Ṭawngṭaina Ngaithlatu Chu Hnaih Rawh

MI TAM tak chuan Pathian an rin nachhan chu an hrilhfiah thei lo va. Sakhua a ṭhat loh fo chhan leh Pathianin hrehawm tawrhna awm a phal chhan pawh an hrilhfiah thei hek lo. An tih theih awmchhun chu an hriatthiam loh Pathian hnêna ṭawngṭai hi a ni.

Mahse, chu mai aia Pathian hnaih lehzual chu thil theih a ni a. Pathian hmangaihna leh hlutna neihtîr thei che amah hriatthiamna hmangin rinna i siam thei a ni. Rinna dik chu finfiahna awm thilah a innghat a. (Hebrai 11:1) Pathian chungchânga thutak i zir chuan, amah chu ṭhian angin i hre theiin, i be thei a ni. Pathian a awm ringhlel chung pawha ṭawngṭai ṭhîn mi ṭhenkhatte thiltawn hi han ngaihtuah teh.

▪ Patricia-i chu thuziak hmasa bera târ lan kha a ni a. Heti hian a sawi a ni: “Ni khat chu ka ṭhiante sâwm vêl nêna kan awm khâwm laiin, anni chuan sakhaw chungchâng an sawi ṭan a. An hnênah chuan Pathian a awm ring lo ka pa leh kan in rawn tlawhtu Jehova Thuhretu pakhat titina ka ngaihthlâk peih lo avânga in aṭanga ka kal chhuah thu ka hrilh a. Ka ṭhiante zînga pakhat chuan ‘Jehova Thuhretute chuan thil engemaw tak sawi tûr an nei pawh a ni thei asin,’ a ti a.

“‘A hriat nân engvângin nge an inkhâwmnaa kan va tel ve loh vang? tiin mi dang leh chuan a lo sawi bawk a. Tichuan, kan va inkhâwm ta a. Kan thu ngaihthlâkah chuan rinhlelhna nei tho mah ila, an nêlawmna avâng hrim hrim chuan kan zînga ṭhenkhat chu kan inkhâwm zawm ta tho a ni.

“Mahse, Chawlhni vawi khat chu ka rilru put hmang thlâktu thu engemaw ka ngaithla fuh ta tlat mai. Thusawitu chuan mite’n hrehawm an tawrh chhan a hrilhfiah a. Mihringte hi atîrah chuan ṭha famkima siam an ni tih leh mi pakhat avânga sual leh thihnain mi zawng zawng a fan chhuah tâk dânte chu tûn hma chuan ka lo hre thiam ngai lo rêng rêng a. Thusawitu chuan mihring hmasa berin a hloh tâk nei lêt leh tûra Isua thih a ngaih chhan pawh a hrilhfiah bawk. * (Rom 5:12, 18, 19) Vawilehkhatah, thil engkim mai chuan ka tân awmzia a nei ta thut mai a. ‘Min ngaihsaktu Pathian chu a lo awm ngei a nih hi,’ tiin ka ngaihtuah ta a ni. Bible chu ka zir zawm ta zêl a, ka nuna a vawi khatna atân mi awm tak tak tuemaw hnênah ka ṭawngṭai thei tih ka hre ta a ni,” tiin.

▪ Allan-a pawh thuziak hmasa bera târ lan a ni a. Ani chuan heti hian a sawi: “Ni khat chu Jehova Thuhretute’n kan in an rawn tlawh a, ka nupui chuan he leia chatuana nun chungchâng an sawi chu a ngaihven avângin in  chhûngah a ko lût a. Kei erawh chu ka thin a rim hle a. In lêngte chu kalsanin kan nu chu chokâah ka ko phei a. ‘Bumin awm suh, hetiang hian thil i ring mai tûr a ni lo!’ tiin ka hrilh a ni.

“‘A nih chuan, kal la, an dik lo tih va finfiah ta che,’ tiin min chhâng a.

“Engmah ka finfiah thei lo ngei mai. Mahse, anni chu ngil an nei hle a, nunna lo inṭanna hi thilsiam aṭangin nge chanchhâwnna aṭangin tih chungchâng ziahna lehkhabu pakhat chu min hnutchhiah a ni. Chuta thil chhût dân chu a chian a, ṭanchhan a neih ṭhat êm avângin Pathian chungchâng hriat tam lehzual chu ka tum ta a. Thuhretute nên chuan Bible kan zir ṭan ta a, sakhaw chungchânga tûn hmaa ka lo ngaih dân nên chuan a inang lo hle tih ka hre chhuak ta thuai a ni. Jehova chanchin ka han hriat tâkah chuan a hnênah sawi bîk neiin ka ṭawngṭai ṭan ta a. Rilru put hmang ṭha vak lo engemaw ka neih avângin, chu mi chungchânga ṭanpuina dîlin ka ṭawngṭai a. Jehova chuan ka ṭawngṭainate chu a chhâng tih ka hria a ni,” tiin.

▪ Andrew-a chu England rama awm a ni a. Ani chuan: “Science lamah ngaih dân nghet tak neiin, tui hle mah ila, chanchhâwnna  ngaih dân chu mi dangte’n a dik an tih avâng chauhva ring mai ka ni a. Pathian ka lo hnâwl chhan pawh kha thil thleng ṭha lo tak takte vâng a ni.

“Mahse, a châng chuan: ‘Chung lamah khian Pathian a awm a nih ngai chuan, nun awmzia hi hriat thiam ka duh a ni. Engvângin nge tharum thawhna leh indona hi a tam êm êm?’ tiin ka ngaihtuah ṭhîn. Harsatna ka tawh pawhin, ṭanpuina dîla ṭawngṭai châng ka nei a; mahse, tu ber nge ka biak erawh ka hre lo.

“Tichuan, Jehova Thuhretute tihchhuah: He Khawvêl Hi A Him Ang Em? tih tract chu tuemawin ka nupui hnênah a pe a. Chu zawhna tak mai chu ka lo ngaihtuah fo ṭhin a ni. Chu tract chuan Bible chungchângah, ‘A chhânnate hian ngaihtuah chîk a phu êm?’ tih min ngaihtuahtîr a. A hnuah chuan, chawlh ka hman laiin, tuemawin The Bible—God’s Word or Man’s? * tih lehkhabu chu min pe a. Bible hi science dik tak nên a inmil tih ka hriat chhuah tâkah chuan Bible chungchâng zir tam lehzual a ngai niin ka hria a. Chuvângin, Jehova Thuhretute zînga pakhatin zir tûra min sâwm chuan ka pawm ta a ni. Jehova thiltum ka han hriat thiam chuan, ani chu ṭawngṭaia zalên taka biak theih, mi tak tak a ni tih ka hre ta a ni.”

▪ Jan-i chu London khawpuia Protestant chhûngkuaa seilian a ni a. Heti hian a sawi a ni: “Sakhuanaa vervêkna leh hrehawm tawrhna hluar êm êm chuan sakhuana min bânsantîr a. College ka chawlhsan bawk a, hla sa leh guitar perhin sum ka zawng ṭan a ni. Chutah Pat-a ka tawng ta a. Ani chu Catholic chhûngkuaa seilian, keimah ang bawka Pathian ring lotu lo ni ve a ni.

“Kan pahnih chuan Eastern sakhua ngaihventu, school bânsan ve tho mi dangte nên mi in rauhsanah kan khawsa a. Zân rei tak tak thlengin nun awmze chungchâng kan sawiho ṭhîn. Pat-a nên chuan Pathian ring lo mah ila, ‘nun lo chhuahna’ engemaw a awm chu kan ring tlat a.

“Musician anga hna zawnga England hmâr lama kan insawn hnu chuan, fapa kan nei ta a. Zan khat chu kan fapa a dam lo va, ka rin ngai miah loh Pathian hnênah chuan ka ṭawngṭai ta ngawt mai a. Chu mi hnu lawkah chuan Pat-a nêna kan inlaichînna chu a ṭha ta lo va, kan fapa chu hruaiin ka chhuahsan ta a. Chu mi ṭum pawh chuan, tuemawin a lo ngaithla mial mahna tiin ṭanpuina dîlin ka ṭawngṭai leh a. Pat-a pawhin chutiang bawkin a lo ti ve tih rêng ka hre lo.

“Chu mi nî chawhnu lam deuhvah chuan Jehova Thuhretute zînga mi pahnih chuan Pat-a kawngka chu an va kik a, Bible-a thurâwn ṭangkai ṭhenkhat chu an hmuhtîr a ni. Pat-a chuan min rawn phone a, Thuhretute hnêna a ruala Bible zir ve ka duh leh duh loh min zâwt a ni. A hnu lawkah chuan Pathian tihlâwm nân, dân anga kan inneih a ngai tih kan hre ta a. Kan inlaichînna derthâwnzia ngaihtuah chuan thil har tak tûr niin a lang.

“Bible hrilh lâwkna thlen famkim dân te, hrehawm tawrhna a awm chhan te, leh Pathian Ram awmziate chu hriat belh kan duh a. Zawi zawiin Pathianin min ngaihsak tih kan hre chhuak a, a sawi anga thil tih kan duh a ni. Tichuan, kan innei ta a. Pathian Thua finna chuan fa pathum enkawl seilian tûrin min ṭanpui a. Jehova’n kan ṭawngṭainate a ngaithla tih kan hre chiang hle a ni.

A Finfiahnate Bih Chiang Rawh

Mi maktaduai tam tak dangte ang bawkin, he thuziaka târ lan mite chu sakhaw dik lo bumin an awm lo va, anni chuan Pathianin hrehawm tawrhna awm a phal chhan an hre thiam a ni. Jehova chu ṭawngṭaina ngaithlatu a ni tih an vaia rin tlattîrtu chu Bible hriat thiamna dik a ni tih i lo hmu em?

Pathian a awmzia finfiahna chu i bih chiang duh em? Jehova Thuhretute chuan Jehova chungchânga thutak zir tûr leh “ṭawngṭaina ngaithlatu” i hnaih theih dân zir tûra ṭanpui che chu an châk hle ang.—Sâm 65:2. (w12-E 07/01)

[Footnote-te]

[Phêk 10-naa thu lâk chhuah]

“Jehova thiltum ka han hriat thiam chuan, ani chu ṭawngṭaia zalên taka biak theih, mi tak tak a ni tih ka hre ta a ni”

[Phêk 9-naa milem]

Rinna dik tak chu finfiahna awm thilah leh Pathian chungchâng thutak hriat duhnaah a innghat