Hmeichhiate Tawh Ṭhin Harsatna

“Hmeichhiate cheibâwl an nih dân ka hmuh hian, puitlin chhoh hi ka hreh hle.” —ZAHRA-I, KUM 15 MI THUSAWI, French magazine GEO târ lan dân.

HE HMEICHHE tleirâwl ṭawngkam hian thil awm dân dik, lungchhiat thlâk tak—khawvêl pumah hian, tharum thawhna leh inthliarnate hian nutlingte leh hmeichhe naupangte nun pum pui a nghawng a ni tih—chu a târ lang a ni. Hêng a taka thilthlengte hi han ngaihtuah teh:

● Mipa leh hmeichhia nihna avânga inthliarna. Asia khawmualpuiah chuan, nu leh pa a tam zâwk chuan hmeichhia aiin mipa an duh zâwk a. Kum 2011-a UN report-in a târ lan dânin chu khawmualpuiah chuan hmeichhia maktaduai 134 dâwn lai chu nuin a pai laia an tihtlâk vâng te, an nausên laia tihhlum an nih vâng te, leh hlamchhiah an nihavângtein an boral a ni.

● Zirna lamah. Khawvêl pumah hian, school kal lo hul hual emaw, kum li aia tlêm chauh kal emawte hmun thuma ṭhena hmun hnih chu hmeichhia an ni.

● Mipat hmeichhiatna lama zar buaina. Hmeichhia tlûklehdingâwn 2.6 chuangte chu pasalte’n an nupuite duh lo chung an mutpui hi dân bawhchhiatna anga ngaih lohna ramahte an chêng a ni.

● Hrisêlna. Ram ṭhang lai mêkahte chuan minute hnih dan zêlah hmeichhe pakhat chu a raipuar lai emaw, a nau hrin lai emawin a thi a. Hei hi damdawi lama enkawlna mumal an dawn loh vâng a ni.

● In leh lo neih theihna. Khawvêla thlai thar chhuah zâtve aia tam hi hmeichhiate thawh chhuah ni mah se, ram tam takah chuan, hmeichhiate’n mahni hminga in leh lo an neih leh an rochun chu phal a ni lo.

Engvângin nge hmeichhiate hi chutianga cheibâwl an nih? Sakhaw ṭhenkhat chuan hmeichhiate tihduhdah leh an chunga kutthlâkna a awmtîrin, thiam a chantîr hial a; chutiang sakhaw thurin leh chîn dân chu hnam dân ṭhenkhat chuan an chhawm a ni. French nî tin chanchinbu chuan India mi, dân lama mi thiam Chandra Rami Chopra thusawi chu heti hian a chhuah a ni: “Sakhaw dân zawng zawng hian inanna engemaw an nei: Hmeichhiate chunga thleibîkna neih a thlâwp a ni,” tiin.

Chu ngaih dân chu i thlâwp em? Bible hian sakhaw lehkhabu dang tam takte angin hmeichhiate a rah beh ve i ring em? Mi ṭhenkhat tân chuan Bible châng ṭhenkhat chu hmeichhiate rah behna niin a lang mai thei. Mahse, Bible ziaktu Pathianin hmeichhiate a thlîr dân dik tak chu eng nge ni? Mi tam takin ngaih dân vawn ngheh engpawh nei se, Bible sawi dân ngun tak leh dik taka zirna chuan a chhânna hmu chhuak tûrin min ṭanpui ang. (w12-E 09/01)

[Phêk 3-naa milem hawhtîrtu]

© G.M.B. Akash/Panos Pictures