo va; vervêkte hnênah pawh ka lût hek lo vang.” (Sâm 26:4) “Mi fing pâwl la, i lo fing ang a, mi â pawl erawh chu hrehawm tuar phahna a ni.” (Thuf. 13:20) “Ṭhian sualte chuan nungchang ṭha an tikhawlo ṭhîn.”—1 Kor. 15:33.
12 Hêng Bible chângte aṭangin eng thil hlu tak nge kan zir theih? (1) Jehova chuan ṭhian kawm chungchânga duhtui tûrin min duh a. Nungchang lam leh thlarau lama min vênhim chu a duh a ni. (2) Kan ṭhian kawmte chuan a ṭha lam emaw, a chhe lam emawin min thunun ṭhîn; Chu chu thil nih dân pângngai tak a ni. Hêng Bible chângte inziak dân aṭang hian Jehova’n kan thinlung hneh a tum a ni tih a lang a ni. Engtin nge? A khawi amah hi dân khauh tak angin, “ . . . tûr a ni lo,” tih ang ṭawngkamin a tâwp lo. Thil nih phung pângngai angin a inziak mai zâwk a ni. A nihna takah chuan, Jehova chuan: ‘Hei hi thil awm dân a ni. Engtin nge i chhân lêt dâwn? I thinlungah eng nge awm?’ min ti a ni.
13 A tâwpah chuan, hêng Bible châng pathumte hi thutak bulpui anga târ lan a nih avângin, hun tiam chin a nei lo va, a hmanna pawh a zau hle bawk. Entîr nân, hetiang zawhnate hi han inzâwt chhin teh: “Vervêkte,” a nih loh leh an nihna thuptute nêna inkawm chu engtin nge ka pumpelh theih? Eng ang dinhmunah nge chutiang mite ka tawh theih? (Thuf. 3:32; 6:12) Jehova’n kâwm tûra min duh “mi fing” chu tute nge ni? Pumpelh tûra min duh “mi â” chu tute nge ni? (Sâm 111:10; 112:1; Thuf. 1:7) Ṭhian sual kawm avângin eng ang “nungchang ṭha” nge ka tihchhiat theih? Ṭhian sual chu khawvêl mite zîngah chauh em ni ka tawh dâwn? (2 Pet. 2:1-3) Hêng zawhnate hi engtin nge i chhân dâwn?
14. Engtin nge Chhûngkuaa Pathian Biakna neih zân chu i tihchangtlun lehzual theih?
14 Bible thute kan ngaihtuah hnu chuan, nang leh i chhûngte nêna inkûngkaih thil chungchânga Pathian ngaihtuahna târ langtu Bible châng dangte chu engah nge kan enfiah loh vang? * Nu leh pate u, chutiang thute chu in Chhûngkuaa Pathian Biakna neih zânah sawiho vang che u. Chutianga insawiho hian, Pathian dân leh thu bulte aṭanga lang chhuak min hmangaihna thûkzia hre thiam lehzual tûra chhûngkaw zînga mi tinte ṭanpui chu i thiltum a ni tih hre reng ang che. (Sâm 119:72) Chutiang zirna chuan chhûngkaw zînga mite chu Pathian Jehova a hnaihtîr zual bâkah, anmahni pawh an inhnaihtîr lehzual ngei ang.
15. Finna leh thu âwihna thinlung i neih leh neih loh engtin nge i hriat theih?
15 Finna leh thu âwihna thinlung i neih leh neih loh engtin nge i hriat theih ang? Hriat theih dân kawng khat chu, i ngaihtuahna leh Davida ang chi hmân lai mi rinawmte ngaihtuahna khaikhin hi a ni, Davida chuan: “Aw ka Pathian, i duhzâwng tih hi ka lâwmzâwng tak a ni; a ni, i dân thu chu ka thinlungah a awm reng e,” tiin a ngaihtuahna a sawi. (Sâm 40:8) Chutiang bawkin, Sâm 119 ziaktu chuan: “I dân hi ka va ngaina êm! Nilênga ka ngaihtuah thin a ni,” a ti bawk. (Sâm 119:97) Chutiang hmangaihna chu lei pan takah a ṭhang chho thei lo. Chutih ahnêkin, ngun taka zirna, ṭawngṭaina, rilrua chhût ngunna, leh thiltawn—mahni nuna Pathian tehnate nunpuinain rah ṭha a chhuahzia hmuhna—aṭanga lo awm a ni zâwk a ni.—Sâm 34:8.
KRISTIAN ZALENNA SUAL CHHUAK RAWH!
16. Zalênna dik tak sual chhuak tûr chuan eng nge kan hriat reng ngai?
16 Mihring chanchin tluan chhuakah hian, zalênna hmingin indona râpthlâk tak tak a thleng a. Chuti a nih chuan i Kristian zalênna atân thlarau lam indona bei tûrin i inpeih lehzual tûr a va ni êm! I hmêlma chu Setana, khawvêl, leh a rilru put hmang hlauhawm tak mai chauh hi a ni lo tih hre rawh. I thinlung bum hmang tak pawh tiamin nangma ṭhat famkim lohna pawh i chai reng a ngai si a. (Jer. 17:9; Eph. 2:3) Chuti chung pawhin, Jehova ṭanpuinain chûng zawng zawng chu i hneh thei a ni. Chu bâkah, thil tê tham emaw, lian tham emaw pawh ni se, i hnehna chan apiang chuan rah ṭha pahnih tal a nei ang. A hmasa berin, Pathian Jehova thinlung i tilâwm ang a. (Thuf. 27:11) A pahnihnaah, Pathian “dân famkim, zalênna dân” hian a chhuah zalên theihna i tem hian chatuana nunna thlentu ‘kawngka zîma’ kal i tumna chu a nghet zual sauh vang. A hnuah chuan, Jehova mi rinawmte la neih tûr zalênna nasa lehzual chu i nei thei ang.—Jak. 1:25; Mt. 7:13, 14.
17. Engvângin nge kan ṭhat famkim lohna avânga kan lunghnual loh vang a, Jehova chuan eng ṭanpuina nge min pêk?
17 A châng chuan thil kan tisual ṭhîn a. (Thur. 7:20) Chutianga i tihsual châng chuan, a lutuka lunghnualin, tlâktlai lovah inchan mai suh ang che. I tlûk avânga tualchhûng kohhran upate ṭanpuina dîl ngai hial pawh ni se, tho la, hma lam pan zêl rawh. An “rinnaa ṭawngṭaina chuan damlo chu a chhandam ang a, Lalpa chuan ani chu a kai tho vang; tin, thil a lo tihsual tawh chuan ngaihdamsak a ni ang,” tiin Jakoba chuan a ziak a ni. (Jak. 5:15) Ni e, Pathian chu zahngai thei tak a ni tih leh i ṭhat famkim huna i awm dân tûr a hmuh theih avângin a kohhran chhûngah a hîp che tih hre reng rawh. (Sâm 103:8, 9 chhiar rawh.) Chuvângin, Jehova lama thinlung ṭha famkim i put phawt chuan, ani chuan a thlau thla ngai lo vang che.—1 Chro. 28:9.
18. Isua ṭawngṭaina Johana 17:15 thu nêna inmilin eng nge kan tih theih?
18 Isua chuan leia a zân hnuhnûng ber a hman laia a zirtîr rinawm 11-te nêna a ṭawngṭainaah he thu theihnghilh theih rual loh hi an tân a chham chhuak a ni: “Mi sual lakah chuan i hum tûr ka ti zâwk a ni,” tih hi. (Joh. 17:15) Isua chuan a tirhkohte chauh a ngaihtuah lo va, a hnungzuitu zawng zawngte chu a ngaihtuah a ni. Chuvângin, Pathian Jehova chuan he hun khirh tak chhûnga min humhimna hmangin Isua ṭawngṭaina chu a chhâng dâwn tih kan ring tlat thei a ni. “Rinawm taka awm ṭhînte tân [Jehova chu] phaw a ni . . . A mi thianghlimte kawng a vawn ṭhat theih nân.” (Thuf. 2:7, 8) Rinawmna kawng chu kawng awlsam tak zawng a ni hauh lo; mahse, chatuana nunna kawng leh zalênna dik kawng awmchhun a ni. (Rom 8:21) Tuman chu kawng ata chu hruai pêng che suh se! (w12-E 07/15)
[Footnote-te]
^ par. 5 Davida hnêna tiam a lalṭhutthlêng luahtu tûr “thlah” a lo pian tûr chungchânga Pathian thutiam chu Absaloma pian hnua pêk chauh a ni a. Chuvângin, Absaloma chuan Davida thlâktu atân Pathian Jehova mi thlan chu amah a ni lo tih a hre tûr a ni.—2 Sam. 3:3; 7:12.
^ par. 14 Entîrna ṭha tak chu Paula’n hmangaihna chungchâng a ziakna 1 Korinth 13:4-8 leh Jehova dânte zawmnain malsâwmna a thlenzia târ langtu Sâm 19:7-11-te a ni.
[Zirlai Atâna Zawhnate]
[Phêk 19-naa milem]
Engtin nge tûn laia Absaloma-te chu kan hriat theih ang a, an laka kan invên theih ang?
