Lalram Khua Leh Tui Angin Nung Rawh!
Lalram Khua Leh Tui Angin Nung Rawh!
“In awm dân chu . . . chanchin ṭha nên inmawi phawt rawh se.”—PHIL. 1:27, 28.
ENGTIN NGE KAN CHHAN ANG?
Tute’n nge Lalram khua leh tui nih theihna nei?
Lalram ṭawng te, chanchin te, leh a dânte chungchângah eng nge kan tih ngai?
Engtin nge Lalram khua leh tuite chuan Pathian tehnate an ngaina tih an târ lan?
1, 2. Engvângin nge Philippi kohhran hnêna Paula fuihna chuan awmzia a neih bîk?
TIRHKOH Paula chuan Philippi khuaa kohhran mite chu ‘chanchin ṭha nêna inmawia nung’ tûrin a fuih a. (Philippi 1:27, 28 chhiar rawh.) Heta Paula hman Grik thu mal “awm” tih hi “khua leh tui anga nung” tih pawhin a lehlin theih a. He thu hian Philippi khuaa kohhran tân awmzia a nei bîk a ni. Engvângin nge? Rom Lalram chuan Philippi khuaa mite chu a khua leh tui nih a phalsak a, Rom dâna vênhimna a pêk bawk vâng a nih hmêl hle. Philippi khuaa mite chuan Rom khua leh tui nihna chu an chhuang hle a; chu chuan chutih laia mi tlêm tê chauhvin an neih theih hlâwknate a pêk vâng a ni.
2 Philippi kohhran mite chuan inchhuan chhan tûr dang ṭha lehzual pawh an la nei a. Paula chuan hriak thih Kristiante an nih angin “vân khua leh tui” an nihzia a hriattîr a ni. (Phil. 3:20) Anni chu mihring lalram mai ni lovin, Pathian Lalram khua leh tui an ni a. Chutiang an nih avângin, vênhimna leh hlâwkna tlukpui nei lo chu an dawng a ni.—Eph. 2:19-22.
3. (a) Tute’n nge Lalram khua leh tui nih theihna chanvo nei? (b) He thuziakah hian eng nge kan ngaihtuah ang?
3 ‘Khua leh tui anga nung’ tûra Paula fuihna chu vâna Krista nêna rorêl tûrte tân a ni deuh ber a. (Phil. 3:20) Mahse, Pathian Ram hnuaia lei lam khua leh tui ni tûrte tân pawh a ni tel thei a ni. Engvângin nge? Kristian inpumpêk tawh zawng zawngte chuan Lal thuhmun, Jehova rawng an bâwl a, tehna inang mila an nun vek a ngaih vâng a ni. (Eph. 4:4-6) Tûn laiah chuan, ram hausa khua leh tui ni thei tûr chuan thawhrim a ngai a. Lalram khua leh tui nih theihna hun remchâng chu kan hlut lehzual tûr a va ni êm! Tûnah chuan chu chanvo chu kan hlut lehzual theih nân mihring sawrkâr khua leh tui ni tûr leh Pathian Ram khua leh tui ni tûra thil phûtte inanna ṭhenkhat kan ngaihtuah ang a. Tin, Lalram khua leh tui nih theihna chanvo hlu tak nei reng tûra kan tih ngai thil pathumte pawh kan bih chiang bawk ang.
KHUA LEH TUI NIH THEIH NANA THIL PHUTTE
4. Ṭawng thianghlim chu eng nge ni a, engtin nge chu ṭawng chu kan ‘hman’?
4 A ṭawng zir a ngai. Mihring sawrkâr ṭhenkhat chuan an ram khua leh tui nih dîltute chu an ram ṭawng hman ber zir tûrin an phût a. Khua leh tui nihna pêk an nih hnuah pawh mite chuan ṭawng thar chu thiam lehzual tûrin a kum têl an beih a ngai thei a ni. Grammar kalhmangte chu an zir thiam nghâl mai pawh a ni thei a; mahse, thu malte dik taka lam ri tûr chuan hun an mamawh rei deuh thei a ni. Chutiang bawkin, Pathian Ram chuan a khua leh tuite chu Bible-in “hmui thianghlim,” a nih loh leh ṭawng thianghlim tia a koh chu zir tûrin a phût a ni. (Zephania 3:9 chhiar rawh.) Chu ṭawng chu eng nge ni? Bible-a chuang Pathian leh a thiltumte chungchânga thutak hi a ni a. Pathian dânte leh a thu bulte kan zawm hian ṭawng thianghlim kan “hmang”tihna a ni. Pathian Ram khua leh tuite chuan Bible zirtîrna thu bulte chu an zir thiam rangin, baptisma pawh an chang nghâl mai thei a. Mahse, baptisma an chan hnuah pawh ṭawng thianghlim “hmang” thiam lehzual tûra an beih a ngai a ni. Eng kawngin nge? Kan vai hian Bible thu bul kan zirte mila nung tûra kan thawh zawm zêl a ngai a ni.
5. Engvângin nge Jehova inawpna pâwl chanchin chu kan theih ang tâwka tam kan zir ang?
5 A chanchin zir a ngai. Mihring sawrkâr khua leh tui nih duh tân chuan a sawrkâr chanchin engemaw zir a ngai mai thei a. Chutiang bawkin, Lalram khua leh tui nih duhte chuan Pathian Ram chanchin an theih ang tâwka tam an zir a ngai a ni. Hmân lai Israel rama rawngbâwl, Kora fate entawn tûr siam hi han ngaihtuah teh. Anni chuan Jerusalem leh a biakna hmun chu an ngainain, a khawpui chanchin sawi chu nuam an ti a. An rilru latu ber chu a lungte leh a chârnate ni lovin, khawpui leh biak inin a entîr zâwk chu a ni. Jerusalem chu biakna thianghlim hmunpui a nih avângin, Jehova “Lal ropui tak khawpui,” a ni. Chutah chuan Jehova Dân zirtîr a ni a. Jerusalem Lal ropui tak rorêlna hnuaia awm mipuite chungah chuan a ni, Jehova’n a ngilneihna a lantîr ni. (Sâm 48:1, 2, 9, 12, 13 chhiar rawh.) Kora fate angin, Jehova inawpna pâwl lei lam pêng chanchin zir leh sawi chhuah chu i châk ve em? Pathian inawpna pâwl chanchin leh Jehova’n a mite a ṭanpui dân i zir tam poh leh Pathian Ram chu i tân a tak lehzual ang a. Ram chanchin ṭha hrilh i châkna pawh a lo pung lehzual ang.—Jer. 9:24; Lk. 4:43.
6. Engvângin nge Jehova’n Lalram dân leh thu bulte kan hriat leh kan zawm a phût chu thil âwm a nih?
6 A dânte hriat a ngai. Mihring sawrkârte chuan an khua leh tuite chu ram dânte an hriat a, an zawm an phût a. Chutiang a nih chuan, Jehova’n Lalram khua leh tui zawng zawng hnêna a dânte leh a thu bulte an hriat a, an zawm a phût chu thil âwm tak a ni. (Is. 2:3; Joh. 15:10; 1 Joh. 5:3) Mihring dânte chu a ṭha famkim lo ṭhînin, a dik hlel mai thei a. Chu mi nêna inkalh takin, Jehova “dân chu a ṭha famkim.” (Sâm 19:7) Pathian dân chu kan ngainain, nî tin a Thu kan chhiar ziah em? (Sâm 1:1, 2) Pathian dân kan hriat theih dân awmchhun chu mahni ngeia zir hi a ni. Tumahin kan tân an ti thei lo.
LALRAM KUA LEH TUITE CHUAN PATHIAN TEHNATE AN NGAINA
7. Lalram khua leh tuite chu eng tehna sâng tak milin nge an nun?
7 Lalram khua leh tui ni reng tûr chuan Pathian tehnate kan hriat mai ni lovin, kan ngainat pawh a ngai a. Mihring sawrkâr khua leh tui tam tak chuan an awmna ram dân leh tehnate chu an pawm thu an sawi a. Mahse, thil phût engemaw chu zawm buaithlâk an tih a, tumahin an hmu lo nia an hriat bawk chuan dân chu an bawhchhe mai ṭhîn a ni. A tlângpui thuin chûng mite chu “mihring tilâwmtute” an ni. (Kol. 3:22) Lalram khua leh tuite chu tehna sâng tak milin an nung a. Mi dangin min hmuh loh hunah pawh Pathian dân chu lâwm takin kan zâwm a ni. Engvângin nge? Dân Zamtu chu kan hmangaih avângin.—Is. 33:22; Luka 10:27 chhiar rawh.
8, 9. Engtin nge Pathian dânte i ngaina tak zet tih i hriat theih ang?
8 Engtin nge Pathian dânte chu i ngaina tak zet tih i hriat theih ang? Mi mal duh thlanna anga i ngaih—entîr nân, silhfên leh incheina chungchânga zilhna i dawn huna i chhân lêt dân chu bih chiang ang che. Lalram khua leh tui i nih hma chuan duhdah tak emaw, mipat hmeichhiatna lama mi hîp thei emaw ang chia inthuam chu i thlang mai thei a. Pathian i hmangaihna a lo pun zêl hian, amah chawimawi zâwnga inthuam chu i zir a ni. (1 Tim. 2:9, 10; 1 Pet. 3:3, 4) Tûnah chuan inchawih tâwk takin i inthuam niin i ngai mai thei. Mahse, i inthuam dân chuan kohhran chhûnga thuchhuahtu engemaw zât a tilungni lo hle tih upa pakhatin hrilh ta che se, engtin nge ni ang? Engtin nge i chhân lêt ang? Thiam thu i sawiin, i thinrim dâwn nge ni a, luhlul i chhuah dâwn? Pathian Ram dân bul ber chu a khua leh tui zawng zawngin Krista an entawn hi a ni a. (1 Pet. 2:21) Isua entawn tûr siam chungchângah, tirhkoh Paula chuan: “Mahni vêngte tihsâwt nân an ṭhatna tûrin tihlâwm i tum ṭheuh ang u; Krista pawh chuan mahni lâwmna a zawng si lo,” tiin a ziak a ni. (Rom 15:2, 3) Kohhran chhûnga remna a awm theih nân, Kristian puitling chuan mi dangte chhia leh ṭha hriatna khawih buai thei thiltih pumpelh chu a duh ngei ang.—Rom 14:19-21.
9 Thil pawimawh tak dang pahnih i lo ngaihtuah leh ang u: mipat hmeichhiatna chungchânga kan rilru put hmang leh inneihna kan thlîr dân chu. Pathian Ram khua leh tui la ni lote chuan mawngkawhurna chu an pawm zamin, saruak lem leh thuziakte chu intihhlimna hlauhawm lo ang leh uirêna leh inṭhenna chu mi mal duhthlanna liau liau niin an ngai thei a. Lalram khua leh tuite chuan chutiang dâwn tawina leh mahni hmasialna rilru put hmang chu an kalsan tawh a ni. Kristian tam tak chu tûn hma chuan nungchang ṭha lote ni mah se, tûnah chuan mipat hmeichhiatna leh inneihna chu Pathian thilthlâwnpêk angin an thlîr tawh a. Jehova tehna sângte chu an hlut a, nungchang bawlhhlawhnaa inhmang rengte chu Lalram khua leh tui ni tlâk an ni lo tih an pawm thlap a ni. (1 Kor. 6:9-11) Chutih rual chuan, thinlung hi bumhmang ber a ni tih pawh an hre bawk. (Jer. 17:9) Chuvângin, nungchang tehna sâng vuan reng tûra ṭanpuitu vaukhânna engemaw bîk tak dawn chu an ngaihlu a ni.
LALRAM KHUA LEH TUITE CHUAN VAUKHANNATE AN NGAIHLU
10, 11. Pathian Ram chuan a hun taka vaukhânna eng nge a pêk chhuah a, chutiang vaukhânna chungchâng chu engtin nge i ngaih?
10 Mihring sawrkârte chuan ei in leh damdawi chungchângah vaukhânna an pe mai thei a. Ei in leh damdawi zawng zawng chu a ṭha lo vek lo ngei mai. Mahse, thil siam chhuah engemaw bîk tak chu ei atân a him loh chuan, sawrkâr chuan a khua leh tuite vênhim nân vaukhânna inbûk tâwk tak a tichhuak pawh a ni thei. Sawrkâr chuan chutianga a tih loh chuan, ngaihthahna avângin thiam loh a chang thei a ni. Chutiang bawkin, Pathian Ram chuan nungchang leh thlarau lama hlauhawm awm thei chungchângah a hun taka vaukhânna a pe chhuak a. Entîr nân, Internet chu inbiak pawhna te, zirna te, leh intihhlimnate petu thil ṭangkai tak a ni a. Pathian inawpna pâwl chuan Internet chu a hmang ṭangkaiin, thil ṭha tam tak a thawh chhuah theih phah a ni. Mahse, Internet-a site tam tak chu nungchang lam leh thlarau lam tân a hlauhawm a. Saruak lem leh thuziakte theh lârtu Web site-te chuan Lalram khua leh tuite thlarau lama an hrisêlna chu dinhmun hlauhawmah a dah chiang hle a ni. Bâwih rinawm pâwl chuan chutiang site-te laka vaukhânna chu kum sâwmbi têl min pe chhuak tawh a. Chûng vaukhânnate avâng chuan kan va lâwm tak êm!
11 Tûn hnai kumte aṭang khân, site dang—fîmkhur taka hman chuan ṭangkai êm êm si—chu a lo lâr chho va. Mahse, social network Web site tia hriat hêng site-te hi mi tichhe thei tak a ni bawk. Mi chu ṭhian sual a kawmtîr thei a ni. (1 Kor. 15:33) Chuvângin, Pathian inawpna pâwl chuan chûng site-te hman chungchânga vaukhânna inbûk tâwk tak a pe chhuak pawh hi thil mak a ni lo. Social network site-te hman chungchânga tûn hnaia bâwih rinawm tihchhuah thuziakte chu i chhiar kim vek em? Chûng thuziakte chhiar lova chutiang site-te hman chu a va âtthlâk dâwn êm! * Chu chu damdawi chak tak, a bûra vuakhânna chuangte chhiar si lova ei mai ang a ni ang.
12. Engvângin nge vaukhânna ngaihthah chu a âtthlâk?
12 Bâwih rinawm pâwl pêk chhuah vaukhânna ngaihthahtute chuan anmahni leh an hmangaihte tân matheilovin chhiatna an thlen a. Ṭhenkhat chuan saruak lem leh thuziakte en ngawl an vei emaw, nungchang ṭhat lohnaah an inhmang emaw a, an thiltih chu Jehova’n hmu thei lo nia ngaiin mahni an inbum a ni. Kan thiltihte Jehova laka thup theih nia rin chu a va âtthlâk tak êm! (Thuf. 15:3; Hebrai 4:13 chhiar rawh.) Pathian chuan chutiang mite chu a ṭanpui duh a, anmahni ṭanpui tûrin lei lama a aiawhtute chu a chêttîr a ni. (Gal. 6:1) Mahse, mihring sawrkârte chuan thil sual engemaw titu chu khua leh tui nihna an hlihsak theih angin, Jehova chuan inchhîrna nei miah lova a tehna bawhchhetute chu an khua leh tui nihna a hlihsak ang. * (1 Kor. 5:11-13) Mahse, ani chuan ngil a nei a. Inchhîr a, an nungchang thlâkthlengtute chuan A hmaah dinhmun ṭha an nei lêt leh theiin, Lalram khua leh tui an nih zawm leh thei a ni. (2 Kor. 2:5-8) Chutianga hmangaihna ngah tak Lal rawng bâwl chu chawimawina a va ni êm!
LALRAM KHUA LEH TUITE CHUAN ZIRTIRNA AN NGAIHLU
13. Engtin nge Lalram khua leh tuite chuan zirtîrna an dawnte an hlut tih an târ lan?
13 Mihring sawrkâr tam tak chu an khua leh tuite zirtîrna pe tûrin an thawkrim a. Ziak leh chhiar thiamna leh kut themthiamna ṭangkai tak tak petu school-te an din a ni. Chûng zirna school-te a awm avângin Lalram khua leh tuite chu an lâwm a, ziak leh chhiar te, leh mahni inchawm nâna an mawmawh kut themthiamnate chu taima takin an zir a ni. Anni chuan Pathian Ram khua leh tuite an nih anga zirtîrna an dawnte chu an ngaihlu lehzual a ni. Kristian kohhran kal tlangin, Jehova chuan ziak leh chhiar thiamna chu a chawi lâr a. Nu leh pate chu an fate hnêna Ka Bible Thawnthu Lehkhabu chhiarsak ṭhîn tûra fuih an ni. Thla tinin, Bâwih rinawm fing chuan Bible ṭanchhan thu leh hlate a tichhuak a. Nî tina phêk khat emaw, phêk hnih emaw i chhiar ziah chuan, Jehova min pêk zirtîrna chu i hlâwkpui zawm zêl thei ang.
14. (a) Eng zirtîrna nge kan dawn? (b) Chhûngkuaa Pathian Biakna neih zân atâna rawtna engte nge i hman theih?
14 Chawlhkâr tinin, Lalram khua leh tuite chuan an kohhran inkhâwmah zirtîrna an dawng a. Entîr nân, Theocratic Rawngbâwlna School chuan zirlaite chu Pathian Thu zirtîrtu thiam tak ni tûrin kum sawmruk chuang lai chu a ṭanpui tawh a ni. He school-ah hian i inziak lût tawh em? Tûn hnai mai kum aṭang khân bâwih rinawm chuan chawlhkâr tina Chhûngkuaa Pathian Biakna neih zân chu a sawi uar hle a. He ruahmanna hian chhûngkuate chu a inpumkhattîr a ni. Kan thu leh hla chhuaha rawtna pêkte chu i hmang thei em? *
15. Chanvo kan neih zînga ropui ber pakhat chu eng nge ni?
15 Mihring sawrkâr khua leh tuite chuan political party chu in tina kal hialin, vântlâng hmaah an thlâwp a. Chu aia nasa zâwkin, Lalram khua leh tuite chuan Pathian Ram chu kawtthlêrah leh in tinah nasa takin an thlâwp a ni. Thuziak hmasaa târ lan tawh angin, Jehova Lalram puangchhuaktu, Vênnainsâng magazine chu tûnah chuan khawvêla thu leh hla sem chhuah tam ber a ni tawh a ni! Chanvo kan neih zînga ropui ber pakhat chu mi dangte hnêna Pathian Ram chanchin hrilh hi a ni a. Thu hrilh rawngbâwlnaah chuan thatho takin i tel ve em?—Mt. 28:19, 20.
16. Engtin nge Pathian Ram khua leh tui ṭha i nihzia i târ lan theih ang?
16 Nakin lawkah chuan Pathian ram chu leilung chunga rorêltu sawrkâr awmchhun a rawn ni thuai ang a. Chu chuan thlarau lam thil chauh ni lovin, khawtlâng lam thil pawh tiamin nî tin nun kawng engkim a rawn enkawl ang. Chutih hunah chuan Pathian Ram khua leh tui ṭha i ni ang em? I ni ang tih târ lan hun chu tûn hi a ni. Nî tina i thutlûkna siam zawng zawngah Jehova ropuina tûr hlîrin thil ti la, Lalram khua leh tui ṭha anga i nunzia i târ lang ang.—1 Kor. 10:31. (w12-E 08/15)
[Footnote-te]
^ par. 11 Entîr nân, Awake! July 2011, phêk 24-27; August 2011, phêk 10-13; leh February 2012, phêk 3-9 chu en rawh.
^ par. 12 Vênnainsâng (English) March 15, 2012, phêk 30-31 en rawh.
^ par. 14 Kan Lalram Rawngbâwlna, January 2011, phêk 3-6-na en rawh.
[Zirlai Atâna Zawhnate]
[Phêk 21-naa thu lâk chhuah]
Internet chungchânga Bible ṭanchhan vaukhânnate chu i zâwm em?
[Phêk 19-naa milem]
Kora fapate angin, biakna dik chu i ngainain, a chanchin sawi chu nuam i ti em?
[Phêk 22-naa milem]
Chhûngkuaa Pathian Biakna neih zân chuan nangmah leh i hmangaihte chu Lalram khua leh tui ṭha ni tûrin a ṭanpui thei che u
