Ṭawngṭaina Ngaithlatu Chu Tu Nge Ni?
Ṭawngṭaina Ngaithlatu Chu Tu Nge Ni?
ṬAWNGṬAINA ngaithlatu an awm a nih chuan, ani chu Siamtu a ni ngei ang. Mihringte thluak siam a, ngaihtuahnate hre theitu chu ani bâk tu dang nge awm chuang? Ani bâk tu dangin nge ṭawngṭainate chhâng a, mihringte hnêna an mamawh ṭanpuinate pe thei? Mahse, ‘Siamtu rin chu thil âwm a ni em?’ tiin i ngaihtuah mai thei a ni.
Mi tam tak chuan Siamtu ring tûr chuan, tûn laia science finfiahnate pawm loh a ngai niin an ring a. Mahse, Pathian rin chu science nên a inmil lo tih ngaihdân chu thil dik a ni lo. A hnuaia mi hi han ngaihtuah teh.
▪ United States-a university ṭha bîk thlan chhuah 21-a science professor 1,646-te chanchin tûn hnai maia zirna chuan an zînga hmun thuma ṭhena hmun khat chauhvin an thlîr dân târ lan nân “Pathian ka ring lo,” tih thuziak hi an thlang tih a târ lang.
A nihna takah chuan scientist tam takin Pathian a awm an ring a ni.
Siamtu A Awm Tih Finfiahna
Finfiahna awm lovin, ṭawngṭaina Ngaithlatu a awm tih kan pawm mai tûr a ni em? Ni lo ve. Rinna awmzia chu finfiahna awm lo chung pawha rin tawp mai hi a ni tih ngaihdân chu a dik lo. Bible chuan rinna chu “thil hmuh lohte hriatfiahna a ni,” tiin a hrilhfiah a. (Hebrai 11:1) Entîr nân, thli hi hmu thei lo mah ila, a han thâwt a thing hnahte a han tihchêt hian, a hnathawh chu kan hmu thei a. Chuvângin, thli a awm tih kan ring thei a ni. Chutiang bawkin, ṭawngṭaina Ngaithlatu chu hmu thei lo mah ila, a awm ngei tih kan rin theih nâna finfiahna awmte chu kan bih chiang thei a ni.
Pathian a awm tih finfiahna chu khawi aṭangin nge kan hmuh theih ang? Kan chhehvêl mai enna aṭang pawh hian kan hmu thei a. Bible chuan heti hian a chhût a ni: “Chhûng tin hian puipa tu emaw tal an nei ṭheuh si a; engkim puipa erawh chu Pathian a ni,” tiin. (Hebrai 3:4) Chu chhût dân chu i pawm em? Lei leh vân fel taka ruahman a nih dân te, nunna lo inṭan dân te, a nih loh leh he leia thil siam hriat thiam harsa ber mihring thluak siam a nih dânte i ngaihtuah hian, mihringte aia ropui zâwk engemaw chu a awm ngei ang tih i ring mai thei a ni. *
Mahse, thilsiamte’n Pathian chanchin min zirtîr theihna chuan chin tâwk a nei a. Thilsiam aṭanga Pathian a awm tih finfiahna en chu kawngka inkhâr phêna tuemaw rawn pên ri hriat ang a ni. Tuemaw chu a awm ngei tih i hria a; mahse, tu nge a nih? I hriat theih nân kawngka chu i hawn a ngai a ni. Chutiang bawkin, thilsiam phêna awm Tuemaw chu i hriat theih nân chutiang deuhva thil i tih chu a ngai a ni.
Bible chu Pathian chungchâng hriat theihna kawngka ang a ni a. Chu kawngka chu i hawn a, a chhûnga hrilh lâwkna chipchiar takte leh a thlen famkimna ṭhenkhat i ngaihtuah hunah, Pathian a awm tih finfiahna chu i hmu ang. * Mahse, chu zawng ai chuan Pathianin mite a dâwr dân chanchinte chuan ṭawngṭaina Ngaithlatu mizia chu a târ lang a ni.
Ṭawngṭaina Ngaithlatu Chu Eng Ang Nge A Nih?
Bible chuan ṭawngṭaina Ngaithlatu chu mi—i hriat theih ngei mi—a ni tih a târ lang a. Hriatthiamna nêna ngaithla theitu awmchhun chu thil ni lovin, mi chauh a ni thei a ni. “Aw ṭawngṭaina ngaithlatu, i hnênah tîsa zawng zawng chu an lo kal ang,” tih thu chhiar hi a thlamuanthlâk hle. (Sâm 65:2) Ṭawngṭaina ngaithlatu chuan rinna nêna a hnêna ṭawngtaitute chu a ngaithla ṭhîn a, hming pawh a nei bawk a ni. Bible chuan: “LALPA chu mi suaksual lakah chuan a hla a, mi fel ṭawngṭai erawh chu a ngaithla ṭhîn,” a ti.—Thufingte 15:29. *
Jehova chuan rilru veizâwng a nei a. ‘Hmangaihna Pathian’ a ni a, “fak tlâk Pathian,” a nih loh leh Pathian hlim tia koh a ni bawk. (2 Korinth 13:11; 1 Timothea 1:10, 11) Sualna a hluar êm êm laia a chhân lêt dân chungchângah Bible chuan: “Rilru nat nân a hman phah,” tih a sawi a. (Genesis 6:5, 6) Pathianin mite fiah nân hrehawm a tawrhtîr tih chu a dik lo a ni. Bible-in: “Pathian chuan thil suaksual . . . chu a ti teuh lo vang,” tih a sawi si a. (Joba 34:10) Amaherawhchu, ‘Pathian chu Siamtu engkimtithei a nih si chuan, engvângin nge hrehawm tawrhna hi a awm zawm zêl a phal?’ tiin i ngaihtuah mai thei a ni.
Jehova chuan mihringte chu zalên taka duh thlan theihna a pe a, chu chuan Pathian nihna engemaw min hrilh a ni. Kan nun dân tûr chungchânga zalên taka duh thlan theihna kan neih chu kan hlut a ni lâwm ni? Mahse lungchhiatthlâk takin, mi tam tak chuan an zalênna chu hmang sualin, mahni leh mi dangte tân hrehawm tawrhna an thlen a ni. He zawhna hi ngaihtuah phû tak a ni: Engtin nge Pathian chuan mihringte zalênna lâksak chuang si lova hrehawm tawrhna a tihbo theih ang? tih hi. Chu chu a dawta thuziakah kan bih chiang ang. (w12-E 07/01)
[Footnote-te]
^ par. 8 Pathian a awm tih finfiahna chiang zâwka hriat nân Jehova Thuhretute tihchhuah The Origin of Life—Five Questions Worth Asking tih brochure leh Is There a Creator Who Cares About You? tih lehkhabu chu en rawh.
^ par. 10 Bible hi Pathian thâwk khum a nihzia finfiah tûra ṭanpui tûr chein, Jehova Thuhretute chuan A Book for All People tih brochure leh The Bible—God’s Word or Man’s? tih lehkhabu an chhuah a ni.
^ par. 12 Thufingte 15:29 leh Bible châng danga “LALPA” tih thu mal hawrawp puia ziak chu Jehova kohna a ni. Mizo Bible tâwp lama awm, “Thu Har Hrilhfiahna” hnuaia “Jehova” tih chu en rawh.
[Phêk 5-naa bâwm]
Sakhuana Chuan Rinhlelhna A Neihtîr Che Em?
Ṭawngṭaina Ngaithlatu khawngaihna ngah tak a awm tih mi tam takte rinhlelhtîrtu chu sakhuana a ni hi a lungchhiatthlâk hle. Indona te, firfiaka chêtna te, leh naupang chhawr luihna pawmzamna thil tea sakhua a inrawlhna chuan ṭawngṭai reng ṭhînte takngial pawh “Pathian ka ring lo,” a tihtîr phah a ni.
Engvângin nge sakhuana chu thil ṭha lo thlentîrtu a nih ṭhin? Mâwl têa sawi chuan: Mi ṭha lote’n sakhaw hminga thil sual an tih ṭhin vâng a ni. Bible chuan Kristianna chu thil dang thununna hnuaia awmin, Pathian duhzâwng kalha hman a nih tûr thu a sawi lâwk a. Tirhkoh Paula chuan Kristian enkawltute chu: “In zînga mi ngei pawh hi, zirtîrhote in hnêna pakaitîr tûrin thu hran sawi in lo la awm ang,” tiin a hrilh a ni.—Tirhkohte 20:29, 30.
Pathian chuan sakhaw dik lo chu a ten a. A nihna takah chuan Pathian Thu, Bible chuan sakhaw dik lo chu “leia thah zawng zawngte thisen” chungah mawh a phurhtîr a ni. (Thu Puan 18:24) Sakhaw dik lote chuan mite hnênah hmangaihna Pathian dik chungchâng an zirtîr loh avângin, Pathian mithmuhah chuan thisen chhuah hmang an ni.—1 Johana 4:8.
Ṭawngṭaina ngaithlatu chuan sakhaw nêksâwra awmte chu a khawngaih a. Pathian chuan mihringte a hmangaih avângin nakin lawkah Isua Krista kal tlangin sakhaw vervêk zawng zawngte chungah ro a rawn rêl ang. Isua chuan: “Mi tam takin, ‘Lalpa, Lalpa, i hmingin thute kan [sawi] . . . ṭhîn lo vem ni, an la ti ang. Chu mi hunah chuan, ‘Nangni thil sual tite u, ka hre ngai lo va che u, ka hnên ata kal bo rawh u,’ tiin anni chu ka la hrilh ang,” tiin a sawi a ni.—Matthaia 7:22, 23.
