Engvângin Nge Ṭawngṭaina Ngaithlatu Chuan Hrehawm Tawrhna Awm A Phal?

MI ṬHENKHAT chu ṭawngṭai ṭhîn mah se, Pathian awm ringhlel chunga ṭawngṭai an ni. Engvângin nge an rinhlelh? He khawvêla hrehawm tawrhna nasa tak an hmuh vâng a ni thei a ni. Pathianin hrehawm tawrhna awm a phal chhan hi i ngaihtuah ngai em?

Pathian chuan mihringte hi tûna an awm dân anga ṭha famkim lo leh hrehawm tuar tûr hian a siam rêng em? Mihringte hrehawm tawrhtîr duhtu pathian chu zah a har hle ang. Mahse, hei hi han ngaihtuah teh: Car thar pakhat chu nalh ti takin i han en kual vêl a, a sîr leh lam chu a lo hmêlhem reng mai tih i han hmuh chuan a siam chhuaktu’n chutianga a siam chu niin i ngai ang em? Ngai hauh lo vang! A siam chhuaktu chuan “ṭha famkim” takin a siam a, tuemawin, a nih loh leh engemawin a tichhia a ni, i ti ngei ang.

Chutiang bawkin, khawvêl duan a nih dân leh a chhûnga thilte siam a nih dân ropui takte ngaisâng taka kan han thlîr a, chutah mihring fate chunga chhiatna thlentu buaina leh bawlhhlawhnate kan han hmuh leh hian eng thu tâwp eng kan siam ang? Bible chuan Pathianin mihring tuak hmasa berte ṭha famkima a siam thu leh a hnua mahni chunga chhiatna an inthlen tâk thu min hrilh a. (Deuteronomy 32:4, 5) Pathianin chhiatna chu siam ṭha lehin, thuâwih mihringte chu ṭhat famkimnaah a hlângkai leh dâwn tih a tiam hi chanchin ṭha a ni. Mahse, engvângin nge hun rei tak a nghah?

Engvângin Nge A Rei Em Em?

A chhânna chu mihringte chunga rorêltu tûr chungchâng nên a inkûngkaih a. Jehova chuan mihringte chu mahnia ro inrêl tûrin a ti ngai lo va. Amah chu an chunga Rorêltu tûr a ni. Bible ngei chuan: “Tungchhova kal mihringah hian, a pheikhai hruai tûr a awm lo,” a ti si a. (Jeremia 10:23) Mahse, lungchhiatthlâk takin, mihring hmasa berte chuan Pathian rorêlna laka hel chu an thlang a. Dân an bawhchhiatna chuan anni chu thil sual tituah a chantîr a ni. (1 Johana 3:4)  Chu mi avâng chuan an ṭhat famkimna chu an hlohvin, anmahni leh an thlahte chungah chhiatna an thlen ta a ni.

Kum sâng têl chu Jehova chuan mihringte mahnia ro an inrêl a phalsak a, mihring chanchin chuan mihringte’n mahnia ro inrêl tûra theihna an neih lohzia a târ lang a. Mihring sawrkâr zawng zawng chuan hrehawm tawrhna a thlenzia a târ lang chiang hle a ni. Mihring sawrkâr pakhat mah hian, indona te, tharum thawhna te, rorêl dik lohna te, a nih loh leh natnate chu an la tibo ngai lo a ni.

Engtin Nge Pathianin Chhiatna Chu A Siam Ṭhat Ang?

Bible chuan Pathianin felna khawvêl thar a rawn thlen thuai dâwn tih min tiam a. (2 Petera 3:13) Chutah chuan mi dangte leh Pathian hmangaihna târ lang tûr zâwnga zalên taka duh thlan theihna an neih hmangtute chauh an nung ang.—Deuteronomy 30:15, 16, 19, 20.

Bible chuan lo thleng thuai tûr ‘rorêlna nîah’ chuan Pathianin hrehawm tawrhna leh a thlentute chu a tiboral dâwn tih a sawi a. (2 Petera 3:7) Chu mi hnuah chuan Pathian ruat Rorêltu, Isua Krista chuan thuâwih mihringte chungah ro a rêl ang. (Daniela 7:13, 14) Isua rorêlna chuan engte nge a hlen chhuah ang? Bible chuan: “Thuhnuairawlhte erawh chuan ram hi an luah ang a: remna chênin an hmuingîl ang,” tiin a sawi a ni.—Sâm 37:11.

Vân lam Lal a nih angin, Isua chuan “nunna tuikhur,” a nih loh leh nunna lo chhuahna Jehova laka mihringte an hel avânga lo awm—natna, tarna, leh thihna pawh tiamin—chhiatna chu a siam ṭha ang a. (Sâm 36:9) A rorêlna duhawm tak pawmtu zawng zawngte chu a tidam ang. A rorêlna hnuaiah chuan, hêng a hnuaia târ lan Bible hrilh lâwknate hi a rawn thleng famkim vek dâwn a ni:

▪ “Chu mi khuaa awm chuan ‘Ka dam lo ve,’ a ti lo vang a, a chhûnga mi awmte chu sual ngaihdamin an awm ang.”—Isaia 33:24.

▪ “[Pathianin] an mit ata mittui zawng zawng  a hrufai ang a; thihna a awm leh thei tawh lo vang a, lungngaih te, ṭah te, nat te pawh a awm leh tawh hek lo vang; thil hmasate chu a ral ta.”—Thu Puan 21:4.

Pathianin hrehawm tawrhna zawng zawng titâwp tûra a thutiam a rawn hlen thuai dâwn tih hriat chu a thlamuanthlâk hle a ni lâwm ni? Chutih chhûng chuan, hrehawm tawrhnate awm rih a phal avâng maiin, kan ṭawngṭainate a ngaithla lo niin kan ngai tûr a ni lo.

Pathian chu a awm ngei a. I ṭawngṭaina a hre theiin, i rilru natna leh lungngaihna i sawi chhuah pawh a hre thei a ni. Tin, ani chuan i rinhlelhna leh rilru natna zawng zawng a bo huna hlim taka nun i chên hun tûr hmuh chu a nghâkhlel hle a ni. (w12-E 07/01)