Diabola Thang Lakah Fimkhur Rawh!
Diabola Thang Lakah Fîmkhur Rawh!
‘Diabola thang ata chhuak rawh.’ —2 TIM. 2:26.
ENGTIN NGE KAN CHHAN ANG?
Ṭûl lo taka mi dangte sawisêl duhna i neih chuan eng inenfiahna nge i neih ngai?
Pilata leh Petera te entîrna aṭangin, mihring hlauhna leh nêksâwrna laka tlâwm lohna chungchâng eng nge i zir theih?
Engtin nge a lutuka mahni inthiam lohna chu i pumpelh theih ang?
1, 2. He thuziakah hian Diabola thang engte nge kan sawiho vang?
DIABOLA chuan Jehova chhiahhlawhte chu a veh reng a. A thiltum chu sa pêl miin a sa man a thah anga mi thah kher hi a ni lo. Chu ai mah chuan a sa ûm chu a nung chunga man a, a duh ang taka hman chu a tum ber a ni.—2 Timothea 2:24-26 chhiar rawh.
2 Mi chuan a nung chunga ramsa a man theih nân thang engemaw tak a hman a ngai a. Thang valh hmanga a lo man theih nân ramsa chu a bihrûkna hmun ata chhuahtîr a tum a ni thei a. A nih loh pawhin ramsa hriat loh tûrin thang a lo kam ru pawh a ni thei bawk. Diabola chuan Pathian chhiahhlawhte a nung chunga a man theih nân chutiang thangte chu a hmang a ni. Mana awm kan duh loh chuan, kan harhvângin, kan bul hnaia Setana thang engemaw ber a awmzia târ langtu vaukhânnate kan zawm a ngai a ni. He thuziakah hian Diabola’n hlawhtling taka a lo hman thang pathum laka kan invên theih dân kan en ang. Chûngte chu (1) ṭawngkam insûm lohna te, (2) mihring hlauhna leh nêksâwrna te, leh (3) a lutuka mahni inthiam lohnate hi a ni. A dawta thuziakah chuan Setana thang dang pahnihte kan ngaihtuah bawk ang.
ṬAWNGKAM INSUM LOHNA MEI CHU TIMIT RAWH
3, 4. Kan lei kan thunun lohna chuan eng nge a rah chhuah theih? Entîrna pe rawh.
3 Ramsate an bihrûkna aṭanga chhuahtîr tûrin, sa pêltute chuan ram ngaw hmun ṭhenkhat chu hâlin, ramsa tlân chhuah tumte chu an lo man ṭhîn a ni. Diabola chuan Kristian kohhran chu meia hâl a duh tia sawi theih a ni a. A hlawhtlin chuan, kohhran mi leh sate chu hmun him tak aṭangin a thununna hnuaiah a dah thei a ni. Engtin nge kan hriat loh hlâna amah chu kan lo thawhpui reng a, a thanga kan awh theih?
4 Zirtîr Jakoba chuan kan lei hi mei nên a tehkhin a. (Jakoba 3:6-8 chhiar rawh.) Kan lei kan thunun loh chuan, kohhran chhûngah entîr nei ram kâng kan thlentîr thei a ni. Chu chu engtin nge a thlen theih? He thil thleng thei hi han ngaihtuah teh: Kohhran inkhâwmnaah chuan unaunu tuemaw chu regular pioneer-a ruat a nih thu puan a ni a. Inkhâwm bânah chuan thuchhuahtu pahnih chuan chu thu puan chu an sawi dûn a. Pakhat chuan pioneer thar chu a lâwmpui thu leh hlawhtling ngei se a duh thu a sawi a. Pakhat zâwk chuan pioneer a thawh chhan chu ringhlelin, kohhran chhûnga lansarh a duh vâng niin a sawi a. Chûng thuchhuahtu pahnihte zîngah chuan tu zâwk nge ṭhiana neih i duh? A ṭawngkam hmanga kohhrana kâng mei chhuahtîrtu tûr zâwk chu hriat a har lo a ni.
5. Ṭawngkam insûm lohna mei kan tihmih theih nân, eng inenfiahna nge kan neih ngai?
5 Ṭawngkam insûm lohna mei chu engtin nge kan tihmih theih ang. Isua chuan: “Thinlunga khat liam chu kain a sawi ṭhin,” a ti a. (Mt. 12:34) Chuvângin, rahbi hmasa ber chu mahni thinlung inenfiah hi a ni. Mi tichhe thei tak ṭawngkam min sawi chhuahtîrtu rilru put hmang ṭha lo chu kan hnâwl em? Entîr nân, unaupa pakhat chuan rawngbâwlna chanvo ṭhenkhat a chang tih kan hriat hunah, a rilru put hmang a thianghlim tih kan ring nghâl nge ni a, mahni hmakhaw ngaih vâng niin kan ngai zâwk? Rinhlelh duhna rilru kan neih chuan Diabola pawhin Pathian chhiahhlawh rinawm Joba chêttîrtu chu a ringhlel tih kan hriatreng a ṭha a ni. (Job. 1:9-11) Kan unaute rinhlelh aiin, an chunga rilru put hmang ṭha lo kan neih chhan chu kan ngaihtuah zâwk tûr a ni. Chutianga rilru ṭha lo put chhan tûr ṭha kan nei em? Nge ni a, hêng ni hnuhnûng chhûnga hluar tak hmangaihna neih lohna rilru put hmang hian min thunun zâwk?—2 Tim. 3:1-4.
6, 7. (a) Mi dangte kan sawisêl mai theih chhan ṭhenkhat chu eng nge ni? (b) Hauva kan awmin engtin nge kan chhân lêt ang?
6 Mi dangte kan sawisêl mai theih chhan ṭhenkhat dang i lo ngaihtuah leh ang u. A chhan pakhat awm thei chu kan thil hlen chhuahte tihlansarh zâwk duhna kan neih vâng a ni thei. A nihna takah chuan mi dangte chu nem hniamin, lan sân zâwk kan tum mai thei a ni. A nih loh leh, kan tlin lohnate chu chhuan lama hmangin, kan tih tûr thilte tih loh phah nân kan hmang thei bawk. Chapona emaw, îtsîkna emaw, a nih loh leh him lo nia inhriatnain min thunun a nih chuan a rah chhuah chu a chhe hle a ni.
7 Tuemaw chu sawisêl tûrin chhan ṭha tak nei niin kan inngai thei a. A ṭawngkam insûm lohna kan lo tawrh tawh vâng pawh a ni thei a ni. Chutiang a nih pawhin, thungrulh ve chu thil dik a ni lo. Chu chuan kângmei chhuak chu a tizual ting mai a, Pathian ni lovin, Diabola duhzâwng anga thil tihna a ni. (2 Tim. 2:26) He mi chungchângah hian Isua kan entawn tûr a ni. Ani chuan mi hauhva a awm lai khân, “a hau ve thung lo va.” Chuti ahnêkin, “fel taka ngaihtuah ṭhîntua hnênah chuan a inpe zâwk a.” (1 Pet. 2:2123) Isua chuan Jehova’n thil nih dân chu ama kawngin, a hun takah a siam ṭha dâwn tih a ring tlat a ni. Chutianga Pathian rinna chu kan nei ve tûr a ni. Mite tihdam nâna kan ṭawngkam kan hman hian kan kohhran “inpumkhatna” vawng tûrin kan ṭanpui a ni.—Ephesi 4:1-3 chhiar rawh.
MIHRING HLAUHNA LEH NEKSAWRNA THANG CHU PUMPELH RAWH
8, 9. Engvângin nge Pilata chuan Isua chu thi tûra thiam loh a chantîr?
8 Thanga âwk ramsate chu an duh ang angin an che sawn thei lo va. Chutiang bawkin, mihring hlauhna leh a kaihhnawih nêksâwrna laka tlâwm chuan a nun chu a thunun pumhlûm thei lo a ni. (Thufingte 29:25 chhiar rawh.) Nêksawrna leh mihring hlauhna laka tlâwm mi pahnih inang lo takte entîrna chu ngaihtuahin, an thiltawn aṭanga kan zir theihte i lo en ang u.
9 Rom Ram Awptu Pontia Pilata chuan Isua’n pawi a khawih lo tih a hria a, tihnat pawh a duh lo niin a lang. A nihna takah chuan, Pilata chuan Isua’n “thihna khawp meuhvin engmah a ti lo,” tih a sawi a. Mahse, thi tûrin thiam loh a chantîr ta tho a ni. Engvângin nge? Pilata chu mipui nêksâwrna laka a tlâwm vâng a ni. (Lk. 23:15, 21-25) An duh anga thil ti tûra Pilata nêksâwr nân, “He mi hi i thlah chuanin Kaisara ṭhian i ni lo vang,” tiin an au va. (Joh. 19:12) Pilata chuan Krista a ṭan chuan a nihna—a nih loh leh a nunna hial pawh—a chân a hlau a ni thei ang. Chuvangin, Diabola duhzâwng a ti ta a ni.
10. Eng thilin nge Petera chu Krista phattîr?
10 Tirhkoh Petera chu Isua ṭhian hnai takte zînga pakhat a ni a. Isua chu Messia a nihzia vântlâng hmaah a puang chhuak a ni. (Mt. 16:16) Zirtîr dangte’n Isua thusawi awmzia an hriat thiam lohva an kalsan pawh khân Petera chu a rinawm reng a. (Joh. 6:66-69) Hmêlmate’n Isua an man dâwn pawh khân, a Pu vênhim nân khandaih a hmang a ni. (Joh. 18:10, 11) Mahse, a hnuah chuan Petera chu mihring hlauhna avânga tlâwmin, Isua Krista a hriat thu pawh a pha hial a. Rei lotê chhûng chu mihring hlauhna thangah a âwk a, huaisen takin thil a tih loh phah a ni.—Mt. 26:74, 75.
11. A ṭha lo zâwnga thununna engte nge kan hmachhawn ṭûl mai thei?
11 Kristian kan nih angin, Pathian tilâwm lo thilte ti tûra nêksâwrna chu kan do a ngai a. Hnathawka ruaitute emaw, mi dangte emaw chuan rinawm lo tûrin min nawrlui mai thei a, a nih loh leh mipat hmeichhiatna hmang tûrin min thlêm thei bawk. Zirlaite chu an ṭhiante’n exam-naa entawn tûr te, saruak lem leh thuziakte en tûr te, zial zu tûr te, damdawi hmang sual tûr te, zu hmang khawlo tûr te, a nih loh leh nungchang ṭhat lohnaa inhmang tûrtein an nêksâwr mai thei a ni. Jehova duh lohzâwng ti tûra nêksâwrna leh mihring hlauhna thang pumpelh tûrin engin nge min ṭanpui thei ang?
12. Pilata leh Petera entîrna aṭangin eng nge kan zir theih?
12 Pilata leh Petera entîrna aṭanga kan zir theih chu i lo en ang u. Pilata chuan Krista chanchin tlêm tê chauh a hria a. Chuti chung chuan, Isua chu pawisawi lo a ni tih leh mi mai mai a ni lo tih a hria a ni. Mahse, Pilata chuan inngaihtlâwmna leh Pathian dik hmangaihna a nei lo va. Diabola chuan awlsam takin a nung chungin a man a ni. Petera erawh chuan hriatna dik leh Pathian hmangaihna a nei a. Mahse, thuhnuairawlhna tlâkchham a, mihring hlauh va, nêksâwrnaa tlâwm châng a nei a ni. Isua an man hma khân, Petera chuan: “An zain lungni lovin awm mah sela, kei zawng ka awm lo vang,” tiin inchhuang takin a sawi a. (Mk. 14:29) Pathiana a rinna nghat a, “LALPA chu ka lama ṭang a ni; ka hlau lo vang: mihringin eng nge mi tih theih ang?” tia zai, fakna hla phuahtu ang ni se chuan tirhkoh chu nakina a tawh tûr fiahna atân a inpuahchah ṭha zâwk tûr. (Sâm 118:6) A lei lam nun tâwp dâwn zân khân, Isua chuan Petera leh tirhkoh dang pahnihte chu Gethsemane huanah a hruai a. Harhvâng taka awm ahnêkin, Petera leh a ṭhiante chu an muhîl ta zâwk a. Isua chuan anni chu kaithovin, “Thlêmnaa in luh loh nân inring rengin ṭawngṭai rawh u,” tiin a hrilh a ni. (Mk. 14:38) Mahse, Petera chu a muhîl leh a, a hnuah chuan mihring hlauhna leh nêksâwrna lakah a tlâwm ta a ni.
13. Engtin nge thil ṭha lo engemaw ti tûra nêksâwrna chu kan do theih ang?
13 Pilata leh Petera te entîrna chuan thil pawimawh tak dang pawh min zirtîr thei a: Nêksâwrna hlawhtling taka do thei tûr chuan hriatna dik te, inngaihtlâwmna te, thuhnuairawlhna te, Pathian hmangaihna te, leh mihring ni lova Jehova hmangaihna te kan neih a ngai tih hi. Kan rinna chu hriatna dika a innghah chuan, kan thurinte chungchâng chu rinnghehna nên huaisen takin kan sawi chhuak ang a. Chu chuan nêksâwrna do tûr leh mihring hlauhna hneh thei tûrin min ṭanpui ang. Kan nihna dik tak aia chak zâwkah kan indah ngai tûr a ni lo va, nêksâwrna do thei tûrin Pathian chakna kan mamawh tih inngaitlâwm takin kan pawm zâwk tûr a ni. Jehova thlarau dîla kan ṭawngṭai a ngai a, amah kan hmangaihna chu a hming chawimawi a, a tehnate zâwm tûra min chêttîrtu a ni tûr a ni. Chu bâkah, fiahna kan tawh hmain, nêksâwrna atân kan lo inpuahchah lâwk tûr a ni. Entîr nân, kan fate kan ṭawngṭaipui a, kan lo buatsaih lâwk chuan, chu chuan an ṭhiante’n thil ṭha lo engemaw tihtîr an tum hunah thiam taka chhâng tûrin a ṭanpui thei a ni.—2 Kor. 13:7. *
MI TICHHE THEI TAK THANG CHU PUMPELH RAWH—A LUTUKA MAHNI INTHIAM LOHNA CHU
14. Tûn hmaa kan thil sual tih chungchângah Diabola chuan engtianga inhre tûrin nge min duh?
14 A châng chuan ramsate kal ṭhinna kawngah thingluang emaw, lung rit tak emaw chu khaiin thang an lo kam thei a. Ramsain thang hrui a han pal fuh chuan thingluang emaw, lung emaw chuan ramsa chu a delh ta ṭhîn a ni. A lutuka inthiam lohna chu chutiang phurrit mi tichhe thei tak nên chuan tehkhin theih a ni a. Tûn hmaa kan thil sual tihte kan ngaihtuah hian, “sil ûrh,” a nih loh leh hrehawm ti takin kan awm mai thei. (Sâm 38:3-5, 8 chhiar rawh.) Setana chuan Jehova zahngaihna dawng tlâk lo leh A thil phûtte tlin thei lo nia inhre tûrin min duh a ni.
15, 16. Engtin nge a lutuka mahni inthiam lohna thang chu kan pumpelh theih ang?
15 Engtin nge he thang mi tichhe thei tak hi i pumpelh theih ang? Thil sual khûnkhân tak tihnaah i inhnamhnawih a nih chuan, Jehova nêna inṭhianna nei lêt leh tûrin hma la nghâl ang che. Upate pan la, an ṭanpuina dîl rawh. (Jak. 5:14-16) Thil dik lo siam ṭha tûrin i theih ang angin hma la bawk ang che. (2 Kor. 7:11) Zilhna i dawng a nih chuan, lunghnual mai suh, chu chu Jehova’n a hmangaih che tih târ lanna a ni si a. (Heb. 12:6) Chu thil suala hruai lûttu che thil rêng rêng chu tihnawn tawh loh tum tlat la, i tum ang chuan awm tlat ang che. I sim a, i inlamlêt hnu chuan, Isua Krista tlanna inthawina chuan i sualna a khuh bo thei tak zet tih ring tlat ang che.—1 Joh. 4:9, 14.
16 Ṭhenkhat chu ngaihdam an nih tawhna an thil sual tih chungah pawh an la inthiam lo reng a. Chutiang i nih chuan, mamawh hun lai taka a Fapa duh tak Isua kalsantu Petera leh tirhkoh dangte chu Jehova’n a ngaidam tih hre reng rawh. Ani chuan nungchang bawlhhlawhna mualpho thlâk taka a inhman avânga Korinth kohhran aṭanga hnawhchhuah, a hnua inlamlêt leh ta pawh a ngaidam a. (1 Kor. 5:1-5; 2 Kor. 2:6-8) Pathian Thu chuan thil sual nasa tak titu; mahse, an inlamlêt leh avânga Pathianin a ngaihdam tâkte chungchâng a sawi a ni.—2 Chro. 33:2, 10-13; 1 Kor. 6:9-11.
17. Tlanna chuan kan tân eng nge a tih theih?
17 Jehova chuan i inlamlêt tak zet a, a zahngaihna i pawm chuan tûn hmaa i sualnate chu a ngaidamin, a theihnghilh bawk ang. Isua tlanna inthawinain i sualte a khuh bo thei lo tûrah ngai suh ang che. Chutianga ngaihna chu Setana thanga awhna a ni. Diabola chuan chutianga ring tûra a duh che chung pawhin, tlanna chuan suala tlûk luh hnua, inlamlêt leh zawng zawngte sualna chu a khuh bo thei a ni. (Thuf. 24:16) Tlanna rinna chuan a lutuka mahni inthiam lohna phurrit chu a hlihthlâksak thei chein, Pathian rawng chu thinlung, thlarau, leh rilru zawng zawnga bâwl tûrin a tichak thei che a ni.—Mt. 22:37.
SETANA NGAMTHLEMNATE CHU KAN HAI LO
18. Engtin nge Diabola thangte chu kan pumpelh theih ang?
18 Setana chuan a awha kan awm phawt chuan awh kan nih dânah a buai lo va. A ngamthlêmnate chu kan hai loh avângin, Diabola min dinchan khalhna chu kan pumpelh thei a ni. (2 Kor. 2:10, 11) Kan harsatnate hmachhawn tûra finna dîla kan ṭawngṭai chuan a thangah kan awk lo vang. Jakoba chuan: “In zîngah tupawhin finna a tlâkchham chuan mi zawng zawng hnêna hau lo leh ui lova pe ṭhîntu Pathian chu dîl rawh se, chutichuan a hnênah pêk a ni ang,” tiin a ziak a. (Jak. 1:5) Mahnia Pathian Lehkha Thu zir ziahna leh nunpuina hmangin kan ṭawngṭaina mila thil kan tih a ngai a ni. Bible zirna ṭanpuitu atâna bâwih rinawm leh fing tak pâwl buatsaih thu leh hla chhuahte chuan Diabola thang kamte hriat thiamna min pe a, pumpelh tûrin min ṭanpui bawk a ni.
19, 20. Engvângin nge thil sual kan huat ang?
19 Ṭawngṭaina leh Bible zirna chuan thil ṭha ngaina tûrin min ṭanpui a. Mahse, sual huatna kan neih pawh chutiang bawka pawimawh chu a ni. (Sâm 97:10) Mahni châkna lam ûmnain a rah chhuah tûr ngaihtuahna chuan chûng thilte pumpelh tûrin min ṭanpui thei a. (Jak. 1:14, 15) Sual huat a, thil ṭha hmangaih tak zet kan zir hian, Setana tâwktarh hmante chu kan tân ngeiawmah a changin, chûng thilte chuan min hîp lo vang.
20 Setana dinchan khalha kan awm loh nâna Pathianin min ṭanpui avângin kan va lâwm tak êm! A thlarau, a Thu, leh a inawpna pâwl hmangin, Jehova chuan “mi sual lakah” min chhan chhuak a ni. (Mt. 6:13) A dawta thuziakah chuan Diabola’n Pathian chhiahhlawhte a nung chunga man nâna hlawhtling taka a hman thang pahnihte pumpelh dân kan zir ang. (w12-E 08/15)
[Footnote]
^ par. 13 Nu leh pate chuan an fate chu Questions Young People Ask—Answers That Work, Volume 2, phêk 132-133-a awm, “Peer-Pressure Planner” tih chu an sawipui thei a. Chu bâkah, w10 11/1 phêk 17-18, par. 11-15-a thu awmte chu sawipui theih a ni bawk. Nu leh pate chuan an Chhûngkuaa Pathian Biakna neih zânah hêng thute hi an hmang thei a ni.
[Zirlai Atâna Zawhnate]
[Phêk 24-naa milem]
Ṭawngkam insûm lohna chuan kohhranah kângmei anga sawi theih buaina a chhuahtîr thei
[Phêk 27-naa milem]
A lutuka mahni inthiam lohna phurrit chu i hlîp thla thei
