Pathian Enkawlna Hnuaia Zahna leh Zahawmna

ISUA’N leia a awm lai khân a Pa vâna mi mizia leh thiltih dân chu famkim takin a lantîr a. Heti hian a sawi a ni: ‘Keiin mahni thuin thil engmah ka ti lo va, Pain mi hrilh ang zêlin . . . ka sawi zâwk a . . . a thil lâwmzâwng apiang ka ti fo ṭhîn,’ tiin. (Johana 8:28, 29; Kolossa 1:15) Chuvângin, Isua’n hmeichhiate a biak dân leh an chunga a rilru put dân ngaihtuahna aṭangin Pathianin hmeichhiate a thlir dân leh an tâna a thil beiseite kan hre thei a ni.

Chanchin Ṭha ziaka chhinchhiahte aṭanga an hmuh dânin, mi thiam tam tak chuan Isua’n hmeichhiate a thlîr dân chu a hun laia mipui thlîr dân siam ṭhat duhna neite ang mai a ni tih an pawm a ni. Engtin nge chutiang chu a nih? Chu aia pawimawh zâwk chu, a zirtîrna chuan tûn thleng hian hmeichhiate chhuah zalên theihna a la nei zêl em? tih hi a ni.

Isua’n Hmeichhiate A Cheibâwl Dân

▪ Isua chuan hmeichhiate chu mipat hmeichhiatna hmanrua ang lekah a ngai lo. Juda sakhaw hruaitu ṭhenkhat chuan hmeichhiate hnaihnain hurnaah bâk min hruai lo tih ngaih dân an nei a. Hmeichhiate chu thlêmna thlentu anga ngaih an nih avângin vântlâng hmaa mipa an biak emaw, hmai khuh lova khaw laia an kal chhuah emaw chu phal a ni lo. Isua erawh chuan mipate chu an tisa châkna thunun tûr leh hmeichhiate biak loh ai chuan zahawm taka anmahni cheibâwl tûrin a fuih zâwk a ni.—Matthaia 5:28.

Isua chuan: “Tupawh a nupui maa mi dang nei apiang chuan a nupui chu a uirêsan a ni,” tiin a sawi bawk a. (Marka 10:10-12) Chutiang chuan, rabbi-ho zirtîrna lâr tak, mipain “eng vâng pawhin” an nupui mâk a thiang tih chu a hnâwl ṭhak a ni. (Matthaia 19:3, 9) A nupui a uirêsan tih ngaih dân chu Juda a tam zâwkte tân chuan thil thar a ni a. An zirtîrtute chuan mipa tân nupuite uirêsan theih a ni lo va, hmeichhiate chauh hi rinawm lo thei an ni tih an zirtîr tlat a ni. Bible hrilhfiahna pakhatin a sawi dânin, “Isua chuan pasalte pawh nungchang lama an nupuite mawhphurhna ang bawk phurhtîrin, hmeichhiate dinhmun leh zahawmna a chawisâng a ni,” a ti.

A zirtîrnain tûn laia nghawng a neih dân: Jehova Thuhretute inkhâwmnaah chuan hmeichhiate chu mipate nên zalên takin an inkâwm a. Mahse, Kristian mipate chuan ‘pitar deuhte chu nu ang leh nula deuhte chu thianghlim takin farnu anga’ cheibâwl tûra an fîmkhur hle avângin, ngaih châka melh leh a lutuka inhnaih palh chu an hlauh a ngai lo a ni.—1 Timothea 5:2.

▪ Isua chuan hun pein hmeichhiate a zirtîr. Hmeichhiate engmah hre lova dahtu Rabbi-hote thlîr dân nêna inkalh takin, Isua chuan hmeichhiate chu thu a zirtîrin, an ngaih dânte sawi chhuak tûrin a fuih a. Mari chu a zirtîrna ṭha tak ngaihthlâktîrin, Isua chuan hmeichhiate chu chokâ ringawta awm tûr an nih lohzia a târ lang a ni. (Luka 10:38-42) Mari unaunu Marthi pawhin Isua zirtîrna a hlâwkpui tih chu Lazara a thih hnua Isua a chhân thiamzia aṭang khân kan hre thei a ni.—Johana 11:21-27.

Isua chuan hmeichhiate ngaihtuahna chu a ngai pawimawh hle a. Chutih hun lai chuan, Juda hmeichhe tam zâwk chuan fapa chhuanawm, a theih phawt chuan zâwlnei lo la ni tûr  fapa neih chu hlimna thlentu tûr niin an hria a ni. Hmeichhe pakhatin: “I paina pum chu a hamṭha e,” tia a au chhuah khân, Isua chuan chu aia ṭha zâwk thil engemaw hrilh theihna hun remchâng chu a zawng a. (Luka 11:27, 28) Pathian thu zawm chu a pawimawh zâwkzia târ langin, Isua chuan chu nu hnênah chuan an hnam dânin hmeichhiate chanvo atâna a dah aia sâng zâwk chu a kawhhmuh a ni.—Johana 8:32.

A zirtîrnain tûn laia nghawng a neih dân: Kristian kohhrana zirtîrtute chuan kohhran inkhâwma hmeichhiate chhânna pêk chu an ngaihlu a. Hmeichhe tar tawhte chu a mi mal tân leh entawn tûr ṭha siamna hmanga “ṭha lam zirtîrtute” an nih avângin an zah hle a ni. (Tita 2:3-5) Tin, Pathian Ram chanchin ṭha vântlâng hmaa puan chhuahnaah pawh an rinchhan hle bawk.—Sâm 68:11; “Tirhkoh Paula’n Hmeichhiate Tân Thusawi A Khap Em?” tih bâwm chu en rawh.

▪ Isua chuan hmeichhiate a ngaihsak. Bible hun lai chuan, fanute chu fapate tluka ngaihhlut an ni ve lo va. Chu mi thlîr dân chungchângah chuan Talmud lehkhabu chuan: “Fapa neitute chu an eng a thâwl e, fanu neitute erawh chu an chung a pik e,” tiin a sawi a. Nu leh pa ṭhenkhat chuan fanu neih chu phurrit tak angin an ngai a ni—an pasal tûr an zawnsak a, an thuam leh ro chhawm tûr an pêk a ngai a, an upat hunah anmahni ṭanpuitu atân an rinchhan leh theih dâwn bawk si loh avângin.

Isua chuan hmeichhe naupang nunna chu mipa naupang nunna ang bawka a pawimawhzia a lantîr a—Nain khuaa hmeithai fapa a kaihthawh ang bawkin, Jaira fanu pawh a kaitho a ni. (Marka 5:35, 41, 42; Luka 7:11-15) “Kum sawm leh kum riat ramhuai man chak loh vei” hmeichhe pakhat a tihdam hnuah, Isua chuan Juda thuziaka lang ngai meuh lo ṭawngkam hmangin, “Abrahama fanu” tiin a ko a ni. (Luka 13:10-16) Chutiang zahna leh ngilneihna ṭawngkam chu hmangin Isua chuan chu nu chu mi dangte ang bawkin a ngai pawimawh a, a rinna nasa tak neih chu a hmu tih a târ lang a ni.—Luka 19:9; Galatia 3:7.

A zirtîrnain tûn laia nghawng a neih dân: Khawchhak thufing pakhat chuan: “Fanu enkawl chu ṭhenawmte huan tui pêksak ang a ni,” a ti a. Chutiang thlîr dânin thunun ahnêakin, hmangaihna nei Kristian pate chuan an fanute pawh tiamin, an fate zawng zawng chu ṭha takin an enkawl vek a. An fate zawng zawng chu zirna lam leh hrisêlna lamah ṭha takin an enkawl vek a ni.

▪ Isua chuan hmeichhiate a ring. Juda-te court-ah chuan hmeichhiate thusawi chu chhiahhlawhte thusawi tluk leka ngaih a ni a. Kum zabi khatnaa thilthleng chanchin ziaktu Josephus-a chuan heti hian thurâwn a pe a ni: “Hretu anga meichhiate thusawi rêng rêng chu pawm ni suh se, anni chu thil ngaizam mi leh ngaihtuah chiang lo mi an ni si a,” tiin.

Chu mi nêna inkalh takin, Isua chuan a thawhlehna chungchâng hretu atân hmeichhia a thlang a. (Matthaia 28:1, 8-10) Chûng  hmeichhe rinawmte chuan an Lalpa tihhlum a ni lai leh phûm a ni lai an hmu vek chung pawhin, tirhkohte chuan an thusawi chu âwih harsa an ti a ni. (Matthaia 27:55, 56, 61; Luka 24:10, 11) Mahse, hmeichhe hnêna inlan hmasain, tho leh Krista chuan hmeichhiate chu a zirtîr dangte ang bawka thuhretu ni tlâka a ngaihzia a târ lang a ni.—Tirhkohte 1:8, 14.

A zirtîrnain tûn laia nghawng a neih dân: Jehova Thuhretute kohhranah chuan, mawhphurhna chelhtu mipate chuan hmeichhiate thil thlîr dân ngaih pawimawhsakin anmahni an ngaihsakna an lantîr a. Kristian pasalte pawhin an nupuite thusawi ngun taka ngaihthlâksakin, an “chawimawi” a ni.—1 Petera 3:7; Genesis 21:12.

Bible Thu Bulte Chuan Hmeichhiate Hlimna A Belhchhah

Mipate’n Krista an entawn hian, hmeichhiate hnênah atîra Pathian ruahman ang taka zahna leh zalênna pêk a ni ṭhîn. (Genesis 1:27, 28) Mipa dah sân zâwkna ngaih dân thlâwp aiin, Kristian pasalte chu Bible thu bulte an inkaihhruaitîr a, chu chuan an kawppuite hlimna a belhchhah a ni.—Ephesi 5:28, 29.

Yelena-i’n Bible a zir ṭan lai chuan, a pasal tihduhdahna nasa tak chu a rûkin a tuar reng a. A pasal chu tharum thawh chînna hmun, nupui atâna an mi duhte tharum hmanga an rûk bo ṭhinna leh insawisakna lâr êm êmna hmuna seilian a ni a. Yelena-i chuan: “Bible aṭanga ka thil zirte chuan chakna min pe a. Min hmangaih êm êmtu leh min hlut a, min ngaihsaktu tuemaw a awm tih ka hria a ni. Chu bâkah, ka pasal pawhin Bible zir ve se chuan, ka chunga a rilru put hmang hi a thlâk thei ang tih ka hre bawk a ni,” tiin a sawi. A tâwpa a pasalin Bible a zir a, Jehova Thuhretute zînga pakhat anga baptisma a chan chuan a duhthusâm chu a thleng famkim ta a ni. Yelena-i chuan heti hian a sawi zawm a: “Ka pasal chu mahni inthunun theihna leh insûmtheihna kawngah entawn tûr ṭha tak a rawn ni chho ta a. Inngaihdam tawn dân kan zir ta a ni,” tiin. A thu tâwp siamna chu eng nge ni? “Bible dân bulte chuan kan inneihnaa mamawh nia inhriatna leh vênhim nia inhriatna nei tûrin min ṭanpui tak zet a ni,” tih hi a ni.—Kolossa 3:13, 18, 19.

Yelena-i chauh chu chutiang thiltawn nei a ni lo. Kristian hmeichhe tam takte chu an pasalte nêna Bible thu bulte nunpui an tum tlat avângin an hlim hle a. An Kristian unaute nêna an inkawmnaah pawh thlamuanna leh zalênna an neiin, zahna nêna cheibâwl an ni bawk a ni.—Johana 13:34, 35.

Famkim lo leh sualna nei an nih angin, Kristian mipa leh hmeichhiate chuan ‘thil lawilo thu thua awmtîr’ Pathian thil siamte zînga mi an ni tih an hria a. Mahse, hmangaihna nei an Pa, Jehova hnaihna hmangin, ‘chhiatna bâwih ata tihchhuaha awm a, Pathian fate zalênna ropuia luh’ theih beiseina an nei a ni. Pathian enkawlna hnuaia awm mipa leh hmeichhiate tâna beisei tûr ropui tak a va ni êm!—Rom 8:20, 21. (w12-E 09/01)

[Phêk 9-naa bâwm]

Tirhkoh Paula’n Hmeichhiate Tân Thusawi A Khap Em?

Tirhkoh Paula chuan: “Kohhranho inkhâwmnaah chuan hmeichheho chu ngawi rengin awm rawh se,” tiin a ziak a. (1 Korinth 14:34) Eng a tihna nge ni? Hmeichhiate finna a ngainêp tihna em ni? Ni lo ve. A nihna takah chuan, hmeichhiate zirtîrna ṭhate chu a sawi lang fo a ni. (2 Timothea 1:5; Tita 2:3-5) Korinth mite hnêna a lehkha thawnah Paula chuan hmeichhiate chauh ni lovin, ṭawng hriat loh leh hrilh lâwk theihna neite pawh an Kristian unau dangte an ṭawng lai chuan “ngawi mai” tûrin a fuih a ni. (1 Korinth 14:26-30, 33) Kristian hmeichhe ṭhenkhat chu an rinna chhar tharah an phûr êm avângin, chutih hun laia chîn dân angin, thusawitu thusawi lai lo pawtchatin, zawhna an lo zâwt ṭhîn a nih hmêl hle. Chutianga lo tihbuai chu pumpelh nân Paula chuan “in lamah mahni pasal zâwt” tûrin a fuih a ni.—1 Korinth 14:35.

[Phêk 10-naa milem]

Isua chuan a thawhleh thu a tirhkohte hnêna hrilh tûrin Mari Magdalini a thlang