Ṭawngṭaina Ngaithlatu An Awm Em?

“Pathian hi a awm ka ringhlel ṭhîn a. Mahse, a châng chuan ka ṭawngṭai ve ngawt tho va. Ngaithlatu an awm leh awm loh erawh ka chiang chuang lo; mahse, tuemaw tak chu a awm ka beisei tih ka pawm a ngai a ni. Ka hlim lovin, nunah thiltum ka nei lo bawk a. Mi chak lote chauhvin Pathian an ring nia ka ngaih avângin, Pathian chu ka ring ngam lo a ni.” —PATRICIA-I, * IRELAND.

PATRICIA-I anga ngaih châng hi i nei ve em? Pathian a awm ringhlel chung pawhin i ṭawngṭai tho vem? Chutiang i nih pawhin nangmah chauh i ni lo. A hnuaia thu hi han ngaihtuah teh.

▪ British mi 2,200-te ngaih dân lâkkhâwmnain a târ lan angin, an zînga mi za zêla 22-te chauhvin khawvêl siamtu leh ṭawngṭaina ngaithlatu Pathian a awm an ring a. Zaa 55 te chuan han ṭawngṭai zauh châng an nei a ni.

▪ Khawmualpui pali-a mi 10,000 hnêna ngaih dân lâkkhâwmna chuan, Pathian awm ring lotu anga insawite zîngah zaa 30 deuhthaw chu an ṭawngṭai tih a târ lang a ni.

Engvângin Nge An Rinhlelh?

England rama pa pakhat Allan-a chuan: “Sakhuana chu mite thunun nân leh sum zawn nâna din nia ka ngaih avângin, Pathian ka ring lo ka lo ti ṭhîn a. Chu bâkah, Pathian a awm a nih chuan heti khawp hian rorêl dik lohna a hluar lo vang tih ka ngaihtuah bawk. Mahse, a châng chuan ngawi renga ṭhuin, ‘engemaw’ chu ka be ṭhîn a. ‘Engtin nge heta ka lo awm?’ tiin ka inzâwt ṭhîn,” tih a sawi.

Chutiang mite chuan an ṭawngṭainate chhân a nih leh nih loh rinhlelh chhan an nei ṭheuh a ni. A tam zâwkah chuan an zawhnate chhânna an hmuh loh vâng a ni thei a, a hnuaiah hian chûng zawhnate chu târ lan a ni:

▪ Siamtu hi a awm em?

▪ Engvângin nge sakhua hian chhiatna a thlen fo?

▪ Engvângin nge Pathianin hrehawm tawrhna awm a phal? tihte hi.

Hêng zawhnate chhânna i hriat theih chuan, ṭawngṭaina chungchângah rin tlatna i nei lehzual ang em? (w12-E 07/01)

[Footnote]