Pathian Thu Aṭangin Inzir Rawh

Rorêlna Nî-ah Eng Nge Lo Thleng Ang?

He thuziak hian i lo ngaihtuah mai theih zawhnate zâwtin, i Bible-a a chhânna i hmuh theihna laite a târ lang a. Jehova Thuhretute chuan chûng chhânnate sawipui che chu an châk hle a ni.

1. Rorêlna Nî chu eng nge ni?

A ding lama milema târ lan ang hian, mi tam tak chuan Rorêlna Nî-ah chuan mi tam takte thlarau chu an dam laia an thiltih ang zêla ro rêlsak tûrin Pathian lalṭhutthlêng hmaa hruai an ni ang a, a ṭhen chu vâna kaitîr tûr an nih laiin, a ṭhen chu hremhmun meidîla nghaisak tûr an nih chu an ring a ni. Mahse, Bible chuan Rorêlna Nîin a tum ber chu rorêl dik lohna ata mite chhan chhuah a ni tih a târ lang. (Sâm 96:13) Pathian chuan mihringte chunga rorêlna dik tungding leh tûrin Isua chu Rorêltu atân a ruat a ni.—Isaia 11:1-5; Tirhkohte 17:31 chhiar rawh.

2. Engtin nge Rorêlna Nî chuan rorêl dikna a tun din leh ang?

Mipa hmasa ber Adam chuan duhthu rênga Pathian laka a hel khân, a thlah zawng zawngte chu sualna, hrehawm tawrhna, leh thihna bawiah a dah vek a. (Rom 5:12) Chu mi siam ṭha leh tûrin Isua chuan mitthi tawh tam takte chu a kaitho leh ang. Chu chu Isua Krista kum sâng rorêl chhûngin a thleng ang tih Thu Puan bu chuan a târ lang a ni.—Thu Puan 20:4, 11, 12 chhiar rawh.

Mitthi tho lehte chu an thih hmaa an thiltih azir ni lovin, Thu Puan bung 20-a târ lan “lehkhabutea” chuang an thiltih ang zêla an chung thu rêlsak an ni zâwk ang. (Rom 6:7) Chûng mitthi zîng ata lo tho va, Pathian chungchâng zir theihna hun remchâng nei tûrte zîngah chuan “mi felte leh fel lote” an tel ang tih tirhkoh Paula chuan a sawi a ni.—Tirhkohte 24:15 chhiar rawh.

 3. Rorêlna Nî chuan eng nge a hlen chhuah dâwn?

Pathian Jehova hre hman lo leh a rawng bâwl hman lova thite chuan inthlâk thleng a, thil ṭha tih theihna hun remchâng an nei ang a. Chutianga thil ṭha an tih chuan an thawhlehna chu ‘nunna changa’ thawhlehna a ni ang. Mahse, tho leh ṭhenkhatte chuan Jehova kawngte chu an zir duh chuang lo vang. Chûng mite thawhlehna chu “thiam loh chang” tûra thawhlehna a ni ang.—Johana 5:28, 29; Isaia 26:10; 65:20 chhiar rawh.

Kum sângkhat chhûng Rorêlna Nî a zawh dâwn lamah, Jehova chuan thu âwih mihringte chu atîra an ṭhat famkimna dinhmunah a hlâng kai leh ang. (1 Korinth 15:24-28) Thu âwih zawng zawngte tâna beisei tûr ropui chu a va ni êm! Tichuan, fiahna hnuhnûng ber atân Pathian chuan leilâwta kum sângkhat a lo phuar tawh Diabol-Setana chu a rawn chhuah ang a. Ani chuan mite chu Jehova hnên ata lâk pên a rawn tum leh ang a, chuta Setana lo hnâwltute chuan he leiah hian chatuanin nun an chên tawh ang.—Isaia 25:8; Thu Puan 20:7-9 chhiar rawh.

4. Rorêlna ni dang eng nge mihringte’n an hlâwkpui dâwn?

Bible chuan he khawvêl kalhmang rawn titâwptu tûr thilthleng chungchâng sawi nân ‘rorêlna nî’ tih thu mal chu a hmang bawk a. He rorêl nî hi Nova hun laia chhuan suaksual zawng zawngte tiboraltu Tuilêt ang khân a rawn thleng thut dâwn a ni. Hlimawm takin, “Pathian ngaihsak lo mite” tihboralna lo thleng mai tûr chuan ‘a chhûnga felna awm’ lei thar atân kawng a sial dâwn a ni.—2 Petera 3:6, 7, 13 chhiar rawh. (w12-E 09/01)

Hriat tam lehzual nân, Jehova Thuhretute tihchhuah Bible Zirtîrna Dik Tak Chu Eng Nge Ni? tih lehkhabu phêk 213-215-na hi en ang che.

[Phêk 16-naa milem]

“Rorêlna Hnuhnûng Ber,” by Gustave Doré, 1832-1883

[Milem Hawhtîrtu]

Engravings by Doré