Thilmak-Lo Thleng Thuai Tûrte

MI ZAI thiam doctor pakhat chuan vawikhat mah a la tih ngai loh chiin a zai dâwn che tih hre ta la, engtin nge i awm ang? I ngaih a ṭha lo hle ngei ang. Kawng leh lamah chuan, doctor chu mi zai thiam berte zînga pakhat a ni tih leh a zai dân tûr ang che chuan hlawhtling takin mi a za têl a lo zai tawh tih hre ta la, engtin nge ni ang? A ṭanpui thei ang che tih i ring lehzual dâwn lâwm ni?

Pathian Jehova chu doctor mi zai thiam tak ang chu a ni a, khawvêl hi zai nghâl ngai dam lo ang chu a ni. Pathian chuan a Thu, Bible hmangin he leia Paradise a din leh tûr thu min tiam a. (2 Petera 3:13) Mahse, chutiang thil a thlen theih nân chuan suahsualna tihbo vek phawt a ngai dâwn a ni. (Sâm 37:9-11; Thufingte 2:21, 22) Paradise din leh a nih hma chuan tûna dinhmun lungchhiatthlâk kan hmuh zawng zawngte hi tihbo vek phawt tûr a ni a. Chutiang thil thleng thei tûr chuan thilmak tihna a thlen a ngai dâwn a ni!—Thu Puan 21:4, 5.

Jehova Thuhretute chuan chûng inthlâkthlengna nasa takte chu a thleng thuai dâwn tih an ring a ni. Engvângin nge? Pathian Jehova thilmak tih tawh zawng zawngte chuan a thutiam a hlen theihzia a finfiah avângin. Bible-a thilmak tih chhinchhiahte zînga paruk chauh leh nakin hun atâna a thu tiamte hi khaikhin ang che.

Kan nakin hun atâna Bible thutiamte chungchâng chu zir belh ang che. I rinna a lo ngheh chhoh chuan, i beiseina—Jehova thilmak tihte i hlâwkpui theihna huna nun i inbeiseina—pawh a nghet ve zêl ang. (w12-E 08/01)

 [Phêk 7-naa bâwm/milem]

THILMAK TIH:

ISUA CHUAN CHHANGPER LEH SANGHA TLEM TEIN MI SANG TAM TAK A HRAI.—MATTHAIA 14:13-21; MARKA 8:1-9; JOHANA 6:1-14.

THUTIAM:

“Lei hian a thil ṭo chu a pe a: Pathian, keimahni Pathian ngei chuan, mal min sâwm ang.” —SAM 67:6.

KAN TANA AWMZIA A NEIH CHU:

TUMAH AN ṬAM LEH NGAI TAWH LO VANG.

THILMAK TIH:

ISUA CHUAN MITDEL MIT A TIVAR.—MATTHAIA 9:27-31; MARKA 8:22-26.

THUTIAM:

“Mitdelte mit chu tihmenin a awm ang.” —ISAIA 35:5.

KAN TANA AWMZIA A NEIH CHU:

MITDEL ZAWNG ZAWNG MIT TIHVAR A NI ANG.

THILMAK TIH:

ISUA CHUAN PIANGSUALTE A TIDAM.—MATTHAIA 11:5, 6; JOHANA 5:3-9.

THUTIAM:

“Ke baite chu sakhi angin an zuang ang.” —ISAIA 35:6.

KAN TANA AWMZIA A NEIH CHU:

PIANGSUALNA ZAWNG ZAWNG TIHDAM A NI ANG.

THILMAK TIH:

ISUA CHUAN NATNA CHI HRANG HRANG A TIDAM.—MARKA 1:32-34; LUKA 4:40.

THUTIAM:

“Chu mi khuaa awm chuan ‘Ka dam lo ve,’ a ti lo vang.”—ISAIA 33:24.

KAN TANA AWMZIA A NEIH CHU:

NATNA ZAWNG ZAWNG TIHDAM A NI ANG A. HRISELNA ṬHA FAMKIM KAN NEI ANG.

THILMAK TIH:

ISUA CHUAN LEILUNG CHAKNA A THUNUN.—MATTHAIA 8:23-27; LUKA 8:22-25.

THUTIAM:

“Inte an sa ang a, chûngah chuan an awm reng bawk ang; grêp huante an siam ang a, a rah an ei bawk ang. Athlâwnin an thawk rim lo vang.” —ISAIA 65:21, 23.

“Hnehchhiahna ata hla takah i awm ang a, i hlau dâwn lo a ni; thil râpthlâk ata hla takah i awm bawk ang a, a hnaih dâwn lo che a ni.”—ISAIA 54:14.

KAN TANA AWMZIA A NEIH CHU:

LEILUNG CHHIATNA A AWM TAWH LO VANG.

THILMAK TIH:

ISUA CHUAN MITTHITE A KAITHO.—MATTHAIA 9:18-26; LUKA 7:11-17.

THUTIAM:

‘Thlâna awm zawng zawng . . . an chhuak vek ang.”—JOHANA 5:28.

“Tuifinriat chuan a chhûnga mitthi awmte chu a chhuahtîr a, Thihna leh Mitthi khua chuan an chhûnga mitthi awmte chu an chhuahtîr bawk.” —THU PUAN 20:13.

KAN TANA AWMZIA A NEIH CHU:

KAN HMANGAIH THI TAWHTE CHU KAIHTHAWHLEH AN NI ANG.